အိုင်ယူဂျေမှ ရေးတဲ့စာ (၂)

သူငယ်ချင်း...၊
ဒီစာမှာတော့ ငါတို့တက္ကသိုလ်နဲ့ ပတ်သက်တဲ့ အကြောင်းအရာလေးတွေကို အနည်းငယ် ပြောပြချင်တယ်။ မင်းအနေနဲ့ ဒီတက္ကသိုလ်မှာ ပညာသင်ကြားဖို့ လာရမယ်လို့ သိရတဲ့အချိန်ကတည်းက Google Earth ကတစ်ဆင့် ကြည့်ရှုထားတဲ့အတွက် တောတောင်တွေအကြား၊ လယ်ကွင်းတွေအကြားမှာ တည်ရှိတယ်ဆိုတဲ့ ငါတို့တက္ကသိုလ်အကြောင်းကို သိရှိပြီး ဖြစ်လိမ့်မယ်ထင်ပါတယ်။ မြို့ပြယဉ်ကျေးမှုကို ခုံမင်ကြသူတွေအတွက် ငါတို့တက္ကသိုလ်ဟာ တောကြိုအုံကြားက ပျင်းရိငြီးငွေ့စရာ အကျဉ်းထောင်တစ်ခုပေါ့ကွာ။ ဒါပေမယ့် အဖိုးမဖြတ်နိုင်တဲ့ သဘာဝအလှတရားတွေကို နေ့စဉ်နေ့တိုင်း အခမဲ့ ကြည့်ရှုခံစားနိုင်တယ်ဆိုတဲ့ စိတ်ကလေးနဲ့ ကြည့်မယ်ဆိုရင်၊ ပျော်ဖို့ပါးဖို့နေရာ နည်းပါးတဲ့အတွက် သက်ဆိုင်ရာပညာရပ်တွေကို စိတ်နှစ်ပြီး ကြိုးစားအားထုတ်နိုင်တယ်ဆိုတဲ့ စိတ်ကလေးနဲ့ နေမယ်ဆိုရင် အင်မတန်မှ ကျေနပ်ပျော်ရွှင်စရာ ကောင်းလှတဲ့ နေရာတစ်ခုပါကွာ။ မင်းဟာ သစ်ပင်တောတောင်တွေ၊ သဘာဝအလှတရားတွေကို မြတ်နိုးတန်ဖိုးထားသူ ဖြစ်လေတော့ မင်းအတွက်တော့ စာသင်ရင်း နတ်ပြည်ရောက်ခွင့်ရသလို အဖြစ်မျိုးပါပဲလေ။ IUJ ကို ၁၉၈၀ ပြည့်နှစ်ဝန်းကျင်မှာ တည်ထောင်ခဲ့တာ ဖြစ်လေတော့ ငါတို့တွေနဲ့ အသက်အတူတူ ဖြစ်နေတာကလည်း ထူးခြားတဲ့ တိုက်ဆိုင်မှု တစ်ခုပါပဲလေ။ ပြောရမယ်ဆိုရင်တော့ ငါတို့တက္ကသိုလ်ဟာ ငါတို့လိုပဲ နုပျိုသစ်လွင်နေဆဲ၊ ကျန်းမာကြံ့ခိုင်နေဆဲပေါ့ကွာ။ ဒီတက္ကသိုလ်မှာ အဓိကဌာနကြီး ၂ ခုရှိတယ်ကွ။ တက္ကသိုလ်နဲ့အတူ ပေါက်ဖွားရှင်သန်လာတဲ့ သက်တမ်းအရင့်ဆုံး၊ စီနီယာအကျဆုံး ဘာသာရပ်ဆိုင်ရာ ဌာနကတော့ မင်းတက်ရောက်မယ့်၊ အခုလက်ရှိ ငါတက်ရောက်နေတဲ့ GSIR ပေါ့ကွာ။ နောက်တစ်ခုကတော့ GSIM ဖြစ်ပြီး အဲဒီဌာနကိုတော့ ငါတို့နိုင်ငံရဲ့ နိုင်ငံရေးသမိုင်းမှာ အဆိုးဝါးဆုံး အချိန်ကာလတစ်ခုလို့ ပြောနိုင်တဲ့ ၁၉၈၈ ခုနှစ်မှာ စတင်တည်ထောင်ခဲ့တယ်။ ဘယ်နှခုနှစ်မှာ စတင်တည်ထောင်ခဲ့တယ်လို့ ပြောလိုက်ရင် ရပေမယ့်လည်း မင်းအနေနဲ့ တစ်သက်လုံး အမှတ်ထင်ထင် ဖြစ်သွားစေချင်တဲ့အတွက် ငါတို့နိုင်ငံရဲ့ အဖြစ်အပျက်လေးနဲ့ ယှဉ်တွဲပြီး ပြောမိတာပါ။ GSIR ရဲ့အောက်မှာ IRP, IDP နဲ့ PMPP ဆိုပြီး ပရိုဂရမ် ၃ ခုရှိတယ်။ GSIM ရဲ့ အောက်မှာတော့ IMBA, E-Biz နဲ့ MBA ဆိုပြီး ပရိုဂရမ် ၃ ခုရှိတယ်။ ဒီတက္ကသိုလ်မှာ ပညာသင်ကြားနေတဲ့ ကျောင်းသားတွေကို အမျိုးအစား ခွဲခြားပြရမယ်ဆိုရင်တော့ Regular Student, Exchange Student နဲ့ Linkage Student ဆိုပြီး ၃ မျိုးရှိတယ်လို့ ပြောနိုင်တယ်။ မဟာဘွဲ့အတွက် ၂ နှစ်တာတက်ရောက်ရတဲ့ ငါတို့လို ပုံမှန်ကျောင်းသားတွေကို