ဂျပန်ပြည်မှာ ဘာလုပ်နေတာလဲတဲ့။ ကျောင်းတက်တယ်ဆိုပြီး ကျောင်းတက်တာ စာလုပ်တာ မတွေ့ဘဲ လတ်လျားလတ်လျား လျှောက်သွားတာတွေ ဟိုပွဲသည်ပွဲ တက်နေတာတွေ ဓာတ်ပုံတွေ လျှောက်ရိုက်နေတာတွေ ကောင်မလေးတွေနဲ့ ကျူနေတာတွေပဲ တွေ့နေရပါသတဲ့။
ကျွန်တော်တို့ကို စီးပွားရေးဘာသာရပ်သင်တဲ့ ဆရာကိုရေးရဲ့ စကားလေးတစ်ခွန်းကို ကိုးကားချင်ပါတယ်။ ဆရာက စာသင်မယ်ဆိုတာနဲ့ အဲသလို မှတ်သားစရာကောင်းတဲ့ စကားလေးတွေနဲ့ သင်ခန်းစာကို ဖွင့်တတ်ပါတယ်။ ဆရာကပြောပါတယ်။ ဘယ်တော့မှ မသေတော့ဘူးလို့ ခံယူပြီး ပညာကိုကြိုးစားသင်ပါတဲ့။ နက်ဖြန်သေတော့မယ်လို့ ခံယူပြီး လောကကြီးရဲ့ အလှအပကို ခံစားပါတဲ့။ ဒီစကားနှစ်ခွန်းဟာ တစ်ခွန်းနဲ့တစ်ခွန်း အစွန်းတစ်ဘက်စီမှာ ရှိနေကြပေမယ့် အတူတူတွဲပြီး ပြောထားတာမို့ လောကကြီးမှာ လေ့လာသင်ယူမှုတွေ ကြိုးစားအားထုတ်မှုတွေကို ပျော်ရွှင်ခံစားမှုတွေနဲ့ ဟန်ချက်ညီအောင် ထိန်းညှိနေထိုင်ဖို့ သတိပေးတဲ့ စကားလို့ပဲ ခံယူမိပါတယ်။
တက္ကသိုလ်ကို ရောက်လာတဲ့ အဓိက ရည်ရွယ်ချက်က ဒီတက္ကသိုလ်ကနေ ပညာတွေ ဆည်းပူးသင်ယူပြီး အဲသည်ပညာတွေကို အသုံးချလို့ ကိုယ်ကိုယ်တိုင်နဲ့ ကိုယ့်ပတ်ဝန်းကျင် ကိုယ့်နိုင်ငံကို တည်ဆောက်မြှင့်တင်ဖို့ပါ။ ဒီအချက်ကိုတော့ ဘယ်တော့မှ မျက်ခြေမပြတ်သင့်သလို အရေးကြီးဆုံးအရာအဖြစ် အမြဲ စောင့်ထိန်းလိုက်နာနေရပါတယ်။
အဲသည်တော့ တက္ကသိုလ်ကနေ ဘာတွေ သင်ယူကြမလဲ။ စာတစ်ခုတည်း မဟုတ်တာကတော့ သေချာပါတယ်။ သူ့နိုင်ငံရောက်တုန်းရောက်ခိုက် သူ့နိုင်ငံက လေ့လာသင်ယူစရာတွေ အပုံကြီး ရှိနေပါတယ်။ နောက်ပြီးတော့ နိုင်ငံတကာ ကျောင်းသားတွေ စုစည်းတွေ့ဆုံကြတဲ့ ဒီလိုနေရာမျိုးမှာ သူ့နိုင်ငံကိုယ့်နိုင်ငံ ယဉ်ကျေးမှုတွေ ဓလေ့တွေ အတုယူစရာ သင်ခန်းစာယူစရာတွေ ပြည့်နှက်လို့ နေပါတယ်။ ဒီလို သင်ယူဖို့ဆိုတာ ဒီအတိုင်း သူများလုပ်တာ ထိုင်ကြည့်နေရုံနဲ့ မပြီးပါဘူး။ အခြေအနေ အချိန်အခါ ကိုယ့်ရဲ့ အဆင်ပြေမှုကို မူတည်ပြီး ကျောင်းသားတွေရဲ့ လှုပ်ရှားမှုတွေမှာ ပါဝင်လုပ်ဆောင်ရတယ်။ အပေါင်းအသင်းလုပ်ရတယ်။ စကားတွေ ပြောရတယ်။ ငြင်းရခုန်ရတယ်။ ဆွေးနွေးညှိုနှိုင်း တိုင်ပင်ရတယ်။ အတူသွား အတူလာရတယ်။ အတူစားရတယ်။ အတူကစားရတယ် စသည်ဖြင့်ပေါ့လေ။ ကိုယ်ယူနိုင်ရင် ယူနိုင်သလောက် ပညာတွေ များများရနိုင်တဲ့ နေရာမျိုးလို သဘောထားပါတယ်။
