အိုင်ယူဂျေမှ ရေးတဲ့စာ (၈)

သူငယ်ချင်း...၊
ငါ့စာတွေ ဖတ်နေရတဲ့ မင်းတော့မသိဘူး၊ ရေးရတဲ့ ငါကိုယ်တိုင်မှာတောင် စာသင်ရတဲ့ကိစ္စတွေ၊ စာမေးပွဲကိစ္စတွေ၊ စာတမ်းကိစ္စတွေ၊ ပါဝါပွိုင့်ကိစ္စတွေကို ပြန်တွေးရ ပြန်ရေးရတာ အတော်ကြီးကို အသက်ရှူ ကြပ်တယ်ကွ။ လက်တွေ့ရင်ဆိုင် ကျော်ဖြတ်ခဲ့ရစဉ်တုန်းက ဖိအားတွေ တွန်းအားတွေ အများကြီးနဲ့ ပင်ပန်းခဲ့ရသလို အဲဒီအကြောင်းတွေကို ပြန်တွေးမိပြန်တော့လည်း နည်းနည်းတော့ စိတ်လှုပ်ရှားရတယ်ကွ။ တကယ်ဆိုရင် ပြီးခဲ့တဲ့ အကြောင်းအရာတွေကို အခုအချိန်မှာ ပြန်ပြောတဲ့အခါ ရယ်ရယ်မောမော ပေါ့ပေါ့ပါးပါးနဲ့ ဖြစ်သင့်တာပေါ့ကွာ။ ဒါပေမယ့် မဖြစ်ဘူးကွ...။ မင်းကိုယ်တိုင် နဖူးတွေ့ဒူးတွေ့ ရင်ဆိုင်ရပြီးတဲ့အခါ ငါ့ခံစားချက်တွေကို နားလည်ပါလိမ့်မယ်။ ဒီစာမှာတော့ ထွေရာလေးပါး အကြောင်းအရာလေးတွေကို နည်းနည်းလေး ပြောပြချင်တယ်။ စာသင်ခန်းထဲတွေကနေ ခဏလောက် ထွက်ပြေးတဲ့ သဘောပေါ့ကွာ။ ဂျပန်ကို ပထမဆုံးအကြိမ် လာရောက်ရမယ့် မင်းအနေနဲ့ အခုအချိန်မှာ ငါ့တုန်းကလိုပဲ ရင်ခုန်စိတ်လှုပ်ရှားနေမယ်၊ စိတ်ကူးနဲ့ ကြိုတင်ပုံဖော် ရူးသွပ်နေမယ်လို့ ငါယုံကြည်ပါတယ်။ ခေါင်းစဉ်အမျိုးမျိုးနဲ့ ဂျပန်နိုင်ငံမှာ လာရောက်နေထိုင် အလုပ်လုပ်ကိုင် ပညာသင်ကြား ခိုလှုံနေကြတဲ့ အခြားသူတွေအတွက် ဘယ်လိုရှိမယ်ဆိုတာ ငါမသိပေမယ့် Scholarship နဲ့ ပညာတော်သင် လာရောက်ရတဲ့ မြန်မာကျောင်းသားတစ်ယောက် အတွက်ကတော့ ဂျပန်နိုင်ငံဟာ အင်မတန်မှ နေပျော်ဖွယ်ကောင်းတဲ့ နေရာတစ်ခုပါဗျာ။ စည်းစနစ်ကျနမှု၊ သန့်ရှင်းသပ်ရပ်မှု၊ ဖော်ရွေပျူငှာမှု၊ ရိုးသားမှု၊ ကြိုးစားမှု၊ တိုးတက်ထွန်းကားမှု၊ ငြိမ်းချမ်းမှု စတဲ့ စတဲ့ အချက်တွေဟာ ငါ့အတွက်တော့ ရင်ခုန်စိတ်လှုပ်ရှားဖွယ် အတိပါပဲ။ ဂျပန်လေဆိပ်ကို မင်းရောက်ပြီဆိုတာနဲ့ မြန်မာတစ်ယောက်အနေနဲ့ မင်းအတွက် ပထမဆုံး အံ့သြတကြီး ဖြစ်ရမယ့်ကိစ္စကတော့ နည်းပညာအခြေပြု ဆောင်ရွက်စီမံတဲ့ သူတို့ရဲ့ လုပ်ငန်းဆောင်တာတွေပါပဲ။ ငါတို့နိုင်ငံမှာဆို လူတွေအများကြီး၊ စားပွဲတွေအများကြီး ကျော်ဖြတ်ရမယ့် လုပ်ငန်းဆောင်တာတွေကို အဆင့်မြင့်နည်းပညာတွေ အသုံးပြုပြီး မိနစ်ပိုင်းအတွင်း ဂျပန်နိုင်ငံထဲကို ၀င်ရောက်ခွင့်ရအောင် ဆောင်ရွက်ပေးတဲ့ ၀န်ဆောင်မှုတွေကို မင်းသေချာပေါက် သဘောကျလိမ့်မယ်လို့ ငါပြောရဲတယ်။ နောက်တစ်ခု မင်းအတွက် shock ရစေမယ့် အချက်တစ်ခုကတော့ ဒီနိုင်ငံရဲ့ ယာဉ်ကြောစနစ်ပါပဲ။ တစ်သက်လုံး ငါတို့နိုင်ငံရဲ့ ညာကပ်မောင်းစနစ်နဲ့ အသားကျလာတဲ့ ငါ့အတွက် ဒီနိုင်ငံကကားတွေ ဘယ်ကပ်မောင်းစနစ်နဲ့ မောင်းနေကြတာကို မြင်ရတော့ အထူးအဆန်း ဖြစ်မိတာ အမှန်ပါပဲကွာ။ အခြားသော အာဆီယံနိုင်ငံအများစုက ကျောင်းသားတွေအတွက်တော့ သူတို့နိုင်ငံတွေမှာလည်း ဘယ်ကပ်မောင်းစနစ်တွေ ဖြစ်တဲ့အတွက် သိပ်မထူးဆန်းလှဘူးပေါ့ကွာ။ ဒီအကြောင်းကို ဘာဖြစ်လို့ ထည့်ပြောရသလဲဆိုတော့ မင်းဆိုတဲ့ကောင်ကလည်း ငါ့လိုပဲ စက်ဘီးတစ်စီးနဲ့ လျှောက်လိမ့်နေမယ်လူဆိုတာ သိနေလို့ပါပဲ။ ငါဖြင့် စက်ဘီးစီးတိုင်း ဘယ်ဖက်ကပ်ပြီး နင်းရတာ၊ လမ်းဆုံလမ်းခွတွေမှာ လမ်းကြောင်းယူရတာ အတော်ကြီးကို ကသိကအောက် နိုင်တဲ့ကိစ္စပဲဟေ့။ အနှစ် ၃၀ ကျော်လောက် အသားကျလာတဲ့ စနစ်တစ်ခုကို ငါ့အနေနဲ့ အရိုးစွဲနေမိတာ မလွန်လောက်ဘူး ထင်ပါရဲ့ကွာ။ ဂျပန်နိုင်ငံရဲ့ ငွေကြေးစနစ်ဟာ ယန်း ( Yen, ¥ ) ဖြစ်တယ်ဆိုတာ မင်းသိပြီးဖြစ်မှာပါ။ နိုင်ငံအတွင်း လှည့်လည်သုံးစွဲတဲ့ ငွေကြေးအမျိုးအစား ၁၀ မျိုးပဲ ရှိတယ်ကွ။ အကြွေစေ့ ၆ မျိုးနဲ့ ငွေစက္ကူ ၄ မျိုး ဖြစ်တယ်။ အကြွေစေ့ ၆ မျိုးက ဘာတွေလဲဆိုတော့ ၁ ယန်း၊ ၅ ယန်း၊ ၁၀ ယန်း၊ ၅၀ ယန်း၊ ၁၀၀ ယန်း၊ ၅၀၀ ယန်း တို့ ဖြစ်ကြတယ်။ ငွေစက္ကူ  ၄ မျိုးကတော့ ယန်း ၁,၀၀၀၊ ယန်း ၂,၀၀၀၊ ယန်း ၅,၀၀၀၊ ယန်း ၁၀,၀၀၀  တို့ ဖြစ်ကြတယ်။ ဒီနေရာမှာ ထူးခြားတာတစ်ခုက ယန်း ၂,၀၀၀ တန်ကို ငါဖြင့် အခုအချိန်အထိ ကိုယ်တိုင်မမြင်ဖူး၊ မကိုင်ဖူး၊ မသုံးဖူးသေးတာပါပဲ။ အရှားပါးဆုံး ငွေစက္ကူ ဖြစ်ပါတယ်။ အဲဒီ ၂,၀၀၀ တန်ကလွဲရင် ကျန်တဲ့ပိုက်ဆံတွေအားလုံးကို ငါတို့တွေ နေ့စဉ်ကိုင်တွယ် သုံးစွဲကြရတယ်။ ငါတို့နိုင်ငံမှာဆို ရှားပါးပစ္စည်းလိုတောင် ဖြစ်နေတဲ့ အကြွေစေ့စနစ်ကို ဒီနိုင်ငံမှာ နေ့စဉ်နဲ့အမျှ အထူးတလည် သုံးနေရတာကို အမှန်တကယ် သဘောကျမိတယ်။ တို့နိုင်ငံမှာ ကျပ် ၂၀၀ တန်၊ ကျပ် ၅၀၀ တန်တွေကိုတောင် အကြွေလို့ သဘောထား သုံးနှုန်း ပြောဆိုနေခဲ့ကြရာကနေ တစ်ယန်းကအစ သုံးလို့ရတဲ့အပေါ် ငါ့အနေနဲ့ တကူးတက ပြောပြသင့်တယ်၊ စာဖွဲ့သင့်တယ်လို့ ထင်ပါတယ်ကွာ။ ဆိုင်တစ်ခုခုမှာ ပစ္စည်းတစ်ခုခုဝယ်လို့ ယန်း ၁၀၀ ကျတယ်ဆိုပါတော့။ မင်းအနေနဲ့ ၁ ယန်းတန် အကြွေစေ့ ၁၀၀ ထုတ်ပေးလို့လည်း ဒီနိုင်ငံက ဆိုင်တွေရဲ့ အရောင်းသမားတွေက ငြူစူ၊ မျက်စောင်းထိုး၊ ပါးစပ်ကနေ ဗြစ်တောက်ဗြစ်တောက်ပြော၊ မင်းကို မတူသလို မတန်သလိုကြည့် စတာတွေ လုံးဝ မရှိပါဘူး။ တရားဝင်လှည့်လည် သုံးစွဲနေတဲ့ မည်သည့်ငွေစက္ကူ ၊ အကြွေစေ့ပဲဖြစ်ဖြစ် မင်းရဲရဲဝံ့ဝံ့ သုံးလို့ ပေးလို့ ရပါတယ်ကွာ။ ဒီမှာသုံးတဲ့ ငွေစက္ကူတွေနဲ့ အကြွေစေ့တွေကို မင်းမျက်လုံးထဲမှာ ရှင်းရှင်းလင်းလင်း မြင်သာရအောင် ငါတွဲပို့လိုက်တဲ့ ဓာတ်ပုံလေးကို ကြည့်စေချင်တယ်။ ကဲ... စာလည်း အတော်ရှည်သွားပြီကွ။ ငါ့စာကို ဒီနေရာမှာ နိဂုံးချုပ်ပါရစေဦး။ နောက်စာတွေကျမှ ဆက်ပြောကြသေးတာပေါ့။ ငါလည်း စာတမ်းအပ်တာတွေ၊ စာမေးပွဲဖြေတာတွေ အားလုံးပြီးပြီဆိုတော့ အချိန်အား ရလာပြီမို့ မင်းဆီကို စာတွေ ဆက်တိုက်ဆိုသလို ရေးနိုင်တော့မှာပါ။ အခုဆိုရင် မင်းလည်း ဂျပန်နိုင်ငံအကြောင်း၊ ငါတို့ တက္ကသိုလ်အကြောင်းကို အတန်အသင့် ဆ၀ါးမိနိုင်နေပြီလို့ ငါထင်ပါတယ်။ ငါ့ရဲ့ အရေးအသား မပြေပြစ်မှုနဲ့ စကားလုံးရွေးချယ်ပုံ ညံ့ဖျင်းမှုတွေကြောင့် မင်းအတွက် မရှင်းမလင်း ဖြစ်ရတာတွေ ရှိတယ်ဆိုရင်လည်း ငါ့ကို ပြန်မေးဖို့ အားမနာပါနဲ့ကွာ။ ငါက မင်းလိုတော့ စာအရေးအသား သိပ်မပြေပြစ်လှဘူးကွ။ အခု ငါရေးနေတဲ့ အကြောင်းအရာတွေကို မင်းရေးတဲ့အခါ ငါ့ထက် အဆပေါင်းများစွာ ပိုကောင်းမယ်လို့ ငါယုံကြည်တယ်။ သူငယ်ချင်း စိတ်ချမ်းမြေ့ပျော်ရွှင်ပါစေကွာ..။
( Ichiro Nyanmyokyaw @ IUJ )