သစ်ရွက်ဝါ အလွမ်းပင်လယ်

သူ့အတွက် အလွမ်းပြေ ပန်းတွေ တစ်ပွင့်စီချွေကာ မြေမှာ စုထားရရင်ကွယ် 

ခုများဆို စကားဥပမာ ပြောလို့နှိုင်းရင်

 တောညို့မှိုင်းတဲ့ မောတို့တိုင်းရဲ့ ရှမ်းတောင်တန်းသဖွယ် 

လွမ်းယောင်သန်းတဲ့ ပန်းတောင်တန်းတွေ ဖြစ်နေမယ်ထင်တယ်

    ဒါကတော့ မာမာအေး ဆိုခဲ့တဲ့ မေ့ဘဝခဏဘယ်သူယူပါ့မယ် ဆိုတဲ့ သီချင်းထဲက စာသားတစ်ချို့ ဖြစ်ပါတယ်။ တစ်ခြားသူတော့ မသိဘူးဗျ။ ဗိုလ်ကောင်းကတော့ ပန်းတောင်တန်းဆိုတာ တစ်ခါမှ မတွေ့ဖူးသေးဘူး။ ပန်းမြို့တော်လို့ ခေါ်ကြတဲ့ ပြင်ဦးလွင်တောင်မှ ပန်းတောင်တန်းလို့ ခေါ်ထိုက်တယ်လို့ မထင်ဘူး။ သီချင်းထဲကလို ပန်းတောင်တန်းမျိုး အပြင်မှာ တကယ်ရှိမယ်လို့လဲ မထင်မိပါဘူး။ ဒါကတော့ သီချင်းရေးဆရာ တမင်သက်သက် ဥာဏ်ကွန့်မြူးပြီး ရေးထားတဲ့ အတိဿယဝုတ္တိ အလင်္ကာ သက်သက်ပဲ လို့ ထင်ပါတယ်။ ဒါပေမယ့် သီချင်းလေးကိုတော့ အကြိုက်သားဗျ။ သူ့ကို တစ်ခါလွမ်းတိုင်းသာ ပန်းတစ်ပွင့် ချွေချွေပြီး ပုံထားရင် ပန်းပုံကြီးက ရှမ်းတောင်တန်းကြီးလောက်တောင် ဖြစ်သွားမယ်ဆိုပြီး သူ့အလွမ်းအင်အား ဘယ်လောက်ကြီးမားသလဲ ဆိုတာကို ဖွဲ့ထားတာလေ။

 

    ဗိုလ်ကောင်းက ညနေညနေဆိုရင် တောအုပ်ထဲမှာ အမြဲတမ်း စက်ဘီးစီးတယ်ဗျ။ တောင်တက်တောင်ဆင်းနဲ့ တောအုပ်ထဲမှာ ဖောက်ထားတဲ့ လမ်းကလည်း ချောမွေ့ ပြေပြစ်ပြီးတော့ စက်ဘီးစီးလို့ သိပ်ကောင်းပေါ့။ လူကလည်းရှင်း ကားကလည်းရှင်း။ ရှုခင်းလေးကလည်း လှမို့ မောတယ်လို့တောင် မထင်ရတဲ့ စက်ဘီးစီး လေ့ကျင့်ခန်းပါ။ တစ်ခုပဲ ရှိတာ။ ဘယ်ချောင်က ကျားထွက်လာမလဲ ဆိုပြီး ချိုးကနဲ ချွတ်ကနဲ အသံကြားရင် အလန့်တကြား လှည့်ကြည့်ရတာက လွဲလို့ပေါ့။ တောအုပ်က အောက်ခြေ သိပ်ရှင်းတာဗျ။ နွယ်ပင်တွေ ခြုံပင်တွေဆိုတာ မတွေ့ရသလောက်ပဲ။ ပြီးရင် သစ်တောလည်း အထိန်းအသိမ်းကောင်းတယ် ပြောရမလား။ သစ်ပင်ခုတ်တာတွေ ဘာတွေလည်း မရှိဘူး ထင်ပါရဲ့။ နောက်ပြီး တောမီးလောင်တာတွေ ဘာတွေလည်း မရှိဘူး ထင်ပါရဲ့။ သစ်ပင်တွေ အောက်ခြေ မှာ အခုလို နွေဦးပေါက်လို့ သစ်ရွက်တွေ ကြွေပြီလား ဆိုမှဖြင့် သစ်ရွက်ဝါ ပင်လယ်ကြီးကို ဖြစ်လို့ပဲ၊ ဘယ်ကိုကြည့်ကြည့် သစ်တောအုပ်ထဲ မျက်စိတစ်ဆုံး မြင်ရသလောက်ကတော့ သစ်ရွက်ဝါ ပင်လယ်ကြီးပဲဗျ။ သူများတွေက ပန်းကော်ဇောတို့ ဘာတို့ ပြောသလို ပြောရရင်တော့ သစ်ရွက်ဝါ ကော်ဇောကြီးပါပဲ၊

    ဗိုလ်ကောင်းကတော့ တစ်ခါမှ မမြင်ဖူးတဲ့ ပန်းတောင်တန်းကြီးကို စိတ်ကူးနဲ့ မတင်စားချင်ဘူးဗျ။ အခု မြက်စိရှေ့မှာ မြင်နေရတဲ့ သစ်ရွက်ဝါ ပင်လယ်ကြီးကို ကြည့်ပြီးတော့ပဲ ပြောပြချင်ပါတယ်။
    ဗိုလ်ကောင်းတစ်ခါလွမ်းတိုင်းမှာ သစ်ရွက်ဝါလေးတစ်ရွက် ကြွေကျပါတယ်ဆိုပါစို့။ ဗိုလ်ကောင်းကလည်း အချိန်ရှိတိုင်း လွမ်းနေလို့ သစ်ရွက်တွေကလည်း အချိန်ရှိတိုင်း ကြွေနေတယ် ဆိုပါစို့။ ဗိုလ်ကောင်းရဲ့ အလွမ်းတွေဟာ သစ်တောအုပ်ထဲမှာ ကြွေကျနေတဲ့ သစ်ရွက်ဝါတွေလောက်ကို များပါတယ်။ ချစ်သူရေ မင်းမယုံရင် မင်းနဲ့ အနီးဆုံး သစ်ပင်ကြီးနားကို သွားကြည့်လိုက်ပါ ဆိုပြီး ချစ်တဲ့သူကို သစ်ရွက်ကြွေတွေနဲ့ သက်သေပြလိုက်ချင်ပါရဲ့။ ဗိုလ်ကောင်းရဲ့ အလွမ်းလှိုင်းဒဏ်ကြောင့် ချစ်သူရပ်နေတဲ့ နေရာက သစ်ပင်တွေကပါ အရွက်တွေ ကြွေကျလာမှာပါ။ အဲဒါ ဗိုလ်ကောင်းရဲ့ အလွမ်းတွေပါ။ သစ်ရွက်တွေကို ဆက်ပြီး မကြွေစေချင်တော့ဘူး။ အလွမ်းသစ်ရွက်ဝါလေးတွေကို အတောင်ပံလုပ်ပြီး ချစ်သူဆီကို အပြေးသာ ပျံလာလိုက်ချင်ပါတော့တယ်။
(26-3-2013)  

သူတို့ဆီက ကလေးစစ်သား

 
    ဒီကနေ့ ကျောင်းကို လေ့လာရေး အဖွဲ့တစ်ဖွဲ့ ရောက်လာပါတယ်။ လားလား စစ်သား ယူနီဖောင်း ဝတ်ထားတဲ့ ကလေးလေးတွေပါလား။ ဒီလို နိုင်ငံကြီးက ဘယ်လိုဖြစ်လို့ ကလေးစစ်သားတွေ ရှိနေရတာပါလိမ့်ဆိုပြီး မေးမြန်းလေ့လာကြည့်တော့မှ . . .
 

   နိုင်ငံတော် ကာကွယ်ရေးအတွက် ကလေးဘဝကတည်းက စစ်ပညာတွေ လေ့ကျင့်သင်ကြားပေးမယ် ဆိုပါစို့။ အဲသည်လို လုပ်မယ်ဆိုရင် တရားဥပဒေနဲ့ ညီညွတ်ပါ့မလား။ နိုင်ငံတကာ စည်းမျဉ်းစည်းကမ်းတွေ၊ ကလေးအခွင့်အရေးတွေနဲ့များ ညိစွန်းသွားမလား။ ဒီမိုကရေစီ စံနှုန်းတွေနဲ့ရော ကိုက်ပါ့မလား။ ပြီးရင် ပြည်သူလူထုကရော လိုလားပါ့မလား။ ဒီလိုဆိုရင်တော့ လူမျိုးပေါင်းစုံ ဓလေ့ပေါင်းစုံ ဘာသာပေါင်းစုံ ဇာတ်နိမ့်ဇာတ်မြင့်ပေါင်းစုံ စသည်ဖြင့် ရှုပ်ထွေးပွေလီနေတဲ့ ကြားထဲက ဒီမိုကရေစီစနစ်ကို တည်တည်ငြိမ်ငြိမ် ကျင့်သုံးနေနိုင်တဲ့ မြန်မာနိုင်ငံ အနောက်ဘက်က ဒီမိုကရေစီနိုင်ငံကြီးက ကလေးစစ်ကျောင်းတွေကို ဖျက်ပစ်ရတော့မှာပါပဲ။ ဟုတ်ပါတယ်။ အိန္ဒိယနိုင်ငံမှာ ဒီလို ကလေးစစ်ကျောင်းမျိုးပေါင်း ပြည်နယ်တစ်ခုကို တစ်ကျောင်းနှုန်းနဲ့ ၂၄ ကျောင်းကျော် ရှိနေလို့ပါပဲ။
  

  ဒီလို ကလေးစစ်ကျောင်းတွေ တည်ထောင်ဖို့ကို ၁၉၆၁ ခုနှစ်က ကာကွယ်ရေးဝန်ကြီး ဗီကေ ခရစ်ရှနာမီနွန်က စတင်စိတ်ကူးရခဲ့ပါတယ်။ အဓိကကတော့ ပြည်နယ်တွေကနေ တပ်မတော် အရာရှိလောင်းတွေ ညီတူညီမျှ မွေးထုတ်ပေးနိုင်အောင်လို့ရယ် ဇာတ်နိမ့်ဇာတ်မြင့်တွေကြားမှာ တပ်မတော်အရာရှိလောင်းများ ညီတူညီမျှ ဖြစ်ခွင့်ရအောင်လို့ရယ် ဆိုပြီး တည်ထောင်ခဲ့တာ ဖြစ်ပါတယ်။ ဒါမှသာလျှင် အိန္ဒိယအမျိုးသားကာကွယ်ရေးတက္ကသိုလ် နဲ့ အိန္ဒိယရေတပ်တက္ကသိုလ်တို့အတွက် သင်တန်းသားတွေ မျှမျှတတ မွေးထုတ်ပေးနိုင်မှာ ဖြစ်ပါတယ်တဲ့။ အခုဆိုရင် ပြည်နယ်တစ်ပြည်နယ်ကို တစ်ကျောင်းနှုန်းနဲ့ ကလေးစစ်ကျောင်း ၂၄ ကျောင်းကျော် တည်ထောင်ထားနိုင်ခဲ့ပြီ ဖြစ်ပါတယ်။
   

