အလှဆုံးသာပ

အလှဆုံးသာပ
အားလုံးရယ်တဲ့ငှက်များတွင်
ဆိုတဲ့ ရွှေဥဒေါင်း ကဗျာလေး သင်ရတုန်းက ကဗျာထဲမှာပါတဲ့ ဒေါင်းအလံစိုက်ကာထိုးကြတယ် ဖိုးထိုက်ပါဘိ ဆိုတဲ့အတိုင်း မြန်မာ့နန်းဓလေ့မှာ တန်ဖိုးတထားနဲ့ ဘုရင့်အလံတော်လုပ်ခဲ့တဲ့ ကဒေါင်းအလံတော်ကြီးနဲ့ ကိုယ်နဲ့ တစ်နေ့မှာ ပတ်သက်လာရလိမ့်မယ်လို့ တွေးကို မတွေးထားခဲ့မိ
.
မြန်မာဘုရင်တွေ နန်းစဉ်အဆက် ဘုရင့်အထိမ်းအမှတ်သင်္ကေတအဖြစ် ဆောင်ထားလွှင့်ထူခဲ့တဲ့ ကဒေါင်းအလံတော်ဟာ လွတ်လပ်ရေးရပြီးနောက်မှာ သမ္မတအလံတော်အဖြစ် စစ်တက္ကသိုလ်ရဲ့ အတော်ဆုံးတပ်ခွဲတွေသာ ဆင်ယင်ကိုင်ဆောင်ခွင့်ရတယ်ဆိုတာ ကိုယ်တိုင်ဗိုလ်လောင်းဖြစ်မှ သိခဲ့ရ
.
ကိုယ်တော်လို့တော့ မဟုတ်ဘဲ ကိုယ့်အထက်က နောင်တော်တွေ ကြိုးစားအားထုတ်မှုကြောင့် ကိုယ်တွေ နောက်ဆုံးနှစ်ဗိုလ်လောင်းဘဝမှာ ဒေါင်းအလံလွှင့်ခွင့်ရတဲ့ အောင်စစ်သည်တပ်ခွဲဖြစ်တော့ ဒေါင်းတံဆိပ်ကို ရင်မှာတပ်ရင်း စစ်တက္ကသိုလ်မှာ ဦးစားအပေးခံရဆုံးတပ်ခွဲရဲ့ ဗိုလ်လောင်းအဖြစ် ခေါင်းမော့ခဲ့ရ
.
စွေးစွေးနီနေတဲ့ နောက်ခံနဲ့ အစိမ်းရောင်ကဒေါင်း အမြီးဖြန့်ကနေတဲ့ မြန်မာဘုရင်တွေလက်ထက်တော်ကတည်းက အဆောင်အယောင်ဖြစ်ခဲ့တဲ့ အောင်စစ်သည်ဆိုတဲ့ ဒေါင်းအလံလွှင့်တဲ့တပ်ခွဲကို ရှေ့ဆုံးကနေ ဦးဆောင်ပြီး ငွေရောင်ဓားကြီးဝင့်လို့ ကျောင်းဆင်းပွဲ စစ်ရေးပြလျှောက်ခွင့်ရတဲ့ စစ်တက္ကသိုလ် ကျောင်းဆင်းတွေထဲမှာ ကိုယ်က ဘယ်နယောက်မြောက်ဖြစ်လေမလဲပေါ့
.
ဘဝမှာ အော်ရတာ အရသာအရှိဆုံးနဲ့ ဂုဏ်အယူရဆုံး စစ်မိန့်သံက
"အောင်စစ်သည်တပ်ခွဲ အလေးပြုရန် ညာကြည့်" ဆိုပြီး တပ်မတော်ကာကွယ်ရေးဦးစီးချုပ်ကို အနှေးလျှောက် အမြန်လျှောက်ရင်း အလေးပြုခဲ့တဲ့ စစ်မိန့်သံ
.
နိုင်ငံတော်နဲ့ တပ်မတော်အပေါ် သစ္စာစောင့်သိစွာနဲ့ တာဝန်ထမ်းဆောင်ပြီး ထမ်းဆောင်ဆဲ ညီနောင်အပေါင်းနဲ့ ဆက်လက်ဝင်ရောက်လာကြမည့် ညီငယ်အပေါင်းအား ဦးညွတ်လျက်
.
ဗိုလ်ကောင်း
၆ ဧပြီ ၂၀၂၀

