ဖရဲသီး လတ်လတ်ဆတ်ဆတ် မစားရတာကြာပြီ

. . . ဖရဲသီးတွေ တောင်ပုံယာပုံရောင်းတဲ့အထဲက ရွေးဝယ်လို့ရတဲ့ ကင်မွန်းတန်းဈေးမှာတောင်မှ ဖရဲသီး လတ်လတ်ဆတ်ဆတ် မရှိဘူး၊ ပြောရမယ်ဆိုရင် ဘယ်အမျိုးအစားပဲဖြစ်ဖြစ် ဘယ်ကပဲလာလာ ဘယ်ဈေးနဲ့ရောင်းရောင်း ဖရဲသီးမှာနှစ်မျိုးပဲ ရတယ်၊ တစ်မျိုးက အပင်ကခူးလာကာစ အထဲမှာ သိပ်မမှည့်သေးဘူး ဆိုတာရယ်၊ နောက်တစ်မျိုးက အညှာတွေခြောက်သွားပြီး အထဲမှာ မှည့်နေပြီဆိုတာရယ်
.
. . . တကယ်တမ်းကျတော့ ဖရဲသီးဆိုတာ ဝမ်းပျဉ်းသီးကို ခူးလာပြီး ရက်ထားအမှည့်ခံရတဲ့ အမျိုးမှ မဟုတ်တာ ဆိုတဲ့ သဘောတရားတောင် မရှိတော့ဘဲ ဖရဲသီးရောင်းတဲ့ သူတွေ ကိုယ်နှိုက်ကိုက အပင်က မမှည့်ခင်ခူး အညှာခြောက်လောက်မှ မှည့်မှာဆိုတာမျိုးကိုပဲ ပြောပြောရောင်းနေကြတော့ ဖရဲသီးကို ကြိုက်လို့သာ ဝယ်စားနေရပေမယ့် ဘယ်တော့မှ စိတ်တိုင်းကျတယ်ရယ်လို့ မရှိ
.
. . . တကယ်တော့ ဖရဲသီးဆိုတာ အပင်မှာမှည့်ပြီး ခူးပြီးပြီးချင်းစားရင် အကောင်းဆုံးအရသာကို ရတယ်ဆိုတာ ဒီဖရဲသီးကုန်သည်တွေ သဘောတရားလေးတောင် မသိတော့ဘဲ သူတို့နားလည်ထားတဲ့အတိုင်း အညှာစိမ်းရင် မမှည့်ဘူး၊ မှည့်တာစားရင် အညှာခြောက်တာရွေးဆိုတဲ့ ပုံသေနည်းကို ကိုယ့်မှာ စိတ်ပျက်ခဲ့ရတာ မြန်မာပြည်ပြန်ရောက်တဲ့ ပထမဆုံး ဖရဲသီးရာသီကတည်းကပဲ ဆိုပါတော့
.
. . . ဖရဲသီးအကြောင်း ဘယ်လောက်သိလို့လဲ မေးရင် ကိုယ်တိုင် ဝင်မစိုက်ဖူးရုံတမယ်ပါပဲလို့ ပြောရမှာပဲ၊ ကိုယ်နေခဲ့တဲ့ ဂျပန်နိုင်ငံအနောက်ပိုင်းကမ်းခြေနဲ့နီးတဲ့ မီနာမီအွန်နူမာ မြို့လေးမှာ ကိုယ်တက်ခဲ့တဲ့ တက္ကသိုလ်က ဖရဲစိုက်ခင်းတွေကြားထဲမှာ ရှိတာကိုး၊ တစ်နှစ်မှာ ပန်းအရောင်ရှစ်မျိုးပွင့်တာကို အစွဲပြုပြီး မှည့်ခေါ်ထားတဲ့ ယာအီရို လွင်ပြင်ကြီးထဲမှာ စိုက်တဲ့ ဖရဲသီးမို့ ရှစ်ရောင်ခြယ်ဖရဲသီး 八色スイカလို့ နာမည်ကြီးတဲ့ ဖရဲသီးတွေထွက်တဲ့ အခင်းတွေကြားမှာ ကိုယ်တွေက ဖရဲသီးပျိုးပင်ပေါက်လေးကနေ နောက်ဆုံး ဖရဲခင်းကို ဖျက်လို့ ကျန်ခဲ့တဲ့ အသီးတွေ ပုပ်တဲ့အထိ နေနေခဲ့ရတဲ့သူမို့ ဖရဲသီးဆိုတာ ဘယ်အချိန်မှာစားရင် အချိုဆုံးလဲဆိုတာ သိနေခဲ့တာပေါ့
.
. . . ကိုယ့်မြေကိုယ့်ရေ ကိုယ့်နိုင်ငံမှာတော့ အစစအရာရာ ခေတ်နောက်ကျပြီး ပို့ဆောင်ဆက်သွယ်ရေးလည်းမကောင်း၊ စိုက်ပျိုးနည်းစနစ်နဲ့ ရိတ်သိမ်းချိန်နည်းပညာကလည်း ခေတ်နောက်ကျတဲ့အပြင် ဖရဲသီးရောင်းစားသူ ကိုယ်တိုင်ကိုက ဖရဲသီးဆိုတာ စိမ်းရင်မမှည့်ဘူး မှည့်ရင်မလတ်ဘူးဆိုတာကို စံနှုန်းကြီးတစ်ခုလို ယုံကြည်လက်ခံထားတဲ့ နိုင်ငံမှာတော့ စံချိန်စံညွှန်းမီ လတ်ဆတ်ရင့်မှည့်ချိုမြတဲ့ ဖရဲသီးဆိုတာ ဈေးကွက်ထဲမှာ ဘယ်တော့မှ တွေ့ရမှာ မဟုတ်ဘူး
.
. . . အလျဉ်းသင့်တဲ့အခါတော့ ဖရဲခင်းတစ်ခုခုသွားပြီး မှည့်နေတဲ့ ဖရဲသီးကို အညှာကမဖြုတ်ဘဲ ထိုင်စားခဲ့အုံးမယ်