 ကလေးစစ်ကျောင်းတွေဟာ ကာကွယ်ရေးဝန်ကြီးဌာနနဲ့ သက်ဆိုင်ရာ ပြည်နယ်အစိုးရတို့ရဲ့ ပူးတွဲကြီးကြပ်မှုအောက်မှာ ရှိကြပါတယ်။ ပြီးခဲ့တဲ့ ၂၀၀၈ ခုနှစ်တုန်းက ကလေးစစ်ကျောင်း  အသုံးစရိတ်အဖြစ် နိုင်ငံတော် ဘဏ္ဍာငွေကနေ ရူပီး သန်းနှစ်ဆယ်စီ ထောက်ပံ့ခဲ့ပါတယ်။ ဒါဟာ နိုင်ငံတော် ကာကွယ်ရေးအင်အား အထူးသဖြင့် အရာရှိအဆင့်များ အင်အားယုတ်လျော့လာတာကို တန်ပြန်ကုစားတဲ့အနေနဲ့ ပေးခဲ့တာ ဖြစ်တယ်လို့ ဘဏ္ဍာရေးဝန်ကြီးဝန်ကြီးက ပြောကြားခဲ့ပါတယ်။

     ကလေးစစ်ကျောင်းများ တည်ထောင်မယ့် စိတ်ကူးရဲ့ ကနဦးအစမှာ အင်္ဂလိပ်ခေတ်က တည်ထောင်ခဲ့သော ရာ့ရ်ှထရီယာ အိန္ဒိယစစ်ကောလိပ်မှ စတင်ခဲ့ခြင်းဖြစ်ပါတယ်။ ယခုထက်တိုင် အသက်ဝင်နေဆဲဖြစ်တဲ့ အဲသည်စစ်ကောလိပ်ဟာ အိန္ဒိယနိုင်ငံအတွက် မြို့ပြဘက်ဆိုင်ရာ ပြည်သူ့ဝန်ထမ်းအကြီးအကဲများ နှင့် အင်္ဂလန်နိုင်ငံ၏ ပုဂ္ဂလိကကျောင်း နည်းစနစ်များကို အမွေပေးခဲ့တဲ့ စစ်ကောလိပ် တစ်ခုဖြစ်ပါတယ်။ ကလေးစစ်ကျောင်းတွေဟာ နိုင်ငံရဲ့ သာမန်မိသားစုဝင် ကလေးများအတွက် ဝင်ငွေနှင့် အဆင့်အတန်း မခွဲခြားဘဲ မြင့်မားသော ပညာရည် ဖြည့်ဆည်းပေးနိုင်သော ကျောင်းများအဖြစ် အသိအမှတ်ပြု ခံထားရပါတယ်။ ကျောင်းသို့ တက်ရောက်နိုင်သူတွေကတော့ လက်ရှိ စစ်မှုထမ်းဆောင်ဆဲ တပ်မတော်သားများ၏ သားများနှင့် အထူးအခွင့်အရေးအဖြစ် အစိုးရ အရာရှိများ၏ သားများကို တက်ရောက်ခွင့် ပေးထားပါတယ်။

     ကလေးစစ်ကျောင်းများ၏ ရည်ရွယ်ချက်ကတော့ နိုင်ငံတော်ကာကွယ်ရေး ကဏ္ဍမှာ ဦးဆောင်နိုင်ရေးအတွက် ကြိုတင်ပြင်ဆင် လေ့ကျင့်ပေးရန် ဖြစ်ပါတယ်။  တစ်နိုင်ငံလုံး အတိုင်းအတာနဲ့ ကျင်းပတဲ့ ဝင်ခွင့်စာမေးပွဲများဖြင့် ထူးချွန်ထက်မြက်ပြီး အလားအလာကောင်းသော ကလေးငယ်များကို ရွေးချယ်ကာ သမားရိုးကျ ကျောင်းသင်ခန်းစာများအပြင် ထပ်ဆောင်း သင်ခန်းစာများဖြင့် ကလေးငယ်များ၏ ကိုယ်ရည်ကိုယ်သွေးကို ဘက်စုံ ဖွံ့ဖြိုးစေရန် သင်ကြား လေ့ကျင့်ပေးခြင်းဖြစ်ပါတယ်။ 

      ကလေးစစ်ကျောင်းများမှာ အားကစားစွမ်းရည် ထက်မြက်အောင်၊ ကျောင်းသင်ပညာရပ်တွေမှာ ထူးချွန်အောင် နှင့် အပိုဆောင်း သင်ခန်းစာများတွင် ကျွမ်းကျင်ပိုင်နိုင်အောင် သင်ကြားပေးပါတယ်။ ကလေးစစ်ကျောင်းတွေမှာ အပြေးလေ့ကျင့်ရာ လမ်းများ၊ တောခရီးလမ်းများ၊ ခမ်းမတွင်း အားကစားနည်းများ၊ စစ်ရေးပြကွင်းများ၊ လက်ဝှေ့စင်များ၊ စက်ပစ်ကွင်းများ၊ လှေလှော်ကလပ်များ၊ မြင်းစီးကလပ်များ၊ တောင်တက်အသင်းများ၊ ခြေလျင်တောကြမ်းခရီးထွက် အဖွဲ့များ၊ အတားအဆီး ဖြတ်ကျော်မှု လေ့ကျင့်ခန်းများ၊ ဘောလုံး၊ ဟော်ကီ၊ ခရစ်ကက်အားကစားကွင်းများ၊ ဘော်လီဘောနှင့် ဘတ်စကက်ဘောကွင်းများ ပါဝင်ဖွဲ့စည်း ပေးထားပါတယ်။

    ကျောင်းတွေများကို အဆောင်တွေနဲ့ထားပါတယ်။ အဆောင်နာမည်တွေကတော့ ထင်ရှားကျော်ကြားတဲ့ ပုဂ္ဂိုလ်များ စသည်ဖြင့် နာမည်ပေးထားတာပါ။ ကျောင်းသားတွေက ကျောင်းအိပ်ကျောင်းစာ တက်ရောက်ရပါတယ်။ နေ့စဉ်အချိန်ဇယားက စစ်သားများ အချိန်ဇယားအတိုင်း ဖြစ်ပါတယ်။ မနက် ကြံ့ခိုင်ရေး အပြေးလေ့ကျင့်တာ စသည်ဖြင့်ပေါ့။ တက်ရောက်နေတဲ့ အတန်းကို မူတည်ပြီး အကြီးတန်း အငယ်တန်း စသည်ဖြင့် သတ်မှတ်ထားပါတယ်။ ကျောင်းဆောင်များအလိုက် အားကစားပြိုင်ပွဲ၊ ကြံ့ခိုင်မှု၊ စာပေပညာ၊ စစ်ပညာ၊ နယ်ကျော်ပြေးပွဲ နှင့် အခြားသော ပြိုင်ပွဲများစွာကို ယှဉ်ပြိုင်ကြရပါတယ်။
    ကလေးစစ်ကျောင်းများကို ကာကွယ်ရေး ဝန်ကြီးဌာန လက်အောက်တွင် ကာကွယ်ရေးဝန်ကြီး ဥက္ကဌအဖြစ် ပါဝင်သော ကလေးစစ်ကျောင်း ကြီးကြပ်ရေးအဖွဲ့က ကြီးကြပ်ကွပ်ကဲပါတယ်။
    ကလေးစစ်ကျောင်းများမှာ ခြောက်တန်းမှ ဆယ့်နှစ်တန်းအထိ ကျောင်းပညာရပ်များ သင်ကြားပေးပါတယ်။ ယောက်ျားလေး ကျောင်းသားများကိုသာ လက်ခံပေမယ့် ကျောင်းက ဆရာဆရာမနဲ့ ကျောင်းဝန်ထမ်းများရဲ့ သမီးများကိုလည်း လက်ခံသင်ကြားပေးပါတယ်။ ကျောင်းသားလက်ခံမှု အနေနဲ့ကတော့ ခြောက်တန်းက ကိုးတန်းထိပဲ လက်ခံပါတယ်။ ကျောင်းဝင်ခွင့်အတွက် ရေးဖြေ စာမေးပွဲများကို ဖေဖေါ်ဝါရီလမှာ ကျင်းပလေ့ရှိပြီး ရွေးချယ်ခံရတဲ့ ကျောင်းသားများကို ဧပြီ နဲ့ မေလများမှာ လူတွေ့စစ်ဆေးခြင်း၊ ကျန်းမာရေးစစ်ဆေးခြင်းတို့ လုပ်ပါတယ်။ မေလကုန်မှာ အပြီးသတ်အောင်စာရင်းကို ထုတ်ပြန်ပေးပါတယ်။
    ပြင်ပ စာသင်ကျောင်းများလိုပဲ အခြေခံပညာရေး ၁၂ တန်း ပြီးဆုံးတဲ့အခါ ကလေးစစ်ကျောင်းက ကျောင်းသားများဟာ အမျိုးသားကာကွယ်ရေး တက္ကသိုလ်မှာ ဗိုလ်လောင်းအဖြစ် ဆက်လက် တက်ရောက်ကြရပါတယ်။ ဒီလို ကလေးစစ်ကျောင်းတွေကနေ အိန္ဒိယတပ်မတော်အတွက် အရာရှိပေါင်း ခြောက်ထောင်ကျော် မွေးထုတ်ပေးနိုင်ခဲ့ပြီး ဖြစ်ပါသည်။
    ဗိုလ်ကောင်းတို့ မြန်မာပြည်မှာလည်း တစ်နေ့နေ့ တစ်ချိန်ချိန်ကျရင် အခုလို ငယ်ရွယ်စဉ်ကတည်းက နိုင်ငံတော် ကာကွယ်ရေးအတွက် ဘက်စုံ အရည်အချင်းထက်မြက်တဲ့ ခေါင်းဆောင်ကောင်းတွေ လေ့ကျင့်မွေးထုတ်ပေးနိုင်ရင် မကောင်းဘူးလားလို့ စဉ်းစားမိပါတယ်။
(22-3-2013)

အင်္ဂလိပ်တွေ ဖောက်ခဲ့တဲ့လမ်း

 

