ခေတ်ကြီးပြောင်းတာ

ခေတ်ကြီးပြောင်းတာက အခုနောက်ပိုင်း တော်တော်မြန်လာတာ
ကျောက်သင်ပုန်းကျောက်တန်ခေတ်ကို နှစ်နှစ် သုံးနှစ်လောက်ဖြတ်ခဲ့ရတာ
ဘောပင်နဲ့ စာအုပ်ခေတ်ကို ဆယ့်ငါးနှစ်လောက် ကောင်းကောင်းဖြတ်လိုက်ရတယ်
အဲသည်နောက် ကွန်ပြူတာနဲ့ ကီးဘုတ်နဲ့ အလုပ်လုပ်တဲ့ လုပ်ငန်းခွင်ထဲ
နောက် လက်နဲ့တို့တဲ့ ဖန်ပြားလေးတွေ
အခု အသံနဲ့ပြောပြီးမေးရင်
ကိုယ်သိချင်တာကို ပြောပြနေနိုင်ပြီ
ပိုပြီး ဖတ်စရာလေ့လာစရာ
လင့်တွေ ပို့ပေးနိုင်နေပြီ
အဲ
မြန်မာလိုနားမလည်သေးတာတစ်ခုပဲ
.
အကြွေစေ့တွေပျောက်သွားပြီး
စက္ကူပိုက်ဆံတွေ
နောက် ချက်လက်မှတ်
နောက် အေတီအမ်ကတ်
နောက် ဘဏ်အကောင့်
အခုက ဘဏ်အကောင့်ကို စကားဝှက်တောင်ရိုက်မထည့်တော့ဘူး
ကိုယ့်မျက်နာမြင်တာနဲ့ ဖွင့်ပေးတာ
.
ကိုယ်ဂျပန်မှာရှိနေတဲ့ ငါးနှစ်အတွင်း
ရထားစီးတဲ့အခါ
လက်မှတ်ရောင်းစက်က ဝယ်ရတဲ့လက်မှတ်
နောက် ပိုက်ဆံထည့်ထားလို့ရတဲ့ ကတ်လေးတွေ
နောက် ဖုန်းထဲမှာပါ လက်မှတ်ထည့်ထားပြီး
ကိုယ့်ဘဏ်အကောင့်နဲ့ တိုက်ရိုက်ချိတ် ပိုက်ဆံထည့်လို့ရတော့
လက်မှတ်ရောင်းတဲ့နေရာတောင် မသွားရတော့ဘဲ
.
အရင်ခေတ်ကဆို
လူကြီးတွေက
အောက်ကလူ ရေးပေးသလောက်ပဲ ဖတ်ကြရရှာတာ
ဘာသာစကားအကန့်အသတ်ရယ်
အပြင်မှာလည်း ဖတ်စရာအရင်းအမြစ်က နည်းတာရယ်
အခုဆို
ကမ္ဘာပေါ်မှာ ဘယ်နေရာဘာဖြစ်ပြီတဲ့ဟေ့ဆို
တက်လာလိုက်တဲ့သတင်းဆိုတာ
မိနစ်ပိုင်း စက္ကန့်ပိုင်းအတွင်း
ဘာသာစကား အကန့်အသတ်ရှိနေတယ်ဆိုရင်တောင်
ကွန်ပြူတာက ဘာသာပြန်ပေးတတ်နေတော့
ရာနှုန်းပြည့် မဟုတ်ရင်တောင်
တော်တော်များများတော့
နားလည်နေနိုင်သွားပြီ
.
အဲ
အဲသည်ဖြစ်ရပ်အပေါ်
အခြားဖြစ်ရပ်တွေ
နိုင်ငံရေးသဘောတရားတွေနဲ့
သုံးသပ္ဖို့ကေတာ့
ပညာလိုတာပေါ့လေ
.
ဒါလည်း နောက်ကျရင်
ဖြစ်လာတော့မှာပဲ
အဲသည်အခါကျရင်
သုတေသနလုပ်ငန်းတွေအတွက်
လူတွေတောင်
များများစားစား လိုပါတော့မလား

အစဉ်လိုက်သော ရွှေအိုးကြီးများ

. . . ကေဒါရ ကျေးမင်းကို လယ်ပိုင်ရှင်က ဖမ်းမိတော့ မေးတယ်၊ စပါးနှံတွေကို စားရရင်တော်ပြီပေါ့ ဘာလို့ ပြန်တော့လည်း သယ်သွားရသလဲပေါ့၊ ကျေးမင်းက ပြန်ဖြေတယ်၊ အခုလို အပြန်မှာ သယ်သယ်သွားရတဲ့အကြောင်းက . . . 

