စစ်တပ်က အာဏာသိမ်းမှကို ဖြစ်တော့မှာပါ ဆိုတဲ့ ခံစားချက်မျိုး ပေါ်ခဲ့ဖူးတာကို အမှတ်ရမိပါတယ်။ တိုက်တိုက်ဆိုင်ဆိုင် ဆိုသလို ယိုးဒယားမှာ ရှပ်နီနဲ့ ရှပ်ဝါတွေ အပြိုင်အဆိုင် ဆန္ဒပြကြ ညှိမရ နှိုင်းမရ ဖြစ်နေကြတဲ့ အချိန်မှာပဲ ယိုးဒယားရေးရာ ကျွမ်းကျင်သူ ပါမောက္ခ ကီဗင် ဟီဝစ်ဆင်ရဲ့ အတန်းမှာ သက်ဆင်ခေတ် ယိုးဒယား နိုင်ငံရေးအကြောင်း လေ့လာနေမိလျက်သား ဖြစ်နေပါတယ်။ ဆရာဟီဝစ်ဆင်က အဲဒီတုန်းက သြစတေးလျ အနောက်ပိုင်း မားဒေါ့ တက္ကသိုလ်က အာရှရေးရာ သုတေသနဌာနညွှန်ကြားရေးမှူး တာဝန်ထမ်းဆောင်နေချိန် ဖြစ်ပါတယ်။
ဒီမိုကရေစီနည်းအရ ရွေးကောက်ခံ အစိုးရကိုလည်း ပြိုင်ဘက် နိုင်ငံရေးအုပ်စုက ဘုရင့်အရှိန်အ၀ါနဲ့ လက်မခံနိုင်ဘူး ဖြစ်နေတဲ့အချိန်။ အနီနဲ့ အ၀ါတွေ ဘယ်သူ့ဘယ်သူမှ အလျှော့မပေးဘူး ဖြစ်နေကြချိန်၊ နိုင်ငံရေးမှာ သြဇာကြီးလှပါတယ်ဆိုတဲ့ ဘုရင်မင်းမြတ်ကလည်း ကျန်းမာရေးချို့ယွင်းလို့ နေ့လားညလား စိုးရိမ်ပူပန်နေရချိန်။ ကျွန်တော့် စိတ်ထဲမှာတော့ ယိုးဒယားရဲ့ လက်ရှိ နိုင်ငံရေး ထွက်ပေါက်က စစ်တပ်က အာဏာသိမ်းတာ တစ်ခုပဲ ရှိတော့တယ်လို့ ခံစားရမိပြီး စစ်တပ်က အာဏာသိမ်းမှကို ဖြစ်တော့မှာပါလို့သာ တစ်ထစ်ချ တွက်ထားမိခဲ့ပါတယ်။
အတန်းထဲမှာ လက်ရှိ ယိုးဒယား နိုင်ငံရေးအကြောင်း ဆွေးနွေးကြတိုင်း ဆရာကတော့ ဘယ်တော့မှ ရှေ့ဖြစ်ကို မခန့်မှန်းပါရစေနဲ့ပဲ ပြောပြီး ကျွန်တော်တို့ကိုသာ ကိုယ့်ထင်မြင်ယူဆချက်တွေကို ပြောပြစေပါတယ်။ ကျွန်တော် အမှတ်မမှားဘူးဆိုရင် အဲဒီတုန်းက အတန်းထဲက အခြားကျောင်းသားတွေလည်း ကျွန်တော့် ရဲ့ ထင်မြင်ချက်ကို မထောက်ခံဘူးဆိုရင်တောင် မကန့်ကွက်ခဲ့ကြပါဘူး။ ဘာလို့လဲ ဆိုတော့ သူတို့မှာလည်း ပိုပြီးကောင်းတဲ့ နိုင်ငံရေးဖြေရှင်းနည်း ကြံဆမရလို့ ဖြစ်မယ်ထင်ပါတယ်။
ဆရာဟီဝစ်ဆင်ကို မေးခဲ့ပေမယ့် သူမဖြေခဲ့တဲ့ မေးခွန်းသုံးခု ရှိပါတယ်။
မေးခွန်း (၁)
ဘူမိဘော ဘုရင်မင်းမြတ်ကို အမေရိကန်မှာ ဖွားမြင်ခဲ့ပြီး ပြည်ပမှာပဲ ပညာသင် ကြီးပြင်းခဲ့ရသူဖြစ်ပါတယ်။ ယိုးဒယားကို ခဏပြန်လာတုန်း ဘုရင်ဖြစ်သူ အစ်ကိုတော် အာနန္ဒာမဟီဒေါဟာ နန်းဆောင်ထဲမှာ သေနတ်ဒဏ်ရာနဲ့ ကံတော်ကုန်လို့ ဘူမိဘောက ငယ်ငယ်ရွယ်ရွယ်နဲ့ ဘုရင်ဖြစ်ခဲ့ရတာပါ။ အာနန္ဒာမဟီဒေါ ဘုရင်ကို လုပ်ကြံခဲ့တဲ့ တရားခံ ဘယ်သူလဲ ဆိုတာ အခုထိ သဲသဲကွဲကွဲ မရှိလှပါဘူး။ အဲဒီတရားခံ ဘယ်သူလဲ ဆိုတာ ဆရာဟီဝစ်ဆင်ကို မေးကြည့်ပါတယ်။ မဖြေပါရစေပါနဲ့တဲ့။
