ပြီးခဲ့တဲ့ ဇန်န၀ါရီလ အစောပိုင်းက စခဲ့တဲ့ ဆောင်းနှင်းဝေတန်းကတော့ ဒီကနေ့ ညနေငါးရီမှာ နောက်ဆုံးစာတမ်းတင်အပြီး တရားဝင် အဆုံးသတ်သွားပါပြီ။ ဒီကျောင်းကို ရောက်ခါစက စာကြည့်တိုက်ထဲမှာ စာဖတ်တာအထာမကျခဲ့လို့ ပြီးခဲ့တဲ့ ဆောင်းဦးရွက်ကြွေတစ်တန်းလုံးမှာ စာကြည့်တိုက်ထဲ လေးငါးခါလောက်ပဲ စာသွားကြည့်ဖြစ်ခဲ့ပါတယ်။ စာအုပ်သွားငှားတာ မပါပေါ့လေ။ အခု ဆောင်းနှင်းဝေတန်းမှာတော့ အချိန်တော်တော်များများ စာကြည့်တိုက်ထဲမှာပဲ ကုန်လွန်ခဲ့တာ များပါတယ်။ စာကြည့်တိုက်ထဲမှာ နေသားကျသွားတော့ အခန်းမှာတောင် သိပ်မနေတတ်တော့သလိုပါပဲ။ စာကြည့်တိုက်ကလည်း တကယ်ကို သက်တောင့်သက်သာ ရှိပါတယ်။ ကျောင်းစာလုပ်ဖို့ ကျယ်ဝန်းပြီး တသီးတသန့်ထိုင်လို့ရတဲ့ စာကြည့်စားပွဲတွေရှိတယ်။ ပတ်ဝန်းကျင်ကို ကျယ်ကျယ်ဝန်းဝန်း ရှုစားလို့ရတဲ့ ပြတင်းပေါက်ကျယ်ကြီးတွေကို မျက်နှာပြုထားတဲ့ စာကြည့်စားပွဲတွေရှိတယ်။ စာကြည့်ရတာ ပျင်းလာလို့ စာကြည့်စားပွဲမှာတင် မှောက်အိပ်နေလို့လည်းရတယ်။ စာကြည့်တိုက် တစ်ဘက်စွန်က ဆိုဖာထိုင်ခုံလေးတွေ တန်းစီချထားတဲ့ နေရာသွားပြီး ဆိုဖာပေါ် ပက်လက် အိပ်နေလို့လည်းရတယ်။ ဆွေးနွေးစရာရှိတာ တိုးတိုးတိတ်တိတ် ဆွေးနွေးလို့ရတဲ့ နေရာလေးတွေ ရှိတယ်။ ကောင်လေးတွေ ကောင်မလေးတွေ ရှိတဲ့သူတွေ အတူတူ စာလုပ်ချင် လုပ်လို့ ရတဲ့ စားပွဲတွေလည်း ရှိတယ်။ တစ်ခုပဲ ရှိတာက စာကြည့်တိုိက်ထဲ ဖုန်းပြောတာ စကားကျယ်ကြီးပြောတာတော့ ခွင့်မပြုပါဘူး။ ပုံမှန်ကတော့ မနက် ရှစ်ခွဲကနေ ည ဆယ့်တစ်လေးငါးထိ ဖွင့်ပါတယ်။ စနေတနင်္ဂနွေဆိုရင်တော့ နေ့လည် ဆယ့်နှစ်နာရီမှ စဖွင့်တာပါ။ ပိတ်ချိန်ကတော့ ပုံမှန်အတိုင်းက အတူတူပါပဲ။ တစ်ခါတစ်လေတော့ ညခုနစ်နာရီ ပိတ်တဲ့ရက်တွေလည်း ရှိတတ်ပါတယ်။ မနက်ပိုင်းကို စာကြည့်တိုက်ထဲ သွားမထိုင်တတ်ပေမယ့် နေ့လည်ပိုင်းတွေကတော့ သီးခြား လုပ်စရာ သွားစရာ မရှိရင် စာကြည့်တိုက်ထဲ သွားထိုင်နေတာပါပဲ။ စာကြည့်တိုက်ထဲမှာဆိုတော့ အကျိုးရှိတာ တစ်ခုခုတော့ လုပ်ဖြစ်တာပါပဲ။ စာဖတ်မယ်။ အိမ်စာတွေ လုပ်မယ်။ စာအုပ်တွေ လျှောက်ကြည့်မယ်။ နောက်ဆုံး ပျင်းရင်တောင် အိပ်ချင်အိပ်နေမယ် ဆိုတာမျိုးပေါ့။ အိုင်ယူဂျေ ကျောင်းသားတွေ စာကြည့်တိုက်မှာ စာကြည့်လေ့ရှိတဲ့ ကျောင်းသားတွေထဲမှာ စာကြည့်တိုက်ထဲ မအိပ်ဖူးတဲ့သူတောင် ရှိပါ့မလား ရှိရင်တောင် ရှားလိမ့်မယ်ထင်ပါတယ်။ တစ်ခါတစ်လေများဆို စာဖတ်နေရင်းနဲ့ နံဘေးဝန်းကျင်က