ချွေးနဲ့ရေးတဲ့ ပန်းချီ

 Lockdown at office

သရဲကြောက်သူများ မဖတ်ရ

. . . ဒီစာကို ဖတ်မိကြရင် ဒီမောင် သောက်ရမ်းများနေပြီဆိုပြီး စီနီယာတွေ သူငယ်ချင်းတွေက နားပန်ကျင်းချင်ကြလိမ့်မယ်ဆိုတာ သိပေမယ့် . . .
.
. . . ကိုယ်တွေနေတဲ့ အဆောင်က တောင်စောင်းမှာ အလျားလိုက် ဆောက်ထားတာဆိုတော့ လှေခါးထစ်လိုပဲ အနိမ့်အမြင့် အထစ်အထစ်နဲ့ဆိုတော့ စင်္ကြန် ကလည်း လှေခါးလိုပဲပေါ့၊ အပြင်တွေလည်း သွားလို့မရတဲ့ နေရာဖြစ်တာရယ် စည်းကမ်းကလည်း တင်းကျပ်တာရယ်ကြောင့် တစ်စင်္ကြန်တည်း နေကြသူတွေအားလုံး သူငယ်ချင်းတွေနဲ့ စီနီယာတွေ ချစ်ချစ်ခင်ခင် စည်းစည်းလုံးလုံး ဟေးလေးဝါးလား နေကြတယ် . . .
.
. . . တနင်္ဂနွေနေ့ညနေပိုင်း စိတ်အေးလက်အေးရှိကြတဲ့ တစ်ရက် ဖုန်းကို ကလိရင်း သရဲပုံတွေ ထင်အောင်ရိုက်လို့ရတဲ့ အက်ပလီကေးရှင်းတစ်ခုကို သွားတွေ့တော့ ဒေါင်းလုတ်ချပြီး စမ်းကြည့်တယ်၊ နောက်နေ့မှာ အတန်းပြန်တက်ရမှာမို့ အဝတ်အစားပြင်ဆင် ဖိနပ်တွေဘာတွေတိုက် ကော်ရစ်ဒါမှာ စကားစုပြောတဲ့သူကပြော နဲ့ အေးအေးချမ်းချမ်းရှိနေကြချိန်၊ ကျနော့်ဖုန်းထဲက အပလီကေးရှင်းကို သုံးပြီး သူငယ်ချင်းတစ်ယောက် ကော်ရစ်ဒါမှာ တံမျက်စည်းလှည်းနေတဲ့ပုံကို ရိုက်လိုက်တယ်၊ အထဲက သရဲမက ခေါင်မိုးအထက်နားမှာ မထင်မရှားလေးပေါ့ . . .
.
. . . ရိုက်လည်း ရိုက်ပြီးရော ကိုယ့်ဖုန်းကို အံ့ဩဟန်နဲ့ ပြူးပြဲကြည့် သူငယ်ချင်းရဲ့ အထက်ကိုလည်း မော့ကြည့်လုပ်တော့ ဟို တံမျက်စည်းလှည်းနေတဲ့မောင်က စိတ်ထဲ မရိုးမရွဖြစ်ပြီး လာကြည့်ပါလေရော၊ ကြည့်တော့ တွေ့တာပေါ့၊ သူက ရှေ့မှာ ကုန်းပြီး တံမျက်စည်းလှည်းနေတဲ့ နောက်ကျော အပေါ်ဘက်မှာ ဆံပင်ဖျားလျားနဲ့ သရဲမက မှုန်မှုန်ဝါးဝါး အခန့်သား၊ သူလည်း ခေါင်းနားပန်း ကြီးသွားပုံရတယ်၊ သူ့အခန်းရှေ့ကြီးမှာကိုး၊ တစ်ယောက်တစ်ခန်းနေကြတာမို့ သူ့အခန်းရှေ့ရိုက်တဲ့ ပုံထဲ ချောက်ခြားစရာ သရဲပုံထင်နေတာ ဘယ်လိုပဲ မကြောက်တတ်ဘူးဆိုပေတဲ့ သူလည်း ဟင်ကနဲ ဟာကနဲတော့ ဖြစ်သွားပြီး အလန့်တကြားနဲ့ ဟိုဘေးနားမှာ ကော်ရစ်ဒါကို တက်လိုက်ဆင်းလိုက်လုပ်ပြီး စာ တတွတ်တွတ်ရွတ်နေတဲ့ တစ်ယောက်ကို လှမ်းခေါ်တယ်၊ ဟိုမောင်ကလည်း မျက်ကလဲဆန်ပြာ ပြေးလာတဲ့ပြီး ဖုန်းကိုကြည့်ပြီးတော့ ရုတ်တရက် ကြောင်သွားတာပေါ့ အပေါ်တွေဘာတွေ မော့ကြည့်လို့ . . .
.
. . . ကဲ ကိုယ်လိုချင်တဲ့ အနေအထားတော့ ရောက်ပြီဆိုပြီး ပုံကို ချက်ချင်း ဖျက်လိုက်တယ်၊ ဖုန်းထဲ ထည့်ထားတဲ့ သရဲအပလီကေးရှင်းကိုလည်း ရှင်းထုတ်လိုက်တယ်၊ အာ့အချိန်မှာ သတင်းက ကော်ရစ်ဒါတစ်လျှောက် ပြန့်နေပြီး ဗိုလ်ကောင်းဖုန်းထဲ သရဲပုံပေါ်လို့တဲ့၊ ကိုယ့်ဆီလာကြည့်တဲ့အခါ ကိုယ်က ဖျက်ပြီးနေပြီ သဲလွန်စက မပေါ်တော့ဘူး၊ ဗိုလ်ကောင်းဆိုးလေးနော်
.
. . . ဟာ မင်းနောက်နေတာမို့လားတဲ့ သရဲပုံပေါ်တဲ့ အပလီကေးရှင်းနဲ့ လုပ်ရင် ရတာကိုလည်း၊ ကိုယ်လည်း မင်သေသေနဲ့ ဟာ အာ့တာရှိတာ သိတာပေါ့ ဟိုနေ့ကတောင် စမ်းကြည့်သေးတယ် မကြိုက်လို့ ပြန်တောင်ဖြုတ်လိုက်ပြီ အခုက အာ့အပလီကေးရှင်းကလို မဟုတ်ဘူးဗျ တစ်ကယ့်ပုံကြီး ဒီကောင်တွေ မေးကြည့်ပါလားပေါ့၊ ဟိုမောင်နှစ်ယောက်ကလည်း အပြေးအလွှား ထောက်ခံတယ်၊ အာ့မှာ ဟုတ်သော်ရှိ မဟုတ်သော်ရှိ သရဲဇာတ်လမ်းက တကယ်ကြီးဖြစ်ပြီး အခန်းအပြင်ကို ဆောင်းဘောက်ကြီးထုတ် ပရိတ်ဖွင့်တဲ့သူနဲ့၊ သူငယ်ချင်းအခန်းမှာ ညနက်ပြီး အိပ်ချင်နေတဲ့အထိ စာသွားကျက်တဲ့သူနဲ့ . . .
.
. . . အဲ သူတို့ပြသနာက ကိစ္စမရှိပေမယ့် ကိုယ့်ပြဿနာက ကိစ္စရှိလာတယ်၊ ကိုယ်တိုင် လံကြုပ်ဇာတ်လမ်းထွင်ပြီး ပိပိရိရိ လုပ်ထားတာပေမယ့် အာ့တာကို တကယ်ထင်ပြီး ကိုယ်တိုင် ဝင်ရောကြောက်နေတာ၊ အားလုံးက ကြောက်နေကြတော့ သူတို့ကိုကြည့်ပြီး ကိုယ်ပါရောကြောက်နေတာ အဲသည်ညက မရွတ်စဖူး ပရိတ်တွေရွတ်လိုရွတ်၊ မနက်ကျတော့လည်း ကြံ့ခိုင်ရေး တန်းစီချိန်မတိုင်ခင် အစောကြီး နိုးနေလို့ မနက်ချမ်းချမ်းစီးစီးကို ဂုဏ်တော်ကွန်ချာတွေအကျယ်ကြီးဖွင့်ပြီး ငုတ်တုတ်ထထိုင်နေရတယ် . . .
.
ကိုယ့်ဟာကို ဇာတ်လမ်းထွင်ပြီး ကိုယ့်ဟာကိုယ်ပြန်ယုံတတ်တဲ့အဖြစ်တွေ လောကကြီးမှာ တကယ်ကိုရှိတယ်
. လူကိုများ မကြောက်တတ်ဘူးများ မှတ်နေလာ့
.
ဗိုလ်ကောင်း
၂၀၁၂ ဇူလိုင်လခန့်
ကရင်ပြည်နယ်အစွန်က
တောင်ခိုးတွေဝေတဲ့
မြို့သေးသေးလေးမှာ

တစ်ကိုယ်ရေလွတ်လပ်ခွင့် ချိုးဖောက်ခံရခြင်း

“အစိုးရက ဆက်သွယ်ရေး ကွန်ရက်ပေါ်မှ အချက်အလက်များ တောင်းခံခြင်းသည် လူ့အခွင့်အရေးအတွက် မေးခွန်းထုတ်စရာ ရှိလာကြောင်း တယ်လီနောက သတင်းထုတ်ပြန်”
.
ဆိုပြီး Eleven Media Group ဝက်ဆိုက်မှာ ဒီဇင်ဘာ ၄ ရက်စွဲနဲ့ တင်ထားတဲ့ သတင်းကို ဖတ်မိတော့ ဒီကိစ္စနဲ့ ပတ်သက်ပြီး အစိုးရက ငါတို့ တယ်လီဖုန်းပြောနေတာ အင်တာနက်သုံးနေတာ မက်ဆေ့ပို့နေတာတွေကို ဘယ်လောက်အတိုင်းအတာထိ ကြားဖြတ် ရယူနေသလဲ၊ ရယူခွင့်ရှိသလား ၊ ငါတို့ရဲ့ လုံခြုံရေးကို ဥပဒေက ဘယ်လောက်အထိ အကာအကွယ်ပေးထားလဲ၊ အစိုးရရဲ့ လုပ်ရပ်က ဥပဒေနဲ့ ညီရဲ့လား၊ အစိုးရက တည်ဆဲဥပဒေတွေကို ချိုးဖောက်ပြီး ငါတို့ရဲ့ လွတ်လပ်လုံခြုံမှုကို ကျူးကျော်နေသလား ဆိုတဲ့ မေးခွန်းတွေ ထွက်လာလို့ လေ့လာကြည့်ရာမှာ အခုလိုတွေ့ပါတယ်
.
. . . အခြေခံဥပဒေမှာ နိုင်ငံသားတစ်ယောက်ရဲ့ လွတ်လပ်မှုနဲ့ လုံခြုံမှုကို အကာအကွယ်ပေးထားတဲ့ ပုဒ်မ နှစ်ခု တွေ့ပါတယ်။ အဲဒါတွေက -
၃၅၃။ မည်သူ့ကိုမျှ တည်ဆဲဥပဒေနှင့်အညီမှတစ်ပါး အသက်ကိုဖြစ်စေ၊ ပုဂ္ဂိုလ်ဆိုင်ရာလွတ်လပ်မှုကို ဖြစ်စေ နစ်နာဆုံးရှုံးမှုမရှိစေရ။
၃၅၇။ ဤဖွဲ့စည်းပုံအခြေခံဥပဒေပါ ပြဋ္ဌာန်းချက်များနှင့်မဆန့်ကျင်လျှင် နိုင်ငံတော်သည် နိုင်ငံသား များ၏ နေအိမ်ဥပစာလုံခြုံမှု၊ ပစ္စည်းလုံခြုံမှု၊ စာပေးစာယူနှင့် အခြားဆက်သွယ်ရေးဆိုင်ရာ လုံခြုံမှုများ အတွက် ဥပဒေအရကာကွယ်ပေးရမည်။ တို့ပဲဖြစ်ပါတယ်။
.
. . . ဒီကိစ္စနဲ့ပတ်သက်ပြီး ဖွဲ့စည်းပုံအခြေခံဥပဒေပါ နိုင်ငံသားများ၏ ပုဂ္ဂိုလ်ဆိုင်ရာလွတ်လပ်မှုနှင့် ပုဂ္ဂိုလ်ဆိုင်ရာလုံခြုံမှုများကို ကာကွယ်ပေးနိုင်ရန်အလို့ငှာ ဆိုပြီး ပြည်ထောင်စုလွှတ်တော်က ပြဌာန်းထားတဲ့ နိုင်ငံသားများ၏ ပုဂ္ဂိုလ်ဆိုင်ရာလွတ်လပ်မှုနှင့် ပုဂ္ဂိုလ်ဆိုင်ရာလုံခြုံမှုကိုကာကွယ်ပေးရေးဥပဒေ အခန်း (၄)
တားမြစ်ချက်များ ၊ ပုဒ်မ ၈။ တာဝန်နှင့်လုပ်ပိုင်ခွင့်ရှိသူမည်သူမျှ တည်ဆဲဥပဒေနှင့်အညီ ခွင့်ပြုမိန့်၊ ခွင့်ပြုချက် သို့မဟုတ် ဝရမ်း တစ်စုံတစ်ရာမရှိဘဲဖြစ်စေ၊ နိုင်ငံတော်သမ္မတ သို့မဟုတ် ပြည်ထောင်စုအစိုးရအဖွဲ့၏ ခွင့်ပြုချက်မရှိဘဲ ဖြစ်စေ-
(ဂ) ပုဂ္ဂိုလ်တစ်ဦးနှင့်တစ်ဦးအကြား ဆက်သွယ်ရေးပစ္စည်းကိရိယာတစ်မျိုးမျိုးဖြင့် ဆက်သွယ်ပြော ကြားခြင်းကို ကြားဖြတ်ဖမ်းယူနားထောင်ခြင်း သို့မဟုတ် တစ်နည်းနည်းဖြင့် အနှောင့်အယှက် ပေးခြင်း မပြုရ။
(ဃ) ဆက်သွယ်ရေး အော်ပရေတာများထံမှ ပုဂ္ဂိုလ်ဆိုင်ရာ တယ်လီဖုန်းနှင့် အီလက်ထရောနစ်ဆက် သွယ်ရေး သတင်းအချက်အလက်များအား တောင်းယူခြင်း၊ ထုတ်ပေးခြင်းမပြုရ။
လို့ ဖော်ပြထားတာကြောင့် နိုင်ငံတော်သမ္မတ သို့မဟုတ် ပြည်ထောင်စုအစိုးရအဖွဲ့ရဲ့ ခွင့်ပြုချက်ရှိခဲ့ရင် ကျနော်တို့ ပြောနေတဲ့ တယ်လီဖုန်းတွေ မက်ဆေ့တွေ စတာတွေနဲ့ ပတ်သက်တဲ့ အချက်အလက်တွေကို တရားရုံးခွင့်ပြုချက်မပါဘဲ အစိုးရက တောင်းခံပိုင်ခွင့်ရှိနေတဲ့ သဘောကို တွေ့ရပါတယ်။
.
. . . ဒါ့အပြင် ဆက်သွယ်ရေးဥပဒေကို လေ့လာကြည့်တဲ့အခါမှာလည်း အခန်း (၅)
လိုင်စင်ရရှိသူ၏တာဝန်များ၊ ပုဒ်မ
၁၇။ လုပ်ငန်းလိုင်စင်ရရှိသူသည် မိမိ၏ ဆက်သွယ်ရေးဝန်ဆောင်မှုလုပ်ငန်းမှတစ်ဆင့် ထုတ်လွှင့်သော သို့မဟုတ် ဖမ်းယူသောသတင်းအချက်အလက်များ၊ အကြောင်းအရာများနှင့် သုံးစွဲသူပြည်သူတစ်ဦး ချင်းစီ၏ လျှို့ဝှက်ထားရှိရမည့် သတင်းအချက်အလက်များကို လုံခြုံစွာထိန်းသိမ်းထားရှိပြီး တည်ဆဲဥပ ဒေများနှင့်အညီ ခွင့်ပြုထားသည့်ကိစ္စမှအပ သက်ဆိုင်ခြင်းမရှိသူအား ထုတ်ဖော်အသိပေးခြင်း မပြုရ။ လို့ဖော်ပြထားပါတယ်။
.
ဆက်သွယ်ရေးဥပဒေ အခန်း(၉) အသုံးပြုသူကို အကာအကွယ်ပေးခြင်း အခန်းမှာ
၃၁။ (က) ဦးစီးဌာနသည် လုပ်ငန်းလိုင်စင်နှင့် စပ်လျဉ်း၍ အသုံးပြုသူကို အကာအကွယ်ပေးသည့် စံနှုန်း များကို ဝန်ကြီးဌာန၏သဘောတူညီချက်ဖြင့် သတ်မှတ်ပေးရမည်။
(ခ) လုပ်ငန်းလိုင်စင်ရရှိသူသည် အသုံးပြုသူကို အကာအကွယ်ပေးသည့် စံနှုန်းများနှင့်အညီ လိုက်နာ ဆောင်ရွက်ရမည်။
၄၀။ ဤဥပဒေပါ ပြဋ္ဌာန်းချက်များကို အကောင်အထည်ဖော်ဆောင်ရွက်ရာတွင်-
(က) ဦးစီးဌာနသည်-
(၁) လိုအပ်သောပုဂ္ဂိုလ်များကို ခေါ်ယူမေးမြန်းခြင်း၊ လိုအပ်သော သတင်းအချက်အလက်နှင့် အ ထောက်အထားများ၊ စာရွက်စာတမ်းများနှင့် စာတမ်းအမှတ်အသားများကို တင်ပြစေခြင်းတို့ကို ပြုနိုင် သည်။
၆၉။ မည်သူမဆို ဆက်သွယ်ရေးနှင့် စပ်လျဉ်း၍ တရားစွဲဆိုခြင်းကိစ္စနှင့် တရားရုံးအမိန့်အရ ထုတ် ဖော်ပြသရန် ခွင့်ပြုထားသည့်ကိစ္စများမှအပ ယုံကြည်စိတ်ချရသောစနစ်ဖြင့်ဖြစ်စေ၊ လျှို့ဝှက်စနစ်ဖြင့် ဖြစ်စေထားရှိသော သတင်းအချက်အလက်ကို ယင်းတို့နှင့်သက်ဆိုင်ခြင်းမရှိသည့် အခြားသူ တစ်ဦးဦးသို့ တစ်နည်းနည်းဖြင့် ထုတ်ဖော်ကြောင်း ပြစ်မှုထင်ရှားစီရင်ခြင်းခံရလျှင် ထိုသူအား တစ်နှစ် ထက်မပိုသော ထောင်ဒဏ်ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ရမည်။
၇၅။ နိုင်ငံတော်လုံခြုံရေးနှင့် တရားဥပဒေစိုးမိုးရေးကို ထိခိုက်စေသော မည်သည့်သတင်းအချက်အလက် နှင့် ဆက်သွယ်မှုများကို မဆို ရရှိနိုင်ရေးအတွက် နိုင်ငံသားများ၏ မူလအခွင့်အရေးများကို မထိခိုက်စေ ဘဲ ပြည်ထောင်စုအစိုးရအဖွဲ့က သက်ဆိုင်ရာအဖွဲ့အစည်းသို့ လိုအပ်သလို ညွှန်ကြားဆောင်ရွက်နိုင်သည်။
လို့ ဖော်ပြထားတဲ့ အတွက်ကြောင့် ပြည်ထောင်စုအစိုးရအဖွဲ့ကသာ ခွင့်ပြုတယ်ဆိုရင် မိမိတို့ရဲ့ ဆက်သွယ်ရေးဆိုင်ရာ အချက်အလက်တွေကို အစိုးရက တောင်းခံပိုင်ခွင့် ရှိနေပြီး သက်ဆိုင်ရာ အော်ပရေတာများက ထုတ်ပေးရမယ့် တာဝန်များ ရှိနေတာကို တွေ့ရပါတယ်
.
. . . အခြေခံဥပဒေ အခန်း (၈) နိုင်ငံသား၊ နိုင်ငံသားများ၏ မူလအခွင့်အရေးနှင့် တာဝန်များ အခန်းက ပုဒ်မ ၃၅၃ နဲ့ ၃၅၇ တို့က ကာကွယ်ပေးထားတဲ့ အကာအကွယ်တွေကို အထက်ဖော်ပြပါ ဥပဒေနှစ်ခုဖြစ်တဲ့ (၁) နိုင်ငံသားများ၏ ပုဂ္ဂိုလ်ဆိုင်ရာလွတ်လပ်မှုနှင့် ပုဂ္ဂိုလ်ဆိုင်ရာလုံခြုံမှုကိုကာကွယ်ပေးရေးဥပဒေ နဲ့ (၂) ဆက်သွယ်ရေးဥပဒေ တို့မှာ ပြည်ထောင်စုအစိုးရအဖွဲ့ကို လုပ်ချင်သလိုလုပ်ဖို့ ခွင့်ပြုထားသလို ဖြစ်နေတာဟာ အခြေခံဥပဒေကို ကျော်လွန်ဖောက်ဖျက်ရာ ရောက်နေသလားလို့ ဆင်ခြင်စရာဖြစ်နေပါတယ်
.
. . . ကောင်းပါပြီ ကိုယ်ဟာ နိုင်ငံသားတစ်ယောက်အနေနဲ့ ကိုယ့်ရဲ့ တကိုယ်ရေ လွတ်လပ်ခွင့်ကို အထက်ပါ ဥပဒေ ၂ ခုမှာပါတဲ့ ပြဌာန်းချက်တွေအကြောင်းပြုပြီး အစိုးရက ချိုးဖောက်နေတာကို ခံရပြီ ဆိုပါတော့၊ ဘယ်လို ကုစားမှု ယူကြရမလဲ၊ ကိုယ့်ရဲ့ လွတ်လပ်ခွင့် အခွင့်အရေးတွေကို အစိုးရက ကျူးကျော်ချိုးဖောက်နေတာတွေကို ရပ်တန်းကရပ်အောင် နိုင်ငံသားတစ်ဦးအနေနဲ့ ဘာတွေ လုပ်ပိုင်ခွင့်ရှိသလဲ၊ အစိုးရကိုယ်တိုင်ကို ကိုယ့်အခွင့်အရေးချိုးဖောက်နေတာတွေကို ရပ်တန့်သွားအောင် ဘယ်သူ့ဆီက အကာအကွယ် တောင်းခံမလဲ၊ အစိုးရကို အာ့လိုတွေ မလုပ်အောင် ဘယ်သူက တားဆီးနိုင်လဲ
.
စိတ်ပါရင် နောက်တစ်ပုဒ် ဆက်ရေးပြီး အဖြေပြောပါ့မယ်
ရွှင်လန်းချမ်းမြေ့ကြပါစေခင်ဗျ
.
ဗိုလ်ကောင်း
၅ ဒီဇင်ဘာ ၂၀၂၀
.
Eleven Media Group ဝက်ဆိုက်တွင် ရေးသားဖော်ပြချက်
https://news-eleven.com/article/199070...
.
ဖွဲ့စည်းပုံအခြေခံဥပဒေ
https://news-eleven.com/article/199070...
.
နိုင်ငံသားများ၏ ပုဂ္ဂိုလ်ဆိုင်ရာလွတ်လပ်မှုနှင့် ပုဂ္ဂိုလ်ဆိုင်ရာလုံခြုံမှုကိုကာကွယ်ပေးရေးဥပဒေ
https://news-eleven.com/article/199070...
.
ဆက်သွယ်ရေးဥပဒေ
နိုင်ငံသားများ၏ ပုဂ္ဂိုလ်ဆိုင်ရာလွတ်လပ်မှုနှင့် ပုဂ္ဂိုလ်ဆိုင်ရာလုံခြုံမှုကိုကာကွယ်ပေးရေးဥပဒေ