    ဒီနေ့သင်ခန်းစာက ဗြိတိသျှတို့ရဲ့ သဘောသဘာဝနဲ့ ပတ်သက်ပြီး တစ်ခြားလူတွေက ဘယ်လိုထင်ကြတယ်၊ တကယ်က ဘယ်လို ရှိတယ်ဆိုတာ ဆွေးနွေးတဲ့ သင်ခန်းစာ ဖြစ်ပါတယ်။ ပြီးတော့မှ မင်းတို့ နိုင်ငံကရော ဘယ်လိုမျိုးလဲ ဆိုတဲ့ သင်ခန်းစာ ဖြစ်ပါတယ်။ သိကြတဲ့အတိုင်း အင်္ဂလိပ်လူမျိုးဆိုတာ စည်းကမ်းကြီးတယ်ဆိုပြီး နာမည်ကြီးတဲ့သူမျိုး။ သူတို့ ကိုယ်တိုင်ကလည်း စည်းကမ်းကြီးပြီး အချိန်တိကျတယ်လို့ ဝန်ခံပါတယ်။ ဒါနဲ့ စပ်လျဉ်းပြီး ဆရာမက ဘာပြောသလဲ ဆိုတော့ သူတို့ နိုင်ငံကိုတဲ့ အင်္ဂလိပ်က အနှစ် နှစ်ရာ အုပ်ချုပ်သွားတာတဲ့။ အင်္ဂလိပ်တွေကျန်ခဲ့တာမှန်သမျှ အကောင်းတွေ ချည်းပဲတဲ့။ ဒီနိုင်ငံမှာရှိတဲ့ ရထားလမ်းတွေအားလုံး အင်္ဂလိပ်တွေ ဖောက်သွားတာချည်းပဲတဲ့။ ကားလမ်းတွေဆိုလည်း သူတို့ ဖောက်ခဲ့သမျှ အခုချိန်ထိ အကောင်းတွေ ချည်းပဲတဲ့။ ဒီဘက်ခေတ်မှာ ဖောက်တဲ့လမ်းတွေဟာ သူတို့ ဖောက်ခဲ့တဲ့ လမ်းတွေလောက် မကောင်းဘူးတဲ့။ အင်္ဂလိပ်တွေက သိပ်ရိုးသားတယ်တဲ့။
    ကိုယ့်နိုင်ငံကို ကျွန်ပြုခဲ့တဲ့ လူမျိုးကိုများ ကောင်းတယ်ပြောနေရအောင် ဒီဆရာမ မျိုးချစ်စိတ် ခေါင်းပါးလှချည်လားလို့ ထင်ရင် မှားပါလိမ့်မယ်။ ဗိုလ်ကောင်းတို့ ကိုယ့်နိုင်ငံ ကိုယ့်လူမျိုးကိုယ် ချစ်သလို သူတို့လည်း ချစ်တာပါပဲ။ ကိုယ့်အမျိုးကို ချစ်တာက တစ်ပိုင်း။ အကောင်းအဆိုး ဝေဖန်တာက တစ်ပိုင်းပါ။ တကယ်လည်း မှန်ပါတယ်။ ဘယ်ကိုသွားသွား စက်ဘီးကို အားပြုပြီး သွားလာနေရတဲ့ နေရာမှာ လမ်းတစ်ခုက ကောင်းတယ် မကောင်းဘူးဆိုတာ သိပ်ကို သိသာလွန်းပါတယ်။ တောင်တက် တောင်ဆင်းတွေကြားမှာ ဖောက်ထားတာတောင် လမ်းက ချောမွေ့ ပြေပြစ်ပြီး စက်ဘီးနင်းလို့ သက်တောင့်သက်သာ ရှိနေပြီဆိုရင် သေချာပါတယ်၊ အဲဒါ အင်္ဂလိပ် ဖောက်ခဲ့တဲ့လမ်းပါပဲ။ လမ်းတစ်ခုက ချောလည်းမချောမွေ့၊ ကျောက်ခဲစားပြီး စက်ဘီးနင်းရင်တောင် အစာကျေတယ် ပြောရလောက်အောင် ချိုင့်တွေ ခွက်တွေနဲ့၊ အတက်အဆင်းကလည်း မပြေပြစ်၊ လမ်းကွေ့ဆိုလည်း အန္တရာယ်မကင်းဖြစ်နေပြီဆို သေချာပါတယ် အဲဒါ အခုခေတ်မှ ဖောက်တဲ့လမ်းပဲ။
    ဆရာမပြောတဲ့ လွန်ခဲ့တဲ့ နှစ်ပေါင်းရာကျော်က အင်္ဂလိပ်တွေ သိပ်ရိုးသားတာပဲဆိုတဲ့စကားဟာ ဗိုလ်ကောင်းအတွက်တော့ တစ်ခါမှကို မကြားဖူးတဲ့ တွေးလည်း မတွေးဖူးတဲ့ စကားပါပဲ။ အင်္ဂလိပ်ဆိုရင် သူများနိုင်ငံကို မတရား တိုက်ခိုက်သိမ်းပိုက် ကျွန်ပြုတတ်တဲ့ လူမျိုး၊ သူများနိုင်ငံက သူရဲကောင်းကို သူပုန်လို့ နာမည်ဖျက်ပြီး နှိပ်ကွပ်တတ်တဲ့ လူမျိုး၊ သစ်လည်း ခိုးထုတ်သေးတယ် သူတို့ကပဲ လျော်ကြေးတောင်းပြီး ရန်စသေးတဲ့ ယုတ်မာပက်စက်တဲ့လူမျိုး၊ တို့ အထွတ်အမြတ်ထားတဲ့ ဘုရင်ကို ကြက်ကလေး ငှက်ကလေး ဖမ်းသလို ဖမ်းပြီး အဝေးကြီးကို ပို့ပစ်တဲ့ လူမျိုး စသည်ဖြင့် အင်္ဂလိပ်ဆိုတာနဲ့ မကောင်းတာတွေပဲ တန်းစီပြီး သိနေခဲ့တဲ့ ဗိုလ်ကောင်းတို့ဟာ အင်္ဂလိပ်တွေရဲ့ ကောင်းတဲ့အချက်တွေ တော်တဲ့ အချက်တွေကို လျစ်လျှူရှုခဲ့မိကြတယ် ထင်ပါရဲ့။
    မိုင်ပေါင်းများစွာ ဝေးတဲ့အရပ်ကနေလာပြီး လူမျိုးလည်းမတူ ဘာသာလည်းမတူ ယဉ်ကျေးမှုလည်းမတူတဲ့ နိုင်ငံတွေကို နှစ်ပေါင်းရာနဲ့ချီပြီး အုပ်ချုပ်နိုင်ခဲ့တယ်ဆိုတာ နည်းတဲ့ အရည်အချင်းလားလို့။ အဲသည်လို အုပ်ချုပ်နိုင်တဲ့ စည်းစနစ်မျိုးကိုမှ ကောင်းတယ် မပြောရင် ဘာကို ကောင်းတယ် ပြောရမှာလဲ။ သူတို့တွေ သူများနိုင်ငံကို သွားအုပ်ချုပ်တယ်ရယ်လို့ ငါတို့ တစ်နေ့တော့ ဒီနိုင်ငံတွေကို စွန့်လွှတ်ပြီး ပြန်ရမှာပဲလို့ ဘယ်မှာ ပြီးစလွယ် စီးစလွယ် လုပ်ခဲ့တာ ရှိလို့လဲ။ လမ်းတွေ တံတားတွေ ဆောက်ခဲ့တဲ့ အဆောက်အအုံတွေ ဆိုတာ တစ်နေ့တစ်ချိန်တုန်းက ငါတို့ ကျွန်ဖြစ်ခဲ့တယ် ဆိုတာတောင် မရှက်နိုင်ပဲ ဒီနေ့အထိ ရှေးဟောင်း အဆောက်အအုံတွေအဖြစ် တသသ ရှိနေရအောင်ကို ဌာန်ကရိုဏ်းကျကျ ဆောက်ခဲ့တာပဲ မဟုတ်လား။ ရွာတွေ မြို့တွေ ခရိုင်တွေ ဆိုတာလည်း သူတို့ဖွဲ့ပေးခဲ့တဲ့အတိုင်း စခန်းသွားနေရတုန်းပဲ မဟုတ်လား။ ဥပဒေတွေ ဆိုရင်ရော။ မြန်မာလို ဘာသာပြန်ရေးထားတာတွေ ရှိပေမယ့် အခုချိန်ထိ ဥပဒေပြင်ဆင်ချက်ကို အင်္ဂလိပ်လိုပဲ ပြင်နေရတုန်းပဲ မဟုတ်ပါလား။ လွတ်လပ်ရေးရတာ နှစ်ပေါင်း ခြောက်ဆယ်ရှိနေပြီ ဆိုတာတောင် သူတို့ပြဌာန်းခဲ့တဲ့ ဥပဒေတွေ အားလုံးကို မြန်မာလို ပြန်ပြီး မပြဌာန်းနိုင်သေးဘူးမဟုတ်လား။
    အင်္ဂလိပ်ကို ကိုယ့်နိုင်ငံလာအုပ်ချုပ်တာ မကြိုက်ပေမယ့် သူတို့ရဲ့ ကောင်းတဲ့အချက်တွေကို ရအောင် ယူကြဖို့ လိုပါတယ်။ အစိုးရအဆောက်အအုံဆိုရင် ပါးပါးလှပ်လှပ် နဲ့ ကိုယ်ဆောက်ခဲ့တဲ့ အဆောက်အအုံလို့တောင် ကိုယ်မပြောနိုင်တဲ့အဖြစ်၊ ကိုယ်ချမှတ်ခဲ့တဲ့စနစ်ရဲ့ အားသာချက် အားနည်းချက်ကိုတောင် ဝေဖန်မခံနိုင်တဲ့အဖြစ်၊ ကိုယ့်မျိုးရိုးစဉ်ဆက် ဂုဏ်သိက္ခာကို အနီးဆုံးမျိုးဆက်ကတောင် ဂုဏ်မယူနိုင်တဲ့ အဖြစ်တွေကို ရပ်ကြသင့်ပါပြီ။ ပြီးခဲ့တာတွေတော့ ပြီးခဲ့ပါပြီ။ အတိတ်ဆိုတာ တစ်ခါပြန်သွားလို့ ရတဲ့အမျိုးမဟုတ်ပါဘူး။ အနာဂတ်ဆိုတာလည်း ရောက်သေးတာ မဟုတ်ပါဘူး။ လွန်ခဲ့တဲ့ အနှစ်နှစ်ဆယ်က မစိုက်ဖြစ်ခဲ့တဲ့ သစ်ပင်ကို ဒီနေ့မှာ စိုက်ကြပါစို့ရဲ့။ ဒီနေ့ လုပ်ခဲ့တဲ့ အလုပ်အတွက် မနက်ဖြန်မှာ ဂုဏ်ယူကြပါစို့ရဲ့။ မြန်မာဆိုတာ အရည်အချင်းရှိတဲ့လူမျိုး၊ အကောင်းဆုံးအရည်အချင်းနဲ့ အလုပ်လုပ်တဲ့ လူမျိုး၊ ဂုဏ်သိက္ခာကို တန်ဖိုးထားတဲ့လူမျိုး၊ လူတွေကို လေးစားတတ်တဲ့ လူမျိုးအဖြစ် ဒီနေ့ပဲ ခင်ဗျားနဲ့ ကျွန်တော် စပြီး တည်ဆောက်ကြပါစို့ရဲ့။ (၂၁-၃-၂၀၁၃)