ဟောက်သံလေးတွေများတောင် ကြားရတတ်ပါတယ်။ စာကြည့်တိုက်ထဲမှာ ဟောက်သံကြားရတာကတော့ သိပ်ဆန်းတော့တဲ့ ကိစ္စမဟုတ်ပါဘူး။ ဆောင်းနှင်းဝေတန်းတစ်လျှောက်လုံး စာကြည့်တိုက်ထဲမှာ ရေတစ်ဗူး ကျောပိုးအိတ်တစ်လုံးနဲ့ လာပြီး ထမင်းစားချိန် စာကြည့်တိုက်ပိတ်ချိန်တွေကျမှ မပြန်ချင်ပြန်ချင်နဲ့ အခန်းပြန်ရတာပါ။ တစ်ခါတစ်လေ စာကြည့်တိုက်ပိတ်ချိန်ကို သတိမထားမိလို့ စာကြည့်တိုက်ဝန်ထမ်းက လိုက်သတိပေးမှ ပစ္စည်းပစ္စယလေးတွေ ကောက်သိမ်းပြီး ပြန်ခဲ့ရတာလည်း ခဏခဏပါ။
အခု ဆောင်းနှင်းဝေတန်းပြီးရင် ကျောင်းတစ်ပတ် ပိတ်ပါမယ်။ ကျောင်းပိတ်ရက်မှာတော့ ကောင်းကောင်းအနားယူ လျှောက်ပတ်လည်ပြီး နောက်တစ်တန်းအတွက် အားမွေးရမှာပေါ့။ ဧပြီလဆန်းမှာ ပြန်စမယ့် နွေဦးပွင့်ဝေတန်းအတွက်ရယ် ဘွဲ့ယူစာတမ်းအတွက်ရယ် ကြိုင်တင်ပြင်ဆင်ရင်း နွေဦးကို ကြိုဆိုပါ့မယ်။ နှင်းတွေအရည်ပျော်စပြုနေပြီမို့လို့ နှင်းတွေ မကုန်သေးခင် မရောက်ဖူးသေးတဲ့ စကီကွင်းတွေ သွားပြီ စကီစီးမယ်လို့လည်း စိတ်ကူးထားပါတယ်။ လော်ကယ်ရထားကြီး စီးပြီးတော့ အနီးအနားက မြို့တွေ ရွာတွေကို သွားလည်မယ်။ လူချင်းဆုံရင် မျက်နှာလွှဲလေ့ရှိတဲ့ ဂျပန်လူမျိုးတွေရဲ့ မျက်လုံးကို ရအောင်လိုက်ဖမ်းပြီး သူတို့ရဲ့ အပြုံးတွေကို တူးဖော်မယ်။ အရည်ပျော်သွားတဲ့ နှင်းခဲတွေအောက်ကနေ တိုးထွက်လာမယ့် နွေဦးကြို ပန်းပွင့်ရောင်စုံလေးတွေကို လိုက်ရှာပြီး မှတ်တမ်းတင်ဖို့လည်း ရည်ရွယ်ထားပါတယ်။ ဆောင်းဦးရွက်ကြွေရာသီကတည်းက အပင်ပေါ်မှာ သစ်ကိုင်းလေးတွေပေါ်မှာ တစ်ဆောင်းတွင်းလုံး သည်းခံစောင့်ဆိုင်းနေကြရှာတဲ့ ပုရစ်ဖူးလေးတွေ နွေနေခြည်နွေးနွေးအောက်မှာ ဘယ်လို ပြူထွက်ပွင့်အာလာကြမလဲ ဆိုတာကိုလည်း သေချာစောင့်ကြည့်ပြီး မှတ်တမ်းတင်ပါ့မယ်။ ပုံမှန်မရောက်ဖြစ်တော့တဲ့ အားကစားခန်းမကို ပုံမှန် ပြန်သွားနိုင်ပါမယ်။ စာမေးပွဲတွေ စာတမ်းတွေကြောင့် အချိန်နည်းနည်းပဲ ပေးနိုင်ခဲ့တဲ့ ချစ်သမီးပန်းပွင့်လေးကို အချိန်တွေအများကြီးပေးပြီး စကားတွေ ပြောမယ်။ သမီးလေးပြောတာတွေ နားထောင်မယ်။ အတူတူ ဆော့ကြမယ်ပေါ့။ ပြီးတော့ တဆိုင်းဆိုင်းဆုတ်ခွာသွားတဲ့ ဆောင်းနှင်းဝေနဲ့ နှင်းဖြူဖြူတွေကိုလည်း မရှိတော့ကာမှ လွမ်းမနေရအောင် တ၀ကြီး ထိုင်ကြည့်ပစ်ပါမယ်။
. . .
. . .ဒီနေ့ညမှာတော့ ညီအစ်ကိုတွေ စုပြီး အောင်ပွဲခံကြမယ်။ ပျော်သလားဟေ့ မောင်တို့ရေ ပျော်တယ်ဟေ့ ပျော်တယ်ဟေ့ .
No comments:
Post a Comment