ဝတ်တော်ရုံဘွဲ့

. . . ဘွဲ့နှင်းသဘင် ခန်းမထဲကို ပါမောက္ခချုပ်ဦးဆောင်တဲ့ ပါမောက္ခတွေ အလယ်လျှောက်လမ်းနှစ်ဘက်က ဝင်လာကြတဲ့အချိန်မှာ ဆိုင်းဝိုင်းကြီးက တီးတဲ့ တီးလုံးကို ဘာလဲ မသိပေမယ့် ပါမောက္ခတွေ စင်မြင့်ထက်ကို အကုန်နေရာယူပြီးတဲ့အချိန်မှာ တီးတဲ့ နိုင်ငံတော်သီချင်းကတော့ နားထဲမှာ တော်တော် စိမ်းတယ်ပြောရမယ်၊ ဘာလို့လဲဆိုတော့ နိုင်ငံတော်သီချင်းကို အနောက်တိုင်းတူရိယာတွေ လေမှုတ်တူရိယာတွေမြိုင်မြိုင်ဆိုင်ဆိုင်နဲ့ စစ်တီးဝိုင်းက တီးတဲ့ သံစဉ်ကို နားရည်ဝနေပြီးသားမို့ မြန်မာ့ဆိုင်းဝိုင်းက နိုင်ငံတော်သီချင်းတီးတဲ့ ဂီတသံဟာ နားထဲမှာ တော်တော်ကို စိမ်းနေတာ
.
. . . စင်မြင့်ထက်မှာ ထိုင်နေတဲ့ ပါမောက္ခဌာနမှူး ဆရာမကြီး ဒေါက်တာ ဒေါ်မြင့်ကြည်ကိုကြည့်ပြီး ဆရာမကြီးဆီ လျှောက်လွှာသွားတောင်းခဲ့တဲ့ အဖြစ်ကို ပြန်သတိရနေမိတယ်၊ ရန်ကုန်တက္ကသိုလ် ဝေသာလီဆောင်က အိုင်အာဌာနမှာ အိုင်အာဒီပလိုမာ ပထမဆုံးအပတ်စဉ်ဖွင့်မှာမို့ သတင်းစာထဲမှာ လျှောက်လွှာတွေခေါ်တာကို ကိုယ်တွေက ရက်လွန်မှ သိတယ်၊ ဘာပဲပြောပြော ကိုယ်သိတဲ့အချိန်က လျှောက်လွှာတွေ ထုတ်ရောင်းပြီး ပြန်တောင်လက်ခံနေပြီဆိုပေတဲ့ တစ်နှစ်ကြာမယ့်သင်တန်းအတွက် နောက်ထပ် အချိန်လုံလုံလောက်လောက် မကျန်တော့တာမို့ ဒီတစ်သုတ်ကို တက်ရမှ ဖြစ်မယ်ဆိုပြီး ဝေသာလီဆောင်ကို ချက်ချင်း ချီတက်ခဲ့တာ သူငယ်ချင်း သုံးယောက်သား
.
. . . အိုင်အာဌာနက လျှောက်လွှာပြန်လက်ခံတဲ့နေရာမှာ အရင်နေ့က ဝယ်သွားတဲ့သူတွေက လာတောင် ပြန်အပ်နေကြပြီ၊ ကိုယ်တွေက အခုမှ လျှောက်လွှာလာတောင်းဝယ်မလို့၊ အဲသည်မှာ ရှိတဲ့ ဆရာမ ငယ်ငယ်ချောချောလေးတွေက လျှောက်လွှာက ရောင်းတဲ့ရက် လွန်ပြီဖြစ်ကြောင်း အခု ပြန်တောင်လက်ခံနေပြီဖြစ်ကြောင်း ကိုယ်တွေကိုလည်း အခုမှ လာရကောင်းလားဆိုတဲ့ မျက်နာပေးနဲ့ ပြုံးစိစိ ရှင်းပြနေတော့ စိတ်ထဲ တယ်မခံချင်လှဘူး၊ ဒါနဲ့ သူတို့ကိုတော့ သိပ်အောက်ကျို့ခံ တောင်းမနေဘူး၊ နဂိုကတည်းကလည်း မာန်လေးက ခပ်တက်တက်ဆိုတော့ ဘယ်သူ့ကို ပြောရင်ရမလဲ ဆိုတော့ တီချယ်ကြီးတို့ သွားပြောရင်ပြောကြည့်ပေါ့တဲ့၊ အမယ် လေသံက သူတို့ ပါမောက္ခဌာနမှူးတီချယ်ကြီးဆိုပြီး မကြောက်လောက်ဘူးများ မှတ်နေလား မသိဘူး၊ အဲ ကြောက်ပြီးမမေးရဲလောက်ပါဘူး ဆိုတဲ့ လေသံနဲ့ မျက်နာပေးနဲ့
.
. . . ဆရာမလေးတွေ ညွှန်ပြတဲ့အတိုင်း ပါမောက္ခရုံးခန်းကို တန်းတန်းမတ်မတ် ချီတက်ပြီး ဝင်ခွင့်တောင်း အထဲဝင်တော့ အထဲမှာ ဆရာမကြီးနှစ်ယောက်၊ ပါမောက္ခဌာနမှူး ဆရာမကြီး ဒေါက်တာဒေါ်မြင့်ကြည်နဲ့ ဆရာမကြီးဒေါ်ကယ်ရိုးအင်ချစ်သာ၊ သားတို့ ဘာများရှိလို့လဲတဲ့၊ အို လေသံလေးကချိုပြီး မျက်နာလေးက ကြည်လိုက်တာ ချစ်ဖို့ကောင်းလိုက်တဲ့ ဆရာမကြီးတွေ တို့စီနီယာတွေနဲ့များ ကွာပ ဆိုပြီး အားတက်သွားပြီး အခုဖွင့်မယ့် ဒီပလိုမာတန်းအတွက် လျှောက်လွှာလိုချင်လို့ပါဆိုပြီး ပြောချပစ်လိုက်တယ်
.
. . . ဆရာမကြီးနှစ်ယောက်က လျှောက်လွှာရောင်းပေးလို့ မရတော့ကြောင်း အခုရောင်းလိုက်တာတောင် လက်ခံနိုင်တာထက် အများကြီးပိုနေပြီမို့ အကုန်တက်ခွင့်ပေးနိုင်ဖို့ မသေချာကြောင်း၊ ပညာကိုလိုလားတဲ့အတွက် တက်ချင်သူတိုင်းကို သင်ပေးချင်ပေမယ့် နေရာနဲ့ ဆရာအကန့်အသတ်ကြောင့် စိန်ခေါ်မှုတွေရှိနေကြောင်း စသည်ဖြင့် ရှည်ရှည်ဝေးဝေး စိတ်ရှည်လက်ရှည် ချိုချိုသာသာ ရှင်းပြကြလေတယ်
.
. . . အိုဗျာ . ဒီလို ချော့ပြောရုံနဲ့ နောက်ဆုတ်သွားမယ့် အမျိုးလားလို့ ၊ ဆရာမကြီးတို့ လေသံနဲ့ အပြောအဆိုထက် တစ်ဆခွဲလောက်ပိုတဲ့ ချိုသာပြေပြစ် ယဉ်ကျေးရည်မွန်တဲ့ စကားတွေနဲ့ ဆရာမကြီးရယ် သားတို့မှာလည်း ဒီအပတ်စဉ်မှ မတက်လိုက်ရရင် နောက်နှစ်ဆိုကျောင်းကလည်း ပြီးပြီမို့ တပ်ကိုပြန်ရတော့မှာဖြစ်ကြောင်း၊ တောထဲတောင်ထဲ ပြန်ပြီး တာဝန်ထမ်းဆောင်ရတော့မယ့် အရေးကြောင့် ဒီအခွင့်အရေးကို နောက်ထပ် ထပ်ရဖို့ဆိုတာ ဘယ်လိုမှ ဖြစ်နိုင်စရာ မရှိတော့ကြောင်း ဒါကြောင့် အခုနေမှ လျှောက်လွှာထုတ်မပေးဘူးဆိုရင် ဒီဝေသာလီဆောင်ပေါ်ကတောင် ခုန်ချပစ်လိုက်ချင်ကြောင်း သံပန်းတွေတပ်ထားလို့သာ ခုန်ချမရလို့ဖြစ်ကြောင်း စသည်ဖြင့် လျှာအရိုးမရှိတိုင်း ပလီရတာပေါ့လေ
.
. . . ဆရာမကြီးတွေကလည်း ဒီလို ပလီပလာကျောင်းသားတွေအထာကို ဘယ်လောက်များ နောကျေနေပြီလဲ မသိဘူး၊ ကိုယ်တွေ ချိုသာတာထက် သုံးဆလောက်ချိုသာပြေပြစ်တဲ့ စကားနဲ့ လျှောက်လွှာရောင်းပေးလို့ မရတော့ကြောင်းပြောပြီး အစည်းအဝေးရှိလို့ သွားလိုက်ပါအုံးမယ်ဆို အခန်းထဲက ထွက်သွားတော့ ကိုယ်တွေလည်း အခန်းအပြင် ပြန်ထွက်ရတော့တာပေါ့
.
. . . ဒါပေမယ့် ဒီလောက်နဲ့ အလျှော့ပေးရိုးလား၊ ဒီတက္ကသိုလ်မှာပဲ တက်သွားခဲ့တဲ့ ကိုယ့်ရဲ့စီနီယာကြီးတွေဖြစ်တဲ့ ကိုအောင်ဆန်းတို့ ကိုအောင်ကျော်တို့သာ ချော့တိုင်းပျော့ခဲ့မယ်ဆို မြန်မာပြည်တောင် လွတ်လပ်ရေးရမှာမဟုတ်ဘူး၊ တို့လဲ တို့နောင်တော်ကြီးတွေ အစဉ်အလာကို ဆက်ခံပြီး လျှောက်လွှာမရမချင်း မပြန်ဘူးကွာဆိုပြီး ဆရာမကြီးတွေ အခန်းရှေ့မှာ ရပ်စောင့်နေတယ်၊ ဟိုဆရာမလေးတွေက ဖြတ်သွားဖြတ်လာ ပြုံးစိစိလုပ်တာကို ရှက်ပေမယ့် ကိုယ်မင်နဲ့ကိုယ်တော့ နေရတာပေါ့
.
. . . တော်တော်ကြာတော့ ဆရာမကြီးတွေ နှစ်ယောက် ပြန်ရောက်လာတဲ့အခါ သူ့အခန်းရှေ့မှာ ကျောက်ချရပ်နေတဲ့ ကိုယ်တွေကို တွေ့သွားပြီး ခုနက ရှင်းပြခဲ့တာတွေကို တစ်ခါထပ်ပြီး ရှင်းပြပြန်လေတယ်၊ ဒီတစ်ခါတော့ ကိုယ်တွေက ဘာမှ စကားတွေ ပြန်ပြောမနေတော့ဘဲ အခန်းအပြင်မှာဘဲ ဆက်ပြီး ရပ်စောင့်နေလိုက်တယ်၊ လျှောက်လွှာမရသရွေ့ ဒီရှေ့က မခွာဘူးကွာဆိုတဲ့ မာတင်္ဂထုံး နှလုံးမူတာပဲ အောင်မြင်သွားတာလား၊ ဆရာမကြီးတွေပဲ မျက်စိနောက်လာလို့လားတော့ မသိဘူး၊ ခဏနေတော့ ဆရာမကြီးအခန်းထဲက ထွက်လာတဲ့ ဆရာမလေးတစ်ယောက်က နောက်နေ့အကြောင်းပြန်ပေးပါမယ်၊ အခုတော့ ပြန်ပါတော့ဆိုလို့ တကယ်နော်ဆိုပြီး ကိုယ်တွေပုံမှန်တက်နေတဲ့ တောင်ငူဆောင်ကို လက်ညှိုးထိုးပြပြီး ပြန်ခဲ့တယ်၊ တောင်ငူဆောင်နဲ့ ဝေသာလီဆောင်က ဘေးချင်းကပ်လျက်၊ နောက်နေ့ကျတော့ လျှောက်လွှာလာယူပါဆိုလို့ ရခဲ့ပြီး အိုင်အာဒီပလိုမာ ပထမဆုံး အပတ်စဉ်ကို တက်ခွင့်ရခဲ့တယ်၊
.
. . . ကိုယ်တွေ ပထမအကြိမ် ဘွဲ့ယူခဲ့တုန်းက ယောက်ျားလေးတွေချည်း တက်တဲ့ တက္ကသိုလ်ဆိုတော့ ပကာသနတွေ မများပေါင်၊ များတာက တစ်နေ့တည်းမှာ မနက်ပိုင်းကျောင်းဆင်းပွဲ စစ်ရေးပြလျှောက်၊ စစ်ရေးပြကွင်းက ပြန်အထွက်မှ လက်နက်တိုက်မှာ ဓားသွားအပ်ပြီး ပြန်တမ်းဝင်ခန့်တဲ့အခမ်းအနားဆက်တက်၊ ပြီးတာနဲ့ အဆောင်ကို တက်သုတ်ရိုက်ပြန် ဘွဲ့ဝတ်စုံလဲ၊ ထမင်းတောင် အပြေးအလွှား ပလုပ်ပလောင်းစားပြီး ဘွဲ့နှင်းသဘင်ခန်းမဝင် ဘွဲ့ယူ၊ ပြီးတာနဲ့ ဆွေမျိုးသားချင်းတွေနဲ့ အပြေးအလွှား ဓာတ်ပုံရိုက်ပြီး အဆောင်ပြန်၊ ရေအပြေးချိုး၊ အခမ်းအနားဝတ်စုံလဲပြီး ညစာစားပွဲတက်။ ကိုယ်နဲ့လာတွေ့ပြီး အိမ်ပြန်တော့မယ့် မိဘဆွေမျိုးတွေရယ်၊ အပြီးခွဲခွာသွားရတော့မယ့် ကျောင်းတော်ကြီးရယ်၊ ကျန်ခဲ့တော့မယ့် မိသားစုဝင်ညီငယ်တွေရယ်ကိုလည်း ရှည်ရှည်ဝေးဝေး အလွမ်းသယ်မနေအားတော့ဘဲ တက်သုတ်ရိုက်နှုတ်ဆက်၊ နောက်နေ့မနက် တာဝန်ကျတဲ့နေရာကို ခရီးဆက်ဖို့ ညကတည်းက အသင့်ပြင်ဆင်ထားရတာကိုး။ အခု ရန်ကုန်တက္ကသိုလ်ကြီးမှာတော့ ဒီပလိုမာဘွဲ့လေးယူတာကအစ ဂုဏ်တွေ ပကာသနတွေ များလိုက်ချက်များ
.
. . . ဘာရယ်လို့ မဟုတ်ဘူး ဒီနေ့ သူငယ်ချင်းတစ်ယောက်တင်ထားတဲ့ ပုံလေးတွေ့လို့ သတိရပြီး လျှောက်ရေးနေမိတာ၊ အထက်က ပြောခဲ့တဲ့ ရန်ကုန်တက္ကသိုလ် ဘွဲ့နှင်းသဘင်မှာ ပါမောက္ခ ဆရာဆရာမကြီးတွေ ခန်းမထဲ ဝင်လာတဲ့အခါ တီးတဲ့ မှန်ညောင်သဉ္ဇာ ဝတ်တော်ရုံဘွဲ့ တီးလုံးကို အခုရက်ပိုင်းကျောင်းဆင်းတဲ့ စစ်တက္ကသိုလ် အမှတ်စဉ် ၆၂ ဘွဲ့နှင်းသဘင်မှာ မှန်စီရွှေချဆိုင်းဝိုင်းနဲ့ တီးတာတွေ့လို့၊ ကိုယ်တွေတုန်းက ဒီလို မတီးခဲ့ပါဘူး၊ စစ်တီးဝိုင်းကပဲ ငြိမ့်ငြိမ့်ငြောင်းငြောင်း တေးသွားတစ်ခုကို တီးပေးပြီး ပါမောက္ခတွေ ဘွဲ့နှင်းခန်းမထဲ ကြွချီခဲ့ကြတာ
.
. . . အခုပုံထဲမှာပါတဲ့ ဆိုင်းဝိုင်းမှာ အမျိုးသမီးဆိုင်းပညာရှင်တွေ ပါဝင်တီးမှုတ်နေတာ တွေ့ရမှာပါ၊ စစ်တက္ကသိုလ်အမှတ်စဉ် (၆၂) ဘွဲ့ယူတဲ့ စစ်တက္ကသိုလ်ရဲ့ အကြိမ် (၆၀) မြောက်ဘွဲ့နှင်းသဘင်မှာ ဖြစ်ပါတယ်၊ ဘယ်ဘွဲ့နှင်းသဘင်ကစပြီး အခုလို ဆိုင်းဝိုင်းကြီးနဲ့ ကျကျနနဆင်ပြီး မှန်ညောင်သဉ္ဇာ ဝတ်တော်ရုံဘွဲ့ကို တီးခဲ့သလဲဆိုတာတော့ မေးကြည့်ရအုံးမယ်၊ ပုံကို သူငယ်ချင်း Nyikita Nyi ဆီက ယူပါတယ်၊ ဝတ်တော်ရုံဘွဲ့တီးလုံးနဲ့ မင်းခမ်းမင်းနားမှာတီးတဲ့ စမုတ်ခံ တီးလုံး မတူတာ ရှင်းပြပေးတဲ့ ယဉ်ကျေးမှုဝန်ကြီးဌာနက Ko Tin Latt Yu ကိုလည်း ကျေးဇူးတင်ပါတယ် . . .
.
ဗိုလ်ကောင်း
၅ ဒီဇင်ဘာ ၂၀၂၀
.
တက္ကသိုလ်ဘွဲ့နှင်းသဘင်တွေမှာ ပါမောက္ခတွေ ခန်းမထဲ ဝင်လာတဲ့အခါ တီးတဲ့ ဝတ်တော်ရုံဘွဲ့သမိုင်းကြောင်းသိချင်ရင် ဒီလင့်မှာ ဖတ်ကြည့်ကြပါ
https://www.moi.gov.mm/article/8410...
.
ဘွဲနှင်းသဘင်မှာတီးတဲ့ ဝတ်တော်ရုံဘွဲ့တီးလုံးကို ဒီမှာ နားထောင်နိုင်ပါတယ်
https://www.youtube.com/watch?v=EawUKuVZsPQ
.
မှန်ညောင်သဉ္ဇာ ဝတ်တော်ရုံဘွဲ့သီချင်းကို ဒီမှာ နားဆင်နိုင်ပါတယ်
https://www.youtube.com/watch?v=MisKgfJnoLw
.
ရှေးရှေးတုန်းက ဘွဲ့နှင်းသဘင်အကြောင်း ဒီမှာ ဖတ်နိုင်ပါတယ်
http://burmese.dvb.no/archives/355572

နှလုံးသားချင်း နီးတဲ့သူတွေ

ရင်ထဲက ခံစားချက်တို့ အတွေးတို့ အမြင်တို့ စိတ်ကူးတို့ သဘောထားတို့ကို ဖော်ထုတ်စရာက စာရေးတာပဲ အမြန်ဆုံးနဲ့ အရိုးရှင်းဆုံး အတိကျဆုံး ဖြစ်တာမို့ ရေးချလိုက်ချင်ပေမယ့် အကန့်အသတ်တွေက အများကြီးမို့ မရေးချဖြစ်ခဲ့တာတွေလည်း အများကြီးပေါ့၊ အရင်တုန်းကတော့ စာအုပ်ထဲမှာချရေးပြီး သိမ်းထား ဘယ်သူမှလည်း သိစရာမရှိ တမင်တကူးတက လိုက်ရှာဖတ်မယ်ဆိုတောင် လက်တစ်ဆုပ်စာလောက်ပဲ သိစရာရှိ
အခုကျ
စာရွက်နဲ့ ဘောပင်နဲ့ စာရေးတဲ့အကျင့်ကလည်း ပျောက်သလောက်ဖြစ်နေပြီမို့ နောက်ပြီး ရေးထားတဲ့ စာတွေကိုလည်း ဒီဂျစ်တယ်နည်းနဲ့ သိမ်းဆည်း ပြန်ရှာရတာကိုပဲ လက်တွေ့နေပြီမို့
အာ့တာတွေ ရေးချဖို့
တိတ်ဆိတ်ငြိမ်းချမ်းပြီး လုံခြုံတဲ့ ဝန်းကျင်လေးတစ်ခု ကိုယ်ဘာသာ ဖန်တီးထားလိုက်ပြီ
အပြင်မှာရေးချဖို့ စိတ်မလုံခြုံတဲ့စာတွေကို အဲသည်မှာရေးမယ်
နှလုံးသားချင်း တစ်အားနီးတယ်လို့ ခံစားရသူတစ်ချို့ကိုတော့ လာလည်ချင်တယ်ဆို ဖိတ်ခေါ်ပေးမယ်လို့ စိတ်ကူးထားတယ်

Be Savage Again

. . . ကိုယ်တွေ တတိယနှစ်ရောက်တော့ မန်းလေးတက္ကသိုလ်က ပြောင်းလာတဲ့ ဆရာမ ဒေါ်အေးဝင်းက ကဗျာသင်တယ်၊ အီးမေဂျာရဲ့ ပထမဆုံး ကျောင်းသားတွေဖြစ်တာကြောင့်မို့ ကဗျာသင်ရိုးမှာ ဘယ်ကဗျာတွေ သင်ရမလဲ ဆိုတာ သတ်မှတ်ပြဌာန်းထားပုံမရဘူး၊ ဆရာမကလည်း အသစ်ဆိုတော့ ကောင်းနိးရာရာ စိတ်ကြိုက်ရွေးသင်ပေးပုံပေါ်တယ်၊ ဆရာမ သင်ပေးခဲ့တဲ့ ကဗျာထဲမှာ စိတ်ထဲ အခုထိ စွဲပြီး မှတ်မိနေတဲ့ ကဗျာ နှစ်ပုဒ်ရှိတယ်၊ တစ်ပုဒ်က The Highwayman ဆိုတဲ့ အချစ်ကဗျာ၊ ဇာတ်ကြောင်းပုံစံနဲ့ ရေးထားပြီး ကြေကွဲစရာနဲ့ အဆုံးသတ်သွားတဲ့ အချစ်ကဗျာရှည်၊ နောက်တစ်ပုဒ်က အားငယ်နေတဲ့သူကို အားပေးတဲ့ ရဲဆေးတင်ပေးတဲ့ ကဗျာလေး၊ အခုပြောမှာက ဒုတိယတစ်ပုဒ်၊ ဟိုအချစ်ကဗျာအကြောင်းကတော့ နောင်အခါ စိတ်ကူးပေါက်ရင် ပြောပြမယ်
.
. . . လူ ဆိုတဲ့အမျိုးက ဘဝမှာ တစ်ကွေ့မဟုတ် တစ်ကွေ့ အားငယ်စရာ စိုးရွံ့စရာ စိတ်ပျက်စရာတွေနဲ့ ကြုံရတတ်တယ်၊ အာ့လို ကြုံရပြီဆို အသာလေး အမြီးကုပ်ပြီးနေမလား၊ ရင်ကော့ခေါင်းမော့ပြီး ထွက်ရင်ဆိုင်မလား၊ အခုပြောမယ့် ကဗျာကတော့ စိုးရွံ့စရာ ကြောက်စရာ ထိတ်စရာတွေ ကြုံရတဲ့အခါ ငြိမ်ပြီးကုပ်ပြီး ကြောက်မနေဘဲ ရင်ကော့ခေါင်းမော့ ရဲရဲကြီး ထွက်ရင်ဆိုင်လိုက်ဖို့ အားပေးတယ်
.
. . . ကဗျာ ခေါင်းစဉ်က “မင်း ကြောက်နေတာလား” Do You Fear the Force of the Wind တဲ့၊ ခေတ်စကားနဲ့ ပြောရရင်တော့ သားကြီး မင်း ဇ မရှိဘူးလားဟျောင့် ပေါ့၊ ကဗျာရဲ့ အပေါ်ဆုံး နှစ်ကြောင်းက လေတွေထန်၊ မိုးတွေသည်း၊ မိုးထဲရေထဲမှာ ဆိုပေမယ့် ကဗျာကို ဆက်ဖတ်ကြည့်တဲ့အခါ မိုးထဲရေထဲ ရောက်နေတဲ့ လူတစ်ယောက် ဆိုတာထက် အဆိုးလောကဓံတွေ ကြုံနေရလို့ စိတ်ပျက်အားလျော့နေတဲ့ လူတစ်ယောက်ကို ရည်စူးရေးထားတဲ့ ကဗျာဆိုတာ ဆက်ဖတ်ကြည့်မှ သိရတယ်
.
. . . တတိယအကြောင်းက စပြီး အားပေးတဲ့ တစ်နည်းအားဖြင့် ရင်းနှီးချစ်ခင်ကြသူချင်း နှလုံးသားချင်း နီးကြသူချင်း အားပေးတဲ့ စကားသံတွေကို စပြီး ကြားရတယ်၊ ဟျောင့် သားရီး မင်း ဇ မရှိဘူးလား၊ ဒါလောက်လေးကို ဘာဖြစ်နေတာလဲ မင်း ငြိမ်ကုပ်မနေနဲ့ ဟျောင့် လုပ်စရာရှိတာ လုပ်ပစ်လိုက်စမ်း ဆိုတဲ့ လေသံမျိုးတွေ တွေ့ရတယ်
.
. . . နှစ်ပိုဒ်ပဲ ရှိတဲ့ ကဗျာထဲ ဒုတိယပိုဒ်မှာတော့ ပိုပြီးကြမ်းလာတယ်၊ ဆာလောင်မွတ်သိပ်နေတဲ့ မြေခွေးလို ဝံပုလွေလို မင်းကြမ်းပစ်လိုက်စမ်း၊ အစာရှာနေတဲ့ ကြိုးကြာငှက်လို လျှောက်သွားနေစမ်း၊ မင်းလက်ဖဝါးတွေ ကြမ်းတမ်းပါစေ လုပ်စရာရှိတာ လုပ်ပစ်လိုက်စမ်း၊ မင်း အသားတွေ နေလောင်ပြီး ညိုညစ်နေပါစေ နေပူပူကို ခံပစ်လိုက်စမ်း၊ မင်းကိုယ်မင်း ညှာတာ မနေနဲ့ ကြမ်းစရာရှိတာ ကြမ်းပစ်လိုက်စမ်း ဆိုပြီး ချစ်တဲ့ သူငယ်ချင်း ရဲဘော်ရဲဘက်ကို အားပေးသလိုမျိုး၊ မင်းယောက်ျားမဟုတ်ဘူးလား မင်း အရင်က ဒီလို မဟုတ်ပါဘူး ဆိုတဲ့ လေသံမျိုးတွေကို ကဗျာထဲမှာ ဆက်ပြောထားပါတယ်
.
တော်ပြီ ဒီလောက်ပဲ၊ သေချာ ခံစားချင်ရင် မူရင်းကဗျာကို ကွကိုယ် ဆက်သာဖတ်ပေရော့
.
Photo : လွန်ခဲ့တဲ့ အနှစ်နှစ်ဆယ်တိတိ သက္ကရာဇ် ၂၀၀၀ တုန်းက ကိုယ့်လက်ရေးနဲ့ကိုယ့်အချစ်ဆုံး သူငယ်ချင်းဆွဲပေးထားတဲ့ပုံ
.
ဗိုလ်ကောင်း
၃၀ နိုဝင်ဘာ ၂၀၂၀