လေချွန်တဲ့သီချင်း

. . . စစ်တက္ကသိုလ်ဗိုလ်လောင်းတွေ ဗိုလ်လောင်းတပ်ရင်းကနေ စာပေသင်တန်းတွေဘက်ကို သွားတဲ့အခါ စစ်ကြောင်းပုံဖွဲ့ပြီး စစ်တီးဝိုင်းနဲ့ သီချင်းတွေဆိုပြီး သွားရပါတယ်၊ မနက်သွား ညနေပြန်မှာ စစ်တီးဝိုင်းပါပြီး နေ့လည်ထမင်းစားချိန်မှာတော့ စစ်တီးဝိုင်းမပါဘဲ သီချင်းပဲ ဆိုရပါတယ်
.
. . . အပတ်စဉ် ကြာသပတေးနေ့တွေမှာတော့ စာပေသင်တန်းအသွားအပြန်မှာ Colonel Bogey ဆိုတဲ့ သံစဉ်ကို တီးတဲ့အခါ သီချင်းဆိုစရာမလိုဘဲ သီချင်းသံစဉ်ကို လေချွန်ပြီး လျှောက်ရပါတယ်။
.
. . . ဒီသီချင်းကိုရေးတာက ၁၉၁၄ ခုနှစ်တုန်းက၊ သီချင်းရေးတဲ့သူက ဗြိတိသျှစစ်တပ်က စစ်တီးဝိုင်းခေါင်းဆောင်တစ်ယောက်ဖြစ်ပါတယ်။ ဂေါက်သီးကစားတဲ့အခါ သတ်မှတ်ရိုက်ချက်ထက် တစ်ချက်ပိုရင် Bogey လို့ခေါ်တာ ဒီသီချင်းက ဆင်းသက်လာတဲ့ အသုံးအနှုန်းတစ်ခုဖြစ်ပါသတဲ့
.
. . . ဒုတိယကမ္ဘာစစ်အတွင်းတုန်းက ဂျပန်စစ်တပ်က ထိုင်းမြန်မာရထားလမ်းဖောက်တဲ့ ချွေးတပ်တစ်ခုအကြောင်းရိုက်ထားတဲ့ The Bridge on the River Kwai ဇာတ်ကားကိုသိရင်တော့ အဲသည် Colonel Bogey သီချင်းကို သိကြမှာပါ၊ ဂျပန်ချွေးတပ်စခန်းမှာရှိတဲ့ ဗြိတိသျှ စစ်သုံ့ပန်းတပ်ဖွဲ့တစ်ဖွဲ့က အဲသည်ရထားလမ်းပေါ်က တံတားတစ်စီးကို တည်ဆောက်ပေးရပါတယ်။ သူတို့က အလုပ်သွားအလုပ်ပြန် သွားကြပြန်ကြတဲ့အခါ အခုပြောနေတဲ့ သီချင်းကို လေချွန်ပြီး စစ်ကြောင်းပုံနဲ့ စနစ်တကျ သွားကြတာပါ။ ဒီဇာတ်ကားကို ကြည့်ဖူးရင်တော့ ဒီသီချင်းသံစဉ်ကို အလွတ်နီးပါး ရသွားကြမယ်ထင်ပါတယ်
.
. . . ဒီသီချင်းသံစဉ်ကို မရင်းနှီးသေးခင်ကတော့ စစ်ရေးပြနဲ့လျှောက်နေရင်း သီချင်းသံစဉ်ကို လေလိုက်ချွန်ရတာ တော်တော်ကို ဂွကျကျနိုင်ပါတယ်။ နောက်ပိုင်းကျတော့လည်း သံစဉ်နဲ့ ရင်းနှီးပြီးအဆင်ပြေသွားပါရော
.
. . . ဒီသီချင်းနဲ့ လေချွန်ပြီး စာပေသင်တန်းကို ချီတက်ကြတဲ့ ဓလေ့ဟာ ကိုယ်တွေ ကျောင်းဆင်းသွားပြီး နောက်ထပ် ဘယ်နှစ်နှစ်လောက်ကြာအောင် တည်တံ့နေသလဲဆိုတာ စိတ်ဝင်စားမိပါတယ်၊ ကိုယ်သိသလောက် အငယ်တွေကို လိုက်မေးကြည့်တာတော့ သူတို့တွေ စာပေသင်တန်းကို လေချွန်ပြီးချီတက်တဲ့ သီချင်းကို စစ်တီးဝိုင်းက မတီးတော့တာမို့ သူတို့လည်း မသိကြတော့ပါဘူးတဲ့
သိတဲ့သူတွေ ပြောကြပါအုံး
.
အသေးစိတ်ကို အောက်က လင့်တွေမှာ ဖတ်နိုင်ပါတယ်
https://en.wikipedia.org/wiki/Colonel_Bogey_March
https://en.wikipedia.org/wiki/The_Bridge_on_the_River_Kwai…
https://en.wikipedia.org/wiki/Par_(score)#Bogey
.
Colonel Bogey Song
(Youtube Link - https://www.youtube.com/watch?v=QuVYS4uw0as )