ဖရဲသီး

. . . ဆောင်းရာသီဆို နှင်းတွေ လူတစ်ရပ်လောက်ဖုံးပြီး အပူချိန်က သုညအောက် တစ်ဆယ်ဝန်းကျင်လောက်အထိ ကျတတ်တဲ့ နှင်းပွင့်တိုင်းပြည်မှာ ဩဂုတ်လရဲ့ နွေရာသီအပူဓာတ်က တို့နေပြည်တော်ထက်တောင် တစ်ခါတစ်လေ ပိုများတတ်တယ်ဆိုတော့ကာ ကြားဖူးတုန်းကဖြင့် မယုံချင်စရာပါပဲ
.
. . . ပြီးခဲ့တဲ့ မတ် ဧပြီလောက်က အညွန့်အဖူးထွက်ခဲ့တဲ့ သစ်ရွက်တွေလည်း စိမ်းရောင်ရင့်ကြပြီမို့ ဘယ်ဆီကြည့်ကြည့် စိမ်းစိမ်းညို့ညို့နဲ့ ဒီလိုအချိန်မှာ ကိုယ်တို့နေတဲ့အရပ်က ထွက်တဲ့ နာမည်ကျော် ဖရဲသီးကိုလည်း တစ်ဝကြီး စားရခွင့်ကြုံပါတယ်
.
. . . နွေဦးပေါက်နှင်းတွေအရည်ပျော်ချိန်မှာ စစိုက်တဲ့ ယာအီရိုဆူအီကာ ဖရဲသီးဟာ ဒီအချိန်မှာ လှိုင်လှိုင်ထွက်ပါပြီ။ ကျောင်းပတ်ပတ်လည်က ရှိသမျှ ဖရဲခင်းတွေမှာ ကိုယ်တွေအတွက် စားစရာ ဖရဲသီးဆိုတာ တောင်ပုံယာပုံလို့တောင် ဆိုရမလားမသိ
.
. . . ဖရဲစိုက်တောင်သူတွေက ဖရဲသီးထွက်တဲ့အခါ အသီးအမျိုးအစား သုံးမျိုးလောက်ပဲ ခူးပါတယ်။ အကြီး အလတ် နဲ့ အသေး ဆိုပြီး သုံးမျိုးလောက်ပဲ ခွဲပြီး အဲသည် အရွယ်သုံးမျိုးထဲ မဝင်တဲ့ စကောစက အရွယ်အသီးတွေကို အခင်းထဲမှာ ဒီအတိုင်းပဲ ထားခဲ့ပြီး ဖရဲသီးတုံးချိန်ကျမှ လိုက်ကောက်ပြီးပစ်ပါတယ်။ ရောင်းတမ်းဝင်တဲ့ ဖရဲသီးတွေကိုတော့ ဖရဲသီးစားပွဲတော်လိုနေရာတွေ၊ ဆူပါမတ်ကက်တွေ မှာ သာမက ရပ်ဝေးမှာရှိတဲ့ အပေါင်းအသင်းရောင်းရင်းများကိုပါ ပို့ပေးလို့ရအောင် ဝန်ဆောင်မှုပေးပါတယ်။ ကိုယ်တွေလည်း အလျည်းသင့်တဲ့အခါ မိတ်ဆွေတွေဆီ ဒေသထွက်ဖရဲသီးပို့ဖြစ်ခဲ့တာတွေလည်း ရှိပါတယ်။ အခင်းထဲကနေတောင် တိုက်ရိုက်ပို့ပေးတဲ့ ဝန်ဆောင်မှုမျိုးရှိပြီး အခင်းနားမှာ သွားဝယ်မယ်ဆိုရင်တော့ ဖရဲသီး တစ်ဝကြီးကျွေးတဲ့အပြင် အပြန်မှာလည်း ဖရဲသီးအပိုတွေ တော်တော်များများ လက်ဆောင်ပေးတတ်ပါသေးတယ်။
.
. . . ဒါပေမယ့် ဖရဲသီးကတော့ ဝယ်မစားရတာ များပါတယ်၊ အဓိကအားဖြင့်တော့ ကျောင်းပတ်ဝန်းကျင် အခင်းတွေက တောင်သူတွေ မခူးဘဲ ချန်ခဲ့တဲ့ ပယ်သီးတွေက စကောစကအရွယ်မို့သာ ကျန်နေခဲ့တာဖြစ်ပေမယ့် ရောင်းတမ်းဝင်အသီးတွေလိုပဲ အရသာအရည်အသွေးအပြည့်နဲ့မို့ ကျနော်တို့အတွက်တော့ ဒီလိုအချိန်ဟာ ဖရဲသီး လှိုင်လှိုင်စားရတဲ့အချိန်ပါပဲ
.
. . . အမှန်ကတော့ ဖရဲသီး စသီးပြီဆိုကတည်းက သီးကင်းလေးတွေအရွယ်မှာ အပင်က အကောင်းဆုံးအလုံးကိုချန်ပြီး ခူးပစ်ကြလေ့ ရှိတာမို့ မြန်မာပြည်က ဗူးသီးနုနုလေးလိုသဘောထားပြီး အလုံးလိုက်ပြုတ်ပြီး ငါးပိရည်နဲ့ တို့စားတာမျိုး၊ ဗူးသီးကြော်လို ကြော်စားတာမျိုးတွေလည်း လုပ်စားဖြစ်ပါတယ်
.
. . . ပုံထဲက စာလေးကတော့ ဖရဲခင်းကြီးကိုကြည့်ပြီး တွေးမိတာလေးကို ရေးထားတာပါ။