Be Savage Again

.
. . . ကိုယ်တွေ တတိယနှစ်ရောက်တော့ မန်းလေးတက္ကသိုလ်က ပြောင်းလာတဲ့ ဆရာမ ဒေါ်အေးဝင်းက ကဗျာသင်တယ်၊ အီးမေဂျာရဲ့ ပထမဆုံး ကျောင်းသားတွေဖြစ်တာကြောင့်မို့ ကဗျာသင်ရိုးမှာ ဘယ်ကဗျာတွေ သင်ရမလဲ ဆိုတာ သတ်မှတ်ပြဌာန်းထားပုံမရဘူး၊ ဆရာမကလည်း အသစ်ဆိုတော့ ကောင်းနိးရာရာ စိတ်ကြိုက်ရွေးသင်ပေးပုံပေါ်တယ်၊ ဆရာမ သင်ပေးခဲ့တဲ့ ကဗျာထဲမှာ စိတ်ထဲ အခုထိ စွဲပြီး မှတ်မိနေတဲ့ ကဗျာ နှစ်ပုဒ်ရှိတယ်၊ တစ်ပုဒ်က The Highwayman ဆိုတဲ့ အချစ်ကဗျာ၊ ဇာတ်ကြောင်းပုံစံနဲ့ ရေးထားပြီး ကြေကွဲစရာနဲ့ အဆုံးသတ်သွားတဲ့ အချစ်ကဗျာရှည်၊ နောက်တစ်ပုဒ်က အားငယ်နေတဲ့သူကို အားပေးတဲ့ ရဲဆေးတင်ပေးတဲ့ ကဗျာလေး၊ အခုပြောမှာက ဒုတိယတစ်ပုဒ်၊ ဟိုအချစ်ကဗျာအကြောင်းကတော့ နောင်အခါ စိတ်ကူးပေါက်ရင် ပြောပြမယ်
.
. . . လူ ဆိုတဲ့အမျိုးက ဘဝမှာ တစ်ကွေ့မဟုတ် တစ်ကွေ့ အားငယ်စရာ စိုးရွံ့စရာ စိတ်ပျက်စရာတွေနဲ့ ကြုံရတတ်တယ်၊ အာ့လို ကြုံရပြီဆို အသာလေး အမြီးကုပ်ပြီးနေမလား၊ ရင်ကော့ခေါင်းမော့ပြီး ထွက်ရင်ဆိုင်မလား၊ အခုပြောမယ့် ကဗျာကတော့ စိုးရွံ့စရာ ကြောက်စရာ ထိတ်စရာတွေ ကြုံရတဲ့အခါ ငြိမ်ပြီးကုပ်ပြီး ကြောက်မနေဘဲ ရင်ကော့ခေါင်းမော့ ရဲရဲကြီး ထွက်ရင်ဆိုင်လိုက်ဖို့ အားပေးတယ်
.
. . . ကဗျာ ခေါင်းစဉ်က “မင်း ကြောက်နေတာလား” Do You Fear the Force of the Wind တဲ့၊ ခေတ်စကားနဲ့ ပြောရရင်တော့ သားကြီး မင်း ဇ မရှိဘူးလားဟျောင့် ပေါ့၊ ကဗျာရဲ့ အပေါ်ဆုံး နှစ်ကြောင်းက လေတွေထန်၊ မိုးတွေသည်း၊ မိုးထဲရေထဲမှာ ဆိုပေမယ့် ကဗျာကို ဆက်ဖတ်ကြည့်တဲ့အခါ မိုးထဲရေထဲ ရောက်နေတဲ့ လူတစ်ယောက် ဆိုတာထက် အဆိုးလောကဓံတွေ ကြုံနေရလို့ စိတ်ပျက်အားလျော့နေတဲ့ လူတစ်ယောက်ကို ရည်စူးရေးထားတဲ့ ကဗျာဆိုတာ ဆက်ဖတ်ကြည့်မှ သိရတယ်
.
. . . တတိယအကြောင်းက စပြီး အားပေးတဲ့ တစ်နည်းအားဖြင့် ရင်းနှီးချစ်ခင်ကြသူချင်း နှလုံးသားချင်း နီးကြသူချင်း အားပေးတဲ့ စကားသံတွေကို စပြီး ကြားရတယ်၊ ဟျောင့် သားရီး မင်း ဇ မရှိဘူးလား၊ ဒါလောက်လေးကို ဘာဖြစ်နေတာလဲ မင်း ငြိမ်ကုပ်မနေနဲ့ ဟျောင့် လုပ်စရာရှိတာ လုပ်ပစ်လိုက်စမ်း ဆိုတဲ့ လေသံမျိုးတွေ တွေ့ရတယ်
.
. . . နှစ်ပိုဒ်ပဲ ရှိတဲ့ ကဗျာထဲ ဒုတိယပိုဒ်မှာတော့ ပိုပြီးကြမ်းလာတယ်၊ ဆာလောင်မွတ်သိပ်နေတဲ့ မြေခွေးလို ဝံပုလွေလို မင်းကြမ်းပစ်လိုက်စမ်း၊ အစာရှာနေတဲ့ ကြိုးကြာငှက်လို လျှောက်သွားနေစမ်း၊ မင်းလက်ဖဝါးတွေ ကြမ်းတမ်းပါစေ လုပ်စရာရှိတာ လုပ်ပစ်လိုက်စမ်း၊ မင်း အသားတွေ နေလောင်ပြီး ညိုညစ်နေပါစေ နေပူပူကို ခံပစ်လိုက်စမ်း၊ မင်းကိုယ်မင်း ညှာတာ မနေနဲ့ ကြမ်းစရာရှိတာ ကြမ်းပစ်လိုက်စမ်း ဆိုပြီး ချစ်တဲ့ သူငယ်ချင်း ရဲဘော်ရဲဘက်ကို အားပေးသလိုမျိုး၊ မင်းယောက်ျားမဟုတ်ဘူးလား မင်း အရင်က ဒီလို မဟုတ်ပါဘူး ဆိုတဲ့ လေသံမျိုးတွေကို ကဗျာထဲမှာ ဆက်ပြောထားပါတယ်
.
တော်ပြီ ဒီလောက်ပဲ၊ သေချာ ခံစားချင်ရင် မူရင်းကဗျာကို ကွကိုယ် ဆက်သာဖတ်ပေရော့
.
Photo : လွန်ခဲ့တဲ့ အနှစ်နှစ်ဆယ်တိတိ သက္ကရာဇ် ၂၀၀၀ တုန်းက ကိုယ့်လက်ရေးနဲ့ကိုယ့်အချစ်ဆုံး သူငယ်ချင်းဆွဲပေးထားတဲ့ပုံ
.
ဗိုလ်ကောင်း
၃၀ နိုဝင်ဘာ ၂၀၂၀

ခါးနာပျောက်

. . . တစ်ရက်ကို ခြေလှမ်းနဲ့ဆို ရှစ်ထောင်၊ ပြေးဖြစ် လမ်းလျှောက်ဖြစ်ရင် ခြောက်ကီလိုလောက်တော့ အနည်းဆုံး အလေ့အကျင့်ရှိခဲ့တဲ့သူက ပြီးခဲ့တဲ့ တစ်ပတ်လုံးလုံး လမ်းမလျှောက် မပြေးတဲ့အပြင် တစ်ရက်ကို ဆယ့်နှစ်နာရီလောက် စာကြည့်စားပွဲမှာ ကျောက်ချပြီးထိုင်နေခဲ့ပြီးတဲ့နောက်မှာ ခါးက တော်တော်ကို နာလာတယ်။ နာတာမှ တော်တော်ကိုနာတာ၊ ကုလားထိုင်လက်တင်တန်းကို လက်နဲ့ အားပြုပြီးမှ ထိုင်လို့ ထလို့ရတယ်၊ အိပ်ယာထဲ ဆိုရင်လည်း အိပ်ဖို့ ပြန်ထဖို့ တော်တော်ကို အားယူရတယ်၊ အထိုင်အထ အလှဲအချတွေမှာ တကျွတ်ကျွတ်နဲ့ စုပ်သပ်နေရတော့ ငါတော့ သွားပါပြီလို့ တွေးမိတယ်
.
. . . အရင်တုန်းက လူကြီးတွေ လုပ်လေ့ရှိတဲ့အပြုအမူမျိုး အထိုင်နှေး အထနှေးတာမျိုး အခု ငါကိုယ်တိုင် ခံစားနေရပါပြီလား ဇရာက ငါ့ကို ဖိစီးနှိပ်စက်လေပြီတကားဆိုပြီး သံဝေဂတွေဘာတွေတောင် ရချင်ချင်ဖြစ်သွားတဲ့အချိန်မှာ
.
. . . ညီလေး ဒီလေ့ကျင့်ခန်းလေးတွေ လုပ်ကြည့်ဆိုပြီး အစ်ကိုကြီးတစ်ယောက်က ပုံလေးတွေနဲ့ ပြပေးတဲ့လေ့ကျင့်ခန်းကို ချက်ချင်းပဲ လုပ်ကြည့်တော့ တော်တော်သက်သာလာတာ၊ အဲဒီ လေ့ကျင့်ခန်းကိုပဲ အခု ရက်ဆက်ပြီး မနက်အိပ်ယာထလုပ်၊ စာကြည့်ရင်းညောင်းရင်လုပ်၊ ရေချိုးခါနီးလုပ်၊ ည အိပ်ခါနီးလုပ်နဲ့ အခုဆို ခါးနာတာ ပျောက်သွားတဲ့အပြင် အရင့်အရင်တုန်းက အထိုင်အထ သတိထားနေရတာတောင် မရှိတော့သလိုပဲ
.
. . . လေ့ကျင့်ခန်းပေးတဲ့ အစ်ကိုကြီးအောင်မျိုးထိုက်ကို တကယ်ကို ကျေးဇူးတင်မိတယ်၊ စိတ်ကူးနေတာက ဒီတစ်ပတ် စောင့်ကြည့်လို့မှ မသက်သာရင် ဆေးရုံပြေးတော့မလို့၊ ဒါပေမယ့် လေ့ကျင့်ခန်းက တော်တော်သင့်သင့် မှန်မှန်ကန်ကန်လုပ်လိုက်တော့ ခါးနာတာလည်းပျောက်၊ အထိုင်အထသွက်၊ အိပ်ယာလှဲအိပ်ယာထ သွက်
.
. . . တကယ်တော့ ဒီလို လေ့ကျင့်ခန်းမျိုး ဆရာကိုရေးရဲ့ ယောဂကလပ်မှာကတည်းက အကျွမ်းတဝင် ရှိခဲ့ပြီးသား၊ အဲသည်တုန်းကလည်း ဆရာက ပြောပြခဲ့တယ် အခု ယောဂပုံစံတွေက ခါးနာတာ ကျောအောင့်တာတွေကို သက်သာပျောက်ကင်းတဲ့ လေ့ကျင့်ခန်းတွေဆိုတာ ကိုယ်တွေလည်း တစ်ခါမှ ခါးနာကျောအောင့် မဖြစ်ဖူးတော့ ဆရာ့လေ့ကျင့်ခန်းတွေကို မေ့တောင်နေတာ၊ အခု တကယ်ခံစားရပြီဆိုတော့မှ ဒီလိုယောဂပုံစံတွေ တကယ်ကို ထိရောက်ပါလားဆိုတာ ပွဲတွေ့ပါပဲ
.
. . . ဒီလို လေ့ကျင့်ခန်းပုံစံတွေ ကိုယ်လေးစားချစ်ခင်ရတဲ့ အစ်ကိုကြီးက ပြောပြတာသာ မဟုတ်ဘူးဆိုရင် လုပ်ရဲမယ် မထင်ဘူး၊ ကိုယ်တွေ မိရိုးဖလာက တစ်ခုခု နာနေတယ်ဆို ငြိမ်နေရတဲ့ အမျိုးကိုး၊ အခု လေ့ကျင့်ခန်းများတော့ ခါးနာပါတယ်ဆို ခါးကို လိမ်ခိုင်းတယ်၊ ကော့ခိုင်းတယ်၊ ကွေးခိုင်းတယ်၊ လှုပ်ခိုင်းတယ် နည်းအမျိုးမျိုးနဲ့ကို ခါးကို အလုပ်ပေးနေတော့တာကိုး၊ အစ်ကိုကြီးက ပေးလို့ လုပ်ကြည့်ရတယ် ဆိုပေမယ့် လုပ်ရတာ ခပ်လန့်လန့်ရယ်၊ မသိရင်ပဲ ခါးနာပိုဆိုးသွားမလားလို့ ထင်စရာ အကွက်တွေ
.
. . . ဒါပေမယ့် အစ်ကိုကြီးပေးလိုက်တဲ့ ပုံတွေ ရရချင်း ချက်ချင်းပဲ ခုတင်တစ်လုံးပေါ်တက်ပြီး လုပ်ကြည့်လိုက်တော့ တော်တော်ကို သိသိသာသာ သက်သာသွားတာမို့ ယုံကြည်မှု တော်တော်ရှိသွားတယ်၊ အချိန်နည်းနည်းခြားပြီး ဆက်လုပ်တယ်၊ အိမ်မှာလုပ်တယ် ဟော အခုကျတော့ သူမဟုတ်တော့သလိုပဲ ပျောက်သွားချက်
.
. . . တကယ်တော့ ကိုယ်တွေနာတဲ့ ခါးနာနည်းက ခါးရဲ့အရင်းပိုင်း ခါးနဲ့ တင်ပဆုံဆက်တဲ့ နေရာမှာရှိတဲ့ ကြွက်သားတွေ အလုပ်မလုပ်ဘဲ ငြိမ်နေလို့ အညောင်းမိပြီးနာတာ၊ စဉ်းစားကြည့် သာမန်အားဖြင့် တစ်ကိုယ်လုံးမှာ အဲသည်နေရာက ဘာအလုပ်မှ မရှိတဲ့နေရာ၊ ထိုင်တာရယ် ထတာရယ် အိပ်ယာထဲ လှဲတာရယ် လှဲနေရာက ပြန်ထတာရယ် အချိန်ကလွဲရင် အဲသည်ကြွက်သားတွေက သိပ်ပြီး အသုံးဝင်ပုံမရဘူး၊ ခါတိုင်းတော့ ထိုင်လိုက်ထလိုက် တတောက်တောက်လျှောက်လိုက်ဆိုတော့ အဲသည်ကြွက်သားတွေ အလုပ်လုပ်နေရပေမယ့် အခုလို တစ်ပတ်လောက် နင်းကန်စွတ်ထိုင်ပစ်လိုက်တော့ အကြောတွေ ဆိုင်းပြီး ခါးက နာရော
.
. . . အလုပ်များလွန်းရင်လည်း ဒဏ်ပိပြီး နာတတ်သလို ဘာသောက်လုပ်မှ မလုပ်ရင်လည်း အညောင်းမိပြီး နာတတ်ပါလားဆိုတာ
.
ဗိုလ်ကောင်း
၂၄ နိုဝင်ဘာ ၂၀၂၀

ကျားမ

. . . ကိုယ် အလယ်တန်းကျောင်းသားဘဝက မန်းလေးကို သွားလည်ရင်း အကြောင်းအားလျော်စွာ မိန်းကလေး သီးသန့်ကျောင်းတစ်ခုကို ရောက်သွားဖူးတယ်။ ကိုယ့်အကိုက အာ့ကျောင်းကို ပစ္စည်းတစ်ချို့သွားပို့တော့ သူ့ကားလိုက်စီးရင်း ရောက်ဖူးတာ။ မြန်မာပြည်မှာ ဒီလို ကျားမ သီးသန့်ကျောင်းတွေလည်း ရှိပါလားဆိုတာ ပထမဆုံး သိလိုက်ရတဲ့အချိန်ပဲ
.
. . . ကိုယ့်သမီးကို ဟိုဟိုဒီဒီ ကိစ္စတွေ စိုးရိမ်လို့ဆိုပြီး ဒီလိုကျောင်းမျိုးမှာ ထားမလားဆိုရင်တော့ မထားဘူးလို့ဘဲ ဖြေရမယ်။
.
. . . လောကကြီးမှာ ကင်းလို့မရတဲ့ သဘာဝတရားကို လျစ်လျှူရှုလိုက်ရင် ကိုယ့်သမီးအတွက် သူ့အရွယ်တန် သိသင့်သိထိုက်တာကို သိခွင့်မရအောင် ပိတ်ပင်လိုက်ရာပဲရောက်မှာမို့ မိန်းကလေး ယောကျ်ားလေး ရောနှောနေရတဲ့ ကျောင်းမှာပဲ သမီးက နေပါစေ၊ ယောက်ျားလေးဆိုတာ အထူးအဆန်းသတ္တဝါကြီးဖြစ်ပြီး အကြောင်းလည်းမသိ မပတ်သက်ရဲ ယောက်ျားတွေရှေ့ရောက်ရင် အရှက်အကြောက်တွေကြီးပြီး ခေါင်းကြီးငုံ့နေမယ့် လူအ လူကြောက် မဖြစ်စေချင်
.
. . . နေပြည်တော်ကျောင်းကိစ္စ အင်တာဗျူးမှာ ကလေးတွေကို အတန်းထဲက အက်တီဗတီတွေ လုပ်တဲ့အခါ ကျားမ ခွဲခြားပြီး သတ်သတ်စီ ဆော့ခိုင်းတယ်တဲ့ ။ ကိုယ်သာ အာ့ကျောင်းက ကျောင်းသားမိဘဆိုရင် ဒီအချက်ကို ကန့်ကွက်မိလိမ့်မယ်
.
. . .ကိုယ့်ကလေးကို စိုးရိမ်လို့ဆိုပြီး မတူတဲ့လိင်တွေနဲ့ ဝေးဝေးထားမလား ထိတွေ့မှုပေးထားမလားဆိုတာ မိဘတွေ စဉ်းစားမိကြဖို့