The Bridge on the River Kwai full movie
(youtube link - https://www.youtube.com/watch?v=TECmDXSofkM&t=8808s)
.
ဗိုလ်ကောင်း
၆ ဧပြီ ၂၀၂၀

ဘယ်လိုပဲဖြစ်ဖြစ်

. . . ပန်းပွင့်လေးအပေါ်မှာထားရှိတဲ့ ဖေဖေနဲ့ မေမေရဲ့ အချစ်တွေဟာ ဘယ်လိုအခြေအနေမျိုးမှာပဲ ဖြစ်ဖြစ် ပြောင်းလဲသွားစရာ လျော့နည်းသွားစရာ ပွန်းပဲ့သွားစရာမရှိဘူးလို့ အမြဲတမ်းယုံကြည်နေအောင် ပြောဆိုဆက်ဆံပြီး သူ့ရဲ့ ဘယ်လိုရလဒ်မျိုးကိုမဆို ဘာကန့်သတ်ချက်မှ မထားဘဲ အရှိအတိုင်း သာယာကြည်လင်စွာနဲ့ လက်ခံပေးတဲ့ ကိုယ်တွေလို မိဘမျိုးရတာ ပန်းပွင့်လေး ကံကောင်းလိုက်တာလို့ တွေးမိတယ်။ အတန်းထဲမှာလည်း စာတော်တဲ့ ကလေးတစ်ယောက်ဖြစ်တဲ့အတွက် သူ့မှာ ပြစရာအစွမ်းတွေ များလှတဲ့အခါ အစွမ်းပြတိုင်းတော့လည်း ထိပ်ဆုံးကချည်း အောင်မြင်နေတာ မဟုတ်လေတော့ သူ့မှာ ကျရှုံးတဲ့ဒဏ်ကို သာမန်ကလေးတစ်ယောက်ထက် ပိုများခံရသလားလို့ ထင်မိတယ်။
.
. . . တစ်ခါတစ်လေ သူအစွမ်းပြခွင့် ရပေမယ့်လည်း ပထမ စသည်ဖြင့် အဆင့်မျိုးကို မရတဲ့အခါ သူ့မှာ မိဘတွေအပေါ် အားနာတဲ့စိတ် မိဘတွေများ စိတ်ဆင်းရဲမလားဆိုပြီး စိုးရိမ်တဲ့စိတ်ကလေးရှိရှိနေတာကို တွေ့တဲ့အခါ ကိုယ်တွေက ဘာမှ မဖြစ်သလို တမင်တကာနေပြပြီး (တကယ်လည်း ဘာမှမဖြစ် သူအားနာတာကို ပြန်အားနာနေတာပဲရှိတာ) သူ့ကို စိတ်လက်ပေါ့ပါးအောင်ထားရတယ်၊ နောက်ပိုင်းကျတော့ သူ့မှာ အခြားသူတွေနဲ့ ယှဉ်ပြိုင်စရာ ရှိလာတဲ့အခါ ပြိုင်ပွဲအချိန် မရောက်ခင်ခပ်စောစောကတည်းက သူဝင်ပြိုင်ခွင့်ရတာကို ဂုဏ်ယူကြောင်း၊ တကယ်လို့ ဒီလိုဝင်ပြိုင်ခွင့် မရဘူးဆိုရင်လည်း ကိုယ့်သမီးလေးမို့ ချစ်တာက ချစ်နေမှာဖြစ်ကြောင်း၊ ပြိုင်ပွဲကို အကောင်းဆုံးပြိုင်ခဲ့ဖို့နဲ့ ထွက်လာမယ့်ရလဒ်အပေါ် စိတ်မပူဖို့၊ ဘယ်လိုရလဒ်မျိုးပဲ ရရ ဖေဖေတို့က ကျေကျေနပ်နပ်ပျော်ပျော်ရွှင်ရွှင်နဲ့ လက်ခံမှာဖြစ်ကြောင်း၊ အခုလောက်ထိ ကြိုးစားပြီး ကိုယ့်တာဝန်ကိုယ်သိတဲ့ ကိုယ့်စည်းကမ်းနဲ့ကိုယ် လုပ်စရာရှိတာကို လိုက်ပြောနေစရာမလိုဘဲ ကိုယ့်အားကိုယ်ကိုးပြီး လုပ်နေတတ်တဲ့ သမီးလေးတစ်ယောက်ရထားတာနဲ့တင် ဖေဖေမေမေတို့က ကျေနပ်နေပြီးသားဖြစ်ကြောင်း သူနားလည်အောင် သေချာပြောပြထားရတယ်။
.
. . . မိဘဘက်က ဖိအားမရှိဘူးဆိုသော်ငြားလည်း သူ့ဘာသာသူတော့ အနည်းနဲ့အများ ဖိအားတစ်ခုခုရှိနေတာပဲလေ၊ ပြိုင်ပွဲတစ်ခုခုမှာ သူရထိုက်တယ်ထင်တာ မရခဲ့ရင် သူ့မျက်နာလေး ညှိုးနေတတ်တာကို အားပေးရင်း ပြိုင်ပွဲဟာ သူ့ကိုချစ်တဲ့အချစ်လောက် အရေးမကြီးကြောင်း နည်းအမျိုးမျိုးနဲ့ ပြရတယ်၊ ကိုဇာဏ်ခီရေးထားတဲ့ စာလေးဖတ်ရင်း သမီးကို သတိရလို့
.
ပန်းပွင့်လေးဖေဖေ
၂၃ ဖေဖော်ဝါရီ ၂၀၂၀

