ဒီစာမှာတော့ ငါတို့တက္ကသိုလ်ရဲ့ စာသင်ချိန်တွေအကြောင်း ပြောပြချင်တယ်။ မင်းအနေနဲ့ ဒီတက္ကသိုလ်ကို မရောက်သေးခင် ကြိုတင်သိရှိထားခြင်းအားဖြင့် လက်တွေ့ရင်ဆိုင် ဖြတ်သန်းရတဲ့အခါ ပိုမိုလွယ်ကူ အဆင်ပြေလိမ့်မယ်လို့ ငါယုံကြည်တဲ့အတွက် ပြောပြလိုခြင်း ဖြစ်တယ်။ ပထမဆုံး ပြောချင်တာတစ်ခုက သင်တန်းကာလ အသီးသီးအတွက် မင်းမှတ်ပုံတင်ထားတဲ့ ဘာသာရပ်တွေရဲ့ သက်ဆိုင်ရာ စာသင်ချိန်တွေ၊ မင်းရဲ့ကျမ်းကြီးကျပ်သူနဲ့ တွေ့ဆုံဆွေးနွေး တင်ပြဖို့အတွက် သီးသန့်ချိန်းဆိုထားတဲ့ အချိန်တွေကို မပျက်မကွက် တက်ရောက်ဖို့၊ တွေ့ဆုံဖို့ လိုအပ်တာကလွဲရင် ကျန်တဲ့အချိန် အားလုံးကို မင်းပိုင်တယ်။ ဘယ်အချိန် စာကြည့်ရမယ်၊ ဘယ်အချိန် အိပ်ရမယ်ဆိုပြီး ဘယ်သူကမျှ လိုက်ပြောနေမှာ မဟုတ်သလို၊ မင်းရဲ့ကိုယ်ပိုင်အချိန်တွေကို မင်းဘယ်လို အသုံးချနေသလဲ ဆိုပြီးတော့လည်း ဘယ်သူကမျှ အစီရင်ခံစာ တင်ခိုင်းနေမှာ မဟုတ်ဘူး။ ဒါတွေကို အထူးအဆန်းလုပ်ပြီး ပြောနေသေးတယ်လို့ မထင်စေချင်ဘူး။ မင်းဒီကိုရောက်လို့ အမြင်မတော်တာတွေကို မြင်တဲ့အခါ ငါအခုပြောနေတာတွေကို ကောင်းကောင်းကြီး နားလည်ပါလိမ့်မယ်။ သူများနိုင်ငံမှာ ပညာသင်ကြားဖို့ ရောက်လာတဲ့ ကျောင်းသားတွေဖြစ်ပါလျက် အတန်းချိန် မှန်မှန်မတက်၊ သင်ခန်းစာတွေလေ့လာဖို့၊ စာဖတ်ဖို့၊ အိမ်စာလုပ်ဖို့ လုံလောက်တဲ့အချိန် မပေးဘဲ အခြားသော ဝေလေလေ၊ ဗာဟီရ၊ အပျော်အပါး ကိစ္စရပ်တွေနဲ့ ကိုယ့်အသက်တွေကိုကိုယ် ဖြုန်းတီးနေတဲ့လူတွေကို မင်းမြင်တဲ့အခါ ငါအခုပြောနေတာတွေဟာ မလွန်ပါလားဆိုပြီး မင်းသိလာပါလိမ့်မယ်။ လိုရင်းကတော့ ဒီတက္ကသိုလ်မှာ ကောင်းသည်၊ ဆိုးသည် မှန်သမျှဟာ တစ်ဦးချင်းစီအပေါ်မှာသာ မူတည်တယ် ဆိုတာပါပဲ။ အရာရာမှာ တတ်သိနားလည်လွယ်တဲ့ မင်းအနေနဲ့ ငါပြောလိုတဲ့ အကြောင်းအရာကို ကောင်းကောင်းကြီး သဘောပေါက်တယ်ဆိုတာ ငါလုံးဝ သံသယမရှိဘူး။ မူလအကြောင်းအရာကို ဆက်ပြောကြရအောင်။ ငါတို့တက္ကသိုလ်ရဲ့ တစ်နေ့တာကာလ ပထမဆုံး စာသင်ချိန်တွေဟာ မနက် ၈ နာရီ ၅၀ မိနစ်မှာ စတင်တယ်။ သာမန်အားဖြင့် နောက်ဆုံးစာသင်ချိန်က ညနေ ၆ နာရီမှာ စတင်ပြီး ည ၇ နာရီ ၃၀ မိနစ်မှာ ပြီးဆုံးတယ်။ စာသင်ချိန် တစ်ချိန်စီဟာ မိနစ် ၉၀ ကြာမြင့်တယ်။ စာသင်ချိန် တစ်ခုနဲ့တစ်ခု အကြားမှာ ခေတ္တနားချိန် ၁၀ မိနစ်ရှိတယ်။ အကြမ်းဖျင်းအားဖြင့် တစ်ရက်မှာ သတ်မှတ်ထားတဲ့ စာသင်ချိန်ပေါင်း ၆ ချိန် ရှိတယ် (ပထမအချိန်ကနေ ဆဌမအချိန်အထိပေါ့ကွာ)။ မနက်ပိုင်း ၂ ချိန်နဲ့ နေ့လည်/ညနေပိုင်း ၄ ချိန် ဖြစ်တယ်။ ပုံမှန်အားဖြင့် တနင်္လာနေ့ကနေ သောကြာနေ့အတွင်းမှာ စာသင်ချိန်တွေ ရှိတတ်တယ်။ မင်းသာ သေသေချာချာ ဂရုစိုက်ပြီး ပြန်ဖတ်မယ်ဆိုရင် "အကြမ်းဖျင်းအားဖြင့်" တို့၊ "ပုံမှန်အားဖြင့်" တို့၊ "သာမန်အားဖြင့်" တို့ ဆိုတဲ့စကားလုံးတွေကို ငါသုံးထားတာ မြင်မှာအမှန်ပဲ။ ဘာကြောင့် အဲလိုတွေ ထည့်ပြောရသလဲဆိုတော့ ငါတို့ GSIR အတွက်တော့ တစ်ရက်ကို စာသင်ချိန် ၆ ခု၊ တစ်ပတ်ကို ၅ ရက်ဆိုတဲ့ ဘောင်ထဲကနေ မထွက်ပေမယ့် GSIM က ဘာသာရပ်အချို့ကတော့ စနေနေ့ သင်ကြားတာတို့၊ သတ္တမအချိန်မှာ တက်ရတာတို့ ရှိတတ်လို့ဖြစ်တယ်။ သတ္တမအချိန်ဟာ ည ၇ နာရီ ၄၀ မိနစ်ကနေ ၉ နာရီ ၁၀ မိနစ်အထိပေါ့ကွာ။ ဆက်ပြောရရင် အမှတ် ၂ မှတ် (2 credits) ပေးတဲ့ ဘာသာရပ်အများစုဟာ တစ်ပတ်ကို စာသင်ချိန် ၂ ချိန်စီ တက်ရောက်ရလေ့ရှိတယ်။ စာသင်ချိန် တစ်ချိန်စီပဲ တက်ရောက်ရတဲ့ ဘာသာရပ်တွေလည်း ရှိတတ်ကြတယ်။ အဲဒီလို ဘာသာရပ်အများစုက အမှတ် ၁ မှတ် (1 credit) သို့မဟုတ် ၀.၅ မှတ် (0.5 credit) ပဲ ပေးလေ့ရှိတဲ့ဟာတွေ ဖြစ်တတ်ကြတယ်။ မင်းအနေနဲ့ တစ်ပတ်ကို စာသင်ချိန် ၂ ချိန်တက်ဖို့လိုပြီး အမှတ် ၂ မှတ်ပေးတဲ့ ဘာသာရပ် ၅ ခုကို မှတ်ပုံတင်ခဲ့တယ်ဆိုပါတော့။ အဲဒီသင်တန်းကာလရဲ့ ရက်သတ္တပတ်တိုင်းမှာ မင်းတက်ရမယ့် စာသင်ချိန်ပေါင်း ၁၀ ချိန် (၉၀၀ မိနစ်) ရှိမှာဖြစ်တယ်။ ဒီနေရာမှာ နောက်ထပ် ပြောချင်တာတစ်ခုက တစ်ခါတလေမှာ ပါမောက္ခတွေအနေနဲ့ အခြားနိုင်ငံ၊ အခြားတက္ကသိုလ်တွေကို ဟောပြောပွဲ သို့မဟုတ် အကြောင်းကိစ္စရပ် တစ်ခုခုကြောင့် မဖြစ်မနေ သွားရောက်ရတဲ့အခါ၊ ဒါမှမဟုတ် ရှောင်လွှဲမရတဲ့ ကိုယ်ရေးကိုယ်တာ ကိစ္စရပ်တွေကြောင့် စာသင်ချိန်တွေ ပျက်ကွက်တတ်တယ်။ အဲဒီအတွက် အစားပြန်သင်ပေးတဲ့ စာသင်ချိန် (make-up class) တွေ ပြုလုပ်တတ်တယ်။ အဲဒီလို အတန်းချိန်တွေကိုတော့ သတ်မှတ်ထားတဲ့ စာသင်ချိန်တွေအတိုင်း မဟုတ်ဘဲ ဆရာနဲ့ကျောင်းသား နှစ်ဦးနှစ်ဖက်လုံး