ပျော်ရွှင်တက်ကြွတဲ့သူတွေ တွေ့ရတဲ့အခါ ကျွန်တော်တို့တွေ အားကျမိတတ်ကြပါတယ်။ ကျွန်တော်တို့ အားကျမိတဲ့အတိုင်း သူတို့တွေ တကယ်ရော ပျော်နေကြရဲ့လား။ ကျွန်တော်ငယ်တုန်းက ကျောင်းမှာတုန်းက သိပ်ကိုအားကျခဲ့ရတဲ့ အစ်ကိုကြီးတစ်ယောက်ရှိတယ်။ ကျောင်းဆင်းသွားပြီး ရုံးကြီးကနားကြီးမှာ အတူတူ တာဝန်ထမ်းဆောင်တော့လည်း အစ်ကိုကြီးရဲ့ အားကျအတုယူစရာကောင်းတဲ့ ကိုယ်ရည်ကိုယ်သွေးတွေ ပိုလို့တောင် တိုးလာတယ်ထင်ရတယ်။ အစ်ကိုကြီးဟာ ကြည့်လိုက်ရင် အမြဲပျော်ရွှင်တက်ကြွနေတာ။ အ၀တ်အစားဝတ်လိုက်ရင်လည်း စမတ်ကျကျ နေတာထိုင်တာလည်း သန့်သန့်ရှင်းရှင်း သပ်သပ်ရပ်ရပ်။ လမ်းလျှောက်သွားရင်တောင် မာန်ချီနေတဲ့ခြေလှမ်းတွေနဲ့၊ ကြည့်လိုက်ရင်လည်း အမြဲပြုံးပြုံး ပြုံးပြုံးနဲ့။ အလုပ်တွေ လုပ်နေတာများဆို တစ်ခုမှ စိတ်မပါ လက်မပါ လုပ်တယ်ရယ်လို့ မရှိဘူး။ အစ်ကိုကြီးနဲ့ တစ်ဆောင်တည်းနေတော့ တစ်ခါသားမှာ အတူတူဝိုင်းဖွဲ့ကြရင်း အစ်ကိုကြီးကို မေးမိတယ်။ အစ်ကိုကြီး ကြည့်ရတာ ဘာအပူအပင်မှ ရှိပုံမရဘူး အမြဲတမ်းရွှင်လန်းတက်ကြွနေတာပဲ ဆိုတော့ အစ်ကိုကြီးပြန်ပြောပြတဲ့ စကားတွေ ခုထက်ထိတောင် မှတ်မိနေပါသေးတယ်။
ညီလေး ကိုယ့်ကို အမြဲတမ်းပျော်ရွှင်နေတဲ့သူလို့ ထင်တဲ့အတွက် ကျေးဇူးတင်ပါတယ် ၀မ်းလည်းသာပါတယ်တဲ့။ ဒါပေမယ့် ကိုယ့်မှာ အပူတွေနဲ့ပါကွာတဲ့။ ကိုယ့်ညီလေးတစ်ယောက်က ကုမရတဲ့ရောဂါနဲ့ အိပ်ယာထဲလဲနေတာ သူ့အတွက်လည်း ပိုက်ဆံတွေကုန်နေတာ သောက်သောက်လဲပဲတဲ့။ တစ်မိသားစုလုံးလည်း အဲသည်အတွက် တစ်ရက်မှ စိတ်ချမ်းသာရတယ်ဆိုတာ မရှိဘူးတဲ့။ ကိုယ့်ညီမလေးလည်း ကျောင်းတက်နေတာကို ကိုယ်က ထောက်ပံ့ပေးနေရတယ်တဲ့။ တစ်လကို ကိုယ်ရတဲ့ လစာ တစ်သိန်းသုံးသောင်းခွဲမှာ ကိုယ်က သုံးသောင်းခွဲပဲ သုံးရတာတဲ့။ ကျန်တာ ညီမလေးကို ကျောင်းစရိတ်ပေးရတယ်တဲ့။ အရာရှိတန်မဲ့နဲ့ အရာရှိလို သုံးစရာစွဲစရာ လိုလာတဲ့အခါ ငါ့မှာ ပိုက်ဆံကို ဘယ်နားက အပိုထွက်လာမလဲဆိုပြီး မနည်းစိစစ် သုံးနေရတာပါကွာတဲ့။ တစ်ခါတစ်လေများဆို ရုံးဆင်းနောက်ကျလို့ အဆောင်က ထမင်းစားဆောင် ပိတ်သွားတဲ့ အခါ ၀ယ်စားစရာလည်း ပိုက်ဆံမရှိလို့ ထမင်းမစားဘဲ နေရပါတယ်တဲ့။ တစ်ခါတစ်လေကျတော့လည်း