ချော်ရဂါ့ဘုရားကျောင်း

    သွားချင်နေတာကတော့ အဲသည် အမြင့်ဆုံးတောင်ထွတ်ကို ထိပ်ထိ တက်လို့ ရတယ်ဆိုတာ သိကတည်းကပဲ။ ဒါပေမယ့် သွားရမယ့် ခရီးက ဝေးတယ်။ ရှိတာက စက်ဘီးပဲ ရှိတယ်။ ပြီးတော့ တစ်ယောက်တည်း သွားလို့ကလည်း မရဲ။ တောထဲက ကျားထွက်လာ ဘယ့်နှယ်လုပ်မတုံး။

အခန်းဖော် သူငယ်ချင်းကို အဖော်စပ်တော့လည်း မရ။ ဘယ်လိုပဲ ဖြစ်ဖြစ်ကွာ နောက်ဆုံး ဘယ်သူမှ မလိုက်လည်း တစ်ယောက်တည်းပဲ သွားတော့မယ်ဆို ဆုံးဖြတ်ပြီး သကာလ။ သွားမယ့်နေ့ မနက်မှာ မနက်စာစားပြီး အဆောင်ပြန်လာတော့ ဗီယက်နမ်က သူငယ်ချင်းတစ်ယောက်ကို မေးကြည့်တယ်။ သယ်ရင်း မင်း ဒီနေ့ ဘယ်သွားဖို့ ရှိလဲ ဆိုတော့ အထွေအထူး ရှိပါဘူးတဲ့။ မင်းရောတဲ့။ အတော်ပဲ ငါနဲ့ လိုက်မလားလို့။ ဒီနယ်မှာ အမြင့်ဆုံးတောင်ကို ဒီနေ့ တက်မလို့ ဆိုတော့ အဲဒီမှာ ဘာရှိလဲတဲ့။ ဟိန္ဒူ ဘုရားကျောင်းတစ်ခု ရှိတယ်ပြောတာပဲလို့။ ဂူးဂယ်အာ့မှာတော့ လမ်းကြောင်း ကြည့်ထားပြီးပြီဆိုတော့ သူတို့လည်း လိုက်မယ်တဲ့။ ဒါနဲ့ ပဲ နေ့လည်စာစားပြီးမှ စထွက်မယ်လို့ မှန်းထားရာကနေ မနက်စာစားပြီး စထွက်လာခဲ့တယ်။

    ပထမဆုံး အဆောင်နဲ့ ငါးကီလိုမီတာလောက်မှာရှိတဲ့ ရှုခင်းသိပ်လှတဲ့ ဟင်ဒီခို့ ချောက်ကြီးကို အရင်ဝင်ကြည့်တယ်။ ဓာတ်ပုံတွေ ဘာတွေ ရိုက်ပေါ့။ ပြီးတော့ ဆက်ထွက်လာခဲ့တယ်။ အဲသည် ချောက်ကြီးကို ကျော်ပြီး ခဏနေတော့ ကုန်းဆင်းတွေချည်းပဲ ဆင်းရတော့ သက်တောင့် သက်သာပေါ့။ အင်း အခုသာ သက်တာတာ ပြန်ခါကျရင်တော့ ကုန်းရုန်းပြီးပဲ နင်းရမလား။ စက်ဘီးပဲ ဆင်းတွန်းရမလားပေါ့။ လမ်းဘေး ရှုခင်းလေးတွေကြည့် သစ်ရွက်ဝါလေးတွေ ကြည့်၊ ကျော်တက်သွားတဲ့ ကားတွေကို လက်ပြ အော်ဟစ်နှုတ်ဆက်။ ဒီလိုနဲ့ သာသာယာယာ ထိုင်စီးနေရင်းကနေ တောင်ခြေ ချိုင့်ဝှမ်းထဲ ရောက်သွားရော။ ဟာ ရှေ့မှာ အတက်ကြီးဟ။ ဒါနဲ့ပဲ သူငယ်ချင်းတွေ တိုင်ပင်ရပြန်တယ်။ ဆက်သွားမှာလားပေါ့။ သွားကြမယ်တဲ့။ အခု ခရီးက ဘယ်လောက် ပေါက်သွားပြီလဲတဲ့။ မြေပုံအရဆိုရင်တော့ သုံးပုံတစ်ပုံလောက် ပေါက်ပြီလို့။ ဆက်သွားမယ်လေတယ် အစောကြီး ရှိသေးတာတဲ့။ ကောင်းပြီ ဆိုပြီး စက်ဘီးကို နင်းတလှည့် တွန်းတစ်ခါနဲ့ ခရီးဆက်ကြတယ်။

    သွားရင်းသွားရင်းနဲ့ တောင်ကလည်း တဖြည်းဖြည်း မြင့်လာ။ ရှုခင်းတွေကလည်း တဖြည်းဖြည်း လှလာ။ နေလေးကလည်း တဖြည်းဖြည်း ပူလာ၊ ချွေးလေးကလည်း တဖြည်းဖြည်း ထွက်လာ။ ဟိုနေရာဆိုလည်း လှလို့ဆိုပြီး ဓာတ်ပုံရိုက်လိုက်။ ဒီနေရာဆိုလည်း လှလို့ဆိုပြီး ဓာတ်ပုံရိုက်လိုက်။ သွားရင်းသွားရင်းနဲ့ အဲသည် တောင်ထိပ်ကို ရောက်လာပြန်ရော။ ရှေ့မှာက တောင်အဆင်းလမ်းကြီး။ ကဲ ဘယ်လိုလုပ်ကြမလဲ တစ်ခါ စည်းဝေးထိုင်ရပြန်တယ်။ အချိန်ကလည်း နေ့လည် ထမင်းစားချိန် ရောက်တော့မယ်။ ရှေ့မှာက ဘာရှိမှန်း မသိ။ ဘာမရှိမှန်းလည်းမသိ။ အိတ်ထဲပါလာတာက ရေတစ်ဗူးစီပဲ ထည့်လာတာ။ တောင်ထိပ်မှာ ခဏနားပြီး လူရိပ်လူချည် ကြည့်ရတယ်။ ခဏနေတော့ မျက်နာချင်းဆိုင်က တက်လာတဲ့ ဆိုင်ကယ်ကို တားပြီး မေးကြည့်တော့ သုံးကီလိုမီတာလောက် ဆက်သွားရင် သဘာဝလှိုဏ်ဂူ ဘုရားကျောင်းတစ်ခု ရောက်မယ်တဲ့။ ချော်ရဂါ့ တောင်ထွတ်ကတော့ အဲသည်ကနေ ဆက်သွားရမှာတဲ့။ နောက်ထပ် ခရီး သုံးပုံတစ်ပုံလောက် လိုသေးတယ်တဲ့။ တော်ပါသေးရဲ့ ကိုယ်မေးတဲ့သူက အင်္ဂလိပ်စကား လည်လည်ပတ်ပတ် ပြောတတ်တဲ့သူမို့လို့။ ဒါနဲ့ တိုင်ပင်ရပြန်ရော ဆက်သွားမလား ပြန်လှည့်မလား။ ဒီနားထိ ရောက်မှတော့ ဆက်သွားကြမယ်တဲ့။

    ကုန်းဆင်းဆိုတော့ သာသာယာယာပေါ့ဗျာ။ လေလေးချွန်ပြီး စက်ဘီးလေးပေါ် ထိုင်စီး။ အဆင်းက နည်းနည်းတော့ ကြမ်းတယ်ဗျ။ ဘရိတ်ကို နှစ်ဘက်လုံး သေချာ ထ်ိန်းထားရတယ်။ သဘောကတော့ အပြန်ခရီးကျရင် ကုန်းရုန်း နင်းပေတော့ဆိုတဲ့ သဘော။ သက်သာပေမယ့် သိပ်တော့ မပျော်နိုင်ဘူး။ အပြန်ခရီးကို တွေးမိပြီး။ ဟော တွေ့ပါပြီး လျှိုကြီးတစ်ခုထဲမှာ ကားတွေဆိုင်ကယ်တွေ ရပ်ထားတာ။ လူတွေ တစ်ချို့ ထမင်းတွေ ချက်ပြုတ်နေကြတာ။ လျှိုအတွင်းပိုင်းမှာ ဘုရားကျောင်းတစ်ခုဗျ၊ ဟော ဟိုဘက်နားမှာ သဘာဝလှိုဏ်ဂူ ထင်ပါရဲ့။ လမ်းမှာ ရပ်ပြီး ငေးနေတုန်း။ ဘာလုပ်ရမလဲ စဉ်းစားနေတုန်း။ လူတစ်ယောက်က လာပြောတယ်ဗျ။ အစ်ကိုတို့ ဒီကဆက်သွားရင် စက်ဘီးစီးလို့ မရတော့ဘူးတဲ့။ စက်ဘီးတွေ ကားတွေ အကုန်လုံး ဒီနေရာမှာ ထားခဲ့ပြီး ခြေလျင် ဆက်သွားမှ ရမှာတဲ့။ စက်ဘီးတွေကတော့ ဟောဟို ဘုရားကျောင်းဘေးက ဆိုင်တန်းမှာ အပ်ထားခဲ့လို့ ရတယ်တဲ့။ သူပြောတဲ့စကားကို နံဘေးက အငေးသားကြည့်နေတဲ့ ဗီယက်နမ်နှစ်ယောက်ကို ပြန်ရှင်းပြတော့ ဟင် မင်း ဘယ်တုန်းက ဟင်ဒီစကား တတ်သွားတာလဲတဲ့။ ငါလည်း နားမလည်ဘူးဟလို့ ၊ သူပြောတဲ့ လေသံနဲ့ ခြေဟန်လက်ဟန်ကြည့်ပြီး ဘာသာပြန်လိုက်တာလေ ဆိုတော့ သူတို့ တော်တော် သဘောကျသွားတယ်။ ဟုတ်တယ်ဗျ အံ့တော့ အံ့သြစရာပဲ။ ဟင်ဒီစကား တစ်လုံးမှ နားမလည်တဲ့ ဗိုလ်ကောင်းက သူရှင်းပြတာတွေ အကုန်နားလည်တယ်ဗျ။ ကိုယ်နားလည်တာတွေလည်း မှန်နေတယ်ဆိုတာ ပြီးတော့ သိရတာပဲ။