61Aung Myo Htike, Winwin Tin and 59 others
3 Comments

Like




Comment


Share

အလှဆုံးသစ်ပင်

. . . ဂျပန်နိုင်ငံ အလယ်ပိုင်းလောက်ရဲ့ အနောက်ဘက်ကမ်းခြေမှာ နိဂတ ဆိုတဲ့ ခရိုင်တစ်ခုရှိတယ်၊ ဂျပန်လို県 လို့ရေးပြီး အင်္ဂလိပ်လို Prefecture လို့ဆိုတဲ့ အဲသည်စီရင်စုကို မြန်မာလို တိုက်ရိုက်ပြန်စရာမရှိလို့ တစ်ခါတစ်လေလည်း ပြည်နယ်ခေါ်လိုက် တစ်ခါတစ်လေလည်း ခရိုင်ခေါ်လိုက်ပေါ့၊ ပြည်နယ်ပဲခေါ်ခေါ် ခရိုင်ပဲခေါ်ခေါ် သူတို့ဒေသန္တရအစိုးရတွေရဲ့ လုပ်ပိုင်ခွင့်က ကိုယ်တွေမြန်မာပြည်မှာဆို စိတ်ကူးတောင် ယဉ်ကြည့်လို့မရတဲ့ အတိုင်းအတာတစ်ခုအထိ များများစားစား ရှိတာကို သိရတဲ့အခါ ပြည်ထောင်စုနိုင်ငံက နိုင်ငံသားတစ်ယောက်ဖြစ်တဲ့ ကိုယ်ဟာ တစ်ပြည်ထောင်နိုင်ငံလို့ လူတွေသိကြတဲ့ ဂျပန်လိုနိုင်ငံမျိုးရဲ့ မြို့နယ်အဆင့်လောက် အသေးဆုံး အုပ်ချုပ်မှု ယူနစ်ကလေးရဲ့ လုပ်ပိုင်ခွင့်နဲ့ ဥပဒေပြုခွင့်တွေကို အားကျပါးကျ ရှိခဲ့မိတယ်
.
. . . မြေပြန့်လွင်ပြင်ရှားပါးလှတဲ့ ဂျပန်နိုင်ငံမှာ နှင်းတောင်တွေပေါ်က နှင်းပျော်ရည်တွေနဲ့ စီးဆင်းနေတဲ့魚野川 (အွန်နုမြစ်) တစ်လျှောက် တောင်တန်းတွေ ဝန်းရံနေတဲ့ လွင်ပြင်ထဲက南魚沼 (မီနာမီအွန်နူမာ) ဆိုတဲ့ မြို့လေးမှာ ကိုယ်နေခဲ့တာပေါ့။ ဂျပန်ရဲ့ ဂန္တဝင်ဝတ္ထု雪国 (နှင်းပွင့်တိုင်းပြည် ယူကီဂူနီ) ဇာတ်အိမ်တည်ရာ ကိုယ်တွေနေတဲ့ နေရာလေးကို八色 (ယာအီရို) လွင်ပြင်လို့ခေါ်ပြီး တစ်နှစ်ပတ်လုံးမှာ ပန်းအရောင်ရှစ်မျိုး ပွင့်တယ်ဆိုတဲ့ အဓိပ္ပာယ်နဲ့ ဒီလိုနာမည်တွင်တာ ဖြစ်ပါသတဲ့။ ဒီဒေသရဲ့ နာမည်ကျော် ထွက်ကုန်သုံးမျိုးကတော့ တောင်ပေါ်က နှင်းပျော်ရည်တွေသောက် လယ်မြေတွေကထွက်တဲ့越光 (ကိုရှီဟီကာရီ)ဆန်၊ အဲသည် ဆန်ကို တစ်ဆောင်းလုံးကျတဲ့နှင်းတွေကို စုဆောင်းထားပြီး တစ်နှစ်ပတ်လုံး သဘာဝ နှင်းအအေးဓာတ်သက်သက်နဲ့ ချက်လုပ်တဲ့八海山 (ဟာကိုင်းစံ) ဆာကေး၊ နဲ့ ယာအီရို ရှစ်ရောင်ခြယ်လွင်ပြင်ကို အစွဲပြုပြီး နာမည်ပေးထားတဲ့八色スイカ ရှစ်ရောင်ခြယ်ဖရဲသီး တို့ဖြစ်ပါတယ်။
.
. . . ကိုယ်တွေရဲ့ ယာအီရိုလွင်ပြင်ကြီးက တစ်နှစ်ပတ်လုံး ပွင့်တဲ့ ပန်းတွေ အရောင်ရှစ်မျိုးပြည့်မပြည့် သေချာမသိပေမယ့် ကိုယ်တို့လွင်ပြင်ကြီးရဲ့ အနားသတ် တောင်တန်းတွေကတော့ တစ်ရာသီကို အရောင်တစ်မျိုးနဲ့ နည်းမျိုးစုံ လှနေတာပေါ့။ ဆောင်းရာသီ နှင်းတွေကျပြီလားဆိုမှဖြင့် ဘေးပတ်လည်က တောင်တန်းတွေအားလုံး နှင်းတွေအပြည့်ဖုံးပြီး နွေရာသီ နှင်းတွေပျော်တော့လည်း တစ်ဆောင်းလုံး နှင်းအောက်မှာ ပုန်းနေခဲ့တဲ့ ပန်းရောင်စုံ အလုအယက်တိုးထွက်ပွင့်ပြူကြနဲ့၊ တစ်ခါ ပန်းတွေပွင့်ချိန်ကုန်လို့ နွေစူးစူးကို ရောက်ပြီဆိုရင်လည်း ဟိုတစ်ချိန်ဆောင်းကာလ နှင်းတွေ လူတစ်ရပ်လောက်ဖုံးပြီး ရေခဲမှတ်အောက်ကျအောင် အေးလေ့ရှိတဲ့ ဒီအရပ်ဟာ မယုံကြည်ရလောက်အောင် ပူတဲ့ နေရောင်အောက်မှာ သစ်ပင်သစ်တောတွေ စိမ်းစိမ်းမြမြနဲ့ ဝေစည်နေပြန်ရော တဲ့
.
. . . နေ့တာတွေ တဖြည်းဖြည်းတို နွေရာသီအလှည့်ပြီး ဆောင်းဦးကာလ ရောက်ပြီဆိုရင် အအေးဓာတ် ပိုလာတာနဲ့အတူ သစ်ပင်တွေက အရောင်ပြောင်းကြတော့တာပါပဲ၊ စိမ်းစိမ်းစိုစိုနဲ့ အပင်အတွက် အစာချက်ဖို့တာဝန်ကို တစ်သက်တာထမ်းဆောင်ခဲ့တဲ့ သစ်ရွက်လေးတွေဟာ ဆောင်းရဲ့အကြိုဝင်လာတဲ့ အအေးဓာတ်လေးတွေနဲ့အတူ စိမ်းရာက ဝါ၊ ဝါရာက နီ ၊ နီရာက ညိုပြီး ဘဝရဲ့ နောက်ဆုံးအချိန်မှာ အရောင်အမျိုးမျိုးပြောင်း လောကကြီးကို အစွမ်းကုန်သောခြယ်သခြင်းမျိုးနဲ့ အလှဆင်ပြီးတဲ့အခါ အပင်ပေါ်မှာ တစ်ရွက်မှ မကျန်ရအောင် ကြွေပေးကြရရှာလေတယ်
.
. . . ဆောင်းဦးရာသီနှောင်းပိုင်း သစ်ပင်တွေက သစ်ရွက်တွေအားလုံး စွန့်ပြီးကြချိန်မှာ အရိုးပြိုင်းပြိုင်းဖြစ်နေတဲ့ တောတွေတောင်တွေထဲ မြင်မြင်ကရာက ဘဝအတွက် မတည်မြဲသော သံဝေဂတရားတွေ ယူတတ်မယ်ဆိုရချင်စရာပေါ့၊ ဒါမှမဟုတ်ရင်လည်း အရင်တုန်းက စိမ်းစိမ်းမြမြနဲ့ ဝေစည်နေတဲ့ တော၊ နောက်ပြီး မကြွေခင်ကာလ ခဏလေး အရောင်ပြောင်းပြီး လှပနေခဲ့တဲ့ တောကြီးက အခုကျတော့လည်း အရိုးပြိုင်းပြိုင်းနဲ့မို့ ကြည့်ရတာ စိတ်ပျက်ညစ်ညူးစရာကြီးလည်း ဖြစ်ချင်ဖြစ်ရပြန်တာ
.
. . . ဒါပေမယ့် ဒီလို စိတ်ပျက်စရာတွေအတွက် ဖြေသိမ့်အားတက်စရာလည်း ရှိပါသေးတယ်၊ အဲဒါကတော့ နွေနွေ ဆောင်းဆောင်း ရာသီတွေ ဘယ်လိုပြောင်းပြောင်း နေတွေပူပူ နှင်းတွေကျကျ ဘယ်လိုသော အခြေအနေမျိုးမှာမှ တစ်ခြားအပင်တွေ အရွက်တွေဝေစည်နေလို့လည်း ထူးပြီးဝေစည်မပြ၊ တစ်ခြားအပင်တွေ အရောင်ပြောင်းလို့လည်း ထူးပြီးအရောင်မပြောင်း၊ တစ်ခြားအပင်တွေ အရွက်ခြွေတော့လည်း ထူးပြီးအရွက်မခြွေတဲ့ ထင်းရှူးပင်ကြီးတွေကတော့ လောကကြီးရဲ့ အပြောင်းအလဲတွေက သူနဲ့ မဆိုင်သလိုပ၊ နောက်ဆုံး ဆောင်းခေါင်ခေါင်ရောက်လို့ အပင်ကြီးသာ နှင်းအောက်ကို ဖုန်းချင်ဖုန်းသွားမယ် သူ့ရဲ့ အရွက်ချွှန်ချွှန်လေးတွေကို အမြဲထိန်းသိမ်းပြီး အပြောင်းအလဲဖြစ်တတ်တဲ့ လောကကြီးကို ထီမထင်ဘဲ မားမားမတ်မတ် ရပ်နေနိုင်တဲ့ ထင်းရှူးပင်ကြီးတွေကိုကြည့်ပြီး အရောင်ပြောင်းကြွေလွင့်သွားတဲ့ သစ်ရွက်တွေကို စိတ်ပျက်နေတာတွေ ဖြေဆည်ရတာပေါ့
.
. . . အရင်တုန်းကတော့ နွေဦးပေါက်မှာ အပြိုင်းအရိုင်းထွက်လာတဲ့ ပန်းရောင်စုံနဲ့ ဆာကုရတွေကို ဒီလွင်ပြင်ကြီးမှာ အလှဆုံး ထင်ခဲ့တယ်၊ နွေမှာဆိုရင်လည်း ပူပြင်းပြင်းနေရှိန်အောက်က စိမ်းတောက်နေတဲ့ တောအုပ်ကြီးကို အလှဆုံးထင်ခဲ့တယ်၊ နောက်တော့ ဆောင်းဦးမှာ အရောင်ပြောင်းတဲ့ သစ်ရွက်တွေနဲ့ ခြယ်သထားတဲ့ တောအုပ်နဲ့တောင်တန်းတွေကို အလှဆုံး ထင်ခဲ့တယ်၊ အခုတော့ ရာသီတွေလည်း အလီလီကြုံခဲ့ရပြီမို့ အခုနေသာ ဟောဒီ ယာအီရိုလွင်ပြင်ကြီးထဲ ဘာအလှဆုံးလဲလို့ မေးခဲ့ရင် နွေနွေ မိုးမိုး ဆောင်းဆောင်း ဘယ်တော့မှ အရောင်မပြောင်းဘဲ ကိုယ့်ဘာသာ တည်တည်တံ့တံ့ ရပ်တည်နေနိုင်တဲ့ ထင်းရှူးပင်ကြီးတွေသာ အလှဆုံးလို့ မဆိုင်းမတွ ဖြေလိုက်တော့မှာ
.
ဗိုလ်ကောင်း
၁၉ နိုဝင္ဘာ ၂၀၂၀
.
The photo was taken in 2019 autumn

ဥတုနဲ့ စရိုက်

. . . ဆောင်းရာသီကုန်လို့ နှင်းတွေ အရည်ပျော်ရင် နှင်းဖြူဖြူတွေအောက်မှာ လေးငါးလလောက်ဖုံးမိနေတဲ့ မြေကြီးထဲက ပန်းရောင်စုံတွေ အပြိုင်းအရိုင်းတိုးထွက်လာ၊ ပန်းပွင့်သမျှ အပင်တွေ ပင်လုံးကျွတ် ဝေဝေဆာဆာပွင့်ကြ၊ အပွင့်တွေတုံးပြီဆိုတာနဲ့ နွေနေရောင်အောက်မှာ တစ်လောကလုံး စိမ်းစိုလှပ၊ နွေရာသီကုန်လို့ ဆောင်းဦးပေါက်ပြီလဲဆိုရော တစ်တောလုံးတစ်တောင်လုံး ရှိရှိသမျှအပင်တွေက အရွက်တွေရောင်စုံအရောင်ပြောင်းပြီး နောက်ဆုံး လောကကို အလှဆင် ပြီးတာနဲ့ တစ်ညီတစ်ညာတည်း ကြွေကျ၊ အရိုးပြိုင်းပြိုင်းအပင်ကြီးငယ်တွေက ဆောင်းနှင်းတွေအောက်မှာ လေးငါးလ အိပ်စက်အနားယူကြ.
. . . ကိုယ့်နိုင်ငံမှာတော့ ရာသီဥတု ဆိုးရွားပြင်းထန်တာမျိုး မရှိသလို တစ်တောလုံး ပန်းပွင့်တဲ့ရာသီ၊ တစ်တောလုံး သစ်ရွက်တွေအရောင်ပြောင်းတဲ့ရာသီ၊ တစ်တောလုံး သစ်ရွက်တွေခြွေချတဲ့ ရာသီဆိုတာ ရှိကောင်းရှိပေမယ့် သိပ်တော့ ထင်ထင်ရှားရှားမဖြစ်လှဘူးလို့ ထင်မိတယ်၊ ပွင့်တဲ့ ပန်းကိုလည်း သဘာဝအတိုင်း လှနေရင်သာလှတာ တမင်လှအောင်များ လုပ်ကြမယ်ဆိုတာမျိုး အားနည်းလွန်းသလားလို့ပဲ၊ ဥပမာ မြန်မာနိုင်ငံမှာ စိန်ပန်းတွေပွင့်တဲ့ တစ်ညီတစ်ညာလည်း လှပနေလို့ သွားလည်ရလောက်တဲ့မြို့၊ ငုဝါတွေ နဲ့ တစ်မြို့လုံးကို ထိန်ထိန်တောက်လို့ ဆိုတာမျိုး ပြောရလောက်အောင်ကိုလှလွန်းလို့ သွားတောင်ကြည့်ရတယ်ဆိုတဲ့ နေရာတွေဆိုတာတောင် ရာသီဥတုက အင်မတန့်ကို မျက်နာသာပေးလို့ လှနေကြတာ၊ လူတွေပြုပြင်စီရင် ဖန်တီးထားလို့ အာ့သလောက်လှတာဆို ပြောပလောက်အောင်ရော ရှိရဲ့လားလို့လေ
.
. . . နေတဲ့ထိုင်တဲ့ လူတွေရဲ့စရိုက်က တောတောင်ရေမြေကို လွှမ်းမိုးသလား၊ တောင်တောင်ရေမြေ ရာသီဥတုက နေတဲ့သူတွေရဲ့ ဓလေ့သဘောကို ပုံဆောင်လေသလား ကိုယ်လည်း သေချာတော့မသိ

စားစရာပါ စီစဉ်ပေးထားတဲ့ ရွေးကောက်ပွဲ

 ဇေယျာသီရိကုန်တိုက် မဲရုံ

တပ်ချုပ် = ဒုသမ္မတ ?

. . . ဖွဲ့စည်းပုံအခြေခံဥပဒေကို အနက်အဓိပ္ပာယ်ဖွင့်ဆိုရာမှာဖြစ်ဖြစ် ဥပဒေတွေကို အနက်အဓိပ္ပာယ်ဖွင့်ဆိုရာမှာဖြစ်ဖြစ် ဘယ်သို့ဘယ်ပုံ ဖွင့်ဆိုရမယ်ဆိုတာကို အခြေခံဥပဒေ အခန်း (၁၅) အထွေထွေပြဌာန်းချက်များရဲ့ ပုဒ်မ ၄၃၅ မှာ “ဤဖွဲ့စည်းပုံအခြေခံဥပဒေပါ စကားရပ်များကို အနက်အဓိပ္ပာယ်ဖွင့်ဆိုရာတွင် တည်ဆဲစကား ရပ်များ အနက်အဓိပ္ပာယ်ဖွင့်ဆိုရေးဥပဒေကို ကိုးကားရမည်။” လို့ ဆိုထားပါတယ်
.
. . . မြန်မာနိုင်ငံမှာတည်ဆဲ စကားရပ်ဖွင့်ဆိုခြင်းနဲ့ ပတ်သက်တဲ့ ဥပဒေ လေးခုရှိတဲ့အထဲက ၁၉၇၃ ခုနှစ် စကားရပ်များအနက်အဓိပ္ပာယ်ဖွင့်ဆိုရေး ဥပဒေ ဟာ အခြေခံအကျဆုံးဖြစ်ပြီး ယခုထိတိုင် လက်ခံသုံးစွဲနေတဲ့ဥပဒေဖြစ်ပါတယ်။ ကျန်တဲ့ ဥပဒေတွေကတော့ ၁၉၈၈ ခုနှစ်မှာ ပြဌာန်းခဲ့တဲ့ စကားရပ်များအစားထိုးသည့်ဥပဒေ၊ ၁၉၉၇ ခုနှစ်မှာ ပြဌာန်းခဲ့တဲ့ စကားရပ်များအစားထိုးသည့်ဥပဒေ၊ နဲ့ ၂၀၁၉ ခုနှစ်မှာ ပြဌာန်းခဲ့တဲ့ စကားရပ်ပြောင်းလဲသတ်မှတ်သည့်ဥပဒေတို့ဖြစ်ပါတယ်။ 
.
. . . အခြေခံဥပဒေက ရည်ညွှန်းထားတဲ့ ၁၉၇၃ စကားရပ်များအနက်အဓိပ္ပာယ်ဖွင့်ဆိုခြင်း ဥပဒေ ပုဒ်မ ၄ မှာ “။ ဥပဒေပြဋ္ဌာန်းချက်တရပ်ရပ်၏ အနက်အဓိပ္ပါယ်ကို ဖွင့်ဆိုရာ၌ ယင်းဥပဒေကိုမပြဋ္ဌာန်းမီက ဥပဒေ ရေးဆွဲရေးကော်မီရှင်၊ သို့မဟုတ်ဥပဒေပြု အာဏာပိုင်အဖွဲ့အစည်းတွင် ဆွေးနွေးခဲ့သည့်အချက် မှတ်တမ်း များကိုလည်းကောင်း၊ ရေးဆွဲခဲ့သော ဥပဒေမူကြမ်းများကိုလည်းကောင်း၊ ဥပဒေပြုရခြင်း၏ ကျိုးကြောင်း ဖော်ပြချက်ကိုလည်းကောင်း ထည့်သွင်းစဉ်းစားနိုင်သည်။” လို့ ရေးသားထားပါတယ်။ ဆိုလိုတာကတော့ အခြေခံဥပဒေပဲ ဖြစ်ဖြစ် ဥပဒေပဲဖြစ်ဖြစ် ရေးသားထားချက်တစ်ရပ်ကို အဓိပ္ပာယ်ဖွင့်ဆိုရာမှာ ရေးသားထားတဲ့ စကားလုံးအပေါ်မှာတင် အပေါ်ယံဖွင့်ဆိုရမှာ မဟုတ်ဘဲ မူလရေးသားစဉ်က ဘယ်လိုရည်ရွယ်ချက်နဲ့ ဒီလိုပြဌာန်းခဲ့သလဲဆိုတာကိုပါ အလေးထား ထည့်သွင်းစဉ်းစားဖို့ လိုအပ်ကြောင်း ပြဌာန်းချက်ဖြစ်ပါတယ်။ 
.
. . . ၁၉၉၃ ခုနှစ် စက်တင်ဘာလ ၁၆ ရက်နေ့မှာ ကျင်းပတဲ့ အမျိုးသားညီလာခံ စုံညီအစည်းအဝေးမှာ ဖွဲ့စည်းပုံအခြေခံဥပဒေ ရေးဆွဲရေးနဲ့ ပတ်သက်တဲ့ အချောသပ် အခြေခံမူ ၁၀၄ ချက်ကို လုပ်ငန်းကော်မတီဥက္ကဌ ဦးအောင်တိုး ဖတ်ကြားတင်ပြခဲ့ပါတယ်၊ ခုလက်ရှိကျင့်သုံးနေတဲ့ အခြေခံဥပဒေဟာ ဆိုခဲ့ပါ အခြေခံမူ ၁၀၄ ချက်အပေါ်မှာ ရေးဆွဲထားတာမို့ အခြေခံဥပဒေကို အနက်ဖွင့်ဆိုရာမှာ အလေးအနက်ထည့်သွင်းစဉ်းစားရမယ့် အချက်များဖြစ်ပါတယ်
.
. . . အဲသည် အခြေခံမူ ၁၀၄ ချက်ထဲက တပ်မတော်နဲ့သက်ဆိုင်တဲ့ အခန်းမှာ အခြေခံမူ ၈ ချက် ချမှတ်ခဲ့တဲ့အထဲ နံပတ် ၈ အချက်က “As a reference in designating the official position of the Commander-in-Chief, the Commander-in-Chief is designated as the Vice-President level.” လို့ ရေးသားထားပါတယ်။ ၁၉၉၃ စက်တင်ဘာလ ၁၇ ရက်နေ့ထုတ် သတင်းစာများမှာ ရှာဖွေဖတ်ရှုနိုင်ပါတယ်
.
ဗိုလ်ကောင်း
၆ နိုဝင်ဘာ ၂၀၂၀

မချစ်တတ် မမုန်းတတ်တဲ့သူ

ဆရာတော် အရှင်ဆန္ဒာဓိကရဲ့
မချစ်တတ်မမုန်းတတ်တဲ့သူ ဆိုတဲ့စာအုပ်ကို ဖတ်ရတုန်းက ကိုယ့်အသက်က နှစ်ဆယ်ကျော်အစိတ်ပိုင်း အရွယ်တော် တစ်စိတ်ဟိုင်းနေပေမယ့် ကိုယ့်မှာ လူပျိုပေါက်လေးလို အသည်းတွေ ကွဲလို့ကောင်းနေတုန်း၊ ရန်ကုန်တက္ကသိုလ်ကနေ ကျောင်းပြီးခါစ တောထဲမှာ တာဝန်ကျတော့ အထွေအထူးလည်း လုပ်စရာမရှိချိန်မို့ စာအုပ်တွေမှာဖတ်ပြီး တစိမ့်စိမ့်စဉ်းစားသုံးသပ်ချိန် ရတဲ့အခိုက်အတန့်ပဲ
.
.. . ဆရာတော်ရဲ့ စာတွေဖတ်ပြီး သံယောဇဉ်တွေ အနှောင်အဖွဲ့တွေရဲ့ ပူလောင်မှုနဲ့ မေတ္တာရဲ့ ငြိမ်းအေးမှုကို ခွဲခွဲခြားခြား ခံစားနားလည်တတ်လာခဲ့တာမို့ ဆရာတော်ဘုရားရဲ့ ကျေးဇူးကြီးမားပါတယ်
.
.. . ကိုယ့်စိတ်ရဲ့အခြေအနေကို စောင့်ကြည့်တဲ့အလေ့အကျင့်လည်း ချမ်းမြေ့ရိပ်သာမှာ ရလာခဲ့ပြီမို့ ကိုယ်ချစ်တဲ့သူတွေအပေါ် ကိုယ့်ရဲ့ ယိုင်ညွတ်မှုအခြေအနေကို အေးအေးချမ်းချမ်း စဉ်းစားသုံးသပ်ဖြစ်ခဲ့တယ်
.
.. . ပုထုဇဉ်ပီပီ သံယောဇဉ်အနှောင်အဖွဲ့နဲ့ တွယ်တာစွဲလန်းမှုတွေကို မပယ်သတ်နိုင်တာပေမယ့် ရှင်းရှင်းလင်းလင်းတော့ မြင်အောင်ကြည့်တတ်ပြီမို့ ဘယ်လောက်ပဲချစ်ချစ် ဘဝဆက်တိုင်းတို့ဘာတို့ဆိုတာမျိုး မတောင်းအပ်တဲ့ဆုကို ဘယ်တော့မှ မတောင်းဖြစ်ခဲ့တော့ဘူး၊ တစ်ဘဝစာရဲ့ နှစ်အပိုင်းအခြားလောက်လေး ချစ်ရတာတောင်မှ ဘယ့်ကလောက်ပူလောင်ပင်ပန်းရသလဲဆိုတာ သံယောဇဉ်ဝဋ်ကြွေးကြီးပုံရတဲ့ ကိုယ်တွေလိုလူမျိုးတွေသာ အပ်ချမတ်ချသိန်ုင်တာမျိုးမို့
.
.. . ကိုယ်ချစ်ခင်မြတ်နိုးစွဲလန်းမိသူတွေ ကိုယ့်ကြောင့် စိတ်အနှောင့်အယှက်မဖြစ်ကြစေဖို့ ၊ ကိုယ့်ကိုအကြောင်းပြုပြီး ကုသိုလ်တရားသာ ပွားများနိုင်စေဖို့၊ ကိုယ့်ကိုချစ်ကြသူတွေအပေါ် တုန့်လှယ်မေတ္တာ များများကြီးထားနိုင်ဖို့ နဲ့ ကိုယ်ကချစ်ပါလျက် ကိုယ့်ကိုစိမ်းကားသူတွေအပေါ် လျစ်လျူရှုခြင်းဖြင့် ကိုယ့်ရဲ့ချမ်းသာကိုမွေးမြူဖို့ ကြိုးစားလေ့ကျင့်ဖြစ်ခဲ့တယ်
.
.. . နောက်ဆုံးတစ်ခုကလွဲရင် ကျန်တာတွေတော့ တော်တော်အလုပ်ဖြစ်နေတုန်း ထင်ပါရဲ့

၂၀၂၀ ရွေးကောက်ပွဲနဲ့ပတ်သက်ပြီး တပ်မတော်က နာခံခဲ့တဲ့ ကိစ္စတွေ

တစ်ခုက ရွေးကောက်ပွဲဆိုင်ရာ နည်းဥပဒေများ ပြင်တုန်းက၊ တပ်ပရဝုဏ်အတွင်းက မဲရုံတွေ တပ်ပြင်ကို ထုတ်ဖို့ဆိုတာပါတဲ့ နည်းဥပဒေကို ပြင်ဆင်ထုတ်ပြန်တုန်းက ဥပဒေအရ ရက်ပေါင်း ၆၀ အတွင်း ပြင်ဆင်ချက်တင် ကန့်ကွက်နိုင်ပေမယ့် မလုပ်တော့ဘဲ အဲသည် နည်းဥပဒေအတိုင်း တပ်မဲရုံတွေကို တပ်ပြင်ကို ထုတ်ပေးခဲ့တယ်
နောက်တစ်ခုက တပ်မတော်ဦးစီးချုပ်ရဲ့ မူဝါဒခြောက်ချက်ကို သတင်းစာမှာထည့်တာကို စာနယ်ဇင်းကောင်စီတစ်ဆင့် ကန့်ကွက်တာကိုလည်း အသာတကြည် ဖြုတ်ပေးခဲ့တယ်၊ အင်စတီကျူးရှင်း နှစ်ခုကြားမှာ မလိုလားအပ်တဲ့ ပွတ်တိုက်မှုတွေမဖြစ်ချင်လို့ အခုလို လိုက်လျောခဲ့တာလို့ ဆိုတယ်

တပ်နယ်တစ်ခုက ကြိုတင်မဲတွေ စာအိတ်ပွင့်နေလို့ ပယ်မဲလုပ်မယ် ဘာညာ အသံထွက်လာတော့လည်း ဥပဒေအတိုင်းလုပ်တာကို နာခံမယ်လို့ ပြောခဲ့တယ်၊ ဒါပေမယ့် ဒီပြသနာက သူ့တစ်နေရာတည်းဖြစ်နေတာမဟုတ်ဘူး တစ်ခြားမှာလည်း ဖြစ်နေတာကို ထင်ရှားအောင်ပြပြီး Double Standard မဖြစ်ဖို့တော့ လိုတယ်ဆိုတာလောက် သတိပေးခဲ့တယ်၊ မကြာပါဘူး ရွေးကော်က ဥပဒေတွေ မကိုးမကားနဲ့ စိတ်ကူးပေါက်ရာရေးထားတဲ့ ကြိုတင်မဲဆန္ဒရှင်များသို့ အသိပေးကြေညာချက်ဆိုတာ ထွက်လာတာပဲ