ဆံပင်ညှပ်စရာ ပိုက်ဆံသုံးရာတောင် မရှိလို့ အကြွေးညှပ်ခဲ့ရတာတွေလည်း ရှိပါတယ်တဲ့။ သူငယ်ချင်းတွေက ကိုယ့်အပေါ် ကောင်းကြတာ ၀မ်းသာစရာပေမယ့် ကိုယ်က ဘယ်တော့မှ ပြန်မကောင်းနိုင်တဲ့အဖြစ်က တကယ်ကို ခံစားရခက်တဲ့ အဖြစ်ပါတဲ့။ ကောင်မလေးကလည်း ပြန်မချစ်ပါဘူးတဲ့။ အဲသည်အတွက်လည်း အသည်းကွဲနေရပါတယ်တဲ့။ တစ်ခါတစ်ခါများဆို အိမ်က ပိုက်ဆံလိုတယ်လို့ ပြောတဲ့အခါမျိုးမှာ သားကြီးဖြစ်တဲ့သူက ဘယ်လိုမှ ငြင်းဆန်နိုင်အားမရှိပေမယ့် အိမ်ကလိုတဲ့ပိုက်ဆံကိုလည်း မရှာပေးနိုင်တဲ့အခါ ဘယ်လိုစိတ်အကျဉ်းအကျပ်ဖြစ်ရသလဲဆိုတာ ကိုယ်တိုင်ကြုံဖူးမှ သိနိုင်တာမျိုးပါတဲ့။ နောက်ထပ်ကိုယ်မပြောပြချင်တဲ့ စိတ်ပျက်စရာ အခက်အခဲ အကျဉ်းအကျပ်တွေကိုတော့ မသိချင်ပါနဲ့တော့တဲ့။ ( အဲဒါကို ပြောပြနေတာတောင်မှ သူ့ရည်းစားအကြောင်း ကြည်ကြည်နူးနူး ပြောနေသလို ပြုံးတုံးတုံးနဲ့ဗျ အကြောင်းမသိရင် ၀ါနေသလား မှတ်ရတယ်)
ဒါပေမယ့် အစ်ကိုကြီးရာ အစ်ကိုကြီးကြည့်ရတာ အမြဲတမ်း တက်တက်ကြွကြွ ရွှင်ရွှင်လန်းလန်းနဲ့ ဆိုတော့ ကျွန်တော်တို့မှာ အစ်ကိုကြီးကို မြင်ရင်တောင် ရွှင်လန်းတက်ကြွတာတွေ ကူးသွားပြီး ကိုယ်တိုင် တက်ကြွလာတတ်တာ။ အစ်ကိုကြီး လုပ်ငန်းခွင်ထဲမှာဆို ဟာသတွေပြောလိုက် ရယ်လိုက်မောလိုက်နဲ့ အလုပ်တွေ လုပ်နေတာမြင်ရတာ၊ ရုံးအဖွဲ့သားတွေနဲ့ ပျော်ပျော်ရွှင်ရွှင် စလိုက်နောက်လိုက် အလုပ်မလုပ်ချင်တဲ့သူတွေကို အားတွေပေးလိုက်နဲ့ နေနေတာ မြင်ရတာ အခု အစ်ကိုကြီး ပြောပြတာတွေကို ယုံဖို့တောင် ခပ်ခက်ခက်ပဲ ဆိုတော့။ အေးပါ ညီလေးရာတဲ့ မယုံပါနဲ့ကွာတဲ့။ တော်ကြာ ငါပြောတာတွေ ယုံပြီး ငါ့ကိုမြင်တာနဲ့ မင်းပါ စိတ်ညစ်နေပါအုံးမယ်တဲ့။ ငါလည်း မနက် အိပ်ယာနိုးတာနဲ့ စိတ်ညစ်စရာတွေ အကုန်လုံးကို မေ့တန်သရွေ့မေ့ထားပြီး တကယ်ကို ပျော်ရွှင်တက်ကြွနေသူတစ်ယောက်လို ဟန်ဆောင်ပြီး လုပ်ငန်းခွင်ကို လာရတာပါတဲ့။ ကိုယ့်ရဲ့ စိတ်ခံစားချက်အမှန်တွေကို ကိုယ့်ကိုယ်ကို မရှိချင်ယောင်ဆောင်ပြီး ပျော်ရွှင်နေတယ်လို့ ကိုယ့်ကိုယ်ကို ညာပြီး အလုပ်လုပ်နေရတာပါတဲ့။ ကိုယ့်ကိုယ်ကို ညာတယ်ဆိုတာ ကောင်းလားမကောင်းလား မသိပေမယ့် ကိုယ်ကတော့ ညာရင်းညာရင်းနဲ့ တကယ်ထင်ပြီး