    အဲသည်ကိုရောက်တော့ နေ့လည်စာ စားချိန် ဆယ့်နှစ်နာရီခွဲလောက် ရှိနေပြီ၊ ဗိုက်ကလည်း သိပ်တော့ မဆာသေးတာနဲ့ မစားတော့ဘူးပေါ့။ အအေး တစ်ဗူးလောက် သောက်ဖို့ ဝယ်လာခဲ့မယ် ဆိုပြီး ဆိုင်တန်းလေးကို သွားတယ်။ ဈေးရောင်းတဲ့ ကောင်လေးတွေက အင်္ဂလိပ်ကို တတ်တာနဲ့ သူတို့ကို သေချာ မေးကြည့်တော့ ခုန ကားသမားလေး လာပြောတာ အမှန်ပဲဗျ။ စက်ဘီးတွေ သူတို့ ဆိုင်မှာ အပ်ခဲ့ပြီး အရင်ဆုံး ဘုရားကျောင်း လှိုဏ်ဂူထဲ ဝင်တယ်။ မဝင်ခင် ပန်းလေးတွေ ဖက်နဲ့ ထုပ်ထားတာလေးတွေ တစ်ထုပ် ငါးရူပီးတဲ့။ ဝယ်လာခဲ့ပြီး လှိုဏ်ထဲ ဝင်လာခဲ့တယ်။ တို့ဆီက ပင်းတယလို လှိုဏ်မျိုးပါပဲ၊ အထဲမှာ သူတို့ ဘုရားပေါ့။ ရှေ့မှာ ဘုရား ကပ္ပိယလုပ်တဲ့သူကို ပန်းထုပ်လေး ပေးလိုက်တော့ ဘုရားကို လှူပြီး ဆုတွေ တောင်းပေးနေတာပဲ။ ဘာတွေလဲတော့ နားမလည်ဘူး။ ကိုယ်ကတော့ အမေမှာလိုက်တဲ့အတိုင်း ကိုယ်ပြုခဲ့တဲ့ ကုသိုလ်ကောင်းမှုလေးတွေကို ပြန်အောက်မေ့ပြီး အဲသည် နတ်ဘုရားကို အမျှအတန်း ပေးဝေခဲ့ပါတယ်။ မေတ္တာများ ပို့သခဲ့ပါတယ်။

    လှိုဏ်ဂူထဲက ထွက်လာပြီးတော့ ကဲဘယ်လိုလဲ ဆက်သွားကြမှာလား ဆိုတော့ ထောက်ခံမဲ သုံးမဲ ကန့်ကွက်မဲ မရှိနဲ့ ချော်ရဂါ့ တောင်ထွတ်ကို စတက်ပါတော့တယ်။ သွားတဲ့ ခရီးလမ်းကတော့ ကျိုက်ထီးရိုးတောင် တက်ရသလိုပါပဲ။ မြင်တော့ မြင်နေရတယ် မရောက်နိုင်ဘူး ဆိုသလိုပဲ။ တောင်ထိပ်ကို မြင်နေရပေမယ့် နီးလာလိုက် ဝေးသွားလိုက် ဘယ်ဘယ်က မြင်ရလိုက် ညာဘက်က မြင်ရလိုက်။ ဒီတောင်တစ်လုံး ဆုံးရင်တော့ ရောက်ပြီပဲလို့ ထင်ရပေမယ့် တစ်တောင်ဆုံးပြန်တော့ တစ်လုံးကျန်ပေသေး ဆိုသလိုပဲ။ တက်လိုက်ရတဲ့ တောင်၊ လျှောက်လိုက်ရတဲ့လမ်း၊ တောင်က တကယ်မြင့်နေပြီဆိုတော့ ရှုခင်းတွေ လှချက်ကလည်း ခုခေတ်စကားနဲ့ဆိုရင် ကိုးလောက်ရှိတယ်။

    နေကလည်းမြင့်လာ ချွေးတွေကလည်း ထွက်လာ ခြေလှမ်းတွေကလည်း နှေးလာ၊ လမ်းမှာလည်း လူတွေ ပိုများလာ။ တစ်ယောက်နဲ့တစ်ယောက် နှုတ်ဆက်လိုက်ကြ ဓာတ်ပုံတွဲရိုက်လိုက်ကြ။ တစ်ခုတော့ မကျေနပ်ဘူးဗျ။ ဗိုလ်ကောင်းကို တွေ့တဲ့ သူတိုင်းက နီပေါလားလို့ မေးကြတယ်။ မဟုတ်ပါဘူး မြန်မာပါလို့ ပြောရင် တစ်ချို့ မသိကြဘူးဗျ။ အရင်တုန်းက ဘားမားဆိုတာ ကြားဖူးလား အရှေ့ဘက်က အိမ်နီးချင်း နိုင်ငံလေဆိုတော့မှ သိတာ။ အေး မှတ်ထားကြ အခု ငါတို့ နိုင်ငံက မြန်မာနိုင်ငံလို့ ခေါ်တယ် မှတ်ထားနော် ဆိုပြီး နာမည်ကြော်ငြာလည်း လုပ်ရသေးတယ်ဗျ။ အမယ်သူတို့က သူတို့ ဘုရားကျောင်းကို အခုလို တကူးတက လာကြတာကို သိပ်ဂုဏ်ယူတယ်ဗျ။ မင်းတို့ နိုင်ငံမှာ ဒါမျိုး ရှိလားလို့လည်း မေးကြတယ်။ ဟင်း ပေါလွန်လွန်လို့ ဒီထက်တောင် လှသေးလို့ အားနာလို့ မပြောတော့ပါဘူး။ ရှိတာပေါ့လို့ပဲ ပြောခဲ့တယ်။ အတူသွားတဲ့ ဗီယက်နမ် သူငယ်ချင်း နှစ်ယောက်ကိုတော့ ကျိုက်ထီးရိုးဘုရားတက်တဲ့အကြောင်း ပြောပြလိုက်ပါတယ်။

    ဒီလိုနဲ့ နောက်ဆုံး တောင်ထွတ်ရဲ့ လမ်းခုလတ်ကိုရောက်တော့ မြန်မာပြည်က ချစ်သမီး ပန်းပွင့်လေးနဲ့ ဖုန်းရတယ်။ အို ပန်းပွင့်လေး ကျန်းမာပါစေလို့ ဆုတောင်းရသေးတာပေါ့။ တောင်ထိပ်ကိုရောက်တော့ ဘုရားကျောင်း တစ်ခုတွေ့တယ်။ သိပ်သားသား နားနားတော့ ဟုတ်ပါဘူး။ ဒါပေမယ့် တို့ မြန်မာအခေါ် သုံးချောင်းခွ လှံတွေ သူတို့ နတ်ဘုရားကို ဆက်ထားကြတာ နည်းနည်းနောနာ မှတ်လို့။ အဲဒါတော့ မှတ်တမ်းတင်ခဲ့ပါတယ်။

 တောင်ထိပ် ရောက်တော့ နှစ်နာရီ ခွဲလောက်ရှိပြီဗျ။ တောင်ထိပ်မှာ ဂျီပီအက်စ်နဲ့ မှတ်တမ်းတင် မှတ်သားစရာတွေ လုပ်ပြီးတော့ ဘေးဘီ ရှုခင်းကိုကြည့်။ ဟောဗျာ စောစောက ကိုယ်တွေ တက်ခဲ့တဲ့ တောင်တွေ အားလုံးက အခုတော့ မျက်စိအောက်မှာ ငုံ့ကြည့်ရလို့ပါလား။ အော် ဒါကြောင့်လည်း တောင်တက်သမားတွေ အရည်မရ အဖတ်မရ အပင်ပန်း ခံပြီး တောင်တွေ လျှောက်တက်ကြတာပါလားလို့ နားလည်မိတယ်။ မြင့်လှပါတယ်ဆိုတဲ့ တောင်တွေကို အပေါ်စီးက ငုံကြည့်ရတဲ့ အရသာနော်။ လေယာဉ်ပေါ်က ကြည့်တာဟုတ်ဘူးနော်။ ကိုယ့်ခြေထောက်နဲ့ကိုယ် တက်လာပြီး အပေါ်ရောက်တော့မှ ငုံ့ကြည့်ရတဲ့ အရသာ။ မကြုံဖူးရင် မသိဘူး။ တောင်မြင့်မြင့် တက်ကြည့်ကြဗျနော်။

    တို့မြန်မာမှာ ဆိုရိုးစကား တစ်ခုရှိတယ်။ ဘာတဲ့ ပွဲသွားကျော့ကျော့ ပွဲပြန်မော့မော့တဲ့။ အသွားမှာ စိတ်အားထက်သန်စွာနဲ့ ကျော့နေသလောက် အပြန်လည်းကျရော ပင်ပန်းပြီး ပြိုင်းပြီး ပြန်လာတယ် ဆိုမလား။ အခုလည်း ဒီလိုပဲဗျို့။ အပြန်ကျရောက် အတူပါလာတဲ့ ဗီယက်နမ် နှစ်ယောက် အသံကို မထွက်တော့ဘူးဗျို့၊ ဗိုက်ထဲမှာကလည်း အချိုရည်နဲ့ ရေပဲ ရှိတာလေ။ ဓာတ်ပုံရိုက်မယ်ဆိုတာတောင် အပြန်မှာ မရိုက်ချင်ကြတော့ဘူးဗျ။ အခု ပင်ပန်းနေတော့ လှတော့ဘူး ရိုက်ချင်ဘူးတဲ့ဗျ။
    ဆင်းလာရင်း တောင်ခြေက ဘုရားကျောင်း ဈေးတန်းမှာ ရေခဲမုန့်ဝင်စား။ စက်ဘီးလေးတွေ ကိုယ်စီတွန်းပြီး ပြန်လာပြီပေါ့ဗျာ။ အပြန်ကျတော့လား။ စက်ဘီးက စီးရတယ်ကို မရှိပါဘူး။ တွန်းချည်းနေရတော့တာပါပဲ။ အဆောင်ပြန်ရောက်တော့ လေးနာရီလောက် ရှိပြီဗျ။ တော်သေးတာပေါ့ နေ့လည်စာစားပြီးမှများ အဆောင်က စထွက်ရင် အပြန် နေမီမယ်တောင် မထင်ဘူး။ ဗိုလ်ကောင်းနဲ့ လိုက်လာတဲ့ ဗီယက်နမ် သူငယ်ချင်း နှစ်ယောက်လည်း သင်ခန်းစာ ရသွားတယ်ထင်ပါရဲ့။ နောက် ဘယ်ကိုခေါ်ခေါ် မလိုက်တော့ဘူးဗျ။ ပေါင်တွေ ခြေသလုံးတွေ တောင့်လို့ နှစ်ရက်လောက်တောင် ဆေးလိမ်းယူရတယ် ဆိုပဲ၊ သွားခဲ့တဲ့ ခရီးကလည်း နည်းမှမနည်းပဲဗျ။ အသွားအပြန် မိုင်သုံးဆယ်မှ မကဘဲကို။

ရွာကိုလွမ်းတဲ့ တပို့တွဲလ

.............................................

