အိုင်ယူဂျေမှ ရေးတဲ့စာ (၆)

သူငယ်ချင်း...၊
နိဒါန်းတွေဘာတွေ ပျိုးမနေတော့ဘဲ အရင်စာထဲမှာ ပြောလို့မပြီးသေးတာတွေ ဆက်ပြောပါရစေ။ Term တစ်ခုချင်းအလိုက် ဘာသာရပ်တွေကို ရွေးချယ်ရာမှာ သက်ဆိုင်ရာဌာနအလိုက် မယူမနေရ (Required course) အဖြစ် သတ်မှတ်ထားတဲ့ ဘာသာရပ်တွေ ရှိတတ်ကြတယ်။ အဲဒီဘာသာရပ်တွေကိုတော့ မဖြစ်မနေ မှတ်ပုံတင်ကြရပြီး ငါတို့အနေနဲ့ ရွေးချယ်ခွင့်မရှိဘူး။ မဟာဘွဲ့ရဖို့အတွက် မသင်မနေရ ဘာသာရပ်တွေ ဆိုပါတော့ကွာ။ မယူမနေရ ဆိုတဲ့အထဲမှာ ကိုယ်ရေးမယ့် ဘွဲ့ယူကျမ်းအတွက် ကိုယ့်ရဲ့ကျမ်းကြီးကြပ်သူနဲ့ အပတ်စဉ် တွေ့ဆုံ၊ ဆွေးနွေး၊ တင်ပြရတဲ့ ဆွေးနွေးပွဲ (Advanced Seminar) ၃ ခု လည်း ပါဝင်တယ်။ မယူမနေရ ဘာသာရပ်တစ်ခုစီနဲ့ Seminar တစ်ခုစီအတွက် အမှတ် ၂ မှတ်စီ ရရှိမှာဖြစ်တယ်။ IR ကျောင်းသားတစ်ယောက်အနေနဲ့ Required Courses အဖြစ် မယူမနေရ ယူရမယ့် ဘာသာရပ်ပေါင်း ၈ ခုနဲ့ ဆွေးနွေးပွဲ ၃ ခု ရှိတယ်။ ဒီတော့ အဲဒီဘာသာရပ်တွေနဲ့ ဆွေးနွေးပွဲတွေကနေ အမှတ် (credit) ၂၂ မှတ် ရရှိမှာဖြစ်တယ်။ မယူမနေရဖြစ်ပေမယ့် ရွေးချယ်ခွင့်ရှိတဲ့ ဘာသာရပ်တွေကိုတော့ Elective Required Courses လို့ ခေါ်တယ်။ ဒီနေရာမှာလည်း နှစ်မျိုးနှစ်စား ခွဲခြားထားတယ်။ Applied Disciplinary Courses (ADC) နဲ့ Regional and Country Courses (RCC) တို့ ဖြစ်ကြတယ်။ ADC နဲ့ RCC ဆိုင်ရာ ဘာသာရပ်ပေါင်း အများအပြား ရှိတဲ့အနက်က ကျောင်းသားတွေအနေနဲ့ မိမိတို့စိတ်ကြိုက် ဘာသာရပ်တွေကို ရွေးချယ်တက်ရောက်ခွင့် ရှိကြတယ်။ ကန့်သတ်ချက်ကတော့ IR ကျောင်းသားတွေအနေနဲ့ ဘွဲ့မရမီ ၂ နှစ်တာ ကာလအတွင်း ADC အတွက် အနည်းဆုံး အမှတ် ၆ မှတ်နဲ့ RCC အတွက် အနည်းဆုံး အမှတ် ၆ မှတ် ရရှိအောင် သင်ယူကြဖို့လိုတယ် ဆိုတာပါပဲ။ ကျောင်းသားတွေ ရွေးချယ်ရတဲ့ နောက်ထပ် အမျိုးအစားတစ်ခုကတော့ Elective Courses ဖြစ်တယ်။ ဒါနဲ့ပတ်သက်ပြီး ရွေးချယ်ရာမှာတော့ ကျောင်းသားတွေအနေနဲ့ IUJ မှာ သင်ကြားပေးတဲ့ မည်သည့်ဘာသာရပ်ကိုမဆို ရွေးချယ်ခွင့် ရရှိကြတယ်။ IRP ကျောင်းသားတစ်ယောက်ဟာ IDP နဲ့ဆိုင်တဲ့ ဘာသာရပ်တွေ၊ PMPP နဲ့ဆိုင်တဲ့ ဘာသာရပ်တွေအပြင် စီးပွားရေးစီမံခန့်ခွဲမှုနဲ့ဆိုင်တဲ့ ဘာသာရပ်တွေကိုလည်း မိမိစိတ်ဝင်စားရင်၊ မိမိရေးသားမယ့် ဘွဲ့ယူကျမ်းနဲ့ သက်ဆိုင်မှုရှိရင် စိတ်ကြိုက်ရွေးချယ်ပြီး မှတ်ပုံတင် တက်ရောက်နိုင်ကြတယ်။ အဲဒီလို ဘာသာရပ်တွေအတွက် အနည်းဆုံး ရယူရမယ့် အမှတ် (Credit) ကတော့ ၆ မှတ် ဖြစ်တယ်။ အဲဒီတော့ မဟာဘွဲ့မယူမီ ၂ နှစ်တာ ကာလအတွင်း IR ကျောင်းသားတစ်ဦး မဖြစ်မနေ အနည်းဆုံးရယူရမယ့် credit တွေက အောက်ပါအတိုင်းဖြစ်တယ် -