အဆင်ပြေစေမယ့် အချိန်တစ်ခုခုကို ရွေးချယ်သတ်မှတ်ကြလေ့ရှိတယ်။ ဆရာတွေရော၊ ကျောင်းသားတွေရော အနေနဲ့ တစ်ပတ်တာလုံး သက်ဆိုင်ရာ အချိန်ဇယားတွေနဲ့ မအားလပ်အောင် ဖြစ်နေတတ်ကြတာကိုး။ ငါ့စကားကို ပြန်ဆက်ရရင် မင်းအနေနဲ့ သင်တန်းကာလ တစ်ခုစီအတွက် မှတ်ပုံတင်ထားတဲ့ ဘာသာရပ်တွေရဲ့ စာသင်ချိန်တွေအတိုင်း လိုက်လံတက်ရောက်ရမှာဖြစ်တယ်။ အွန်လိုင်းကနေ မှတ်ပုံတင်စဉ်ကတည်းက ဘယ်ဘာသာရပ်ဟာ ဘယ်နေ့ ဘယ်အချိန်မှာ သင်ကြားမှာဖြစ်တဲ့အကြောင်း၊ အမှတ် ဘယ်နှမှတ် ပေးတဲ့ဘာသာရပ်ဖြစ်ကြောင်း၊ သင်ကြားမယ့်ဆရာက ဘယ်သူဖြစ်ကြောင်း မင်းအနေနဲ့ တစ်ခါတည်း သိခွင့်ရမှာဖြစ်တယ်။ ဒါ့အပြင် ဘာသာရပ်အသီးသီးရဲ့ သင်ရိုးမာတိကာ (Syllabus) တွေကိုလည်း မင်းအနေနဲ့ မှတ်ပုံမတင်ခင်ကတည်းက ကြိုတင်လေ့လာနိုင်တယ်။ အဲဒီသင်ရိုးမာတိကာထဲမှာ ရက်သတ္တပတ်အလိုက် သင်ကြားဆွေးနွေး ပို့ချပေးမယ့် အကြောင်းအရာတွေ၊ လေ့လာရမယ့် စာအုပ်စာတမ်းတွေ၊ ဘာသာရပ်ရဲ့ ဦးတည်ချက်တွေ၊ အမှတ်ပေးမယ့်ပုံစံတွေ၊ ပါမောက္ခဆရာရဲ့ သီးသန့်မှာလိုတဲ့ အကြောင်းအရာတွေကို ရှင်းလင်းရေးသားထားတယ်။ ပြောချင်တာတွေ များနေလေတော့ ငါ့စကားတွေက ဘေးကို ရောက်ရောက်သွားတယ်ကွာ။ အဲဒါကိုတော့ နားလည်ပေးပါ။ စာသင်ချိန်တွေအကြောင်း ပြန်ဆက်ရရင် မွန်းတည့် ၁၂ နာရီကနေ မွန်းလွဲ ၁ နာရီအထိ နေ့လည်စာစားချိန် ရပ်နားကြတယ်။ အဲဒီအချိန်မှာ ဒီတက္ကသိုလ်ရဲ့ ဘယ်ဌာနမျှ အလုပ်လုပ်မှာ မဟုတ်သလို၊ ဘယ်ပါမောက္ခကမျှလည်း တွေ့ဆုံဖို့ ချိန်းဆိုမှာ မဟုတ်ဘူး။ တစ်နေ့တာ အချိန်သတ်မှတ်ချက်တွေနဲ့ ပတ်သက်ပြီး မင်းအနေနဲ့ ရှင်းရှင်းလင်းလင်း မြင်သာအောင်လို့ ဇယားလေးတစ်ခုဆွဲပြီး ငါထည့်ပေးလိုက်တယ်။ အဲဒါကိုကြည့်လိုက်ရင် စာသင်ချိန် သတ်မှတ်ချက်တွေကို မင်းလုံးဝ သဘောပေါက်သွားလိမ့်မယ်။ ဒါ့အပြင် အပေါ်မှာ ငါပြောခဲ့သလို ဘာသာရပ်အလိုက် ဘယ်အချိန်တွေ သင်ကြားမယ်ဆိုတဲ့ အကြောင်းကိုလည်း မင်းအနေနဲ့ ကွက်ကွက်ကွင်းကွင်း မြင်စေချင်လို့ သင်တန်းကာလ တစ်ခုစီအတွက် မင်းမှတ်ပုံတင်တဲ့အခါ မြင်တွေ့ရမယ့် ပုံစံကို ရှင်းလင်းချက်တွေနဲ့အတူ နမူနာအဖြစ် တစ်ပါတည်း ထည့်ပေးလိုက်ပါတယ်။
( Ichiro Nyanmyokyaw @ IUJ )
No comments:
Post a Comment