ပေါက် လဲ ငုံ ကင်း ထန်းယာဉ်နင်းသည် နှင်းစီစီငယ်နှင့်လေ

ရာသီငယ်မှ မှိုင်းမို့ ဆိုင်းဆိုင်းညို့လို့

တပို့တွဲဆို တမာလည်းနု ကျေးလည်းဥလို့ ရှုတိုင်းငယ်စိုသည်

 မြင်းမိုရ်တောင်ထိပ်က လွမ်းရိပ်ကိုခင်း

ပျော်ခင်းငယ်မှသာလှ သည်ချိန်ကျလျင်

တောဝဂနိုင် စုံသာမြိုင်မှာ

မခိုင်ရွက်ညောင်း ကြွေကျပြောင်းလို့

ထောင်းထောင်းငယ်လျှံငွေ့ လောင်ဓလေ့နှင့်

လွမ်း၍ငယ်တစေ အလို သေရချည့်

စိတ်ဖြေလို့ မရနိုင် ဘယ့်နှယ်လူခိုင်ပါ့မယ်

ယုဂန်ပိုင် ရှင်သိကြားတို့ မာန်ထားရင်းလေ။

    ဒါကတော့ ငယ်ငယ်က ကြိုက်ခဲ့ဖူးတဲ့ တပို့တွဲလဘွဲ့ ကဗျာတစ်ပုဒ်ပါ။
    ဒီနေ့ တပို့တွဲ လပြည့်ကျော် ၁၂ ရက်။ လာမယ့် တနင်္လာနေ့ဆို တပို့တွဲလ ကွယ်လေပြီပဲ။ အမေ့အိမ်မှာ ဆိုရင်တော့ ဒီအချိန် ထမင်းနဲတွေ ထိုးလို့ပေါ့။ တစ်အိမ်က ထမင်းနဲနဲ့ တစ်အိမ်က ထမင်းနဲနဲ့ လဲစားကြလို့ပေါ့။ အေးတဲ့ရာသီဆိုတော့ အဆီအဆိမ့်များတဲ့ ထမင်းနဲကို စားရတယ်သားရဲ့ ဆိုတဲ့ အမေရဲ့ မရိုးနိုင်တဲ့ ဆေးကျမ်းတွေကို နားထောင်ပြီး ထမင်းနဲတွေ စားလို့ပေါ့။ လွန်ခဲ့တဲ့ လွန်ခဲ့တဲ့ ဆယ့်ခုနစ်နှစ် ဆယ်တန်း ကျောင်းသားဘဝကတော့ ဒီလိုအချိန်မျိုးဟာ လွမ်းစရာ ကောင်းတယ် ဆိုပေတဲ့ ဘယ်မှာ လွမ်းနိုင်ပါ့မလဲ။ ဆယ်တန်းစာမေးပွဲ ဆိုတာကလည်း အင်မတန် နတ်ကြီးတာကလား။ ကျူရှင်တွေဘာတွေ မတက်နိုင်တဲ့ ဗိုလ်ကောင်းတစ်ယောက်၊ စက်ဘီးတွေဘာတွေ မစီးနိုင်တဲ့ ဗိုလ်ကောင်းတစ်ယောက်၊ သူများတွေက ကျောင်းမတက်တော့ဘူး ကျူရှင်က စာပဲ ကျက်တော့မယ်ဆိုပြီး ကျောင်းကို မလာတော့တဲ့ အချိန်မှာတောင် စာမေးပွဲဖြေဖို့ ခုံစီတဲ့နေ့အထိ ကျောင်းကိုသွားပြီး ဆရာတွေ နောက်ဆုံးအချိန်ထိ သင်ကြားပြသပေးတဲ့ စာလေးတွေ ဖတ်မှတ်ပြီး ဆယ်တန်း အောင်ခဲ့ရတဲ့ ဗိုလ်ကောင်း။ အိမ်နောက်က ကမ်းပါးကြီးကဆင်း ကမ်းပါးခြေက သရဲခြောက်တယ်ဆိုတဲ့ တမာပင်ကြီးနားရောက်ရင် သုတ်သုတ် သုတ်သုတ်လျှောက်၊ ရေစပ်စပ်ပဲ ရှိတော့တဲ့ ချောင်းကို ဖိနပ်ကလေးချွတ် လက်မှာကိုင်၊ ပုဆိုးစလေး အသာမလို့ မြေပဲခင်းတွေ ကြံခင်းတွေ ဖြတ်ပြီး ကျောင်းသွားခဲ့ရတဲ့ဗိုလ်ကောင်း။ ရဲရဲနီအောင် ပွင့်နေတဲ့ ပေါက်ပင်တွေ လက်ပံပင်တွေရဲ့ အလှတွေကိုတောင် မခံစားနိုင်ဘဲ ကျက်ထားတဲ့စာတွေကို ပြန်စဉ်းစားရင်း ခွေးကိုက်တတ်တယ်ဆိုတဲ့ တဲစုနားကနေ ကျီးလန့်စာစား ကျောင်းသွားခဲ့ရတဲ့ ဗိုလ်ကောင်း။
    အဲသည် ကောင်လေးဟာ နောင် ဆယ့်ခုနစ်နှစ် ကြာပြီးနောက်မှာတော့ တောင်တောင်ရေမြေ သဘာဝ အလှအပတွေ၊ တောဘွဲ့တောင်ဘွဲ့ ကဗျာလေးတွေ၊ သစ်ရွက်ဝါလေးတွေ၊ ငှက်အော်သံလေးတွေ၊ လိပ်ပြာလေးတွေ၊ မှိုင်းမှုန်ပြာဝေနေတဲ့ တောင်ပြာတန်းကြီးတွေ၊ ရေပြင်ပေါ်ကို သစ်ရွက်ဝါလေးတစ်စ ကြွေကျသွားလို့ ဖြစ်လာတဲ့ ရေလှိုင်းလေးတွေ၊ လူတွေ့ရင် လန့်လန့်ပြီး ပြေးတတ်တဲ့ ရှဥ့်ကလေးတွေကို ချစ်တတ်တဲ့ ဗိုလ်ကောင်းဖြစ်လာခဲ့ပါပြီ။ ဒီလို ချစ်တတ်ခဲ့တာလည်း တက္ကသိုလ် ဘုန်းနိုင်တို့ မောင်စိန်ဝင်းတို့ ဇော်ဂျီတို့ ဝီလီယံဝပ်သ်ဝပ်တို့ ခင်နှင်းယုတို့ ဂျူးတို့ ရဲ့ စာတွေပေတွေ ပယောက မကင်းသလို သိပ်လှတဲ့ ချောင်းလေးရယ် သိပ်လှတဲ့ လယ်ယာကွင်းပြင်တွေရယ် နွေဦးပေါက်ရင် ပွင့်တတ်တဲ သိပ်လှတဲ့ ပန်းတွေရယ်ရှိတဲ့ သိပ်လှတဲ့ ရွာလေးမှာ မွေးဖွားကြီးပြင်းခဲ့တာအပြင် စာကျက်တာငြီးငွေ့လာရင် သီချင်းဆိုပြီး အငြီးဖြေပေးတတ်တဲ့ အမေ့ရဲ့ ကျေးဇူးတွေကြောင့်လည်း ပါတာပေါ့။ ဒါတင်မက ပန်းမြို့တော်လို့ တင်စားကြတဲ့ မြို့လေးမှာ သုံးနှစ်သုံးမိုး ပညာသင်ကြား ခဲ့ရတာ၊ ကန့်ကော်တောတွေ အဓိပတိလမ်းတွေ ပုဂံလမ်းတွေ တောင်ငူဆောင်တွေ ဂျပ်ဆင်တွေနဲ့ တန်ဆာဆင်ထားတဲ့ အိပ်မက်ထဲက တက္ကသိုလ်ကြီးကိုလည်း သုံးနှစ်သုံးမိုး တက်ခွင့် ကြုံခဲ့တာတွေကြောင့် ကိုယ့်သူငယ်ချင်း ရဲဘော်ရဲဘက်တွေ ပင်ပင်ပန်းပန်း တာဝန်ထမ်းဆောင် နေကြချိန်မှာ ဗိုလ်ကောင်းတို့က သက်တောင့်သက်သာနဲ့ စာပေအရသာ သဘာဝတောတောင်ရေမြေ အရသာတွေကို ကောင်းကောင်း မြည်းစမ်းခွင့် ရခဲ့တာမို့ ဗိုလ်ကောင်းမရှိတဲ့အချိန်မှာ ဗိုလ်ကောင်းအလုပ်ကို ပိုလုပ်ပေးတဲ့ ရဲဘော်ရဲဘက်တွေရဲ့ ကျေးဇူးတွေလည်း အများကြီး ပါသပေါ့။
    မွေးရပ်မြေက လှသလို အခု ရောက်နေတဲ့ နေရာကလည်း တော်တော်ကို လှတဲ့ နေရာတစ်ခုပါပဲ။ အင်္ဂလိပ်မင်းများ အုပ်စိုးစဉ်အခါက တောင်ပေါ် အပန်းဖြေစခန်း မြို့လေးအဖြစ် တည်ခဲ့တဲ့ နေရာဆိုတော့ မလှဘဲ နေပါ့မလားဗျာ။ ရေတံခွန်တွေ တောင်ကမ်းပါးတွေ ကုန်းဆင်းကုန်းတက်တွေ ရေကန်တွေ သစ်တောတွေ ပြီးတော့ သစ်တောထဲကို လှည့်ပတ်သွားလာလို့ရတဲ့ ချောမွေ့ပြေပြစ်တဲ့ လမ်းတွေ တောင်ကုန်းမြင့်မြင့်တွေထက်မှာ ဆောက်ထားတဲ့ အိမ်လှလှလေးတွေ၊ ကျောက်ဂူတွေ၊ ရှေးရှေးအခါက သချိုင်းဂူတွေ၊ အေးမြသာယာတဲ့ ရာသီဥတု၊ ပုံမှန်လည်ပတ်နေတဲ့ အချိန်ဇယား၊ စတဲ့ အကြောင်းပေါင်းစုံ တိုက်ဆိုင်လာတဲ့အခါကျတော့ တောအလှ တောင်အလှကို ကောင်းကောင်း ခံစားလို့ရတဲ့ အနေအထားကို ရောက်လာပါတော့တယ်။
    မနက်အိပ်ယာနိုး ရေမိုးချိုး၊ သိုးဆောင်းတို့ဓလေ့အတိုင်း မနက်စာစားပြီးတဲ့အခါ ကျောင်းကားပေါ်တက် ကျောင်းသွား၊ နေ့လည် ဆယ့်တစ်နာရီထိုးရင် မုန့်တစ်ခုနဲ့ လက်ဖက်ရည်တစ်ခွက်သောက်၊ အတန်းဆက်တက်၊ နေ့လည် နှစ်နာရီအတန်းပြီးတဲ့အခါ အဆောင်ပြန်လာ နေ့လည်စာစား။ ဒါပြီးရင်တော့ ဗိုလ်ကောင်းရဲ့ ကိုယ်ပိုင်ချိန် ရောက်ပါပြီ။ အဆောင်မှာ ခဏတဖြုတ် နားပြီးတာနဲ့ ညနေ သုံးနာရီခွဲလောက်ဆို စက်ဘီးလေးစီးပြီး ဗိုလ်ကောင်း စထွက်ပါလေပြီ။ သူငယ်ချင်းတွေနဲ့ အတူတူသွား တစ်ခါတစ်လေတော့လည်း တစ်ယောက်တည်းသွား။ တစ်ခါကတော့ သွားရင်းသွားရင်းနဲ့ ဆက်သွားခွင့်မပြုတဲ့ နေရာအထိ ရောက်သွားတယ်။ ဘာလို့ ဆက်သွားလို့ မရတာလဲ ဆိုတော့ ကျားအန္တရာယ် ရှိလို့ပါတဲ့။ ဟုတ်သားပဲ ကျားထိန်းသိမ်းတဲ့ အမျိုးသားဥယျာဉ်ကြီးထဲမှာ တည်ထားတဲ့ မြို့ဆိုတော့ ကျားရှိပေမပေါ့။ ဟဲဟဲ မသိလို့နော်လို့ ပြောပြီး ခပ်သုတ်သုတ် ပြန်ပြေးလာရတယ်။ ဆပ်ကပ်ထဲက ကျားဟုတ်ဘူးနော် တောထဲမှာ သဘာဝအတိုင်းနေတဲ့ ကျားဆိုတော့ သိတယ်မလား၊ ဗိုလ်ကောင်း သဘာဝအလှအပကို ချစ်တတ်ပေမယ့် ကျားတော့ ကြောက်တယ်ဗျ။ နောက်နေ့ ကျောင်းရောက်တော့ ဆရာမကိုပြောပြတာ ဒေသခံ ဆရာမက စိုးရိမ်တကြီး သတိပေးရှာတယ် သတိထားပါ ဗိုလ်ကောင်းတဲ့။ နောက်နေ့ကျတော့ အဲဒီလို လျှောက်သွားရအောင်ဆိုပြီး သူငယ်ချင်းကို ခေါ်တာ လိုက်တော့ဘူးဗျ။
    အခုတော့ ဗိုလ်ကောင်း လွမ်းနေရပါပြီ။ အိမ်မှာ ကျန်ခဲ့တဲ့ ကဗျာစာအုပ်လေးကို လွမ်းတာပါ။ တက္ကသိုလ် ပထမနှစ် ဒုတိယနှစ်အတွက် ပြဌာန်းတဲ့ မြန်မာကဗျာလက်ရွေးစင် ဆိုတဲ့ စာအုပ်လေးကို လွမ်းတာပါ။ အိမ်မှာတုန်းက ခေါင်းအုံးဘေးမှာ ထားအိပ်တဲ့ စာအုပ်လေး အခုလို စိတ်အေးချမ်းသာ ရှိတုန်းမှာ ဖတ်ချင်လိုက်တာ။ အေးချမ်းဆိတ်ငြိမ်တဲ့ တောအုပ်ထဲသွားပြီး ကဗျာစာအုပ်လေးနဲ့ ငြိမ့်နေချင်တာ အခုတော့ ကဗျာစာအုပ်လေးကိုပဲ လွမ်းနေရပါတော့တယ်။