လုပ်ငန်းခွင်ထဲမှာ ပျော်မိတယ်တဲ့။ အလုပ်တွေ သိပ်ပင်ပန်းတဲ့အခါ အလုပ်ဖိအားတွေ များတဲ့အခါ စောစောစီးစီးရုံးဆင်းပြီး အဆောင်ပြန် နားနားနေနေ အေးအေးလူလူ နေရတဲ့ အဖြစ်လေးကို တောင့်တမိပေမယ့် ကိုယ့်အခန်းကို ပြန်ရောက်တဲ့အခါ တကယ့်ဘ၀မှန်က စိတ်ခံစားချက်တွေ သောကတွေကို အဲသည်အချိန်ကျတော့ မေ့ထားလို့ မရတော့ဘူးတဲ့။ ဒါကြောင့် စိတ်ပင်ပန်းရတာချင်းအတူတူ လုပ်ငန်းခွင်မှာဘဲ ကိုယ့်ရဲဘော်ရဲဘက်တွေကြားမှာ ပျော်ချင်ယောင်ဆောင်ပြီး ပင်ပန်းနေရတာက ပိုသက်သာပါတယ်ကွာတဲ့။ ဒါကြောင့် အလုပ်တွေကို ပျော်ရွှင်တက်ကြွချင်ယောင်ဆောင်ပြီး လုပ်နေရတာပါတဲ့။ နောက်ပိုင်း စကားစပ်မိလာ တော်တော်လေးလည်း ရင်းနှီးလာတော့ အစ်ကိုကြီးအကြောင်းတွေ ပိုသိလာရတဲ့အခါ အစ်ကိုကြီးကို လေးစားချစ်ခင်တာတွေ မလျော့သွားပေမယ့် သနားမိတာတော့ အမှန်ပါပဲ။ အဲဒီလောက် ကြံ့ခိုင်တဲ့ အစ်ကိုကြီးတစ်ယောက်ကို အားပေးစကားပြောရလောက်အောင် ကျွန်တော်က မကြံ့ခိုင်ပါဘူး။ အားပေးစကားပြောစရာလည်း စကားလုံးတွေ မရှိပါဘူး။ ဘာလို့လည်းဆိုတော့ အစ်ကိုကြီးက သူ့အခက်အခဲတွေကို အကောင်းဆုံးနည်းလမ်းနဲ့ ရင်ဆိုင်နေတယ်လို့ ယုံကြည်မိလို့ပါပဲ။ နောက်တစ်ခုက အစ်ကိုကြီးက သူ့ကို အားပေးစကားတွေဘာတွေ ပြောတာကိုလည်း ကြိုက်ပုံမရပါဘူး။ သူ့ကိုသနားတာ ကရုဏာမျက်လုံးနဲ့ အကြည့်ခံရတာကိုတောင် တော်တော် စက်ဆုပ်ပုံရပါတယ်။ သူ့အခက်အခဲလေးတွေကို ကျွန်တော်တို့ကို ပြောပြတယ်ဆိုတာကလည်း ရင်ဖွင့်ပြရုံသက်သက်ပဲဆိုတာရယ် ကျွန်တေ်ာတို့က သူပြောတာလေးကို ဂရုတစိုက်နားထောင်ပေးတယ်ဆိုတာကတင် အစ်ကိုကြီးအတွက် စိတ်လက်ပေါ့ပါးစေမယ့် အကြောင်းဖြစ်တယ်ဆိုတာတော့ တဖြည်းဖြည်းသိလာရပါတယ်။
အစ်ကိုကြီး တစ်ဆင့်မြင့်ရာထူးနဲ့ ပြောင်းသွားပြီး လူချင်းမတွေ့ကြတာ နှစ်တွေကြာမှ ဖေ့ဘုတ်ပေါ်မှာ ပြန်တွေ့ပါတယ်။ အစ်ကိုကြီး တိုင်းလိုင်း ၀င်ကြည့်တဲ့အခါ ပျော်စရာကောင်းတဲ့ မိသားစုလေးနဲ့ ပျော်ရွှင်ချမ်းမြေ့နေတဲ့ အစ်ကိုကြီးပုံတွေ စာသားလေးတွေ အများကြီးတွေ့ပါတယ်။ ဒီတစ်ခါတော့ တို့အစ်ကိုကြီး တကယ်ပျော်နေတာဖြစ်ပါစေလို့ ဆန္ဒပြုလိုက်မိပါတယ်။ အစ်ကိုကြီး ပျော်ရွှင်ပါစေ
No comments:
Post a Comment