https://bokaungpage.blogspot.com/2018/08/yario-suika.html

I Wandered Lonely as a Cloud

ဒီအချိန်မှာ အလွမ်းဆုံးကတော့ Daffodil ဆိုတဲ့ ပန်းလေးတွေ
.
မြန်မာလိုဆိုရင်တော့ ဒပ်ဖဒဲလ် လို့ အသံထွက်မယ်ထင်ရတဲ့ ဒီပန်းလေးတွေကို ကဗျာဆရာကြီး William Wordsworth ရဲ့ ကဗျာထဲ ဖတ်ရတုန်းကတည်းက သဘောတွေကျနေခဲ့တာ၊ ကိုယ်တွေ ငယ်ငယ်က အင်တာနက်ဆိုတာကြီးလည်း မရှိတော့ ပန်းပုံကိုတောင် မမြင်ခဲ့ဖူးပဲနဲ့ တိတ်တခိုး ကြိတ်ကြွေခဲ့ရတဲ့ ပန်းလေးတွေ၊ နောက်ပိုင်း အင်တာနက်တွေ သုံးတတ်လာတော့ ဒီပန်းလေးတွေကို ပုံထဲ မြင်ဖူးနေခဲ့ပေမယ့် အပြင်မှာတော့ မြင်ခွင့်ရအုံးမယ် မထင်မိခဲ့
.
. . . နောက်တော့ ဒီပန်းတွေ အပြိုင်းအရိုင်းပွင့်တဲ့ အရပ်ကို ရောက်သွားပြီး ဆောင်းကုန်လို့ နှင်းတွေများ အရည်ပျော်ပြီလားဆိုရင် ဖုံးထားတဲ့ နှင်းခဲတွေအောက်ကနေ အလုအယက်ထိုးထွက်ဖူးပွင့်ကြတဲ့ ပန်းတွေက ကိုယ့်ရဲ့ ပုံမှန်နွေဦးတေးသံတွေလို ဖြစ်လာခဲ့ရ၊ နှင်းတွေပျော်ချိန်ရောက်တိုင်း ဒီပန်းလေးတွေ ပွင့်လေ့ရှိတဲ့ နေရာတွေ၊ လမ်းဘေးတွေ၊ တောအုပ်တွေထဲ သွားသွားကြည့်ရ
.
. . . ဆိုင်ကလုန်းနာဂစ် လို့ လူတွေသိကြတဲ့ နာဂစ် ဆိုတာ ကိုယ်အရမ်းကြိုက်တဲ့ ကဗျာထဲက ဒီပန်းလေးတွေကို အူရဒူဘာသာနဲ့ခေါ်တဲ့နာမည် نرگس ပါလားဆိုတာ သိခဲ့ပြီးတဲ့အချိန်တုန်းက ဒီပန်းနာမည်ကို ခဏတော့ မုန်းခဲ့မိပေမယ့် တကယ်တမ်းဖြစ်သွားခဲ့တဲ့ အဖြစ်အပျက်ကြီးမှာ ဒီပန်းလေးတွေ ပယောဂ မပါပါလားဆိုတာ ဆင်ခြင်မိတဲ့နောက်ပိုင်း ဒီပန်းလေးတေွကို ပြန်ချစ်သွားခဲ့ရပြန်
.
. . . ကိုယ်ချစ်တဲ့ ပန်းဝါဝါဖြူဖြူလေးတေွ ပွင့်တဲ့အရပ်ကို စွန့်ခွာခဲ့ရပေမယ့် ပန်းလေးတွေကို အခွင့်ကြုံတိုင်းလွမ်းမိဆဲ၊ ဟာကိုင်းစံတောင်ခြေက ယာအီရိုလွင်ပြင်ကြီးထဲမှာ ကိုယ်မရှိတော့ပေမယ့်လည်း ချိန်ခါရာသီရောက်တိုင်း ပွင့်နေကြမှာဖြစ်တဲ့ ပန်းလေးတွေ ကိုယ့်လို ချစ်တတ်သူတွေနဲ့ ဆုံနေပါစေလို့ ဆုတောင်းနေမြဲ
