Published in IUJ Alumni News
January 2015, The 40th Edition
ပြီးခဲ့တဲ့ နိုဝင်ဘာလကုန်ခါနီး နွေနှောင်းပိုင်းရက်တွေတုန်းက အမှတ်မထင် ရိုက်ထားမိတဲ့ ဓာတ်ပုံလေး တစ်ပုံကို အခု ၂၀၁၅ ခုနှစ် ဇန်န၀ါရီလထုတ် ကျွန်တော်တို့ တက္ကသိုလ် ကျောင်းသားဟောင်းများ စာစောင်မှာ ဖော်ပြထားတာကို တွေ့လို့ ပျော်နေမိပါတယ်။ စာစောင်မှာ ပါတယ်ဆိုတာတောင် နေ့လည် ထမင်းစာချိန်က တယ်လီဖုန်း ဖွင့်လိုက်တော့ သူငယ်ချင်း ကျောင်းသားတစ်ယောက်က စာတိုလေးပို့ပြီး ပြောပြလို့ သိရတာပါ။ သိသိချင်းပဲ ကျောင်းသားရေးရာဌာနကို ပြေးကြည့်တော့ တစ်ကမ္ဘာလုံးက အိုင်ယူဂျေ ကျောင်းသားဟောင်း ၃၆၀၀ ကျော်ကို ပို့ပေးဖို့ စာစောင်တွေ ပြင်ဆင်ထုပ်ပိုးနေတာကို တွေ့ပါတယ်။ အဲသည်ထဲက တစ်စောင်လောက် ယူလို့ရမလား ဆိုတော့ ကျောင်းသားရေးရာဌာနမှူး ဒေါ်ဂရစ်ချန်က မရသေးဘူးလို့ပြောပါတယ်။ ဒါနဲ့ပဲ စာစောင်ထဲမှာ ပါတဲ့ ပုံကိုပြပြီး ဒီမှာလေ ကျွန်တော့်ဓာတ်ပုံပါနေတာ တစ်စောင်လောက်တောင် မပေးချင်ဘူးလား ဆိုတော့မှ အော် အဲဒါ မင်းဓာတ်ပုံလား ယူပါယူပါတဲ့။ သူလည်း အခုမှ လူနဲ့ နာမည်နဲ့ တွဲသိပုံရတယ်။ ဟုတ်တယ်လေ ဒေါ်ဂရစ်ချန်ဆိုတာ ကျွန်တော့်ဓာတ်ပုံတွေကို အမြဲ လိုက်ပေးနေကျ မှတ်ချက် ၀င်ရေးနေကျ။ သူအက်ဒမင်လုပ်တဲ့ အိုင်ယူဂျေ စာမျက်နှာမှာတောင် ကျွန်တော့်ပုံတွေ ပရိုဖိုင်လုပ်ပါရစေဆိုပြီး ယူသုံးနေကျပဲကို။ ဒီပုံကို တင်လိုက်တုန်းက ဒီလိုပုံမျိုးအရင်က မတွေ့ဖူးပါဘူးတဲ့။ တကယ့်ကို အသစ်စက်စက်ရိုက်ချက်လေးပါလို့ သူပဲ မှတ်ချက်ဝင်ရေးထားခဲ့တာလေ။
ဒီပုံလေးရိုက်ဖြစ်ခဲ့ပုံကို ပြောပြပါ့မယ်။ ပြီးခဲ့တဲ့ နွေနှောင်း နေသာတဲ့ ညနေတစ်ခုမှာ အပြင်ကို လမ်းလျှောက်ထွက်လာခဲ့ပါတယ်။ အဆောင်အပြင်ရောက်တော့ မြင်ကွင်းဆန်းတစ်ခုကို မြင်ရပါတယ်။ ကျောင်းရဲ့ လမ်းတွေအားလုံးက ရေတွေပန်းထွက်နေတာပါ။ တကယ်တော့ ဒီကျောင်းမှာတင်မဟုတ်ဘဲ နှင်းကျတဲ့ မြို့တော်တော်များများမှာ ဒီလို ရေဖြန်းစနစ်ရှိပါတယ်။ လမ်းထဲမှာ ရေပိုက်မြှပ်ထားပြီး ခုမြင်နေရသလို ရေထုတ်ဖြန်းပေးတာပါ။ နှင်းကျတဲ့အချိန် နှင်းတွေ လမ်းမှာ ခဲမနေစေပဲ ပျော်ကျသွားအောင် ရေနဲ့ ဖျော်ချတာပါ။ အဲသည်အချိန်က နွေနှောင်းရာသီပဲ ဆိုတော့ နှင်းမကျသေးပါဘူး။ အခုလို ရေတွေပန်းထွက်နေတာကတော့ မကြာခင် နွေရာသီကုန်ဆုံးပြီး ဆောင်းနှင်းဝေတော့မှာမို့ သက်ဆိုင်ရာဝန်ထမ်းတွေက နှင်းဖျော်ရေဖြန်းစနစ်တွေ စစ်ဆေးတဲ့အနေနဲ့ ရေပိုက်တွေ ဖွင့်ပြီး စမ်းနေကြတာပါ။ ဒီပုံလေးတွေက အမြင်ဆန်းလှတယ်ဆိုပြီး ပါလာတဲ့ အိုင်ဖုန်းလေးနဲ့ ဓာတ်ပုံတွေ လျှောက်ရိုက်မိပါတယ်။ အခုဓာတ်ပုံမှာ ပါတဲ့နေရာကတော့ အိုင်ယူဂျေ အဓိပတိလမ်းမကြီးထိပ်ကနေ တက္ကသိုလ်ပင်မဆောင်ဘက်ကို ချိန်ပြီး ရိုက်ထားတာပါ။ ညနေဘက် ကျနေကို မျက်နှာမူပြီး ရိုက်ရတာမို့ အရောင်အသွေး အစုံအလင်ကို မဖမ်းဆုပ်နိုင်တော့ပါဘူး။ ဖုန်းကင်မရာရဲ့ စွမ်းရည်အကန့်အသတ်ကြောင့်လည်း ပါတာပေါ့လေ။ ဒါပေမယ့် ဆောင်းနှင်းဝေရာသီရောက်တော့မယ့် အမှတ်လက္ခဏာတွေဖြစ်တဲ့ အရွက်တွေ ကြွေကျသွားပြီး အရိုးပြိုင်းပြိုင်းကျနေတဲ့ ချယ်ရီပင်ကြီးတွေရယ် နှင်းဖျော်ရေပန်းတွေရယ်ကို အရအမိ မှတ်တမ်းတင်လိုက်နိုင်တာမို့ ဒီဓာတ်ပုံလေးကို "ဆောင်းနှင်းဝေချိန် ရောက်လုပြီ" လို့ နာမည်တပ်ပြီး တက္ကသိုလ်ဖေ့ဘုတ် စာမျက်နှာမှာ တင်လိုက်ပါတယ်။
အခုတော့ ကျွန်တော့်ပုံလေးကို တက္ကသိုလ်ကျောင်းသားဟောင်းများထံ ပေးပို့နေတဲ့ သတင်းလွှာမှာ ဖော်ပြပေးလိုက်ပါပြီ။ ကျွန်တော့်ပုံလေးကို အခုလို အသိအမှတ်ပြုဖော်ပြပေးတဲ့အတွက် စာစောင်စီစဉ်သူများကို အများကြီးကျေးဇူးတင်ပါတယ်။
ရွှင်လန်းချမ်းမြေ့ကြပါစေဗျ ###
No comments:
Post a Comment