နောက်ထပ် ဘာတွေ ရှိသေးပါလိမ့်

အဖွဲ့အစည်းအသီးသီး

ရွေးကောက်ပွဲနဲ့ ပတ်သက်တဲ့ တပ်မတော်ရဲ့ သဘောထား စာနှစ်စောင် ထုတ်ပြန်မှုမှာ အစိုးရရဲ့ လက်အောက်က ဝန်ထမ်းအဖွဲ့အစည်းတစ်ခုက ဒီလိုမျိုး အစိုးရကို ပြန်သတိပေးတဲ့ စာမျိုး ထုတ်တာ နေရာကျရဲ့လားလို့ တစ်ချို့က မေးကြတယ်
.
ဒီမိုကရေစီကျင့်သုံးတဲ့ နိုင်ငံတွေမှာ နိုင်ငံတော်နဲ့ ပတ်သက်တဲ့ တာဝန်နဲ့ အာဏာအရပ်ရပ်ကို အဖွဲ့အစည်းအသီးသီးကို လွှဲအပ်ထားပြီး သက်ဆိုင်ရာ အဖွဲ့အစည်းက သက်ဆိုင်ရာ တာဝန်ကို အခြေခံဥပဒေက အပ်နှင်းထားတဲ့ လုပ်ပိုင်ခွင့်နဲ့အညီ လုပ်ဆောင်ရတယ်ဆိုတာ နားမလည်လို့ ဒီလိုမေးကြတယ် မှတ်တယ်
.
ဥပမာ စီအိုင်အေလို ဌာနမျိုးရဲ့ အကြီးအကဲကို သမ္မတက ခန့်အပ်ပေမယ့် သမ္မတက ရုရှားနဲ့ ပလူးပလဲလုပ်ပြီး အမျိုးသားလုံခြုံရေးကို ထိပါးနေစေသလားဆိုတာကို စီအိုင်အေက သူ့ဘာသာ စုံစမ်းစစ်ဆေးလုပ်လို့ရတယ်၊ မြန်မာပြည်က ပြည်ထောင်စု ရွေးကော်က သီးခြားလွတ်လပ်တဲ့ အဖွဲ့အစည်းသာ ဖြစ်ခဲ့ရင် အခုလို သမ္မတက အိမ်တော်မြက်ခင်းပြင်လိုမျိုးမှာ သူ့ပါတီမဲဆွယ်တဲ့ စာသားတွေနဲ့ မဲဆွယ်ရာရောက်တဲ့ အပြုအမူတွေလုပ်တာ ကို တားဆီးလို့ရတယ်
.
အခြေခံဥပဒေ ပုဒ်မ ၂၀(စ) မှာ တပ်မတော်သည် နိုင်ငံတော်ဖွဲ့စည်းပုံအခြေခံဥပဒေကို ကာကွယ်စောင့်ရှောက်ရန် အဓိက တာဝန်ရှိသည် လို့ ပြဌာန်းထားတာမို့ အခြေခံဥပဒေရဲ့ အနှစ်သာရကပေးထားတဲ့ တန်ဖိုးတွေ ကျင့်ဝတ်တွေကို သွေဖယ်မယ့် ကိစ္စမျိုးတွေကို ဝင်ရောက်ထိန်းသိမ်းပေးဖို့ သတိထောက်ဖို့ တည့်မတ်ပေးဖို့ တပ်မတော်မှ တာဝန်ကို ရှိတယ်၊ မလုပ်ဘဲ ဒီအတိုင်း ထိုင်ကြည့်နေရင်တောင် တာဝန်မကျေပွန်ရာကျအုံးမယ်

ဥပဒေနဲ့အညီ

. . . ၂၀၁၀ ရွေးကောက်ပွဲ ကျင်းပတဲ့ရက် မတိုင်ခင်လေးမှာပဲ ကိုယ်က တပ်ပြောင်းပါတော့ မူရင်းတပ်မှာ ကြိုတင်ဆန္ဒမဲ ပေးခဲ့ပြီး တပ်အသစ်ကို သွားရတယ်၊ သတင်းပို့ရက် စောစောရချင်လို့ တပ်အသစ်ကို မြန်မြန်သွားချင်တော့ ကြိုတင်ဆန္ဒမဲကို အစောကြီးသွားပေးတယ်၊ ကိုယ်ပေးတဲ့အချိန် ကိုယ့်ရှေ့မှာ လေးငါးယောက်လောက်ပဲ ပေးရသေးတယ်၊ ကိုယ်မဲပေးတဲ့ စာအိတ်ကို သက်ဆိုင်ရာ တာဝန်ရှိသူက အပေါ်က ခဲလေးနဲ့ နာမည်မှတ်တော့ ကိုယ်က ပြောရတယ်၊ ဥပဒေအရ ကြိုတင်မဲလက်မှတ် စာအိတ်အပေါ်မှာ ဘယ်သူ့မဲပါဆိုပြီး မှတ်ခွင့်မရှိဘူး မဲပေးသူရဲ့ လျှို့ဝှက်စွာ မဲပေးခြင်းကို ထိခိုက်တာမို့ မဲကလည်း ပယ်မဲဖြစ်သွားနိုင်တာမို့ အာ့လို မှတ်လို့မရဘူးလို့ ပြောရတယ်၊ အဲသည်တော့မှ အဲသည် တာဝန်ရှိသူက ဟုတ်လား ဆိုပြီး ခဲဖျက်လေးနဲ့ အသာပြန်ဖျက်တယ်၊ အရင်က မှတ်ထားတဲ့ နာမည်လေးတွေကိုလည်း ပြန်ဖျက်ရှာတယ်၊ သူ နာမည်မှတ်တဲ့ ရည်ရွယ်ချက်က ဘယ်သူတွေ မဲပေးပြီးပြီဆိုတာကို စာအိတ်ပေါ်မှာလည်း မှတ်ထားချင်ပုံရတယ် သေချာချင်တာကိုး၊ နောက်တစ်ခုက သူ့ကို ဒီတာဝန်ပေးထားပေမယ့် ဥပဒေရဲ့ အကန့်အသတ်တွေကို သေချာ နားလည်ပုံမပေါ်ဘူး၊ ပြောပြတော့လည်း နားထောင်ပါရဲ့၊ ပြောချင်တာက ဥပဒေကို နားမလည်ဘဲ ချိုးဖောက်မိရင်လည်း မဲပေးသူရဲ့ အခွင့်အရေး ဆုံးရှုံးနိုင်တယ်ဆိုတာပါပဲ

.
. . . ဂီရိမုန်တိုင်းတိုက်နေတဲ့ ရက်တွေထဲမှာပဲ တာဝန်ကျတဲ့ ဧရာဝတီတိုင်းကို ရောက်သွားတယ်၊ မုန်တိုင်းလည်းအစဲမှာ ပထမဆုံး ထမ်းဆောင်ရတဲ့ တာဝန်က ရွေးကောက်ပွဲကျင်းပတဲ့ ရက်မှာ မြို့တစ်မြို့ရဲ့ လုံခြုံရေးတာဝန်၊ သိတဲ့အတိုင်းပဲ မြို့ရဲ့ လုံခြုံရေးတာဝန် အထူးသဖြင့် နိုင်ငံရေးသမားတွေ ပြိုင်ဆိုင်ကြတဲ့ ပွဲတစ်ခုကို လုံခြုံရေးလုပ်ပေးရတဲ့ တာဝန်က အင်မတန် သိမ်မွေ့တယ် အလုပ်မတတ်ရင် နိုင်ငံရေးသမားတွေ အငြင်းပွားမှုကြား ကိုယ်က အချိန်မရွေး မြေစာပင် ဖြစ်သွားနိုင်တာကိုး၊ ကိုယ့်တာဝန်ကို ထမ်းဆောင်ရင်း မြေစာပင်တော့ အဖြစ်မခံနိုင်ဘူး၊ ငါအားကိုးစရာ ဥပဒေပဲရှိတယ်ဆိုပြီး ရွေးကောက်ပွဲဆိုင်ရာ ဥပဒေတွေအကုန် လုံးစေ့ပတ်စေ့ဖတ်တယ်၊ အထူးသဖြင့် လက်နက်ကိုင်ထားတဲ့ လုံခြုံရေးအဖွဲ့ဝင်တပ်မတော်သားတစ်ယောက် ကျော်ခွင့်မရှိတဲ့ စည်းတွေကို လိုက်ရှာတယ်
.
. . . ဥပဒေတွေထဲမှာမှ အထူးသဖြင့် ပြည်သူ့လွှတ်တော်၊ အမျိုးသားလွှတ်တော်၊ တိုင်းဒေသကြီးနှင့် ပြည်နယ်လွှတ်တော် ရွေးကောက်ပွဲ ဥပဒေ နဲ့ နည်းဥပဒေတွေထဲမှာ ခုနပြောခဲ့တဲ့ လုံခြုံရေးတာဝန်ထမ်းဆောင်ရတဲ့ သေနတ်ကိုင်ထားတဲ့ စစ်သားတစ်ယောက် ကျော်ခွင့်မရှိတဲ့ စည်းတွေကို လိုက်ရှာတယ်၊ တွေ့တယ်၊ ရွေးကောက်ပွဲ ကျင်းပချိန်မှာ မဲရုံပရဝုဏ်အတွင်း ဘယ်သူတွေ ရှိနေခွင့်ရှိလဲဆိုတာ တွေ့တယ်၊ ဥပဒေအရ ကိုယ်က လုံခြုံရေးတာဝန်ထမ်းဆောင်သူ ဆိုပေမယ့် ရဲတပ်ဖွဲ့ဝင်ကိုသာ မဲရုံအတွင်း ရှိနေခွင့်ပေးထားတယ်၊ သက်ဆိုင်ရာ ရပ်ကွက်ကျေးရွာအုပ်စု ကော်မရှင်အဖွဲ့ခွဲက လုံခြုံရေးတာဝန်ပေးထားသူ မဲရုံအတွင်း ရှိနေခွင့်ပေးထားတယ်၊ တခြားနေခွင့်ရှိသူတွေလည်း ရှိသေးတယ်၊ သေချာတာကတော့ ကိုယ့်ကို တာဝန်ပေးထားတာ သက်ဆိုင်ရာ ရပ်ကွက် ကျေးရွာအုပ်စုက မဟုတ်တဲ့အတွက် ကိုယ်သည် မဲရုံအတွင်း ရှိနေခွင့်ရှိသူမဟုတ်ဘူး မဲရုံပရဝုဏ်ရဲ့ အပြင်မှာသာ နေခွင့်ရှိသူ၊
.
. . . အဲသည်ဥပဒေကို ဖတ်ပြီးတဲ့အချိန်မှာ တစ်မြို့လုံးမှာရှိတဲ့ ရပ်ကွက်အားလုံးက မဲရုံမှူးတွေကို ကိုယ်တိုင်သွားတွေ့တယ်၊ ကျနော်က မဲပေးမယ့်ရက်မှာ ဒီမြို့ရဲ့ လုံခြုံရေးတာဝန်ကျ အရာရှိဖြစ်ပါတယ်၊ ကျနော်က မဲပေးတဲ့နေ့ မတိုင်ခင်နဲ့ မဲပေးပြီးရက်အထိ တာဝန်မရုပ်သိမ်းမချင်း လုံခြုံရေးတာဝန်ထမ်းဆောင်ရမယ့်သူ ဖြစ်ပါတယ်၊ သို့သော်လည်း ဥပဒေအရ မဲရုံပရဝုဏ်ထဲ ဝင်ခွင့်မရှိသူဖြစ်တာကြောင့် မဲရုံပရဝုဏ်ရဲ့ ပြင်ပမှာ ဘယ်နေရာမှာ ကျနော့်ရဲ့ တပ်ဖွဲ့ဝင်တွေ အနီးကပ်ရှိနေပေးပါတယ်၊ ကျနော်က တစ်မြို့လုံးကို ပတ်နေမှာဖြစ်ပါတယ်၊ ဆရာကြီး ဆရာမကြီး (မဲရုံမှူးတွေက ဆရာဆရာမကြီးတွေ) ဖုန်းနံပတ် ကျနော့်ကို ပေးထားပါခင်ဗျာ ကျနော့်ဖုံးနံပတ်က ဟောသည်မှာပါ နာမည်က ဘယ်သူပါ၊ လုံခြုံရေးနဲ့ ပတ်သက်ပြီး လိုအပ်သလို အချိန်မရွေးဆက်သွယ်ပါခင်ဗျာ့ ဆိုပြီး မဲရုံတွေပတ်ကြည့် မဲရုံပရဝုဏ်အကျယ်အဝန်းကြည့် သက်ဆိုင်ရာ လက်အောက်ငယ်သားကို သေချာမှာ တွေ့လားဟျောင့် အဲဒီအထဲကို မင်း ဘယ်အချိန်မှာမှ ဘယ်လိုအကြောင်းနဲ့မှ ဝင်ခွင့်မရှိဘူး ဝင်သွားတယ်ကြားလို့ကတော့ ပုံတစ်ပုံ တက်လာလို့ကတော့ မင်းရောငါရော အသေပဲ စသည်ဖြင့် တပေါ်ကျဲ့တွေ သေချာမှာရတာ
.
. . . နောက်ပြီး သက်ဆိုင်ရာ မြို့နယ်ရဲတပ်ဖွဲ့မှူးနဲ့ ချိတ်ဆက်ထားပြီး မဲရုံအလိုက် တာဝန်ပေးထားတဲ့ ရဲတပ်ဖွဲ့ဝင်တွေနဲ့ ကြိုတင်ချိတ်ဆက် ဖုန်းနံပတ်တွေဖလှယ်လုပ်ရတယ်
.
. . . ရွေးကောက်ပွဲနေ့မှာ မနက်မိုးမလင်းခင်ကတည်းက တစ်မြို့လုံးတပ်ဖြန့်ထားတဲ့ ကိုယ့်တပ်ဖွဲ့ဝင်တွေ လိုက်စစ် ရဲတပ်ဖွဲ့ဝင်တွေ လိုက်နုတ်ဆက် အခြေအနေမေး စသည်ဖြင့် လုပ်ရတာပေါ့၊ အေးအေးချမ်းချမ်းနဲ့ တာဝန်ထမ်းဆောင်ပြီးခဲ့ပါတယ်
.
. . . ရွေးကောက်ပွဲနေ့မှာ လုံခြုံရေးတာဝန်ကျတဲ့ တပ်မတော်သားညီအစ်ကိုတွေ ဥပဒေဘောင်အတွင်းကနေ တာဝန်ကို အေးချမ်းချောမွေ့စွာ အောင်အောင်မြင်မြင် ထမ်းဆောင်နိုင်ကြပါစေ
.
ဗိုလ်ကောင်း
၁ နိုဝင္ဘာ ၂၀၂၀

အဆင့်မြင့်ကြက်ဥပြုတ်

ကြက်ဥပြုတ်ကို အရသာရှိအောင် ပြုတ်တတ်ရင် စားလို့သိပ်ကောင်းတာ
ကြက်ဥပြုတ်မှာ အပြင်အကာသားက မာမာကြီးမဖြစ်ဘဲ အနေတော် နူးညံ့တဲ့အနေအထားလေးနဲ့ ၊ အနှစ်ကလည်း အရည်တွေ ခဲကာစ စိမ့်နေတဲ့ အရသာလေးနဲ့ ဖြစ်ဖို့ဆိုတာ ပြုတ်တဲ့အခါ အတိုင်းအဆ အင်မတန် အရေးကြီးတာ
.
ကြက်ဥပြုတ်တာများ လွယ်တာပေါ့လို့ ပြောလို့ရတာပေါ့၊ ဒါပေသိ အထက်မှာ ပြောခဲ့တဲ့ အရသာနဲ့ နူးညံ့မှုကို ရဖို့ကတော့ အတိုင်းအဆ လိုတယ်
.
ကြက်ဥပြုတ်ဖို့အတွက် ကြက်ဥမြုပ်လောက်တဲ့ ရေကို အိုးထဲထည့်ပြီး ဆူအောင်တည်ရတယ်၊ ရေဆူပြီဆိုမှ ကြက်ဥကို ထည့်ရတာ၊ ထည့်တဲ့အခါမှာလည်း ကြက်ဥကို ရေနွေးပူပူထဲ ပစ်ထည့်လိုက်ရင် ကွဲတတ်တယ်၊ ကြက်ဥကွဲသွားရင် ကြက်ဥထဲက အရည်တွေ အပြင်ထွက်ပြီး ပျက်ကရောပဲ၊ ဒါကြောင့် ကြက်ဥကို ဇွန်းလေးနဲ့ အသာယူပြီး ဆူနေတဲ့ ရေထဲကို အသာလေး ထည့်ရတာ
.
ထည့်ပြီးဆိုတာနဲ့ အိုးအဖုံးကို ပိတ်လိုက်၊ ပြီးတာနဲ့ နာရီကို မှတ်ထားတော့
အိုးအဖုံးပိတ်ပြီး ခြောက်မိနစ်တိတိ ဆူနေတဲ့ ရေဆူထဲမှာ အဖုံးပိတ်ပြီး ထားရမယ်
.
ခြောက်မိနစ်ပြည့်ပြီဆိုတာနဲ့ ကြက်ဥကို ဆူနေတဲ့ ရေထဲကနေ ဇွန်းလေးနဲ့ဆယ်ပြီး ရေခဲရေထဲကို စိမ်ထားလိုက်၊ အနည်းဆုံး ငါးမိနစ်စိမ်ရမယ်
ရေခဲရေထဲ ငါးမိနစ်စိမ်ပြီးတာနဲ့ ကြက်ဥလည်း အေးသွားပြီ အခွံနွှာဖို့ အသင့်ဖြစ်ပြီ
.
ကြက်ဥကို ဘေးပတ်ပတ်လည် ခေါက်လိုက်ရင် ကြက်ဥအခွံက အတွင်းသားတွေနဲ့ ကပ်မနေဘဲ ကောင်မလေးကို အင်္ကျီချွတ်သလို သာသာယာယာ ကွာသွားလိမ့်မယ်
.
ပြီးတာနဲ့ ဓားနဲ့ မခွဲဘဲ အပ်ချည်ကြိုး ဒါမှမဟုတ် ဝါယာကြိုးစလေးနဲ့ ကြက်ဥကို လိုသလို ပိုင်းစိတ်ကြည့်လိုက် နူးညံ့တဲ့ အပြင်အကာသားဖြူဖြူလေး အထဲမှာ အရည်က အနှစ်ဖြစ်ခါစ နူးညံ့ပြီး အရသာရှိတဲ့ အနှစ်သားလေးနဲ့ အဆင့်မြင့် ကြက်ဥပြုတ် ရပါပြီ
.
အဲ
တစ်ခုပဲရှိတာ
အရမ်းအရသာရှိတဲ့ အနှစ်သားလေးတွေကို
ဝိတ်ချနေတဲ့အချိန်မှာတော့ မစားသင့်ပါဘူးတဲ့
.
လခွမ်းတဲ့မှဘဲ
အဲ့သည် အနှစ်သားလေး အရသာရှိရှိ စားချင်လို့ ဒီလောက် အလုပ်ရှုပ်ခံပြီးပြုတ်ထားတာကို အနှစ်မစားရဘူးဆိုမှတော့ ဘာအဓိပ္ပာယ်ရှိတော့မှာလဲ
.
ဖာ့ခ်

NCA Speeches by different stakeholders

the speeches obviously indicate that there are different versions of narrative on Pyidaungsu, Federalism, and Peace concepts. Reconcialiation of the narrative, i think, would be the most important in the priority order of the process, life and death matter for a Myanmar dream


#genuine
both parties never disagree
on the use of it
one uses it for #democracy
the other uses it for #Pyidaungsu

တင်သွင်းလွှာ ၁/၂၀၂၀

. . . ဥပဒေကိစ္စတွေတော့ သိပ်နားမလည်ပေမယ့် မနေ့က လုပ်တဲ့ အခြေခံဥပဒေခုံရုံး တင်သွင်းလွှာ ကြားနာမှုနဲ့ ပတ်သက်ပြီး မြင်တာလေးတွေပြောချင်တယ်
.
ဝန်ကြီးချုပ်က တင်သွင်းခွင့်ရှိမရှိ
.
. . . ဆုံးဖြတ်ရမယ့်အချက် နံပတ်တစ်ဟာ ကယားပြည်နယ်ဝန်ကြီးချုပ်အနေနဲ့ ခုံရုံးကို တင်သွင်းခွင့် ရှိမရှိကိစ္စဖြစ်ပါတယ်၊ စာရွက်စာတမ်းတွေအပေါ် ဖော်ပြထားတဲ့ ရက်စွဲတွေအရ ဝန်ကြီးချုပ်ဟာ တာဝန်က ရပ်စဲမခံရခင်မှာ တင်တယ်လို့ဆိုတယ်၊ ဝန်ကြီးချုပ်တာဝန်ထမ်းဆောင်နေစဉ်မှာ တင်သွင်းခဲ့တာဆိုရင် ဒါကို ခုံရုံးက လက်ခံထိုက်တယ်လို့ ယူဆလို့ရတယ်၊ ခုံရုံးက တင်သွင်းလွှာကို လက်ခံကြားနာထိုက်တယ်လို့ ဆုံးဖြတ်ခဲ့ရင် အမှုက ရှေ့ဆက်သွားမယ်၊ လက်မခံရင် အမှုက ဘာမှ ဆက်လုပ်စရာမလိုတော့ဘူး
.
ဝန်ကြီးချုပ်လား အယ်ဖောင်းရှိုလား
.
. . . အခု အမှုကို လက်ခံကြားနာထိုက်တယ်လို့ ခုံရုံးက ဆုံးဖြတ်ပြီး ဆက်လက် ကြားနာစစ်ဆေးခဲ့မယ်ဆိုရင် ဒီအမှုဟာ ဘယ်သူတင်တာလဲဆိုတာ ဥပဒေကြောင်းအရ ရှင်းလင်းဖို့ လိုမယ်လို့ထင်တယ်၊ အခြေခံဥပဒေအရ ခုံရုံးကို နည်းလမ်းတကျ တင်သွင်းခွင့်ရှိတာ ပြည်နယ်ဝန်ကြီးချုပ် ဖြစ်ပါတယ်၊ တာဝန်က ရပ်စဲခံရတဲ့ ဦးအယ်ဖောင်းရှို မဟုတ်ပါဘူး၊ ဒါကြောင့် သူတာဝန်က ရပ်စဲသွားတဲ့ နောက်မှာ ဒီအမှုကို လက်ရှိ ပြည်နယ်ဝန်ကြီးချုပ်က ရာထူးတာဝန်အရ ဒီအမှုကို ဆက်ခံရပါမယ်။ လက်ရှိ ပြည်နယ်ဝန်ကြီးချုပ်ကသာ အမှုကို ဆက်လက် ရင်ဆိုင်ရပါမယ်၊ လက်ရှိ ဝန်ကြီးချုပ်က တာဝန်လွှဲအပ်တဲ့ ရှေ့နေကသာ ရုံးတော်မှာ လျှောက်လဲခွင့်ရှိရပါမယ်၊ အခု လက်ရှိ ရုံးတော်မှာ ဦးအယ်ဖောင်းရှိုရဲ့ ပုဂ္ဂိုလ်ရှေ့နေက လာရောက်လျှောက်လဲနေတာ နည်းလမ်းကျတယ်လို့ မထင်ပါဘူး။ ဒါကိုလည်း ရုံးတော်က ထည့်သွင်းစဉ်းစားရမယ့် အရေးကြီးကိစ္စလို့ ထင်ပါတယ်
.
ရုံးတော်သဟာယ
.
. . . ခုံရုံးက ရုံးတော်သဟာယ ဖိတ်ခေါ်တဲ့အခါမှာ ရှေ့နေချုပ်ရုံးကို ဖိတ်ခေါ်ခဲ့တဲ့အတွက် ရှေ့နေချုပ်ကိုယ်စား ညွှန်ကြားရေးမှူးချုပ်တစ်ယောက် တက်ရောက်တာကို တွေ့ရပါတယ်၊ ရုံးတော်သဟာယရဲ့ ပြောကြားချက်တွေကလည်း မူလတင်သွင်းလွှာမှာပါတဲ့ အချက်တွေကို ထောက်ခံတဲ့သဘောမျိုး တင်ပြသွားတာ တွေ့ရပါတယ်၊ ကိုယ့်အမြင်အရ ပြောရရင် အုပ်ချုပ်ရေးမဏ္ဍိုင်အကြီးအကဲ နိုင်ငံတော်သမ္မတ အမည်ပေးပို့ခန့်အပ်ထားတဲ့ အုပ်ချုပ်ရေးအာဏာပိုင် ဝန်ကြီးချုပ်ကို ဥပဒေပြုရေးအာဏာပိုင် ပြည်နယ်လွှတ်တော်က စွပ်စွဲပြစ်တင်ဖြုတ်ချခဲ့လို့ ဖြစ်ခဲ့ရတဲ့ နောက်ဆက်တွဲအဖြစ် အခြေခံဥပဒေခုံရုံးကို ရောက်လာတဲ့ ကိစ္စမှာ အုပ်ချုပ်ရေးအကြီးအကဲ သမ္မတက ခန့်အပ်ထားတဲ့ ရှေ့နေချုပ်ကို ရုံးတော်သဟာယအဖြစ် ဖိတ်ကြားတာက ရာထူးအာဏာအလျောက် ဩဇာလွှမ်းမိုးမှု မကင်းနိုင်ဘူးလို့ သံသယဖြစ်ဖွယ်ရှိပါတယ်၊ ဒါကြောင့် ရုံးတော်သဟာယအဖြစ် အုပ်ချုပ်ရေး နဲ့ ဥပဒေပြုရေး မဏ္ဍိုင်တွေနဲ့ လွတ်ကင်းတဲ့ မြန်မာနိုင်ငံ ရှေ့နေများကောင်စီတို့လို ကြားနေအဖွဲ့အစည်း ပုဂ္ဂိုလ်မျိုးကိုသာ ရုံးတော်သဟာယအဖြစ် ဖိတ်ကြားဖို့ ပိုမိုသင့်လျော်မယ်လို့ ယူဆပါတယ်
.
ခုံရုံးရဲ့ သမာသမတ်ကျမှု
.
. . . အခြေခံဥပဒေအရ ခုံရုံးကို သမ္မတနဲ့ လွှတ်တော်ဥက္ကဌ နှစ်ယောက်တို့က တရားသူကြီးသုံးဦးစီ အမည်စာရင်းပေး ခန့်အပ်ထားတာမို့ တရားသူကြီး ကိုးဦးလုံးက လက်ရှိ အာဏာရပါတီက အလုံးစုံခန့်အပ်ထားတဲ့ တရားသူကြီးတွေ ဖြစ်နေတဲ့ အချက်လည်း ခုံရုံးရဲ့ ဆုံးဖြတ်ချက်အပေါ် သက်ရောက်နိုင်ဖွယ်ရှိပါတယ်၊ (အခြေခံဥပဒေပြင်ဆင်ရေးရှုထောင့်ပြောရရင်) ခုံရုံးရဲ့ ဖွဲ့စည်းပုံရယ် သက်တမ်းကိုလည်း အစိုးရသက်တမ်းနဲ့ အတူတူ ပေးထားတာရယ်ကြောင့် အစိုးရတစ်ရပ်ပြောင်းတိုင်း လိုက်ပြောင်းနေမယ့် ခုံရုံးအစား ပြည်ထောင်စုတရားလွှတ်တော်ချုပ်ကဲ့သို့ တရားစီရင်ရေးမဏ္ဍိုင်ကို ခိုင်ခိုင်ခံ့ခံ့ ထိန်းကျောင်းနိုင်တဲ့ စနစ်မျိုးပြင်ဆင်ဖို့လိုမယ်လို့ ထင်ပါတယ်
.
ကယားလွှတ်တော်စုံစမ်းရေးအဖွဲ့မှာစွပ်စွဲသူပါနေတဲ့ကိစ္စ
.
. . . ဥပဒေပြဌာန်းချက်များမှာ တားမြစ်မထားပေမယ့် စွပ်စွဲသူကို စုံစမ်းစစ်ဆေးရေးအဖွဲ့ထဲ ထည့်ဖွဲ့တာက သာမန်အားဖြင့်တော့ မလုပ်သင့်တဲ့ ကိစ္စလို့ ထင်ပါတယ်၊ ဒါပေမယ့် စုံစမ်းစစ်ဆေးရေးအဖွဲ့က စုံစမ်းရုံသာဖြစ်ပြီး ဆုံးဖြတ်တာက ကယားလွှတ်တော်သာဖြစ်တဲ့အတွက် ဘယ်သူစုံစမ်းစစ်ဆေးခဲ့တယ်ဆိုတဲ့အချက်က အယ်လ်ဖောင်းရှို ဖြုတ်ချခံရတဲ့ ကိစ္စမှာ သက်ရောက်မှု ကြီးမယ်လို့တော့ မထင်မိပါဘူး
.
. . . အခုပြောခဲ့တာက ကိုယ့်အမြင်သက်သက်ပါ၊ ခုံရုံးရဲ့ ဆုံးဖြတ်ချက် ထွက်လာတဲ့အခါ လက်ရှိအာဏာရပါတီရဲ့ အစိုးရနဲ့ လွှတ်တော်အကြီးအကဲတွေက ခန့်အပ်ထားတဲ့ တရားသူကြီးတွေ အမှုကို ဘယ်လိုဆုံးဖြတ်ကြမလဲဆိုတာကြည့်ပြီး သူတို့ရဲ့ တရားမျှတမှုအယူအဆကို အကဲဖြတ်ကြပါစို့
.
ဗိုလ်ကောင်း
၇ အောက်တိုဘာ ၂၀၂၀
.
တစ်နာရီခွဲလောက်ကြာတဲ့ ခုံရုံးကြားနာချက် အပြည့်အစုံကို ဒီနေရာမှာ ကြည့်ရှုလေ့လာနိုင်ပါတယ်
https://youtu.be/ikE_PCleP38