.
မောင်လွမ်းဝေ
၁၄ ဧပြီ ၂၀၂၁
.
The photo was taken on 10 April 2019

စစ်သည်တော်

စစ်မြေပြင်မှာကျဆုံးခဲ့ရတဲ့ သူငယ်ချင်း မီရှယ်၊ ဘယ်ဆီရောက်လို့ရောက်နေမှန်းမသိတဲ့ မြင်းလေး၊ ဂျောပြား တို့နဲ့ နေပြည်တော်မှာ အတူတာဝန်ထမ်းဆောင်ခဲ့တဲ့ အချိန်တွေကို သတိတရဖြစ်စေခဲ့တဲ့ တိုကျိုမြို့လယ်က ဧကရာဇ်နန်းတော် မလှမ်းမကမ်းမှာရှိတဲ့ ယာစုကုနိ နတ်ကွန်း နှစ်ပေါင်းတစ်ရာ့ငါးဆယ်ပြည့် အထိမ်းအမှတ်တွေလုပ်တဲ့အချိန်မှာ ကိုယ်က ပထမဆုံးအကြိမ်ရောက်ဖြစ်ခဲ့တယ်
.
ဂျပန်နိုင်ငံ ပါဝင်တိုက်ခိုက်ခဲ့တဲ့စစ်ပွဲတွေအတွင်းကျဆုံးခဲ့တဲ့ စစ်သည်တော်တွေ အရပ်သူအရပ်သား ယောက်ျားမိန်းမ ကလေးသူငယ် သက်ကြီးရွယ်အိုနဲ့ အိမ်မွေးခွေးကြောင် အသက်ပေါင်း ၂၄၆၆၅၃၂ ရဲ့ အမည်စာရင်းကို မော်ကွန်းထိုးထားတဲ့ အထဲမှာ စစ်ရာဇဝတ်ကောင်အဖြစ် သတ်မှတ်ထားတဲ့ စစ်သည်တော်တွေပါ ပါနေတယ်ဆိုပြီး အငြင်းပွားဖွယ် သိမှတ်ချက်နဲ့ဆက်စပ်ပြီး ဒီနတ်ကွန်းကို ဂျပန်အစိုးရ အရာရှိကြီးတွေ သွားရောက်ဂါရဝပြုတိုင်း တရုတ်နဲ့ ကိုရီးယားတို့က ပြင်းပြင်းထန်ထန် ကန့်ကွက်ရှုတ်ချနေကြတာ ဒီနေ့ထိထက်တိုင်ပါပဲ
.
တိုင်းပြည်နဲ့လူမျိုးအတွက် တိုက်ပွဲဝင် အသက်စွန့်ခဲ့ရတာချင်းတူပေမယ့် တစ်ချို့က သူရဲကောင်းအဖြစ်မော်ကွန်းတင်ခံရပြီး တစ်ချို့က စစ်ရာဇဝတ်ကောင်အဖြစ် သတ်မှတ်ခံရတာတွေကိုကြည့်ရင် စစ်သည်တော်ဆိုတာ စစ်ကိုနိုင်အောင်တိုက်နိုင်ရုံနဲ့တင် မပြီးသေးဘဲ ကိုယ်တိုက်ခဲ့တဲ့စစ်ဟာ တရားမျှတကြောင်း သမိုင်းတွင်ရစ်အောင် ကမ္ဗည်းထိုးခဲ့နိုင်စွမ်းရှိဖို့လဲ အရေးကြီးကြောင်း သတိတရားရမိပါတယ်
.
နတ်ကွန်းရှေ့မှာ တွေတွေကြီးရပ်နေမိနေမိတဲ့ ကိုယ့်ရဲ့ခေါင်းထဲဘာတွေတွေးမိနေလဲဆိုတာ ကိုယ့်နှလုံးသားထဲ ဘာတွေခံစားနေရလဲဆိုတာ အပေါ်မှာပြောခဲ့သူငယ်ချင်းသုံးယောက်သာသိရင် လှောင်ပြုံးပြံုးပြီးများ ဝိုင်းကြည့်နေကြမလားဆိုပြီး မလုံမလဲဖြစ်မိတယ်
.
ဗိုလ်ကောင်း
၇ ဒီဇင္ဘာ ၂၀၁၉