ကျနော်အဆင်ပြေပါတယ်

ကျနော်အဆင်ပြေပါတယ်

ကျနော်ဘယ်သူ့ကိုမှလွမ်းမနေပါဘူး
အသည်းကွဲတယ်တွေဘာတွေဆိုတာ
ဟာသလျှောက်လုပ်နေတာပါ

တစ်ယောက်တည်းလည်း
နေသားကျနေပြီမို့
ကျနော်အဆင်ပြေပါတယ်

သောက်ဖက်လုပ်မခံရတာတွေ
သောက်ရေးမပါဆက်ဆံခံရတာတွေလည္း
အခုတော့ အရေထူပြီး
ကျနော်အဆင်ပြေနေပါပြီ

ဒီရှေ့ဆို
ပိုပြီးအဆင်ပြေသွားမှာပါ

ဖုန်းတွေလည်းမဆက်တော့ဘူး
မက်ဆေ့တွေလည်းမပို့တော့ဘူး
မီးစိမ်းလေးထိုင်ကြည့်ပြီး
ပြန်လာနိုး စာတွေလည်းမမျှော်တော့ဘူး

မနက်လင်းရင် အိပ်ယာထမယ်
ကိုယ်လက်သန့်စင် ဘုရားရှိခိုးပြီး
ညကချက်ထားတဲ့ထမင်းလေးချိုင့်ထဲထည့်
အလုပ်သွားမယ်
ညနေအလုပ်ကစောစောပြန်ပြီး
အားကစားလုပ်မယ်
အာမီရမ်သောက်ရင်းရုပ်ရှင်ကြည့်မယ်
အိပ်ချင်တဲ့အချိန်အိပ်လိုက်မယ်
အိပ်မပျော်တဲ့အခါလည်း
ကဗျာတွေဖတ်မယ်
ရေးချင်ရာတွေလျှောက်ရေးမယ်

မူးမူးနဲ့အိပ်ပျော်သွားတော့
အလွမ်းရသက်သာတာပေါ့

ကျနော်အဆင်ပြေပါတယ်
တကယ်ပြောတာပါ

လက္ခဏမင်းသားက

လက္ခဏမင်းသားက
သီတာဒေဝီကိုချစ်ခဲ့လားတော့မသိပေမယ့်
ရာမမင်းနဲ့ သီတာဒေဝီရဲ့နောက်မှာ
ဘယ်လိုနှလုံးသားမျိုးနဲ့
လိုက်နေနေခဲ့လဲဆိုတာ
စိတ်ဝင်စားစရာပဲ