နောက်ဆုံးတိုက်ပွဲ

      သမ္မတ စဖြစ်ပြီဆိုကတည်းက အရင့်အရင်သမ္မတတွေနဲ့ မတူဘဲ ဘာပဲလုပ်လုပ် ပွဲဆူလေ့ရှိတဲ့ သမ္မတထရမ့် လေးနှစ်သက်တမ်းပြည့်ခါနီးမှာ နောက်ဆုံးတိုက်နေရတဲ့ တိုက်ပွဲကတော့ တရားရုံးချုပ် တရားသူကြီးတစ်ယောက် ကွယ်လွန်လို့ လစ်လပ်သွားတဲ့တစ်နေရာ အစားထိုးပြန်ခန့်ဖို့ ကြိုးစားနေရခြင်း ဖြစ်ပါတယ်။
.
. . . သာမန်အားဖြင့်ကတော့ အမေရိကန်အခြေခံဥပဒေမှာ ပြဌာန်းထားတဲ့အတိုင်း လစ်လပ်သွားတဲ့ တရားသူကြီးတစ်ယောက်ကို သမ္မတက အမည်စာရင်းတင်သွင်း လွှတ်တော်က လိုအပ်တဲ့ စိစစ်ကြားနာမှုတွေလုပ်ပြီး အတည်ပြုခန့်အပ်လိုက်တာဆိုပေမယ့် အခြေအနေက ထင်သလောက် မရိုးရှင်းပါဘူး။
.
. . . ပထမဆုံးအချက်က သမ္မတရွေးကောက်ပွဲ အလွန်ကိုနီးကပ်နေတဲ့အချိန်ဖြစ်တဲ့အပြင် အမေရိကန်တစ်လွှားက ကြိုတင်မဲပေးမယ့်သူတွေက မဲပေးပြီးကုန်ကြပါပြီ။ ဒီလိုအချိန်မျိုးမှာ လစ်လပ်တရားသူကြီးတစ်ယောက်ကို အမည်စာရင်းတင်သွင်းပြီး ခန့်အပ်ဖို့ ကြိုးစားတာက အမေရိကန်သမိုင်းမှာ မရှိခဲ့သေးဘူးလို့ ဆိုပါတယ်၊ အခြေခံဥပဒေအရ သမ္မတရဲ့ လုပ်ပိုင်ခွင့်ဘောင်ဝင်ပေမယ့် ဒီလိုအခြေအနေမျိုးမှာ ဒီလိုလုပ်တာက ကျင့်ဝတ်နဲ့မညီတဲ့ သဘောမျိုး ကန့်ကွက်နေကြတာတွေရှိပါတယ်
.
. . . အထူးသဖြင့် သမ္မတလောင်းပြိုင်ဘက် ဂျိုးဘိုင်ဒင်က သူသမ္မတဖြစ်ခဲ့ရင် ဒီအမည်စာရင်းတင်သွင်းမှုကို ပြန်လည်ရုပ်သိမ်းပြီး အမည်စာရင်းအသစ်ပြန်တင်မယ်လို့ ဆိုပါတယ်၊ အောက်လွှတ်တော်ဥက္ကဌ ဒီမိုကရက်အမတ် နန်စီပလိုစီကလည်း ဒါကို ခုချိန်မှာ မလုပ်သင့်ဘူးလို့ ကန့်ကွက်နေပါတယ်၊ ဒါ့အပြင် တခြားသော ထင်ရှားကျော်ကြားတဲ့ နိုင်ငံရေးသမားတွေအပိုင်းက ကန့်ကွက်နေကြတာတွေ ကျယ်ကျယ်လောင်လောင် လုပ်နေကြပေမယ့် ထောက်ခံတဲ့သူတွေကလည်း ဒုနဲ့ဒေးပါပဲ၊
.
. . . ဒုတိယ အချက်ကတော့ လက်ရှိ တရားသူကြီးတွေရဲ့ ဝါဒစွဲတွေနဲ့ ဆိုင်ပါတယ်၊ တရားသူကြီးဆိုသော်လည်း သူတို့လည်း လူဖြစ်တဲ့အတွက် သူတို့ယုံကြည်ရာ ဝါဒစွဲတွေ ကိုယ်စီရှိကြပါတယ်။ သူတို့ကို ဘယ်သမ္မတက ခန့်ခဲ့သလဲ ဆိုတာအပေါ် မူတည်ပြီး သူတို့ရဲ့ ဝါဒစွဲကို ပြောကြတာ ဖြစ်ပါတယ်၊ အခုလက်ရှိ တရားသူကြီးချုပ်အပါအဝင် တရားသူကြီးစုစုပေါင်း ရှစ်ဦး ရှိတဲ့အနက် ရီပတ်ပလစ်ကင် သမ္မတွေဖြစ်တဲ့ ဘုရှ် စီနီယာနဲ့ ဂျူနီယာ၊ လက်ရှိသမ္မတ ထရမ့် တို့ ခန့်ခဲ့တဲ့ တရားသူကြီးက ငါးဦးရှိနေပြီး ဒီမိုကရက်သမ္မတတွေဖြစ်တဲ့ ကလင်တန်နဲ့ အိုဘားတို့ ခန့်ခဲ့တဲ့ တရားသူကြီးက သုံးဦးပဲ ရှိပါတယ်။ ထရမ့်ရဲ့ လေးနှစ်သက်တမ်းအတွင်းမှာ ယခင်က တရားသူကြီး ၂ ယောက်နေရာလွတ်လို့ ခန့်အပ်ခဲ့တာရှိပြီး အခုအခါ တရားသူကြီး Ruth Bader Ginsburg ကွယ်လွန်သွားတဲ့အတွက် သူ့နေရာကို တစ်ယောက်ထပ်ခန့်ခဲ့ရင် ရီပတ်ပလစ်ကင် တရားသူကြီး ၆ ဦးအထိဖြစ်လာမှာဖြစ်ပါတယ်၊ တရားရုံးချုပ်လို နိုင်ငံတော်တရားစီရင်ရေး အထွတ်အထိပ် အာဏာအပ်နှင်းထားရတဲ့နေရာမှာ အခုလိုမျိုး နိုင်ငံရေးဝါဒစွဲ မမျှမတဖြစ်နေမှာကို မလိုလားဘူးလို့ ဝေဖန်သူတစ်ချို့က ဆိုကြပေမယ့် သမ္မတ ထရမ့်ကတော့ ဒါဟာ အခြေခံဥပဒေက ပေးထားတဲ့ သမ္မတ အခွင့်အာဏာသာဖြစ်လို့ သူ့မှာ ခန့်ခွင့်ရှိတယ်လို့ ဆိုနေပါတယ်။
.
. . . အထက်မှာ ဆိုခဲ့သလို ဝေဖန်မှုတွေ ကျယ်ကျယ်လောင်လောင် ဖြစ်နေတဲ့ ကြားကပဲ အစားထိုးခန့်အပ်မည့် တရားသူကြီးတစ်ဦး အမည်ကို ပြီးခဲ့တဲ့ စက်တင်ဘာလ ၂၆ ရက်နေ့ကသမ္မတထရမ့် ကြေညာခဲ့ပါတယ်။ အသက် ၄၈ နှစ်အရွယ် နော်တာဒိမ်းတက္ကသိုလ်က ဥပဒေပညာရှင် လက်ရှိမှာလည်း တရားသူကြီးအဖြစ် တာဝန်ထမ်းဆောင်နေတဲ့ အေမီကော်နီဘားရက် ဆိုသူကို အမည်စာရင်းတင်သွင်းလိုက်ခြင်းပဲ ဖြစ်ပါတယ်။
.
. . . ရှေးရိုးစွဲဘာသာရေးကိုင်းရှိုင်းတယ်လို့ နာမည်ကြီးတဲ့ အေမီတစ်ယောက် တရားသူကြီးခန့်အပ်ရေး လုပ်ငန်းစဉ်အရ ဆီးနိတ်မှာ လိုအပ်တဲ့ ကြားနာစစ်ဆေးမှုနဲ့ မဲခွဲဆုံးဖြတ်မှုကို ခံယူရအုံးမှာပါ။ လက်ရှိ ဆီးနိတ် အထက်လွှတ်တော်ထဲမှာ ဥက္ကဌဖြစ်တဲ့ ထရမ့်ရဲ့ ဒုသမ္မတ မိုက်ခ်ပန့်စ် နဲ့ ရီပတ်ပလစ်ကင် အမတ် ၅၂ ဦး၊ ဒီမိုကရက်အမတ် ၄၇ ဦးနဲ့ တစ်သီးပုဂ္ဂလအမတ် ၂ ဦးရှိနေတဲ့အတွက် အများစုနဲ့ အနည်းစု အမတ်ဦးရး သိပ်မကွာလှပါဘူး။ သမ္မတ ထရမ့်အနေနဲ့လည်း သူလုပ်သမျှတိုင်းကို သူ့ရဲ့ မိခင်ပါတီ ရီပတ်ပလစ်ကင်က ထောက်ခံလေ့ မရှိတာမို့ ခုတစ်ကြိမ် တရားသူကြီးခန့်တဲ့ ကိစ္စမှာ လွှတ်တော်ထဲက ရီပတ်ပလစ်ကင်အမတ်တွေရဲ့ ရပ်တည်ချက်အပေါ်မူတည်ပြီး သမ္မတထရမ့် (ပထမ)သက်တမ်းရဲ့ နောက်ဆုံးတိုက်ပွဲ အနိုင်အရှုံးက အဆုံးအဖြစ်အဖြေဖြစ်သွားမှာမို့ ငွေရောင်ပိတ်ကားပေါ်မှ ဆက်လက်စောင့်မျှော်ကြည့်နေရမှာဖြစ်ပါကြောင်း
.
ဗိုလ်ကောင်း
၁ အောက်တိုဘာ ၂၀၂၀
.
Photo credit
http://www.financetwitter.com/.../us-supreme-court-judges...
See Less

ရထား

ကိုယ်စီးမယ့်ရထားက

ပြေးလိုက်လို့မမီတဲ့အကွာက

တရွေ့ရွေ့မောင်းသွားတာမျိုး

ရထားပေါ်မှာ

ကိုယ်အချစ်ဆုံးသူ

ပါသွားတာမျိုး

နေရာချ

သစ်ရွက်ဝါလေးတွေစီထားသလို
အချစ်ကို
နေရာချလို့
ရသလား

သက်တော်ရှည်

. . . စက်တင်ဘာလ ၁၈ ရက်နေ့တုန်းက အမေရိကန်တရားရုံးချုပ် တရားသူကြီးတစ်ဦးဖြစ်တဲ့ Ruth Bader Ginsburg ကွယ်လွန်သွားလို့ သူ့နေရာမှာ အသစ်တစ်ဦးအစားထိုးခန့်ဖို့ သမ္မတထရမ့် က ပြင်ဆင်နေပါတယ်၊ တနင်္လာနေ့မှာ ဆီးနိတ်လွှတ်တော်ကို အမည်စာရင်း တင်သွင်းမယ်လို့ပြောပါတယ်၊ လောလောဆယ် သူလျာထားတာ အမျိုးသမီး နှစ်ယောက်ရှိပြီး တစ်ယောက်ကို အတည်ရွေးမယ့်သဘောရှိပါတယ်၊

.
. . . အမေရိကန်အခြေခံဥပဒေ အရ တရားရုံးချုပ်မှာ တရားသူကြီးချုပ်တစ်ယောက်နဲ့ တရားသူကြီး ရှစ်ယောက်ရှိပြီး ရာသက်ပန်တာဝန်ထမ်းဆောင်ခွင့်ရှိပါတယ်။ တရားသူကြီးတွေရဲ့ အရည်အချင်းတွေနဲ့ ပတ်သက်ပြီး အခြေခံဥပဒေထဲ ဘာမှ ပြဌာန်းသတ်မှတ်ထားတာမရှိဘဲ အထက်လွှတ်တော်ဆီးနိတ်က သဘောတူရင် ခန့်အပ်ခွင့်ရှိပေမယ့် သမ္မတတွေက သူတို့သက်တမ်းမှာ တရားသူကြီးတွေထဲက ကွယ်လွန်လို့ဖြစ်ဖြစ်၊ အငြိမ်းစားယူသွားလို့ဖြစ်ဖြစ် နေရာလပ်ပေါ်မှသာ ခန့်အပ်ခွင့်ရတာပါ။ တရားရုံးချုပ်ထူထောင်ပြီး တရားသူကြီးတွေ စတင်ခန့်အပ်ခဲ့တဲ့ ၁၇၈၉ ခုနှစ်က နေ ၂၀၂၀ အထိ နှစ်ပေါင်း ၂၃၁ နှစ်အတွင်း တရားရုံးချုပ်တရားသူကြီးပေါင်း ၁၁၄ ယောက် ခန့်အပ်ခဲ့တဲ့အနက် လက်ရှိ တာဝန်ထမ်းဆောင်နေတဲ့ တရားသူကြီး ရှစ်ဦး၊ မကွယ်လွန်မီ ရာထူးက အနားယူသွားတဲ့ သက်ရှိထင်ရှား တရားသူကြီးအငြိမ်းစား ၃ ဦး ရှိပါတယ်။ လက်ရှိ တာဝန်ထမ်းဆောင်ဆဲ တရားသူကြီး ရှစ်ယောက်အနက် သမ္မတထရမ့်လက်ထက်မှာ ၂ ဦး၊ အိုဘားမားလက်ထက်မှာ ၂ ဦး၊ ဂျော့ဘုရှ် ဂျူနီယာလက်ထက်မှာ ၂ ဦး၊ ကလင်တန်လက်ထက်မှာ ၁ ဦး၊ ဂျော့ဘုရှ် စီနီယာ လက်ထက်မှာ ၁ ဦး အသီးသီးခန့်အပ်ထားတာဖြစ်ပြီး စီနီယာအကျဆုံးတရားသူကြီး ကလားရင့်စ်သောမတ်စ် ဆိုရင် ၁၉၉၁ ခုနှစ်ကတည်းက စတင်တာဝန်ထမ်းဆောင်ခဲ့တာဖြစ်တဲ့အတွက် တရားရုံးချုပ်တရားသူကြီးသက်တမ်း ၂၉ နှစ်နီးပါး ရှိပါပြီ။ တရားသူကြီးတစ်ယောက် တာဝန်ထမ်းဆောင်တဲ့ ပျမ်းမျှသက်တမ်းက အရင်တုန်းက ၁၅ အောက်ပဲ ရှိခဲ့ပေမယ့် ၁၉၇၀ နောက်ပိုင်းမှာ ၂၆ နှစ်ထိ ရှိလာပါတယ်၊ တစ်ခါခန့်အပ်လိုက်ရင် ရာသက်ပန် တာဝန်ထမ်းဆောင်လို့ ရတယ်ဆိုပေမယ့် တော်တော်များများကတော့ မကွယ်လွန်မီ ရာထူးက အနားယူလေ့ရှိကြပါသတဲ့
.
. . . တရားစီရင်ရေးမှာ အမြင့်ဆုံးအာဏာရှိတဲ့ တရားရုံးချုပ်တရားသူကြီးတွေကို အခုလို ရာသက်ပန် တာဝန်ထမ်းဆောင်ခွင့်ပေးထားခြင်းဖြင့် သမ္မတ တစ်ယောက်တက်လာတိုင်း တရားသူကြီးတွေအားလုံးကို ပြန်ခန့်စရာမလိုတော့တာကြောင့် တရားသူကြီးတွေက သမ္မတရဲ့ ဩဇာလွှမ်းမိုးမှုကနေ ပိုမိုလွတ်လပ်မှုကို ရရှိပါတယ်၊ တရားစီရင်ရေးမဏ္ဍိုင်ရဲ့ သီးခြားလွတ်လပ်မှုကို တည်ဆောက်ထိန်းသိမ်းတဲ့ နည်းလမ်းတစ်ခုလည်း ဖြစ်ပါတယ်၊ မြန်မာနိုင်ငံမှာကတော့ တရားသူကြီးအဖြစ် အသက် ၅၀ ပြည့်မှ ခန့်အပ်ခွင့်ပြုထားပြီး အသက် ၇၀ အထိ တာဝန်ထမ်းဆောင်ခွင့်ပြုထားပါတယ်
.
. . . မြန်မာနိုင်ငံမှာ တရားစီရင်ရေးအာဏာအမြင့်ဆုံးဖြစ်တဲ့ ပြည်ထောင်စု တရားလွှတ်တော်ချုပ်ရဲ့ သီးခြားလွပ်လပ်မှုကို ရုပ်သိမ်းပြီး သမ္မတရဲ့ လက်အောက်ကိုထည့်ဖို့ ကြိုးပမ်းတဲ့ လုပ်ရပ်တစ်ခု ရှိခဲ့ဖူးပါတယ်။ ပထမအကြိမ်ပြည်ထောင်စုလွှတ်တော်မှာ ၂၀၁၅ ခုနှစ် ဩဂုတ်လက တင်သွင်းခဲ့တဲ့ အခြေခံဥပဒေပြင်ဆင်ရေး ဥပဒေကြမ်းမှာ ပြည်ထောင်စုတရားလွှတ်တော်ချုပ် တရားသူကြီးတွေရဲ့ သက်တမ်းကို သမ္မတသက်တမ်းနဲ့ အတူထားဖို့ ဆိုတဲ့ ပြင်ဆင်ချက်တစ်ခု ပါခဲ့ပါတယ်၊ ဘုရားသိကြားမလို့ အဲသည်ပြင်ဆင်ချက်က အတည်မဖြစ်ခဲ့တာပါ
.
ဗိုလ်ကောင်း
၂၁ စက်တင်ဘာ ၂၀၂၀
.
Photo credit
https://myanmar.gov.mm/union-supreme-court