၁။ Required Courses (including Advanced Seminar I, II, III)         22 credits
၂။ Elective Required Courses                                                    12 credits
၃။ Elective Courses                                                                   6 credits
Total (required credits)                                                            40 credits
ဘာသာရပ်တွေ မှတ်ပုံတင်ဖို့အတွက် လုပ်ငန်းဆောင်တာ အဆင့်ဆင့်ကို အွန်လိုင်းကနေပဲ လုပ်ကြရတယ်။ သင်တန်းကာလ (Term) တစ်ခုအတွက် ဘာသာရပ်တွေ ရွေးချယ်တာ၊ စာသင်ချိန် တိုက်နေတာ ရှိ၊ မရှိ စစ်ဆေးတာ၊ ကန့်သတ်ထားတဲ့ 11 credits ထက် ကျော်လွန်ခြင်းမရှိအောင် စစ်ဆေးတာ စတာတွေအားလုံးကို အွန်လိုင်းကနေ လုပ်ကြရတယ်။ အချောသတ် ရွေးချယ်ပြီးစီးပြီ ဆိုတဲ့အချိန်မှာတော့ ပထမအဆင့် အွန်လိုင်းကနေ မှတ်ပုံတင်ခြင်း ပြီးဆုံးပြီဖြစ်တယ်။ အဲဒီနောက် ဒုတိယအဆင့်နဲ့ နောက်ဆုံးအဆင့်အဖြစ် မိမိအတည်ပြု ရွေးချယ်မှတ်ပုံတင်ပြီးဖြစ်တဲ့ ဘာသာရပ်စာရင်းကို ပရင့်ထုတ်ပြီး မိမိရဲ့ ကျမ်းကြီးကြပ်သူ လက်မှတ်ရေးထိုးစေကာ သက်ဆိုင်ရာ ကျောင်းသားရေးရာဌာနကို ပေးပို့ရတယ်။ အဲဒီလို ပေးပို့ပြီးတဲ့ အချိန်ကျမှသာလျှင် သင်တန်းကာလ term တစ်ခုအတွက် ဘာသာရပ်ဆိုင်ရာ မှတ်ပုံတင်ခြင်းလုပ်ငန်း ပြီးဆုံးတယ်။ မှတ်ပုံတင်ထားတဲ့ ဘာသာရပ်တွေနဲ့ ပတ်သက်ပြီး ပြန်လည်ပြင်ဆင်တာတို့၊ withdraw လုပ်တာတို့နဲ့ ပတ်သက်တာတွေကိုတော့ မင်းအနေနဲ့ ရှုပ်သွားမှာစိုးတဲ့အတွက် မရှင်းပြတော့ပါဘူး။ ဒါနဲ့ စကားမစပ်... လွန်ခဲ့တဲ့ ၂ ရက်လောက်က မင်းရဲ့ ဖေ့စ်ဘုတ်မှာရေးထားတဲ့ ကဗျာလေးကို ငါသိပ်သဘောကျတယ်။ မင်းရွေးချယ်ထားတဲ့ စကားလုံးအချို့ကို ငါဘ၀င်မကျတာကလွဲရင် မင်းပြောချင်တဲ့ ဦးတည်ချက်နဲ့ မင်းရဲ့စေတနာကို အတိုင်းသားမြင်ရတယ်။ ငါ့စာထဲမှာ မင်းမရှင်းလင်းတာတွေရှိရင် ငါ့ကို အားမနာတမ်း မေးပါသူငယ်ချင်း။ ငါတတ်နိုင်သလောက် ဖြေပေးပါ့မယ်။ အခုတော့ ငါ့စာကို ဒီနေရာမှာ ခေတ္တရပ်နားပါရစေ။
 ( Ichiro Nyanmyokyaw @ IUJ )