တို့အသဲပန်းရဲ့ မိဘပြည်သူ အပေါင်းအသင်းတွေ

. . . အသဲပန်းဆိုတာက ကိုယ့်ရွာက တေးဂီတတီးဝိုင်းရဲ့နာမည်။ တို့ရွာမှာ ကထိန်တွေဘာတွေဆို ဘုန်းကြီးကျောင်းဝင်းထဲ ဇာတ်စင်ထိုးပြီး ဖျော်ဖြေတဲ့ တီးဝိုင်းနှစ်ဝိုင်းရှိတယ်။ အင်းသာမြောက်ကျောင်းမှာဆို အသဲပန်းတေးဂီတ နဲ့ အင်းသာအရှေ့ကျောင်းမှာဆို The Eastern Brothers Band တဲ့။ မြန်မာလိုဆိုရင်တော့ အရှေ့ပိုင်းလူငယ်များတေးဂီတအဖွဲ့လို့ ပြောရမယ်ထင်တယ်။ ဘုန်းကြီးကျောင်းနာမည်တပ်ပြီးပြောရတာက အဲသည် တီးဝိုင်းတွေကို ဘုန်းကြီးကျောင်းက ထောင်ထားလို့ မဟုတ်ဘူး၊ ရွာက ဘုန်းကြီးကျောင်းအစွဲနဲ့ အပိုင်းနှစ်ပိုင်းဖြစ်နေလို့ မြောက်ကျောင်း အရှေ့ကျောင်း ခွဲပြောရတာပါ၊ တီးဝိုင်းဆိုပေမယ့် တီးဝိုင်းတစ်ဝိုင်းစာ တူရိယာနဲ့ အသံပိုင်းဆိုင်ရာ ပစ္စည်းတွေကို ပွဲရှိမှ မြို့က ငှားတီးကြရတာထင်တယ်။
.
. . . ရွာမှာ ကထိန်ပွဲ နီးပြီဆိုရင် ကျနော်တို့ ကလေးတွေ ပျော်စရာတွေထဲ သီချင်းတိုက်သွားကြည့်ကြတာလည်း ပါတယ်။ ရွာက အိမ်ကျယ်ကျယ်တစ်ခုခုမှာ သီချင်းတိုက်ကြတဲ့အခါ ဆိုတဲ့ တီးတဲ့သူတွေသာမက ကျနော်တို့လို့ ဟိုစပ်စပ်ဒီစပ်စပ် သမားတွေလည်း သွားအားပေးကြတယ်။ တစ်ခါတစ်လေ အိမ်က လူပြည့်တဲ့အခါ တစ်ခါတစ်လေလည်း ဘာကြောင့်ရယ်မသိဘူး တံခါးကို ပိတ်ထားတော့ အထဲဝင်ကြည့်လို့မရတဲ့အခါ အသာလေး လှည့်ပြန်လာခဲ့ရတာတွေလည်းရှိတယ်။
.