မြန်မာစာပေသမိုင်း

    ဒီနေ့ ဆရာက လက်ရေးမူနဲ့ ရေးကူးထားတဲ့ စာမျက်နှာ နှစ်ဆယ်လောက်ရှိတဲ့ စာမူမိတ္တူတစ်ခု ပေးလာတယ်။ ဘာလဲပေါ့ ကြည့်လိုက်တော့ လားလား မြန်မာစာပေသမိုင်း ဆိုပါလား။ လက်ရေးကတော့ သပ်သပ်ရပ်ရပ်လို့ ဆိုနိုင်ပါရဲ့။ ရှင်းရှင်းလင်းလင်းလည်း ရှိပါရဲ့။ နည်းနည်း အမြည်းသဘော ဖတ်ကြည့်လိုက်တော့ မြန်မာလူမျိုးတစ်ယောက် ရေးသားထားတဲ့ စာပေသမိုင်းကျမ်းငယ်တစ်ခု ဖြစ်ပေမယ့် ကူးရေးတဲ့သူကတော့ မြန်မာလူမျိုး ဟုတ်ဟန်မတူဘူး။ ဆရာ ဘယ်ကရတာလဲ ဆိုတော့ မြို့တော်က ပို့ပေးတာဆိုပဲ။ တစ်ချို့နေရာတွေကတော့ ကူးရေးထားတာ မှားတယ်ထင်ပါရဲ့။ ဥပမာ (ကျောက်စာထွန်းကားရာ ဖြစ်သော ပုဂံကောင်းစွာသည့်ခေတ်ကို တွေ့ရှုသင့်သည်) ဆိုတာမျိုး အမြီးအမောက် မတည့်တာလေးတွေ တစ်ချို့တွေ့ရပေမယ့် တော်တော်ကို သပ်သပ်ရပ်ရပ်  ရေးနိုင်သားနိုင်တဲ့သူတစ်ယောက် ရေးကူးထားတယ်လို့တော့ ယူဆရပါတယ်။
    သုံးမျက်နှာလောက် အကြမ်းဖျင်း ဖတ်ပြီးသွားတော့ တော်တော် ခေါင်းကိုက်မယ့် ဆောင်းပါးပါလားလို့ သိလိုက်ရတယ်။ ပုဂံခေတ် စာပေအရေးအသားမှာ မြစေတီကျောက်စာကို ရှင်းပြထားတယ်။ မြန်မာလိုတောင် မြစေတီ ကျောက်စာ ဘယ်လောက် ခက်သလဲဆိုတာ သင်ဖူးတဲ့သူတွေ သိကြပါတယ်။ ဗိုလ်ကောင်းလည်း ကိုးတန်းတုန်းကလားမသိ သင်ဖူးပါရဲ့။ ကိုယ့်ဘာသာတော့ ကိုယ်နားလည်တာပေါ့လေ။ မြန်မာစာကို တိုင်းတစ်ပါးသား နားလည်အောင် အင်္ဂလိပ်လို ရှင်းပြရမယ့်အရေးကတော့ တကယ့်ကို ခေါင်းကိုက်စရာပါပဲလား။ ရာဇကုမာရ မင်းသားက ရွှေဆင်းတုတစ်ဆူထုလုပ်ပြီး နာမကျန်းဖြစ်နေတဲ့ ခမည်းတော် ကျန်စစ်မင်းကြီးအတွက် လှူဒါန်းပါတယ် ဆိုတာကို ဗုဒ္ဓဘာသာဝင် မဟုတ်တဲ့သူတွေ နားလည်အောင် ဘယ်လို ရှင်းပြရမှာပါလိမ့်။ (ထိုမင်း၏ ပယ်မယားတစ်ယောက်သော်ကား) ပယ်မယားဆိုတာ သူတို့နားလည်အောင် ဘယ်လို ပြောရပါ့။ ဘုရားတည် ကျောင်းဆောက်ပြီးရင် ဘုရားကို ထိန်းသိမ်းစောင့်ရှောက်ဖို့ ကျွန်တွေကိုပါ လှူတယ်ဆိုတာကို သူတို့က ဘယ်လိုသဘောမျိုးနဲ့ နားလည်ပေးကြမှာပါလိမ့်။
    နောက်တစ်ခုက အနန္တသူရိယအမတ်ရဲ့ မျက်ဖြေလင်္ကာ (သူတည်းတစ်ယောက် ကောင်းဖို့ရောက်မူ သူတစ်ယောက်မှာ ပျက်လင့်ကာသာ ဓမ္မတာတည်း . . .) ဆိုတာကို ဘယ်လိုရှင်းပြရပါ့။ ပြီးရင် ပါသေးတယ် ( ငါးသိုင်းများဟင်းဟုံ ဆိုဘိသကဲ့သို့ ...) ပြီးရင် ရှမ်းမင်းတွေ ကြီးစိုးတဲ့ ပင်းယခေတ်မှာ ကာချင်း ရတုတွေ ဘာကြောင့် ထွန်းကားသလဲ မေးရင် ဗိုလ်ကောင်း ဘယ်လို ဖြေရပါ့။ ပေလေးပင် ရှင်လေးပါး ဆိုတာလည်း ပါတယ်။ ပါရမီတော်ခန်း ပျို့အကြောင်းလည်း ပါတယ်။ ဇာတ်တော်ကြီး ဆယ်ဘွဲ့အကြောင်းလည်း ပါတယ်။ ပါယာယန ဝတ္ထုလည်းပါတယ်။ ဂါထာခြောက်ဆယ်ပျို့လည်း ပါတယ်။ အများကြီးပဲဗျာ။
    သူတို့ကို ရှင်းပြရအောင်ဆိုပြီး အဆောင်ရောက်တော့ တစ်ကြောင်းချင်းကို ဘာသာပြန်ကြည့်ဖို့ ကြိုးစားသေးတာ။ မလွယ်ဘူးဗျို့။ နိုင်ငံရပ်ခြားမှာ မြန်မာစာပါမောက္ခ သွားလုပ်နေတဲ့သူတွေကို တကယ် ကိုယ်ချင်းစာမိပါရဲ့။ သူတို့ခမျာ အကြောင်းအရာတစ်ခုခု အစ ဆွဲထုတ်မိမှဖြင့် တစ်သီကြီး ရှင်းပြရရှာလိမ့်မယ်လို့။ ပြီးတော့ သူတို့ ကျောင်းသားတွေက ဗိုလ်ကောင်းတို့ ငယ်ငယ်တုန်းကလို ဆရာ သင်ပေးတာလေးကို အေးအေးသက်သာ ဇိမ်နဲ့ ထိုင်နားထောင်တာ မဟုတ်ဘူးဗျ။ အမေးအမြန်းကလည်း ထူမှထူ။ တစ်ခါတစ်လေများဆို သင်နေတဲ့ ဆရာကို ခြောက်ပေါက်တိုးအောင်ကို မေးတော့တာ။ ကဲ တိုက်ရိုက်ဘာသာပြန်ဖို့ အဆင်မပြေရင် သူတို့ နားလည်နိုင်မယ့် နည်းလမ်းနဲ့ အလွယ်ပြန်ရေးမယ်ဆိုပြီး တတ်သရွေ့ မှတ်သရွေ့ အင်္ဂလိပ်စကားနဲ့ အလွယ်ဆုံးဖြစ်အောင်တော့ ပြန်ရေးနေတာပဲ။ တကယ်ရှင်းပြတဲ့ အချိန်ရောက်ရင် မေးခွန်းခက်ခက်တွေ မမေးကြပါစေနဲ့ဆိုပြီး ဘုရားမှာ ဆုတောင်းရမှာပဲ။ မြန်မာစာ ဆရာများခင်ဗျာ မြန်မာစာပေသမိုင်းကို အင်္ဂလိပ်လို ရှင်းပြထားတဲ့ ဆောင်းပါးလေးဘာလေးများရှိရင် မစတော်မူကြပါခင်ဗျာ။