ပန်းအကြွေလေးတွေ

. . . ကိုယ်က သူ့ကို သွားစခဲ့တာ
စာသိပ်ဖတ်တဲ့ မိသားစုထဲ ကြီးပြင်းလာခဲ့ပြီး အတန်းထဲမှာ စာလည်းတော် တစ်ခုခုဆိုလည်း သူမသိတာရော ရှိသေးရဲ့လားလို့ ထင်ရလောက်အောင် အရွယ်နဲ့မလိုက် တော်တော်သိတဲ့ အဲသည် ဟေမာထွန်းဆိုတဲ့ ကောင်မလေးကိုမှ ဒီအကြောင်း စဖြစ်အောင် စလိုက်ခဲ့မိတာ
.
. . . ငါ့ကိုမေးတော့ ပြန်မေးပါအုံးမယ် ဒီကဗျာထဲက အခုချိန်ပွင့်တဲ့ ပန်းတစ်မျိုးမေးမယ် နင်ဖြေစမ်းဆိုပြီး သူက ယင်းမာပန်းအကြောင်းမေးတယ်၊ အဲ ဟို အာ ဆိုပြီး တိုင်ပတ်နေတော့မှ သူက ပြောပြတယ် နင်ကလည်း ဘုန်းကြီးကျောင်းသား လုပ်နေပြီး ယင်းမာပန်းတောင် မသိဘူးလားတဲ့၊ ဟီး သိဘူးလေဟာ ဘုန်းကြီးကျောင်းသားနဲ့ ယင်းမာပန်းနဲ့ ဘာဆိုင်လို့တုန်း ဆိုတော့၊ နင်တို့ မြောက်ကျောင်းဝင်းထဲ ယင်းမာပန်းတွေမှ ပေါလို့ အခုချိန်ပွင့်နေတာ နင်မသိဘူးလားတဲ့၊ နင်မသိရင် ဒီတစ်ပတ် ဥပုသ်နေ့ ကြီးတော်သီလယူရင် ငါလိုက်ခဲ့ပြီး နင့်ကိုပြမယ် စောင့်နေတဲ့
.
. . . ဥပုသ်နေ့ဆို မနက်ပိုင်း ဓမ္မာရုံထဲမှာ ဝါတွင်းဆွမ်းလောင်းပွဲ ပုံမှန်လုပ်တယ်၊ ကိုယ်မှတ်မိသလောက်ဆို စခန်းထောက်ကျောင်း၊ စည်ပင်သာရွာကျောင်းက သံဃာတွေပါပင့်ပြီး ဆွမ်းလောင်းတာ၊ မနက်အစောဆွမ်းဆိုတော့ ဆွမ်းလောင်းတဲ့သူကလောင်း လက်ဖက်ခြောက်တို့ ဆပ်ပြာတို့လို အခြောက်လောင်းတဲ့သူကလောင်းပေါ့၊ ကိုယ်တွေ ဘုန်းကြီးကျောင်းသားကတော့ ဆွမ်းဟင်းထည့်တဲ့ ဆိုင်းထမ်းကိုထမ်းပြီး ကပ္ပိယကြီးတွေ စီမံပေးတဲ့အတိုင်း သယ်ရတာပါပဲ၊ အရင်တုန်းက ဒီဓမ္မာရုံကြီး မဆောက်ခင်တုန်းက ဆွမ်းလောင်းပွဲကို မန်ကျည်းတန်းမှာ လုပ်တယ်ပြောတာပဲ ကိုယ်လည်း သိပ်မမှတ်မိတော့ဘူးရယ်
.
. . . ဥပုသ်နေ့ရောက်တော့ ဆရာတော်ကြီးက သီလပေးနေတုန်း သူက ကျောင်းကြီးပေါ်က ဆင်းလာတယ်၊ အင်းသာမြောက်ကျောင်းက နှစ်ဆောင်ပြိုင်ကျောင်းကြီးဖြစ်ပြီး ဆရာတော်ကြီးက မြောက်ဘက်ကျောင်းမှာ သီတင်းသုံးတော့ တခြားပွဲတွေဆို တောင်ဘက်ကျောင်းမှာ လုပ်ပေမယ့် လူနည်းတဲ့ ဥပုသ်နေ့လိုမျိုးကိုတော့ ဘုန်းဘုန်းရှိတဲ့ မြောက်ဘက်ကျောင်းမှာပဲ လုပ်လေ့ရှိတယ်၊ မြောက်ဘက်ကျောင်းရဲ့ မြောက်ဘက်ကိုဆင်းတဲ့ လှေခါးထိပ်က ဖိနပ်ချွတ်မှာ ကိုယ်ကစောင့်နေတုန်း သူက ဆင်းလာတာ
.
. . . သူပြောတော့မှ ဟုတ်သားပဲ၊ တို့ကျောင်းဝင်းထဲ ယင်းမာပန်းပင်တွေ များလှချည်လား၊ မနက်မနက် မနင်းရက်နင်းရက် နင်းခဲ့မိတဲ့ပန်းလေးတွေ၊ ဘုန်းဘုန်းကြီး စင်္ကြန်လျှောက်တဲ့လမ်းမှာ တံမျည်စည်းနဲ့ ပုံမှန် လှဲထုတ်နေရတဲ့ ပန်းလေးတွေက အနံ့သေးတသင်းသင်းနဲ့ ဘာပန်းမှန်းမသိပေမယ့် သဘောကျခဲ့ရတာ လက်စသတ်တော့ ယင်းမာပန်းကိုး
.
. . . ဟိုတစ်နေ့က ရွာကိုရောက်တော့ ရန်ပြေမာန်ပြေဘုရားဘက်သွားရင်း လမ်းမှာပြန့်ကျဲနေတဲ့ ယင်းမာပန်းလေးတွေမြင်တော့ သတိရမိတယ်၊ ဟေမာထွန်း အခု ဘယ်ရောက်နေပြီလဲဆိုပြီး အတူပါလာတဲ့ သူငယ်ချင်းကိုမေးကြည့်တော့ ဟင် မင်းနဲ့ ဟိုမှာ တွေ့ခဲ့ရတယ်ထင်နေတာတဲ့၊ ဘယ်မှာ တွေ့ရမှာတုန်းဟ ဆိုတော့ ဂျပန်မှာလေတဲ့ .
ဟာ . သူ ဂျပန်ရောက်နေတာလား . . . အာ့လိုမှန်းသိရင်ကွာ . . .
.
. . . မနက်မနက် လမ်းလျှောက်တိုင်း မနင်းရက်နင်းရက် ကျော်ခွသွား၊ ပြီးရင် အပင်ပေါ်မော့ကြည့်မော့ကြည့်လုပ်နေရတဲ့ ယင်းမာပန်းလေးတွေ လမ်းဘေးပလက်ဖောင်းပေါ် ပြန့်ကျဲနေတာမြင်တဲ့အခါတိုင်း ကိုယ့်ကို ယင်းမာပန်းနဲ့ မိတ်ဆက်ပေးခဲ့ဖူးတဲ့ ကောင်မလေးကို လွမ်းလွမ်းနေမိတယ်
.
. . . နင်နဲ့တွေ့ဖို့အတွက် ငါ ဂျပန်ကို ပြန်လာဖြစ်အောင် လာပါအုံးမယ်ဟာ
.
မောင်လွမ်းဝေ
၁၉ စက်တင်ဘာ ၂၀၂၀

ဟက်ပီးဘတ်ဒေးပါ မိုဒီ

. . . မနေ့က စက်တင်ဘာလ ၁၇ ရက်နေ့က အိန္ဒိယဝန်ကြီးချုပ် နရန်ဒရာမိုဒီရဲ့ အသက် ၇၀ ပြည့် မွေးနေ့ဖြစ်ပါတယ်၊ တစ်ခြားနိုင်ငံခေါင်းဆောင်အချို့နဲ့ သူ့ကို ထောက်ခံတဲ့ ပြည်သူတွေက ဝန်ကြီးချုပ်ကို မွေးနေ့ဆုတောင်း ပို့ကြတာပေါ့

.
. . . မွေးနေ့ဆုတောင်းပေးကြတဲ့သူတွေကို ကျေးဇူးတင်ကြောင်း ပြောရင်း သူတကယ်လိုချင်တဲ့ လက်ဆောင်ကို ပြောပြပါတယ်၊ အဲဒါကတော့ ကိုဗစ်ရောဂါ ကာကွယ်နိုင်ဖို့အတွက် နှာခေါင်းစည်း သေချာတပ်ဖို့၊ လက်ဆေးဖို့၊ လူချင်းခွာစည်းကမ်းကို လိုက်နာကြဖို့ နဲ့ ကိုယ့်ဘာသာ ကိုယ်ခံအားကောင်းအောင်နေရင်း ကမ္ဘာကြီးကျန်းမာရေး ဝိုင်းဝန်းထိန်းသိမ်းပေးကြဖို့ အဲဒါတွေက သူလိုချင်တဲ့ မွေးနေ့လက်ဆောင်ပါတဲ့
.
. . . တကယ်တမ်းဆို ကျနော့်မွေးနေ့လက်ဆောင်အဖြစ် နောက်တစ်ခါ ရွေးကောက်ပွဲကျရင် ကျယ်မပါတီ အဲ ကျနော့်ပါတီကို မဲပေးကြပါလို့ သူ ပြောခဲ့သင့်တာ၊ အင်းလေ မြန်မာပြည်က နိုင်ငံရေးသမားတွေလို သူက လည်မှ မလည်ပဲ ခံပေါ့

ချစ်ရေစင်

. . . သဟာယ ဆရာတင်ရေးတဲ့သီချင်းဆိုပေတဲ့ ကိုယ်က ဂီတနန္ဒဝန် စန္ဒရားပွဲ အခွေထွက်တော့မှ စ ကြားဖူးတဲ့သီချင်း၊ သူ့ခေတ်သူ့အခါကလည်း နာမည်ကြီး ကိုယ်တွေ နားထောင်တော့လည်း ကြိုက်မိတဲ့သီချင်းပဲ၊ အဲ သီချင်း အဓိပ္ပာယ်ကို သေချာ မတွေးမိခင်အထိပေါ့

.
. . . သီချင်းစစချင်းမှာ နှင်းဆီပန်းလေး တစ်ပွင့်ရဲ့ အလှကို ဖွဲ့ပြထားတယ်
“ကြူကြူသင်းတယ် ရွှေနှင်းဆီရယ်.. ဆင်းရနံ့ကမွှေးတယ်.. မခူးရက်စရာကွယ်.. အထူးပဲလှတယ်.. သူ့ကိုယ်သူပင် ဆူးတွေကိုဆင်… နတ်ဥယျာဉ်ဝယ် ရောင်စုံဖူးပွင့်တယ်. . .”
.
. . . ဒုတိယပိုဒ်ကျတော့ နည်းနည်း တွေးစရာ ပါလာတယ်
“အဆောင်တော်ကူးကာ.. ဆွတ်ခူးတော့မယ့် သခင်ရယ် တစ်ပွင့်ထဲပန်းကို လှမ်းနိုင်ပေရဲ့ ရွှေရည်လွမ်းတဲ့ မြပန်းခက်ကို.. သူ့လက်လှမ်းကာ ချစ်ရေစင်ဖျန်းတယ်…”
အဲသည် သခင်ဆိုတဲ့လူက ပန်းကို အဆောင်ကူးပြီးဆွတ်တယ်ပေါ့၊ ထားပါတော့ ပန်းကိုဆွတ်ပြီးရင် ရေဆေးရင်ဆေး မဆေးရင်လည်း ဒီအတိုင်း ထားရမှာမို့လား ဘာကိစ္စ ချစ်ရေစင် ဖြန်းရတာတုန်း ချစ်ရေစင်ဆိုတာက ရေရိုးရိုးကိုပြောတာလား ဘာကိုပြောတာလည်း စဉ်းစားရခက်ပါ့
.
. . . နောက်ထပ်လာတဲ့ စာသားကတော့ ရှင်းပါတယ်၊ ပန်းလေး နုပျိုလှပနေတာကို ပြောထားတာပဲ
“နုပျိုစိုလန်းလို့ရယ်.. ဖူးပွင့်စပန်းနှယ်.. နေရောင်ခြည်မထိုးခင်.(မညှိုးလို့စင်ကြယ်)၂ ခင်တွယ်စရာ အလွန်တင့်တယ်”
.
. . . ဟော နောက်တစ်ပိုဒ်ကျတော့ တစ်ခါ စဉ်းစားရပြန်ရော
“ပျားကောင်ပိတုန်းရယ် မသုံးဆောင်ခင်များမယ်.. ဆင်းရနံ့ကလေးရယ် ဝတ်မှုန် ဝတ်ရည် ထုံသင်းတယ်.. ခုတော့ဖြင့် မစိုပြည် နဂိုရည်.. ပျက်ယွင်း တယ်… ပန်ဆင်တဲ့သူရယ်.. အစာဝတော့ ဌာနပြန်ချင်တယ်…”
. . . ပန်းဆိုတာမျိုးက ပျားလိုအကောင်မျိုးတွေ လာတတ်တာပဲလေ၊ လာတယ် ဝတ်မှုန်ကူးတယ်၊ ဝတ်ရည်လေးတွေ စုပ်တယ် သယ်သွားတယ်၊ အာ့လိုလုပ်လို့ဖြင့် ခုန နှင်းဆီပန်းလေး ပျက်စီးသွားတယ်လို့ မကြားဖူးပေါင်၊ ပျားလေးလာသွားလို့ ဝတ်မှုန်တွေကူးပြီး ပန်းရဲ့ ရုက္ခဗေဒဖြစ်စဉ်ကို အကူအညီတောင် ဖြစ်သေးတယ်မို့လား၊ ပျားလေးလာစုပ်သွားတာနဲ့ပဲ ခုတော့ဖြင့် မစိုပြည် နဂိုရည်ပျက်ယွင်းတယ် ဆိုတာကာတော့ ဒရမ်မာတွေ ချိုးလွန်းအားကြီးသွားပြီလို့ပဲ ထင်မိတယ် ပေါက်ပေါက်ရှာရှာ
.
. . . နောက်တစ်ပိုဒ်မှာ ရေးထားတာကိုလည်း သိပ်သဘောမတူချင်ဘူး၊ ဘာတဲ့ . . .
“မွှေးတုန်းတော့ကွယ် ပန်ချင်ပြန်တယ်.. နံရင်ပစ်ပယ်.. ချစ်လက်စ မဆုံးခင် ရှောင်ကြဉ် မုန်းရက်တယ်”
အော်၊ လူဆိုတာ မွှေးတာလေးပဲ ပန်ချင်မှာပေါ့ နံတာကြီးတော့ ဘယ်သူက သဘောကျပါ့မလဲ
.
မသိဘူး သီချင်းသာဆုံးသွားတယ်
ဘာကို ပြောချင်လို့ ပြောချင်မှန်းကို မသိဘူး
နားထောင်လို့တော့ အကောင်းသားပေမယ့်
ဟို နှင်းဆီပန်းခူးပြီး ရေမဆေးဘဲ ရေဖြန်းတဲ့မောင်ကို နားပန်တွေချည်း လှိမ့်လှိမ့်ကျင်းချင်တယ်
လုပ်လိုက်ရင် မရှင်းမရှင်းနဲ့
ဗြန်းပတာတွေပါကွာ

ကပ်ကြီး နှစ်ပါး

ဥမ္မာဒန္တီ ရုံးတင်မည်
ဒေဝီမယ်လျ လိုင်းချုပ်ကျ 

ဆိုတာ မြန်မာစာကျောင်းသားတွေ သူတို့သင်ရတဲ့ ဥမ္မာဒန္တီပျို့နဲ့ ပတ်သက်ပြီး ဆိုလေ့ရှိကြတဲ့ စာချိုးလေးပေါ့၊ ကိုယ်ကတော့ အဲသည်အချိန်တုန်းက ဥမ္မာဒန္တီပျို့ မဖတ်ဖြစ်ခဲ့ပဲ ရန်ကုန်တက္ကသိုလ်တက်တော့မှ ဥမ္မာဒန္တီပျို့ကို ဖတ်ဖြစ်တာ၊ ဥမ္မာဒန္တီပျို့ကို နားလည်တာလည်းရှိ နားမလည်တာလည်းရှိ ဖြစ်ပေမယ့် ဖတ်ရတာ တော်တော် အရသာ တွေ့ပါတယ်၊ ဥမ္မာဒန္တီပျို့မှ မဟုတ်ပါဘူး၊ အဟောင်းတန်းမှာ တွေ့သမျှ ဝယ်တော့ စန္ဒကိန္နရီပျို့တို့ လောကသာရပျို့တို့ ကိုးခန်းပျို့တို့ လိုက်ဖတ်ကြည့်ဖူးပါတယ်၊ ဥမ္မာဒန္တီပျို့ကတော့ ရသ သက်သက်နဲ့မို့ အကြိုက်ဆုံးပျို့ပါ
.
. . . စစ်ရေး မက်ရေး ရန်သူဘေးကြောင့်
အပြေးအလွဲ ဆွေမျိုးကွဲသား
ပြည်ထဲရေးရာ ခက်သည်သာတည်း
.
အစာအစား
ထွားထွားမြည့်ကြေ ရှားပါးလေ၍
သေကျေပျောက်စဲ ငတ်မွတ်ကဲလျှင်
ပြည်ထဲရေးထက် ဝမ်းရေးခက်၏။
ထို့ထက်ကမူ ချစ်သသူနှင့်
အတူတကွ မပေါင်းရဘဲ
လွမ်းတ ပူဆွေး သူနှင့်ဝေးသော်
ပြည်ထဲရေးနှင့် ဝမ်းရေးတို့ထက်
လွမ်းရေးခက်၏
.
အခုနေများ မဟာမင်းလှ မင်းခေါင်ကျော် ဘွဲ့ရ ဦးရွှန်းက ဥမ္မာဒန္တီပျို့ကို ရေးရင် အထက်မှာပါခဲ့တဲ့ ကပ်ဘေးကြီး နှစ်ပါးအပြင် ကိုဗစ်ကပ်ဘေးကြီးအကြောင်းကိုလည်း ထည့်ရေးလောက်တယ်လို့ တွေးမိလို့ပါ

ဇွန်ဘီနိုင်ငံတော်က နကျယ်ရဲ့ သားကောင်ဖြစ်ရသူများ

. . . ဇွန်ဘီဇာတ်ကားတွေ ကြည့်ဖူးကြမှာပေါ့၊ ဗိုင်းရပ်စ်ရောဂါတစ်မျိုးကြောင့် လူတွေဟာ ပုံပျက်ပန်းပျက်တွေဖြစ်ပြီး အသိစိတ်တွေ ပျောက်ဆုံးကုန်တယ်၊ သူတို့မှာ လူအချင်းချင်းဆိုတဲ့ အသိ မရှိတော့ဘူး၊ အရင်က သိခဲ့ကျွမ်းခဲ့ ခင်မင်ခဲ့ ချစ်ခဲ့ကြတာတွေ မသိတော့ဘူး၊ သူတို့သိတာ တစ်ခုပဲ ရှိတော့တယ်၊ အဲဒါကတော့ တွေ့သမျှလူကို လိုက်ကိုက်ပြီး ရောဂါဖြန့်ဖို့ပဲ