. . . သီချင်းတိုက်တာကတော့ နေရာအတည်တကျရယ် မဟုတ်ဘဲ အလျဉ်းသင့်သလို တစ်နှစ်တစ်နှစ် နေရာရွေးရတဲ့ပုံပဲ၊ ကိုယ်မှတ်မိသလောက် သီချင်းတိုက် ကြည့်ခဲ့ဖူးတဲ့အိမ်တွေက ရွာလယ်လမ်းမကြီးတောင်ဘက်က ဆရာဝန်ဒေါ်က်တာ ဌေးဌေးတို့ အခု တစ်ထပ်တိုက်နေရာမှာ အရင်ကရှိခဲ့တဲ့ ပျဉ်ထောင်အိမ်ကြီးပေါ်၊ ကြီးကြီး‌ဒေါ်ခင်ကြည်တို့အိမ်မြောက်ဘက်က ဦးကိုကိုတို့အိမ်၊ ကြိုင်တို့ မြိုင်တို့ ခိုင်တို့ ညီမတစ်တွေရဲ့အိမ်၊ ရွာတောင်ဘက်ပိုင်း နတ်စင်ညောင်ပင်ကြီးနား ပေတရာလမ်းအနောက်ဘက်ခြမ်းက ဦးရွှေတိုက်အိမ်ကြီးပေါ် အဲသည်လေးနေရာပဲ မှတ်မိတယ်။
.
. . . မြောက်ကျောင်းက အသဲပန်းတီးဝိုင်းမှာတော့ အသဲပန်း ကိုယ်ပိုင်သီချင်းရှိတယ်၊ ဘယ်သူရေးခဲ့တာလဲတော့ မမှတ်မိတော့ဘူး။ ကထိန်အဝင်နေ့ညမှာ တီးဝိုင်းစပြီဆိုရင် အဲသည်သီချင်းနဲ့ ဖွင့်လေ့ရှိတယ်။ နောက်နေ့မနက်မှာလည်း ကထိန်လှည့်က ပြန်လာတဲ့အချိန် တရားမနာခင်အထိ တီးဝိုင်းက ဖျော်ဖြေတတ်တာမို့ မနက်ပိုင်းမှာ အဲသည် သီချင်းကို အထပ်ထပ်ဆိုတာ တစ်ခါ သတိထားမိဖူးတယ်။
.
. . . ဆယ်တန်းအောင်ပြီး ရွာကထွက်လာပြီးကတည်းက ကိုယ်လည်း ရွာကို ဧည့်သည်လိုပဲပြန်ရောက်ဖြစ်တော့လို့ ရွာက အသဲပန်းတီးဝိုင်းနဲ့ အသဲပန်းသီချင်းကို မတွေ့မမြင်ရတော့တာ နှစ်ပေါင်းနှစ်ဆယ်ကျော်တောင် ရှိသွားခဲ့ပြီ၊ အခုရွာမှာ ကိုယ်တွေငယ်ငယ်က ဂုဏ်ယူခဲ့ရတဲ့ အသဲပန်းတီးဝိုင်း ရှိသေးရဲ့လား၊ အသဲပန်းသီချင်းကို သံပြိုင်ဆိုကြသေးရဲ့လား မသိတော့ဘူး၊ အဲသည်သီချင်းကို ‌ေသေချာအသံလေးပြန်သွင်းပြီး ထိန်းသိမ်းရအုံးမယ်၊ ဒါလည်း တို့ရွာရဲ့ ဒြပ်မဲ့ယဉ်ကျေးမှုအမွေအနှစ်တစ်ခုပဲမို့လား