အဲသည်တော့ တက္ကသိုလ်ကျောင်းသားတစ်ယောက်ရဲ့ အခွင့်အရေးကို အသုံးချပြီးတော့ အပေါ်မှာ ပြောခဲ့တဲ့ ရနိုင်သမျှ ပညာတွေ အတွေ့အကြုံတွေကို ယူပါတယ်။ ဒါပေမယ့် သေချာတာကတော့ အချိန်နဲ့ ကြိုးစားအားထုတ်မှု ရဲ့ ရာခိုင်နှုန်း အများဆုံးကတော့ သင်ကြားနေတဲ့ ပညာရပ်အပေါ်မှာ မြှပ်နှံထားပါတယ်။ ဘယ်လောက်ပဲ ဘယ်တွေကို လတ်လျားလတ်လျား သွားသွား အချိန်တန် အခန်းပြန်ရောက်ရင် ကျောပိုးအိတ်လွယ်ပြီး စာကြည့်တိုက်ကို ပြေးရပါတယ်။ ဘယ်လောက်ပဲ ဘယ်လို လှုပ်ရှားမှုတွေနဲ့ အလုပ်ရှုပ်နေနေ စာသင်ချိန် စာဆွေးနွေးချိန် စာရေးစာဖတ်ချိန်ကို အထိခိုက် ခံလို့ မရပါဘူး။
ညနေ စာသင်ချိန်ပြီး ခြေခင်းလက်ခင်းသာလို့ နေညိုချိန် ရွှေရောင်တောက်တဲ့ နေခြည်အောက်မှာ စိတ်အေးလက်အေးလမ်းလျှောက်ချင်လျှောက်မယ်။ အားကစားခန်းသွားပြီး ကယ်လိုရီ သုံးလေးရာလောက်ကုန်အောင် ကစားမယ်။ အဆောင်ရှေ့ မြက်ခင်းမှာ သူငယ်ချင်းတွေနဲ့ ကစားမယ်။ ညနေစာကို ထမင်းနည်းနည်းနဲ့ အသီးအရွက် များများစားမယ်။ ထမင်းစားပြီး သွားတိုက်ပြီးတာနဲ့ ကျောပိုးအိတ် ကောက်ထမ်းပြီး စာကြည့်တိုက်ကို ဒိုးရပါတယ်။ စာကြည့်တိုက်ရောက်တော့မှ စာကြည့်စားပွဲပေါ် မှောက်ပြီး အိပ်ပျော်သွားတာလည်း တစ်ပိုင်းပေါ့လေ။
တစ်ခါတစ်လေ ညပိုင်းမှာလည်း ဟိုအတန်း ဒီအတန်းက ရှိတတ်သေးတာကိုး။ အတန်းမရှိလည်း ဂီတကလပ်က သီချင်းတိုက်ဖို့ ရှိတာ၊ အိုင်အာကောင်စီက အစည်းအဝေးရှိတာ၊ စာအတူလုပ်တဲ့အဖွဲ့က စာဆွေးနွေးဖို့ ရှိတာ၊ ဒါမှမဟုတ် ချယ်ရီပင်တန်းမှာ ဂစ်တာသွားတီးကြဖို့ရှိတာ ဒါလေးတွေတော့ ရှိတတ်ပါတယ်။ ရှားတောင့်ရှားခဲ့ပေါ့။ ဒါတွေကလွဲရင် ကျန်တဲ့အချိန်တွေ အကုန်လုံးနီးပါးက စာကြည့်တိုက်ထဲက စာကြည့်စားပွဲမှာပဲ ရှိနေတာ များပါတယ်။ စာကြည့်တိုက်က ည ဆယ့်နှစ်နာရီ ထိုးခါနီးမှာ ပိတ်လို့ ပြန်လာရပေမယ့် အခန်းပြန်ရောက်တော့လည်း ချက်ချင်းအိပ်ဖြစ်တယ်ဆိုတာ မရှိပါဘူး။ တစ်ခါတစ်လေ အိမ်နဲ့ စကားပြော။ မပြီးတဲ့စာ ဆက်ကြည့်။ တစ်ခါတစ်လေတော့လည်း မီးဖိုထဲ လူရှင်းချိန်မို့ ဟင်းဆင်းချက်။ တစ်ခါတစ်လေတော့လည်း အ၀တ်လျှော်ပေါ့။
ဒါကြောင့် လတ်လျားလတ်လျား လုပ်နေတာတွေ ရှိသလို အဲသလို အချိန်တွေလည်း ရှိပါတယ်လို့။ ဖေ့ဘုတ်ပေါ်တက်လာတဲ့ ပုံတွေက အနော်တို့ လက်တွေ့ဘ၀ရဲ့ မဆိုသလောက် ရာခိုင်နှုန်း နည်းနည်းလေးသာ ရှိပါသေးတယ်လို့ ပြောလည်း ပြောချင်တယ်
No comments:
Post a Comment