regular student လို့ ခေါ်ကြတယ်။ အခြားနိုင်ငံတွေရဲ့ တက္ကသိုလ်တွေကနေ အလဲအလှယ်ကျောင်းသားအဖြစ် လာတက်တဲ့ ကျောင်းသားတွေက Exchange Student ပေါ့ကွာ။ ဒီနေရာမှာ အချို့က One term တက်ကြတာဖြစ်ပြီး အချို့ကတော့ Two term တက်ရောက်ကြတယ်။ Term တစ်ခုဟာ ရက်သတ္တပတ် ၁၀ ပတ် ကြာမြင့်လေ့ရှိတယ်။ Linkage Student အဖြစ် လာတက်ကြတဲ့ ကျောင်းသားတွေကတော့ ထူးခြားတယ်။ ဘာကြောင့်လဲဆိုတော့ သူတို့အနေနဲ့ ပထမနှစ်ဘ၀ကို သူတို့နိုင်ငံတွေက တက္ကသိုလ်တွေမှာ တက်ရောက်ခဲ့ကြပြီး IUJ မှာ ဒုတိယနှစ် ကျောင်းသားတွေအဖြစ် တစ်နှစ်ပဲ လာတက်ကြတဲ့လူတွေ ဖြစ်ကြတယ်။ ပညာသင်နှစ် ပြီးဆုံးတဲ့အချိန်မှာတော့ သူတို့တွေဟာ IUJ က မဟာဘွဲ့တစ်ခု၊ သူတို့မိခင်နိုင်ငံက တက္ကသိုလ်က မဟာဘွဲ့တစ်ခု၊ စုစုပေါင်း မဟာဘွဲ့ ၂ ခုကို တစ်ပါတည်း ရကြတယ်။ ငါတို့တက္ကသိုလ်မှာ ကမ္ဘာတစ်ဝန်းမှာရှိတဲ့ နိုင်ငံပေါင်း ၄၀ ကျော်က လူမျိုးပေါင်းစုံ၊ ဘာသာပေါင်းစုံ တက်ရောက်သင်ကြားလျက် ရှိကြတယ်။ အာဆီယံထဲက စင်ကာပူ၊ မလေးရှားနဲ့ ဘရူနိုင်းကလွဲရင် ကျန်တဲ့နိုင်ငံ ၇ ခုက ကျောင်းသားတွေ လာရောက်ပညာသင်ကြားလျက်ရှိတယ်။ အာရှဒေသ၊ ဥရောပဒေသ၊ အာဖရိကဒေသ၊ လက်တင်အမေရိကဒေသ၊ အရှေ့အလယ်ပိုင်းဒေသ၊ အာရှအလယ်ပိုင်းဒေသ စသဖြင့် ဒေသပေါင်းစုံက ကျောင်းသားပေါင်းစုံ တက်ရောက်နေကြတယ်ဆိုတာ ဘယ်လောက်များ ဂုဏ်ယူဖို့ ကောင်းလိုက်သလဲကွာ။ ငါတို့ဗုဒ္ဓဘာသာ အယူအဆအရဆိုရင်တော့ ရှေးရေစက် ရှိခဲ့လို့သာ ဘယ်လိုမျှ ဆုံဆည်းဖို့မဖြစ်နိုင်တဲ့ ဂါနာလို၊ ကင်မရွန်းလို နိုင်ငံတွေက ကျောင်းသားတွေနဲ့ ခင်မင်ခွင့် ရခဲ့သလို၊ ဂျော်ဒန်လို၊ တူရကီလို နိုင်ငံတွေက ကျောင်းသားတွေနဲ့လည်း မိတ်ဆွေဖြစ်ခွင့် ရခဲ့တယ်။ ငါ့စာကို နိဂုံးချုပ်ရရင်တော့ လာမယ့်နှစ်မှာ နိုင်ငံပေါင်း ၄၀ ကျော်က ကျောင်းသားတွေအကြားမှာ မင်းကိုလည်း မြန်မာကျောင်းသားတစ်ဦးအနေနဲ့ မြင်တွေ့ခွင့်ရတော့မယ်ဆိုပြီး ပျော်ရွှင်နေမိတယ် ဆိုတာပါပဲ။ မင်းသိချင်တာတွေရှိရင်လည်း ငါ့ဆီကို သီးသန့်အီးမေးလ် ပို့ထားလိုက်ပါ။ ငါသိသလောက် ပြန်ဖြေပေးပါ့မယ်။
မကြာခင် တွေ့ကြတာပေါ့။

ရှင်းလင်းချက်များ
GSIR - The Graduate School of International Relations
GSIM - The Graduate School of International Management
IRP - International Relations Program
IDP - International Development Program
IPSP - International Peace Studies Program
PMPP - Public Management and Policy Analysis Program
MBA - Master of Business Administration
IMBA - Intensive MBA
E-Biz - E-Business Management Program
(Ichiro Nyanmyokyaw @ IUJ)