"ေဟ့ ေဟ့ ေဟ့
တို့သူငယ်ချင်းတွေ
မင်းဘယ်မလဲလေ
တို့ကျောင်းဆရာတော်ဘုရားကြီးရဲ့ အရိပ်အောက်မှာလေ
မာပါစေ သာပါစေ တောင်းဆုမေတ္တာဝေ
အလှူတော်တွေ မင်္ဂလာတွေ ပေါပြည့်နိုင်ပါစေ
ဘေးဘယာတွေ ဝေးကွာစေ တောင်းဆုပြုမယ်လေ
ရတနာမိုး ဝေဆာဖြိုး စိုပြည်သာယာစေ
တို့အသဲပန်းရဲ့ မိဘပြည်သူ အပေါင်းအသင်းတွေ"
.
ကိုကိုမောင်
၅ ဖေဖော်ဝါရီ ၂၀၂၀

ပျဉ်းမနားကော်ပြန့်

. . . ကော်ပြန့်ကြော်ကို ကတ်ကြေးနဲ့ အပိုင်းပိုင်းကိုက်၊ ကန်စွန်းရွက်နုတ်နုတ်စင်းထားတာနဲ့ရောပြီး မန်ကျည်းချည်ရည်စက်လက်နဲ့ စားကြတာ မြန်မာပြည်မှာ ပျဉ်းမနားတစ်ခုပဲ ရှိမယ်ထင်တယ်။ မန်ကျည်းချည်ရည်ကျဲကျဲက ပျဉ်းမနားကော်ပြန့်ကြော်ရဲ့အသက်ပဲ၊ မန်ကျည်းချည်ရည်ကောင်းရင် ကော်ပြန့်က နာမည်ကြီးတာပဲ၊ ပျဉ်းမနားသားတွေအဖို့တော့ ညနေပိုင်းမှာ ကော်ပြန့်စားကြတာ အိမ်ကို ဧည့်သည်လာရင် ကော်ပြန့်ကြော်ပါဆယ်ထုပ်ပြီး ဝယ်ကျွေးကြတာ လုပ်လေ့ရှိတယ်
.
. . . ကိုယ်တွေငယ်ငယ်က မမတို့ ပျဉ်းမနားမြို့ထဲသွားလို့ ပြန်လာရင် ကော်ပြန့်ကြော်က မပါမဖြစ်ပဲ၊ ကော်ပြန့်ချောင်းလေးတွေနဲ့ ကန်စွန်းရွက်နုတ်နုတ်စင်းထားတဲ့ အထုပ်လေးထဲ မန်းကျည်းချည်ရည်ကျဲကျဲအထုပ်လေးနဲ့ ဆို အဲဒါ ပျဉ်းမနားကော်ပြန့်ပဲ၊ မန်ကျည်းချည်ရည်က အချိုနဲ့ အစပ်ဆိုပြီး နှစ်မျိုးရှိတယ်၊ ကိုယ်တွေက ငယ်ငယ်ကတည်းက အစပ်စားတဲ့သူဆိုတော့ အစပ်ကိုမှ ပိုပြီးအရသာရှိတယ်ထင်တာ၊ အစပ်ဆိုပေမယ့်လည်း ရာဇအိန္ဒြေပျက်လောက်အောင် အစပ်ကြီး မဟုတ်ပါဘူး သူသူငါငါစားနိုင်တဲ့ စားကောင်းရုံ အစပ်မျိုးပါ
.
. . . မရောက်တာကြာပြီဖြစ်တဲ့ ပျဉ်းမနားမြို့ထဲ ဒီနေ့ရောက်လို့ ကော်ပြန့်ကြော်စားချင်စိတ်ပေါက်လာတာနဲ့ သွားစားခဲ့တယ်။ ပျဉ်းမနားဈေးနားက ကော်ပြန့်ကြော်ဆိုင်မှာ ကော်ပြန့်ကြော်အစပ်တစ်ပွဲ၊ ဝက်ရိုးကြော်တစ်ပွဲ၊ ဝက်ခြေထောက်စွပ်ပြုတ်တစ်ပွဲ စားလာခဲ့တယ်။
.
 . ကော်ပြန့်စားနေရင်း စဉ်းစားမိတာက ပျဉ်းမနားမှာ နာမည်ကြီးတဲ့ စားစရာတွေဖြစ်တဲ့ ကော်ပြန့် နန်းစိန်ကိတ်မုန့် မျှစ်ချဉ် နဲ့ ခရမ်းချဉ်သီးယိုတွေ ရှိတဲ့အထဲ နန်းစိန် နဲ့ မျှစ်ချဉ်က နေပြည်တော်ရဲ့ အမှတ်တရလက်ဆောင်တွေအဖြစ်ကို ရောက်ခဲ့ပြီး ကော်ပြန့်နဲ့ ခရမ်းချဉ်သီးယိုက သိပ်ပြီး နာမည်ကြီးလာတာ မတွေ့မိဘူး၊ အထက်ကပြောခဲ့တဲ့ မြန်မာပြည်မှာ ပျဉ်းမနားတစ်မြို့တည်းမှာပဲရ (တယ်လို့ ကိုယ်ထင်) တဲ့ ကန်စွန်းရွက်နုတ်နုတ်စင်းနဲ့ မန်ကျည်းချည်ရည်ကျဲနဲ့ဆမ်းစားတဲ့ ကော်ပြန့်ကလည်း မြို့မဈေးထဲမှာတောင် ရရဲ့လား ကိုယ်မသိဘူး။ တကယ်တော့ အဲသည်ပုံစံနဲ့ စားတဲ့ ကော်ပြန့်က ပျဉ်းမနားရဲ့ အမှတ်သင်္ကေတတစ်ခုပဲ၊ နေပြည်တော်ရဲ့ အမှတ်သင်္ကေတအဖြစ်‌ ရောက်လာဖို့ကောင်းတယ်လို့ ကိုယ်ထင်တယ်