မေးခွန်း (၂)
ဘူမိဘောဘုရင်မင်းမြတ် ကျန်းမာရေးချို့ယွင်းပြီး နေ့လားညလား ဖြစ်နေတဲ့အချိန် ယိုးဒယား နိုင်ငံရေးကလည်း မတည်မငြိမ် ဖြစ်နေတဲ့အချိန်မို့ ဘုရင်မင်းမြတ်သာ နတ်ရွာစံခဲ့ရင် နောက်တက်မယ့် ဘုရင်ရဲ့ နိုင်ငံရေးအပေါ် သက်ရောက်မှုက တော်တော်လေး ရှိနိုင်တယ်လို့ခန့်မှန်းမိပါတယ်။ ပြည်သူတွေ သိပ်မလေးစားတဲ့ မင်းသားဝီရိယလောင်ကွန်း နဲ့ ပြည်သူတွေ ချစ်ခင်လေးစားတဲ့ မင်းသမီး သီရိဒုံတို့နှစ်ယောက်အနက် ဘယ်သူက ထီးနန်းဆက်ခံရမလဲလို့ ဆရာဟီဝစ်ဆင်ကို မေးခဲ့ပါတယ်။ မဖြေခဲ့ပါဘူး။
မေးခွန်း (၃)
အနီတွေ အ၀ါတွေနဲ့ ဇာတ်ရှုပ်နေတဲ့ ယိုးဒယားမှာ အရင်တုန်းကလိုပဲ စစ်တပ်က အာဏာသိမ်းမှာလား လို့ မေးခဲ့ပါတယ်။ မဖြေခဲ့ပါဘူး။ ( အဲဒီတုန်းက ၂၀၁၄ ဖေဖေါ်ဝါရီလ ဖြစ်ပြီး သုံးလခန့်အကြာ မေလ ၂၂ ရက်မှာ စစ်တပ်က အာဏာသိမ်းခဲ့ပါတယ်)
၁၉၉၇ ပြည်သူ့အခြေခံဥပဒေရေးဆွဲကျင့်သုံးလာတဲ့အချိန်ကစပြီး ယိုးဒယားဟာ ဒီမိုကရေစီလမ်းကြောင်းပေါ်ကို တည်တည်ငြိမ်ငြိမ်နဲ့ ရောက်ပြီလို့ မှတ်ယူခဲ့ကြပေမယ့် သက်ဆင်တက်လာခဲ့ပြီး ဘုရင်ထက် လက်စောင်းထက်နေလို့ ဘုရင်မင်းမြတ် ရွှေစိတ်တော်ညိုပြီး စစ်တပ်အပေါ် သြဇာကြီးလှတဲ့ ဘုရင့်အကြံပေးကောင်စီ ဥက္ကဌ ဖရမ်တင်စူလန်နိုဒါရဲ့ အားပေးမှုနဲ့ ၂၀၀၆ မှာ စစ်တပ်က တစ်ခါ အာဏာသိမ်း ၂၀၁၄ မှာ တစ်ခါ အာဏာသိမ်း စတာတွေ ဖြစ်ခဲ့ပါတယ်။ အခု ထပ်မေးချင်တဲ့ မေးခွန်းက တကယ်လို့ ဘုရင့်ထက်တောင် အသက်ရှစ်နှစ်လောက်ကြီးတဲ့ အကြံပေးကောင်စီဥက္ကဌ ၀န်ကြီးချုပ်ဟောင်း အငြိမ်းစားဗိုလ်ချုပ်ကြီး ဖရမ် ကွယ်လွန်ခဲ့ရင် နန်းတော်က စစ်တပ်အပေါ် သြဇာညောင်းပါအုံးတော့မလား ဆိုတာလည်း စိတ်ဝင်စားမိပါတယ်။
ဘာလို့လဲ ဆိုတော့ သက်ဆင်တက်လာခဲ့ပြီး နောက်ပိုင်းမှာ စစ်တပ်ထဲ သက်ဆင်အုပ်စုနဲ့ ဘုရင်အုပ်စု ကွဲခဲ့ပြီး ဘုရင်အုပ်စုဘက်က အရေးသာသွားလို့ ၂၀၀၆ အာဏာသိမ်းကိစ္စ အောင်အောင်မြင်မြင် ဖြစ်ခဲ့တဲ့ အထောက်အထား ရှိလို့ ဖြစ်ပါတယ်။ ဒီအကြောင်းကို နောက်ကြုံရင် ရေးပါအုံးမယ်။
(ဘာရယ်မဟုတ်ပါဘူး စာတွေဖတ်နေရင်း စိတ်အညောင်းပြေ လျှောက်ရေးတာပါ)
No comments:
Post a Comment