Forever Youth

မနှစ်က နှစ်သစ်ကူးနေ့က ရိုက်ထားတဲ့ပုံ၊ ဒီပုံထဲက အကြီးဆုံးကလေးက ကိုယ့်ထက် အသက်ဆယ့်ရှစ်နှစ်တောင်ငယ်တယ်၊ ကိုယ်တွေ ကျောင်းဆင်းစမှာ ဒီကလေးကို စတွေ့ဖူးတုန်းက သူငယ်တန်းတောင်မတက်သေးတဲ့ကလေးလေး၊ အခုကျတော့ သူကလူလားမြောက်လာပေမယ့် ကိုယ်က ဘယ်အရွယ်ကတည်းက စိတ်ရောရုပ်ရော လူလားမြောက်တာ ရပ်နေခဲ့လဲမသိဘူး၊ ငယ်ရွယ်တဲ့သူတွေနဲ့ အပေါင်းအသင်းလုပ်ရတာ တကယ်ကိုနုပျိုတယ်၊ အပြင်ကို ထုတ်မပြောကြရင်တောင် နုပျိုတာကိုတော့ လူတော်တော်များများ လိုချင်ကြမှာပဲ၊ ကိုယ်က အသက်လေးဆယ်အရွယ်မှာ စိုင်းစိုင်းခမ်းလှိုင်လို မနုပျိုနိုင်ခဲ့ပေမယ့် အသက်ခြောက်ဆယ့်ငါးကျရင် မြန်မာအိုက်ဒေါက ဦးလတ်ကြီးလို ဂေါ်နေချင်သေးတာ၊ အာ့လို ဂေါ်နေမှ ကိုယ်လုပ်ချင်တာတွေကို မသေခင် ပြီးအောင်အကုန်လုပ်သွားနိုင်မယ်၊ ကိုယ်လုပ်တာရဲ့ အသီးအပွင့်တွေကို ကျန်းကျန်းမာမာ ရွှင်ရွှင်လန်းလန်းနဲ့ ကျေကျေနပ်နပ်ကြီး ကြည့်နေချင်နိုင်မယ်၊ တစ်ချို့ကကျ ကလေးကလားနေတာ အမြင်မတင့်တယ်ဘူးပြောကြမှာပဲ ကိုယ်ကတော့ တတ်နိုင်သလောက် ငယ်ပြီးနေချင်တယ်၊ နောင်ဘယ်လောက်ထိ နေနိုင်မလဲ စောင့်ကြည့်ရအုံးမှာပ