.
. .. ဒါပေမယ့် ဒီနေ့ ဝင်စားတဲ့ ဆိုင်မှာ စားတဲ့ ဆိုင်အပြင်အဆင် တည်ခင်းမှုနဲ့ ဝန်ဆောင်မှုကို သတိထားမိတာတော့ ကိုယ်တွေ ဆယ်တန်းအောင်ခါစ ပျဉ်းမနားမြို့မှာ ရောက်နေတုန်းအချိန်က ပုံစံအတိုင်းပဲ ရှိနေသေးတယ်လို့ထင်မိတယ်၊ အရသာနဲ့ ပုံစံက အရင်အတိုင်းပဲ ရှိနေတာက ဂုဏ်ယူစရာဖြစ်ပြီး တည်ခင်းပုံ နဲ့ ဝန်ဆောင်မှု မပြောင်းသေးဘဲ ခေတ်ဟောင်းမှာ ကျန်ခဲ့လို့ နေပြည်တော်ရဲ့ အမှတ်သင်္ကေတ စားစရာတစ်ခုအဖြစ် မရောက်သေးတာလို့ ကိုယ်ထင်တယ်၊ ဘာလို့လဲဆိုတော့ နန်းစိန်ကိတ်မုန့်တောင်မှ ကိုယ်တွေ ပျဉ်းမနားကို ပြန်ရောက်တဲ့ နေပြည်တော်ကြီး စတည်တဲ့ ၂၀၀၅ - ၂၀၀၆ လောက်ကတည်းက ခေတ်မီ ဝန်ဆောင်မှုတွေနဲ့ အလုပ်ဖြစ်နေပြီး အခုချိန်မှာ နေပြည်တော်ရဲ့ အမှတ်သင်္ကေတ လက်ဆောင်တစ်ခု ဖြစ်နေပြီမို့ ကိုယ်ကြိုက်တဲ့ ပျဉ်းမနား ကော်ပြန့်ကလည်း အဲသည်နေရာကို ရထိုက်တယ်လို ကိုယ်ထင်တယ်လေ၊ ရလည်း ရစေချင်တယ်၊
.
. . . ခရမ်းချဉ်သီးယိုနဲ့ ပတ်သက်ရင်တော့ ထုတ်လုပ်မှု လုပ်ငန်းစဉ်ကို မသိပေမယ့် နည်းပညာလိုတယ်လို့ ထင်တာပဲ၊ သာမန်အားဖြင့်ဆို ခရမ်းချဉ်သီးယိုက စျေးကြီးတယ်လို့ ထင်စရာရှိတယ်၊ နည်းနည်းပဲပါတဲ့ ယိုဘူးလေးက ပိုက်ဆံတွေ အများကြီးပေးရတာကိုး၊ တကယ်တမ်းကျတော့ ကိုယ်တွေ ငယ်ငယ်ကဆို ပျဉ်းမနားတစ်ဝိုက်က ခရမ်းချဉ်သီး အသားကုန်ထွက်တဲ့အရပ်ပဲ၊ တစ်ခါတစ်လေ တောင်သူတွေက အသီးတွေထွက်ပြီး ဈေးကောင်းမရလို့ အသီးမခူးနိုင်ဘဲ အခင်းထဲ ပစ်ထားရတာတွေဘာတွေတောင် ရှိတယ်လို သိထားတာကိုး၊ ခရမ်းချဉ်သီးကို သေချာသာ လုပ်နိုင်မယ်ဆို ပျဉ်းမနား ခရမ်းချဉ်သီးယိုက နေပြည်တော်ရဲ့ လက်ဆောင်ကောင်းတစ်ခု ဖြစ်လာနိုင်ပါတယ်၊ အခုလည်း မုန့်ဆိုင်တွေမှာ တင်ပေမယ့် စျေးကြီးလို့ တော်ရုံတန်ရုံ လက်ဆောင်မပေးကြဘူးထင်တယ်
.
. . . အခု စာဖတ်သူက ပျဉ်းမနားသား မဟုတ်ဘူးဆိုရင် ပျဉ်းမနားကော်ပြန့်ကို မစားဖူးလောက်ဖူး၊ တစ်ခါစားဖူးရင်လည်း ကြိုက်သွားမှာပဲ၊ ပျဉ်းမနားကို လာခဲ့ပါ၊ ကော်ပြန့်ကြော် လိုက်ကျွေးပါမယ်၊ ကျနော်လည်း စားပါမယ်၊ ပိုက်ဆံကတော့ ခင်ဗျားရှင်းပေါ့ :p
.
ဗိုလ်ကောင်း
၂ ေဖေဖၚဝါရီ ၂၀၂၀