.
. . . ကျွန်တော်တို့ ဇွန်ဘီဇာတ်လမ်းတွေ ကြည့်ကြတဲ့အခါ ဒါဟာ စိတ်ကူးယာဉ်ဇာတ်လမ်းသက်သက်လို့ ထင်မိကြလိမ့်မယ်၊ ဇွန်ဘီလို အဖြစ်မျိုး လောကကြီးမှာ ဖြစ်နိုင်ပါ့မလား တွေးမိကြလိမ့်မယ်၊ မဖြစ်နိုင်ပါဘူးလို့ ထင်ကောင်းထင်မိကြလိမ့်မယ်၊ မထင်ပါနဲ့ ဇွန်ဘီဆိုတာ တကယ်ရှိပါတယ်
.
. . . အင်းဆက်လောကမှာတော့ တစ်ခြားအင်းဆက်တွေကို ဇွန်ဘီတွေဘဝရောက်အောင် အဖန်တီးနိုင်ဆုံးက နကျယ်ကောင်တွေပါပဲ၊ နကျယ်ကောင်တွေရဲ့ သားကောင်တွေကတော့ အများကြီး၊ အဓိက ကတော့ ပိုးတုန်းလုံးကောင်တွေ၊ ပိုးဟပ်၊ ပင့်ကူ၊ ပရွက်ဆိတ် စသည်ဖြင့်ပေါ့၊ သူတို့တွေမှာ နကျယ်ကောင်တွေကြောင့် ဇွန်ဘီဖြစ်ပြီး ဘဝပျက်ကြရရှာတယ်
.
. . . နကျယ်အိမ်တွေ တော်တော်များများ မြင်ဖူးကြမယ်ထင်ပါတယ်၊ အိမ်တွေရဲ့ အမြင့်နေရာတွေမှ ရွှံ့နဲ့ဆောက်ထားတဲ့ နကျယ်အိမ်တွေ ရှိတတ်တယ်၊ ငယ်ငယ်တုန်းက လူကြီးတွေပြောတာက နကျယ်ကောင်တွေက အိမ်ဆောက်တယ်၊ ပိုးတုန်းလုံးကောင်တွေ ဖမ်းယူလာပြီး အိမ်ထဲကို ထည့်ပိတ်တယ်၊ အပြင်ကနေ မန်းမှုတ်ပေးရင်းနဲ့ ပိုးတုန်းလုံးကောင်က နကျယ်ကောင်ဖြစ်ပြီး ပြန်ထွက်လာတယ် စသည်ဖြင့်ပေါ့၊ ဒါပေမယ့် တကယ်တမ်းကျတော့ နကျယ်ကောင်တွေဟာ ပိုးတုန်းလုံးတွေကို ဖမ်းပြီး နကျယ်အိမ်ထဲထည့်တာ နကျယ်ကောင်ဥ အကောင်ပေါက်လာတဲ့အခါ စားဖို့ပါ၊ နကျယ်ကောင်အိမ်ဆောက် ဥဥပြီးရင် ပိုးတုန်းလုန်းကောင်တွေကို ဖမ်းပြီး အိမ်ထဲထည့်ပိတ်ထား၊ နကျယ်ဥက အကောင်ပေါက်လာတဲ့အခါ အိမ်ထဲပိတ်ထားတဲ့ ပိုးတုန်းလုံးကောင်ကိုစား၊ ပြီးတော့ နကျယ်ကောင်ကြီးလာပြီး အပြင်ထွက်၊ နောက်ထပ် ပိုးတုန်းလုံးကောင်တွေရှာ သံသရာအသစ်ပြန်စ၊ ဒါဟာ အင်မတန်ကို ရိုးရှင်းတဲ့ ဖြစ်စဉ်တစ်ခု ဖြစ်ပါတယ်၊ ဒါပေမယ့် နကျယ်ကောင်တွေရဲ့ လုပ်နိုင်စွမ်းက ထင်တာထက် အများကြီး ပိုပါတယ်
.
. . . နကျယ်ကောင်ဟာ ပိုးတုန်းလုံးအကောင်ရဲ့ ခန္ဓာကိုယ်ထဲကိုလည်း ဥဥထည့်ပေးနိုင်ပါတယ်၊ အပြင်မှာ သွားလာလှုပ်ရှားနေတဲ့ ပိုးတုန်းလုံးကောင်ရဲ့ ကိုယ်ခန္ဓာထဲ ဥ ဥထည့်ပေးလိုက်တဲ့အခါ ဥနဲ့အတူ ဓာတုပစ္စည်းတစ်မျိုးကိုပါ ထိုးသွင်းပေးခဲ့လိုက်တာပါ၊ အဲသည် ဓာတုဓာတ်ကြောင့် ပိုးတုန်းလုံးဘဝကနေ အင်းဆက်ဘဝကို အဆင့်ဆင့်ပြောင်းသွားမည့် ဇီဝဖြစ်စဉ်ဟာ ရပ်သွားပြီး ပိုးတုန်းလုံး ဇွန်ဘီကောင်ဘဝ‌ ရောက်ရရှာပါတယ်၊ သူဟာ လိပ်ပြာ ဒါမှမဟုတ် အင်းဆက်ကောင်တစ်ခုခုအဖြစ် ဆက်မဖြစ်တော့ဘဲ ပိုးတုန်းလုံးဘဝနဲ့ပဲ အသက်ဆက်ဖို့ ဖြစ်လာပါတယ်၊ ဒါမှသာ သူ့ရဲ့ ကိုယ်ခန္ဓာထဲက နကျယ်ကောင်ဥတွေအတွက် နားခိုစရာ အိမ်ကောင်းကောင်းရမှာမို့ပါ
.
. . . ပိုးတုန်းလုံးရဲ့ ခန္ဓာကိုယ်ထဲက နကျယ်ကောင်ဥလေးတွေဟာ အချိန်တန်တော့ လောက်လိုအကောင်လေးတွေ ပေါက်လာပါတယ်၊ အဲသည်အကောင်လေးတွေဟာ ပိုးတုန်းလုံးရဲ့ ခန္ဓာကိုယ်ထဲမှာ ပိုးတုန်းလုံးရဲ့ အသားတွေကိုစားပြီး ကြီးလာပါတယ်၊ စိတ်ဝင်စားစရာကောင်းတဲ့ အချက်က နကျယ်ကောင်သားလောင်းလေးတွေဟာ ပိုးတုန်းလုံးရဲ့ ခန္ဓာကိုယ်ထဲက ပိုးတုန်းလုံး အသက်ကို သေသွားနိုင်လောက်တဲ့ အစိတ်အပိုင်းတွေကို မစားဘဲ သူတို့နားခိုရာ ခန္ဓာကြီး ဆက်တည်မြဲနေအောင် လုပ်ကြပါတယ်၊ အဲသည်လို စားနေတဲ့အချိန်မှာ ပိုးတုန်းလုံးကောင်ဟာ သူ့ကိုယ်လုံးထဲ နကျယ်ကောင်သားလောင်းတွေ သူ့အသားတွေစားပြီး ကြီးထွားနေကြတယ်ဆိုတာ မသိဘဲ ပုံမှန်အတိုင်း နေမြဲ စားမြဲလုပ်ပြီး သူ့ကိုယ်လုံးထဲက နကျယ်ကောင်သားလောင်းတွေအတွက် အာဟာရကို ထောက်ပံ့ပေးနေရပါတယ်
.
. . . ဒါပေမယ့် အချိန်တန်တဲ့အခါကျတော့ နကျယ်ကောင်သားလောင်းလေးတွေက ပိုးတုန်းလုံးရဲ့ ကိုယ်လုံးအရေပြားကို ဖောက်ပြီး ထွက်လာကြပါတယ်၊ မသိရင် ပိုးတုန်းလုံး အမေကြီးက ပိုးတုန်းလုံး သားပေါက်လေးတွေ ပေါက်လာသလိုပါပဲ၊ ဘာမှ မသိရှာတဲ့ သားကောင်အဖြစ်ကိုရောက်နေတဲ့ ဇွန်ဘီပိုးတုန်းလုံးကောင်ရဲ့ ရင်နာစရာအဖြစ်က အဲသည်မှာတင် မရပ်သေးပါဘူး၊ သူ့တစ်ကိုယ်လုံး စကာပေါက်ဖြစ်အောင် ဖောက်ထွက်လာကြတဲ့ နကျယ်ကောင်သားလောင်းလေးတွေကို သူ့ပါးစပ်က ပိုးမျဉ်တွေထုတ်ပြီး ရစ်ပတ်ထုပ်ပိုး ကာကွယ်ရပြန်ပါတယ်၊ အဲလို လုပ်နေရင်းနဲ့ပဲ နကျယ်ကောင်သားလောင်းလေးတွေ သူ့အသားတွေစားထားတဲ့ဒဏ်၊ အစာမစားရတော့လို့ ငတ်ပြတ်တဲ့ဒဏ်နဲ့ ပိုးတုန်းလုံးလေးခမျာ သေပွဲဝင်ရရှာပါတယ်၊ ပိုးတုန်းလုံး မသေခင် ပိုးမျဉ်တွေနဲ့ ရစ်ပတ်ထုပ်ပိုးကာကွယ်ပေးထားခဲ့တဲ့ နကျယ်ကောင်သားလောင်းလေးတွေက အချိန်တန်တော့ ပိုးမျှင်တွေကို ဖောက်ပြီးထွက်လာ နကျယ်ကောင်ဘဝကို အပြည့်အဝ ရောက်လာပြီး နောက်ထပ်သားကောင် ပိုးတုန်းလုံးတွေကို ရှာဖို့ ထွက်သွားပါတော့တယ်
.
. . . နကျယ်ကောင်တွေဟာ ပိုးတုန်းလုံးလို အားပျော့တဲ့ အစွမ်းအစမဲ့တဲ့ အကောင်တွေကိုတင် အာ့လိုလုပ်တာ မဟုတ်ပါဘူး၊ အင်းဆက်ပိုးအချင်းချင်း ပိုက်ကွန်ဖွဲ့ ဖမ်းဆီး စားသောက်တတ်တဲ့ ပင့်လူလို အကောင်မျိုးကိုတောင် သားကောင်အဖြစ် အမြတ်ထုတ်ပါတယ်၊ နကျယ်ကောင်ဟာ ပင့်ကူကို ဖမ်းပြီး တစ်ချက် တုပ်လိုက်ပါတယ်၊ အဲသည် တုပ်လိုက်တဲ့အထဲမှာ ပါသွားတဲ့ ဓာတ်တစ်မျိုးက ပင့်ကူရဲ့ ဥဏှောက်ကို ရောက်သွားတဲ့အခါ ပင့်ကူဟာဇွန်ဘီလိုဖြစ်သွားပြီး နကျယ်ကောင်အလိုကျ လုပ်ဆောင်ရတော့တာပါပဲတဲ့၊ ဘာတွေများ လုပ်ရတာပါလိမ့်၊ နကျယ်ကောင်ဟာ ပင့်ကူကို တုပ်ပြီးတဲ့အခါ ပင့်ကူရဲ့ ကိုယ်ပေါ်မှာ ဥတစ်လုံး ဥချခဲ့ပါတယ်၊ အဲသည်ဥလေးကို သယ်ပိုးပြီး နေရတဲ့ ပင့်ကူဟာ အနားမနေရရှာပါဘူး၊ ခုနက နကျယ်ကောင်ထည့်ခဲ့တဲ့ ဓာတုပစ္စည်းက ပင့်ကူဥဏှောက်ကို ရောက်သွားတဲ့အခါ ဇွန်ဘီဖြစ်နေတဲ့ပင့်ကူဟာ နကျယ်ကောင်လေး အကောင်ပေါက်လာတဲ့အခါ လုံလုံခြုံခြုံနေဖို့ ပင့်ကူအိမ်ကို ပုံမှန်ဆောက်နေကျပုံအတိုင်းမဟုတ်ဘဲ ပိုပြီး ခိုင်ခိုင်မာမာ ဆောက်ရပါတယ်၊ အဲသည်နောက်တော့ နကျယ်ကောင်ဟာ သူ့ကိုယ်လုံးပေါ်မှာတင် သားလောင်းဘဝရောက်လာပြီး လက်ခံ ပင့်ကူကောင်ကို စပြီး စားပါတော့တယ်၊ စားတဲ့အခါမှာလည်း ပင့်ကူကို တန်းခနဲ သေသွားစေမည့် နေရာတွေကို ရှောင်ပြီး စားရင်း ကြီးလာပါတယ်၊ ပင့်ကူ မသေသေးဘဲ ရှိနေမှ သူ့ကို ဆက်ပြီး စောင့်ရှောက်နေနိုင်မှာမို့ ချက်ချင်းသေမယ့်နေရာတွေကို မစားတာပါ၊ အချိန်တန်တဲ့အခါ ပင့်ကူလည်း နကျယ်ကောင်သားလောင်းစားတာခံရင်းသေ၊ နကျယ်ကောင်သားလောင်းလည်း ပင့်ကူဆောက်ပေးခဲ့တဲ့ လုံခြုံတဲ့ အိမ်မှာနေရင်း နကျယ်ကောင်ဘဝကို ရောက်ပါတော့တယ်၊ ပြီးတော့ သူ့ကျေးဇူးရှင် ပင့်ကူလို နောက်ထပ် သားကောင်တစ်ကောင်ထပ်ရှာပြီး မျိုးဆက်သံသရာကို ဆက်ပါတော့သတဲ့
.
. . . နကျယ်ကောင်ရဲ့ သားကောင်ဘဝရောက်ရတဲ့ နောက်တစ်မျိုးက ပိုးဟပ်ပါ၊ နကျယ်က ပိုးဟပ်ကို ဝင်လုံးပြီးရင် ပထမတစ်ချက် တုပ်လိုက်တဲ့အခါ ပိုးဟပ်ရဲ့ ရှေ့ဆုံးခြေထောက်နှစ်ချောင်းက လေဖြတ်သလို လှုပ်လို့မရဖြစ်သွားပြီး သူ့ကိုသူ မကာကွယ်နိုင်ဖြစ်သွားပါတယ်၊ အဲသည်အခါကျမှ နကျယ်က ပိုးဟပ်ကို ဒုတိယတစ်ချက် ထပ်တုပ်ပါတယ်၊ ဒုတိယအချက်တုပ်တဲ့အခါ ပိုးဟပ်ရဲ့ ဥဏှောက်ထဲကို ဓာတ်တစ်မျိုး ထည့်လိုက်တာပါ၊ အဲသည်ဓာတ်ကြောင့် ပိုးဟပ်ဟာ အသက်မသေပေမယ့် မလှုပ်နိုင် မပြေးနိုင်တဲ့ဘဝကို ရောက်ရပါတယ်၊ ခဏနေတော့ နကျယ်ကောင်က ပိုးဟပ်ရဲ့ ဥမင်နှစ်ချောင်းကို ဖြတ်ပစ်လိုက်ပါတယ်၊ ပိုးဟပ်ဘဝဟာ ရှင်လျက်နဲ့ သေခဲ့ရပါပြီ၊ အဲသည်အခါကျမှ နကျယ်ကောင်က ပိုးဟပ်ကို သူ့တွင်းထဲဆွဲသွင်းသွားပြီး ပိုးဟပ်ရဲ့ ကိုယ်ပေါ်မှာ ဥတစ်လုံး ဥချလိုက်ပါတယ်၊ ပြီးတဲ့အခါ တွင်းထဲက ပြန်ထွက်ပြီး တွင်းကို ပိတ်ပစ်လိုက်ပါတော့တယ်၊ တွင်းထဲက ပိုးဟပ်ဟာ သူ့ကိုယ်လုံးပေါ်က နကျယ်ကောင် သားလောင်းလေး အစားခံဖို့ဆိုတာကိုတောင် မသိနိုင်တော့ဘဲ အသိမဲ့ဘဝနဲ့ စောင့်နေရရှာပါတယ်၊ အချိန်တန်တဲ့အခါ နကျယ်ကောင်သားလောင်းလေး ပေါက်လာတဲ့အခါ ပိုးဟပ်ကို မသေအောင် တဖြည်းဖြည်းချင်းစားပြီး ပိုးဟပ်ကိုယ်ထဲ ဝင်သွားပါတယ်၊ နောက်ဆုံး ပိုးဟပ်လည်းသေ နကျယ်ကောင်လည်း အကောင်ဖြစ်ပြီး တွင်းထဲက ထွက်လာ၊ နောက်ထပ် သားကောင်ပိုးဟပ်တစ်ကောင်ကိုရှာပြီး မျိုးဆက်သံသရာဆက်ပါတော့တယ်
.
. . . အထက်မှာ ပြောခဲ့တဲ့ ပိုးတုန်းလုံးကောင်၊ ပင့်ကူနဲ့ ပိုးဟပ်တို့ကို နကျယ်ကောင်က အနိုင်ယူခဲ့တာ၊ သူတို့ရဲ့ ကိုယ်ခန္ဓာကို အမြတ်ထုတ်ပြီး နကျယ်မျိုးဆက်ခဲ့တာတွေမှာ နကျယ်ကောင်သုံးသွားတဲ့ နည်းက တစ်ခုတည်းပါ၊ အဲဒါကတော့ သူ့သားကောင်ရဲ့ ကိုယ်လုံးထဲ ဓာတ်တစ်မျိုးထည့်ပြီး သူတို့ရဲ့ ဘဝဖြစ်စဉ်တွေကို ရပ်တန့်သွားအောင်၊ သူတို့လုပ်စေချင်သလိုမျိုး လုပ်စေအောင်၊ သူတို့မျိုးဆက်အတွက် အသာအယာအစားခံရအောင် လုပ်သွားခဲ့တာပါ၊ တစ်နည်းအားဖြင့် သားကောင်တွေကို ဇွန်ဘီဘဝရောက်အောင်လုပ်ပြီး ပုံမှန်ပြုမူနေကျ အပြုအမူတွေကသွေဖည်ပြီး သူတို့မျိုးဆက်အတွက် အမြတ်ထုတ်သွားကြတာ ဖြစ်ပါတယ်
.
. . . အထက်မှာ ဖော်ပြခဲ့တဲ့ နကျယ်ကောင်နဲ့ တစ်ခြားအင်းဆက်များရဲ့ အဖြစ်အပျက်ကို ကြည့်ပြီး ဆက်တွေးမိတာက ကျွန်တော်တို့မှာရော အလားတူဖြစ်ရပ်တွေ ရှိနေသလား ???
.
. . . သူ့ကျွန်ဘဝကို ရောက်ခဲ့ကြတာချင်းအတူတူ၊ ရုန်းကန်ကြိုးစားခဲ့ကြရတာချင်း အတူတူ သူများတွေနိုင်ငံက ဖွံ့ဖြိုးတိုးတက်ပြီး လူလူသူသူ ဖြစ်နေတဲ့အချိန်ထိ ကျွန်တော်တို့ နိုင်ငံက နိုင်ငံဖွံ့ဖြိုးမှုဖြစ်စဉ် သိသိသာသာ နှေးကွေးနေရတာ မြန်မာနိုင်ငံကြီးက လှပတဲ့ လိပ်ပြာဘဝကို မရောက်တော့ဘဲ ပိုးတုန်းလုံးဘဝမှာတင် ရပ်တန့်နေစေတဲ့ နကျယ်ကောင်ရဲ့ ဂျင်းတွေမိနေခဲ့တာလား၊ ကျနော်တို့ရဲ့ ကိုယ်ခန္ဓာ အသွေးအသားတွေကို စားသုံးကြီးထွားနေတဲ့ နကျယ်ကောင်သားလောင်းတွေကို မြွေပွေးခါးပိုက်ပိုက်ထားသလို မသိလိုက်မသိဘာသာ လက်ခံထားမိနေပြီလား
.
. . . ပုံမှန်မဟုတ်တဲ့ အပြုအမူတွေနဲ့ ပိုပြီးခိုင်မာတဲ့ အိမ်ဆောက်နေမိတဲ့ ပင့်ကူကောင်လို ကျွန်တော်တို့ရဲ့ ကြိုးပမ်းအားထုတ်မှုတွေက ကိုယ့်ကိုယ်ပေါ် တွယ်ထားတဲ့ မကြာခင် ကိုယ့်ကိုစားပြီး မျိုးဆက်တော့မယ့် နကျယ်ကောင်အတွက် အိမ်ဆောက်ပေးနေသလိုများ ဖြစ်နေပြီလား
.
. . . ဥမင်တွေအဖြတ်ခံရပြီး တစ်ကိုယ်လုံး မလှုပ်နိုင်ဘဲ နကျယ်ကောင်ရဲ့ တွင်းထဲမှာ မကြာခင်ပေါက်လာမယ့် နကျယ်သားလောင်းလေးရဲ့ အစားခံရဖို့ အသိမဲ့ စောင့်နေရတဲ့ ပိုးဟပ်လေးလို ကျွန်တော်တို့ရဲ့ ခြေတွေလက်တွေတုပ်နှောင်ခံထားရပြီလား ဥမင်တွေ အဖြတ်ခံထားရပြီလား
.
. . . ကျွန်တော်တို့တွေ အထက်ဥပမာအတိုင်း သားကောင်ဘဝကို ရောက်နေပြီသာဆိုရင် နကျယ်ကောင်က ဘာလဲ၊ သူထိုးထည့်ခဲ့တဲ့ ကျွန်တော်တို့ ကိုယ်ခန္ဓာထဲက ဓာတုပစ္စည်းတွေက ဘာတွေလဲ ကျွန်တော်တို့ကို ဘယ်လမ်းကြောင်းကို လျှောက်နေစေတာလဲဆိုတာ သိဖို့ လုပ်ကြရပါလိမ့်မယ်
.
. . . ကျွန်တော်တို့ ပြည်ထောင်စုမြန်မာနိုင်ငံသားတွေက အသိဉာဏ်နိမ့်ပါးတဲ့ ပိုးတုန်းလုံးလို၊ ပိုးဟပ်လို၊ ပင့်ကူလိုအကောင်တွေမဟုတ်တဲ့အတွက် နကျယ်ကောင်တဲ့တူတဲ့ ရန်သူက ဘယ်သူလဲဆိုတာ ရှာဖွေဖော်ထုတ်ပြီး ချေမှုန်းနိုင်ရင် ကျွန်တော်တို့ရဲ့ အနာဂတ်ဘဝ လှပနိုင်ပါလိမ့်မယ်၊ သို့မဟုတ်ရင်တော့ . . .
.
ဗိုလ်ကောင်း
၁၂ စက်တင်ဘာ ၂၀၂၀
.
ပူးတွဲကြည့်ရန်
https://youtu.be/nHMppxpul5s
https://youtu.be/vMG-LWyNcAs
https://youtu.be/Cha-lmuPdek
https://youtu.be/EudG9t4B07M

အဖေဖြစ်ခြင်းအနုပညာ

. . . ဆယ်တန်းအောင်အရွယ် သမီးဖြစ်သူကို ဆယ်ကျော်သက် နှုတ်ခမ်းနီမလေးတွေရဲ့ အသည်းစွဲ ကိုရီးယားမင်းသားလေးတွေပုံကို သေသေချာချာ ဘောင်နဲ့အကျအနကွပ်ပြီး မွေးနေ့လက်ဆောင်ပေးတဲ့ သူငယ်ချင်းကိုကြည့်ပြီး ဒီကနေ့ခေတ်မှာ အဖေဖြစ်ရခြင်းရဲ့ အနုပညာကို ဆင်ခြင်မိလိုက်သလို အဖေတွေအမေတွေ လိမ်လိမ်မာမာနေကြဖို့ ကိုယ့်ဘာသာကိုယ် ဆုံးမရမယ့်ခေတ်ကိုရောက်နေပါပြီလားလို့လည်း သတိထားမိလိုက်ပါတယ်

.
. . . သားသမီးကို ရုပ်ဝတ္ထုပိုင်း လိုအပ်ချက် ဖြည့်ဆည်းပေးရုံသာမက လှလှပပလည်း ချစ်တတ်ပြီး နှလုံးသားချင်းနီးကပ်နေတဲ့ သူငယ်ချင်းမိတ်ဆွေဆက်ဆံရေးမျိုးနဲ့ ကိုယ့်သားသမီးရဲ့ စိတ်ပိုင်းဆိုင်ရာ လုံခြုံနွေးထွေးမှုကို ကဗျာဆန်ဆန်ပေးတတ်တဲ့ အဖေမျိုးဖြစ်ဖို့က ကိုယ်တိုင်လည်း ရောမန္တိကဖြစ်နေဖို့ ပြင်ဆင်ထားရအုံးမှာပါ
.
. . . ဒါ့အပြင် သူတို့ရဲ့ လိင်စိတ်တိမ်းညွတ်မှု ဝါသနာ နဲ့ လွတ်လပ်စွာ ရှင်သန်အရွယ်ရောက်ခွင့်ကို လေးလည်းလေးစား အကာအကွယ်လည်းပေးရအုံးမှာပါလားဆိုတာကို ဘယ်တော့မှ မမေ့သင့်ပါဘူး
.
. . . သမီးတစ်ယောက် လူလားမြောက်ခြင်းရဲ့ ရင်ဆိုင်လာရမယ့်အရာတွေကို အဆင်သင့်ဖြစ်အောင် ကိုယ့်ဘာသာပြင်ဆင်နေတဲ့ အဖေတစ်ယောက်ရဲ့ အတွေးလေးတွေပါ
.
ပန်းပွင့်လေးဖေဖေ
၇ စက်တင်ဘာ ၂၀၂၀

တစ်ယောက်ကဗြန်းရင် တစ်ယောက်က ကောက်

. . . အင်စတီကျူးရှင်းတွေအကြောင်း ပြောရင်းနဲ့ သတိရလာတာက ကိုယ်တွေငယ်ငယ်က ကစားပွဲစည်းမျဉ်းတွေအကြောင်းပဲ၊ နှစ်ဘက်နှစ်သင်းခွဲပြီး ကစားကြမယ့်ပွဲမှာ ပထမဆုံး ရှိတဲ့သူတွေကို နှစ်သင်းခွဲရတာကိုး၊ ဒီအခါမှာ နှစ်သင်းစလုံးဟာ လက်ရည်ခြေရည်တူဖြစ်ဖို့အတွက် အသင်းခွဲတဲ့နေရာမှာ လုပ်ကြတဲ့ စည်းမျဉ်းလေးအကြောင်း ပြောပြချင်တယ်

.
. . . အသင်းခွဲတော့မယ်ဆိုရင် ခေါင်းဆောင်နှစ်ယောက်က ဘယ်သူဗြန်းပြီး ဘယ်သူကောက်မလဲဆိုတာ အရင်ဆုံး သဘောတူရတယ်၊ မောင်ဘက ဗြန်းမယ်ဆိုရင် မောင်ဘဟာ ကစားမယ့်သူတွေ အကုန်လုံးကို နှစ်ယောက်တစ်တွဲစီ မျက်နာချင်းဆိုင်ရပ်ပြီး တန်းစီတယ်၊ တတ်နိုင်သမျှ လက်ရည်ခြေရည်တူတွေကို မျက်နာချင်းဆိုင် တွဲတွဲပေးတယ်၊ တော်တဲ့သူအချင်းချင်း သိပ်မကစားနိုင်တဲ့သူအချင်းချင်းတွဲတယ်ပေါ့၊ မျက်နာချင်းဆိုင်ရပ်နေတဲ့ လူတွေကို သေချာ မျှတအောင် ခွဲပြီးပြီဆိုရင် အဲသည်အသင်းနှစ်သင်းအနက် ဘယ်အသင်းကို ယူမလဲ ဆိုတာကိုတော့ နောက်ခေါင်းဆောင်တစ်ယောက်ဖြစ်တဲ့ မောင်လှက ရွေးရတယ်၊ အဲဒါကို ကောက်တယ်လို့ခေါ်တယ်။ မောင်ဘက ဗြန်းရင် မောင်လှက ကောက်၊ မောင်ဘ ကသာ အသင်းနှစ်ခုရဲ့ လူတွေကို မမျှမတ ခွဲခဲ့လို့ တစ်သင်းသင်းက အင်အားအရမ်းကြီးပြီး တစ်သင်းက အင်အားအရမ်းနည်းနေတယ်ဆိုရင် မောင်လှက အင်အားကောင်းတဲ့အသင်းကို ယူသွားမှာမို့ မောင်ဘဟာ အသင်းခွဲတဲ့နေရာမှာ အတတ်နိုင်ဆုံး မျှတအောင်ခွဲတယ်၊ ဒါမှ သူ မနစ်နာမှာကိုး၊ အသင်းနှစ်သင်း လက်ရည်တူဖြစ်ဖို့ရယ် ခေါင်းဆောင်တွေက အသင်းကို လက်ရည်တူဖြစ်အောင် ခွဲဖို့ရယ်ကို တစ်ယောက်ကဗြန်းပြီး တစ်ယောက်က ကောက်တဲ့ စနစ်နဲ့ လုပ်ထားပြီး ဒီစနစ်ကိုလည်း အားလုံးက လိုက်နာကြတော့ ကစားပွဲတွေဟာ တရားမျှမျှတတ ဖြစ်သွားတယ်
.
. . . သူတို့တွေ ကစားနေကြချိန်မှာ တစ်ယောက်ယောက် အသစ်ရောက်လာခဲ့ရင် သူတစ်ယောက်တည်း တစ်ဘက်ဘက်ကို ဝင်လိုက်ရင် မမျှမတ ဖြစ်သွားမှာမို့ နောက်တစ်ယောက်အလာကို စောင့်ရတယ်၊ နောက်တစ်ယောက် ထပ်ရောက်လာရင် သူတို့နှစ်ယောက်ဟာ ခြေရည်မျှတဲ့အတွဲဖြစ်ကောင်းမှ ဖြစ်မယ်၊ ကစားနေတဲ့ အသင်းခေါင်းဆောင်တွေကလည်း ခြေသာတဲ့သူကိုသာ ပိုပြီး လိုချင်တာမို့ သူတို့နှစ်ယောက်မှာ ဘယ်သူ့ကို ရွေးတယ်ဆိုတာကိုလည်း ကျပမ်းနည်းတစ်ခုရှိတယ်၊ အဲဒါက သူတို့နှစ်ယောက်ကို စကားဝှက်လုပ်ခိုင်းတဲ့နည်းပဲ
.
. . . ဆိုပါစို့၊ ကျနော်နဲ့ နောက်တစ်ယောက် ကစားပွဲထဲ ဝင်တော့မယ်ဆိုရင် ကျနော်တို့နှစ်ယောက် တိတ်တိတ်လေးတိုင်ပင်ပြီး ကိုယ့်နာမည်ဝှက်ကိုယ် ပေးကြတယ်၊ များသောအားဖြင့် အသီးနာမည်တွေ၊ အရွက်နာမည်တွေ ပေးလေ့ရှိတယ်၊ မင်းက သရက်သီး ငါက သင်္ဘောသီး၊ ဒါမှမဟုတ် တမာရွက်နဲ့ ဩဇာရွက် စသည်ဖြင့်ပေါ့၊ ပြီးရင် အသင်းခေါင်းဆောင်တွေကို နာမည်ဝှက်နှစ်ခုကို ပြောပြီး ရွေးခိုင်းရတယ်၊ သူက တမာရွက်နဲ့ဩဇာရွက်ဆိုရင် အသင်းခေါင်းဆောင်တစ်ယောက်က တမာရွက်ယူမယ်ဆို တမာရွက်လို့ အမည်ဝှက်ထားတဲ့သူက သူ့အသင်းကိုသွား၊ ကျန်တဲ့တစ်ယောက်က တခြားပြိုင်ဘက်အသင်းကိုဝင် ဒီလိုလုပ်ကြရတာ
.
. . . ပြောချင်တာက ကိုယ်တွေ ငယ်ငယ်က စကားနည်းတွေမှာ စည်းမျဉ်းစည်းကမ်းတွေ ခိုင်ခိုင်မာမာရှိခဲ့ လိုက်လည်းလိုက်နာခဲ့ကြတော့ ငယ်ဘဝ ကစားနည်းတွေဟာ တရားမျှတမှုကို လေ့ကျင့်ခဲ့ရတဲ့ လေ့ကျင့်ရေးကွင်းတွေ ဖြစ်ခဲ့ကြတယ်၊
.
. . . သတ်မှတ်ထားတဲ့ စည်းကမ်းတွေကို ချိုးဖောက်တဲ့သူ ညစ်တဲ့သူရော မရှိဘူးလားတဲ့၊ ရှိတာပေါ့၊ ညစ်တဲ့သူတွေလည်း ရှိတန်သရွေ့ ရှိတာပေါ့၊ ဒါပေမယ့် ညစ်တဲ့သူဆိုရင် ကစားပွဲမှာ ဘယ်သူမှ သိပ်မခေါ်ချင်ကြဘူး၊ ညစ်လို့ နိုင်သွားတယ်ဆိုရင်တောင် မင်းတို့က ညစ်လို့နိုင်တာပါကွာ ဆိုတဲ့ အပြောမျိုးဟာ သိပ်ပြီး နာစရာကောင်းတယ်
.
. . . ကိုယ်တွေဟာ ဒီလို ကစားပွဲစည်းမျဉ်းတွေနဲ့ ကျင့်သားရပြီး ကြီးလာခဲ့ကြတာပေမယ့် တို့နိုင်ငံကြီးက စည်းမျဉ်းစည်းကမ်းတွေ တည်ဆောက်ခိုင်မြဲစေခြင်းဆိုတဲ့ နိုင်ငံရေးဓလေ့ကြီးကို အခုထိ ဘာလို့ ခိုင်ခိုင်မြဲမြဲ မရသေးတာလဲဆိုတာ သေသေချာချာ သုတေသန လုပ်ဖို့ကောင်းတယ်၊ ငယ်ဘဝက ကစားပွဲစည်းမျဉ်းတွေဟာ ကြီးလာတဲ့အထိ ဘာလို့ ခိုင်ခိုင်မာမာ မပါလာခဲ့ကြတာလဲ
.
ဗိုလ်ကောင်း
၆ စက်တင်ဘာ ၂၀၂၀
.
Photo credit
https://www.mmtimes.com/.../21072-the-encyclopedia-of...