ဒီမိုကရေစီ မျောက်နိုင်ငံတော်

    ကျွန်တော်တို့မြို့ဟာ ကျားထိန်းသိမ်းရေး ကာကွယ်တော အမျိုးသားဥယျာဉ်ကြီးထဲမှာ ရှိနေတဲ့မြို့လေးတစ်မြို့ ဖြစ်ပါတယ်။ ကျားကို ထိန်းသိမ်းသလို မျောက်ကိုလည်း ကာကွယ်ထိန်းသိမ်းထားပါတယ်။ မြို့ထဲမှာ ဘေးမဲ့ပေးထားတဲ့ နွားတွေ၊ ကဲချင်တိုင်း ကဲနေတဲ့ မျောက်တွေ မတွေ့ချင် မမြင်ချင်တဆုံးပါပဲ။ မျောက်အမျိုးအစားကလည်း တော်တော်စုံပါတယ်။ တစ်ခါတစ်ခါ မြို့ထဲပြထဲမှာ မျောက်တွေ များလာလို့ အကုန်လုံးဖမ်းပြီး တောထဲ ပြန်ပြန်ပို့ရပါသတဲ့။ ပြန်ပို့လည်း တဖြည်းဖြည်းနဲ့ ပြန်ရောက်လာတာပါပဲတဲ့။ ဒီနေရာမှာ ကျားကို သတ်ခွင့် မရှိသလို မျောက်ကိုလည်း သတ်ခွင့် မရှိပါဘူး။ လူ့ပယောကကြောင့် မျောက်တစ်ကောင် သေတယ်ကြားရင် ရုပ်ရှင်ထဲကလို ရဲတွေ ရောက်လာမှာပါ။ ပြီးခဲ့တဲ့ အပတ်စဉ်က ကျောင်းသားတစ်ယောက် ခဲနဲ့ ခြောက်ပစ်ပစ်လိုက်တာ မျောက်ကိုမှန်ပြီး သေသွားလို့ ရဲစခန်းက မလာခင် အသာလေး မြေမြှပ်ပစ်လိုက်ရတယ်ဆိုပဲ။
    မျောက် သူ့ဘာသာ နေတာ ဘာလို့ ခဲနဲ့ ပစ်ရသလဲလို့ မေးချင်တာလား။ မျောက်က သူ့ဘာသာ မနေပါဘူး။ အဆောင်နားပတ်ဝန်းကျင် သစ်ပင်တွေမှာ သူတို့ပဲ ကြီးစိုးနေတာပါ။ မနက် မိုးမလင်းသေးဘူး ကိုယ်တော်တို့က ခေါင်မိုးပေါ်မှာ တဂျိမ်းဂျိမ်း ပြေးလွှားနေကြပါပြီ။ မနက်စောစောများ အိပ်ယာထချင်ရင် နှိုးစက်ပေးစရာ မလိုပါဘူး။ ကျေးဇူးရှင်တွေက အလိုက်တသိ နှိုးပေးပါတယ်။ ပန်းခြံထဲမှာလည်း သူတို့ပါပဲ။ သူတို့ဘာသာ အေးအေးလူလူ ဆော့နေရရင် ကဲချင်တိုင်း ကဲနေရရင်သာ အသံမထွက်တာပါ။ သူတို့ကိုများ သွားစရင် လူကိုတောင် ရန်ပြန်လုပ်ချင်တဲ့ အကောင်တွေပါ။ မျောက်ဆိုတဲ့အကောင်က လူနဲ့တူလို့လားမသိဘူး။ သိပ်ကို လည်တဲ့ သတ္တဝါတွေဖြစ်ပါတယ်။ အိမ်တစ်အိမ်ထဲကိုများ ဝင်တော့မယ်ဆိုရင် အရင်ဆုံး ချောင်းကြည့်လိုက်ပါသေးတယ်။ အိမ်ထဲမှာ မိန်းမသားချည်းပဲ ရှိတယ်ဆိုရင် ပိုင်စိုးပိုင်နင်း ဝင်ပြီး လုပ်ချင်ရာလုပ်တော့တာပါ။ မိန်းမတွေက သူတို့ကို ကြောက်တတ်တယ်ဆိုတာ သိနေလေတော့ အိမ်ထဲဝင်ရင်တောင် ခိုးကြောင်ခိုးဝှက် မဝင်ပါဘူး။ အိမ်ကြီးရှင်ဟန်ပန်နဲ့ဝင်ပြီး တစ်အိမ်လုံးကို စိမ်ပြေနပြေ မွှေနှောက်တော့တာပါပဲ။ မွှေလို့နှောက်လို့ အားရမှ စားစရာရှိတာစားပြီးလို့ ဝမှ လက်ထဲမှာ နိုင်သလောက်သယ်ပြီး အေးအေးလူလူ ပြန်ထွက်ပါသတဲ့။ အိမ်ထဲမှာ ယောက်ျားသားများရှိရင်တော့ မောင်မင်းကြီးသားတို့က အနားတောင် မသီဘူးဆိုပဲ။
    မြို့ပတ်ဝန်းကျင်မှာက လည်စရာပတ်စရာ လှလှပပနေရာတွေ အများကြီး ရှိပါတယ်။ တစ်နေရာသွားလည်တော့မယ်ဆိုရင် အဲသည်နေရာမှာ ကျားရှိသလား မျောက်သောင်းကျန်းသလား အရင်စုံစမ်းရပါတယ်။ ကျားကတော့ လူတွေနားကို လာခဲလို့ ကိစ္စမရှိဘူးဆိုပေမယ့် မျောက်ကတော့ ကိစ္စရှိပါတယ်။ မျောက်ကိုသတ်ရင်သာ မျောက်သတ်မှုဆိုပြီး ဖမ်းပေမယ့် ခင်ဗျား ပိုက်ဆံအိတ် ဒါမှမဟုတ် ကျောပိုးအိတ် ဒါမှမဟုတ် စားစရာမုန့်ထုပ်ကို မျောက်က အလစ်သုတ်သွားရင် အဲသည်မျောက်ကို ဖမ်းပြီး တရားစွဲနိုင်တဲ့ ဥပဒေ ဒီမှာ မရှိပါဘူး။ သူတို့ကမှ ကိုယ်ယုံကြည်ရာကို လွတ်လပ်စွာ လုပ်ပိုင်ခွင့်ရှိတဲ့ တကယ့် ဒီမိုကရေစီ မျောက်တွေဖြစ်ပါတယ်။ မျောက်တို့စံပျော်ရာ ဒီမိုကရေစီ လောကကြီးမှာ အကာအကွယ်ပေးတဲ့ ဥပဒေသာရှိပြီး ဖိနှိပ်တဲ့ ဥပဒေ မရှိလို့ ဒီမိုကရေစီ နိုင်ငံရေးသမားတွေ လာရောက်လေ့လာလှည့်ကြပါလို့ ဖိတ်ခေါ်လိုက်ပါတယ်။ 
    မျောက်တို့ရဲ့ ဒီမိုကရေစီထွန်းကားရာအရပ်မှာ လာနေမိတဲ့ လူများအဖို့ကတော့ ဘာပဲလုပ်လုပ် မျောက်ရန်က လွတ်အောင် လုပ်ရပါတယ်။ သစ်ပင်စိုက်ရင် သံဇကာနဲ့ လုံအောင် ကာရတယ်။ ခေါင်မိုးပေါ်မှာ ဂြိုဟ်တုစလောင်းတင်ရင် အပေါ်က သံဇကာတွေ သံဆူးကြိုးတွေ အုပ်ရတယ်။ ကင်းသမားတစ်ယောက်ဟာ မသမာသူကို စောင့်ကြည့်ရုံသာမက မျောက်မောင်းတာဝန်ကိုပါ ပူးတွဲ ထမ်းဆောင်ရတာပါ။ ကင်းသမားမှန်လျှင် တုတ်ရှည်ရှည်တစ်ချောင်း ကိုင်ဆောင်ထားရမည်လို့များ တည်မြဲအမိန့်ထဲ ထည့်ရေးထားသလားတော့ မသိပါဘူး။ တုတ်ကိုင်ကင်းသမားရဲ့ အဓိက လုပ်ငန်းတာဝန်ကြီးနှစ်ရပ် ရှိတဲ့အနက် အရာရှိတွေ့ရင် အလေးပြု။ မျောက်တွေ့ရင် မောင်း ဆိုတဲ့ တာဝန်တွေကို အလေးအနက်ထား ထမ်းဆောင်ကြတာ တွေ့ရပါတယ်။ ကင်းသမားတွေ မျောက်မောင်းတာကလည်း တစ်ခါတစ်လေ ရယ်စရာလည်း ကောင်းသလို တစ်ခါတစ်လေကျတော့ သနားစရာကောင်းပါတယ်။ ဟိုကျေးဇူးရှင်က ဖတ်ဖတ်ဆို သစ်ပင်ပေါ် တက်ပြေးတော့ တုတ်ကိုင်ထားတဲ့ စစ်သားရင့်မာကြီးတွေခမျာ သစ်ပင်ပေါ်ပဲ လိုက်တက်ရတော့မလို ခဲနဲ့ပဲ ကောက်ပစ်ရတော့မလို ဗျာများတာတွေကို ဗိုလ်ကောင်းသာ သစ်ပင်ပေါ်တက်ပြေးတဲ့ မျောက်ဆိုရင် ဟားတိုက်ပြီး ရယ်မိမှာပဲ။ အခုတော့ ဗိုလ်ကောင်းက အောက်က လိုက်နေတဲ့ တုတ်ကိုင်စစ်သားကြီးနဲ့ မျိုးနွယ်တူ လူဖြစ်နေတော့ ရယ်စရာကောင်းပေမယ့် ကိုယ့်အမျိုးချင်းပဲ ဘက်လိုက်ပြီး သနားနေမိပါတော့တယ်။
    ဒီမှာ မျောက်ကို နတ်ဘုရားတစ်ပါးအဖြစ် ကိုးကွယ်ကြတာလည်း ရှိပါတယ်။ ဗိုလ်ကောင်းတို့ စွဲလမ်း နှစ်ခြိုက်ခဲ့ရတဲ့ ရာမ လက္ခဏာ သီတာဒေဝီတို့ ဒသဂီရိတို့ ဇာတ်လမ်းထဲမှာ ပါတဲ့ ဟာနုမာန်မျောက်ကို ကိုးကွယ်ကြတာ ဖြစ်ပါတယ်။ အဲသည် ယုံကြည်မှုတစ်ခု ရှိနေလို့လည်း မျောက်တွေ ဒီလောက်ထိ ကဲချင်တိုင်း ကဲခွင့် ရနေတာထင်ပါရဲ့။ သြော် လူတွေများ ယုံမိပြီဆိုရင် ဘယ်လိုမှကို အဆိုးမမြင်ကြတော့ပါလားလို့တောင် တရားကျမိပါတယ်။ (28-2-2013)