ကြွေးဟောင်းကိုလည်း ဆပ်ရတယ်
ကြွေးသစ်ကိုလည်း ချရတယ်
အစဉ်လိုက်သော ရွှေအိုးကြီးတွေကိုလည်း မြှပ်ရတယ် တဲ့
.
. . . ပထမ နှစ်ခုကတော့ မြန်မာ့လူမှုနယ်ပယ်မှာ အများသိသလိုပဲ ကိုယ်လဲ သိပေမယ့် တတိယစကားရဲ့ အဓိပ္ပာယ်ကိုတော့ ကိုယ်က ဘဝင်မကျဘူး၊ ဘာလဲ အစဉ်လိုက်သော ရွှေအိုးကြီးတွေကိုလည်း မြှပ်ရတယ်ဆိုတာ
.
. . . ကိုယ့်အထင်ကတော့ အစဉ်လိုက်သော ရွှေအိုးကြီးတွေဆိုတာ ဇာတကဝတ္ထုတွေထဲမှာ ရှင်းပြထားသလို ရပ်ထဲရွာထဲက လုပ်ကျွေးစောင့်ရှောက်မယ့်သူမရှိတဲ့ သက်ကြီးရွယ်အိုတွေကို ကျွေးမွေးစောင့်ရှောက်တယ်ဆိုတဲ့ အဓိပ္ပာယ်ထက်တော့ မကဘူးလို့ထင်တယ်၊
.
. . . ဒီစကားဟာ စည်းမျဉ်းစနစ်များတည်ဆောက်ခိုင်မြဲစေခြင်း ဆိုတဲ့ Institutionalization ကို ဆိုလိုတာများလားလို့ ထင်မိတယ်။ ကိုယ့်မိသားစုနဲ့ နောင်လာနောက်သားတွေ၊ ကိုယ့်ရပ်ကိုယ့်ရွာ ကိုယ့်လူမှုအဖွဲ့အစည်းအတွက် အခုချက်ချင်း စားရရုံသက်သက်မဟုတ်ဘဲ အစဉ်သဖြင့် အသီးအပွင့်တွေ သီးပွင့်ဝေဆာပြီး လူ့အဖွဲ့အစည်းတစ်ခုလုံးအတွက် ရေရှည်မှာ အကျိုးရှိစေမယ့် စည်းမျဉ်းစနစ်များတည်ဆောက်ခိုင်မြဲစေခြင်း ဆိုတဲ့ သဘောတရားကို ကေဒါရကျေးမင်းက ပြောသွားလေသလားလို့ တွေးမိပါတယ်၊
.
. . . ရှေးရှေးက အတိတ်သမိုင်းကို အဝေးကြီးမတူးဆွတတ်ပေမယ့် လတ်တလော ကိုယ့်မျက်စိရှေ့က မြင်နေရတဲ့ ကိုယ့်ရဲ့နိုင်ငံ မြို့ရွာ လူမှုအသိုင်းအဝိုင်း အသင်းအဖွဲ့ နဲ့ ကြုံခဲ့ရတဲ့ နိုင်ငံရေးစနစ်တွေ အကျွမ်းတဝင်ရှိတဲ့ အဖွဲ့အစည်းတွေမှာ အထက်က ဆိုခဲ့တဲ့ စည်းမျဉ်းစနစ်များတည်ဆောက်ခိုင်မြဲစေခြင်းဆိုတဲ့ အင်စတီကျူရှင်နယ်လိုက်ဇေးရှင်း အားနည်းခဲ့ အားနည်းနေဆဲပဲလို့ ကိုယ့်အမြင်က မမှားဘူးဆိုရင် ကေဒါရကျေးမင်း ဆုံးမခဲ့တဲ့ ဆုံးမစကားကို တို့တွေရဲ့ လူ့အသိုင်းအဝိုင်းက နားလည်နိုင်စွမ်းမရှိခဲ့ဘူးလို့ ကောက်ချက်ချရမယ်ထင်ပါရဲ့
.
. . . ကိုယ်နဲ့ ကိုယ့်ပတ်ဝန်းကျင်ကို ကြည့်လိုက်မယ်ဆိုရင် အခု လတ်တလော အဆင်ပြေစေရေးအတွက်ကိုပဲ ဦးစားပေးနေတာတွေရှိနေပြီး ဒီလုပ်ငန်းအတွက် ဒီစနစ်ကို တည်ဆောက်မယ်၊ လက်ရှိ လည်ပတ်နေတဲ့ စနစ်ကို ပြန်လည်သုံးသပ်ပြီး တိုးတက်မွမ်းမံမယ် ပြင်ဆင်မယ်လို့ဆိုတဲ့ စနစ်ပိုင်းဆိုင်ရာ တွေးခေါ်ကြံဆ စိတ်ဝင်စားမှုနဲ့ စနစ်ရဲ့ အရေးပါပုံကို တို့တွေရဲ့ လူမှုအဖွဲ့အစည်းကြီးက မေ့ပဲ မေ့လျော့နေလေသလား၊ စနစ်ကိုတည်ဆောက်ဖို့ အချိန်မပေးနိုင်လောက်အောင် စနစ်အကြောင်းကို တွေးတောခွင့်မရလောက်အောင် အင်မတန် ကျပ်တည်းအလျင်လိုတဲ့ လောကကြီးထဲကိုပဲ ရောက်နေတာလား၊ စနစ်တည်ဆောက်ရေးကို တွေးတောကြံဆ ဆင်ခြင်နိင်စွမ်းတွေမှာ ဉာဏ်မမီအားနည်းနေကြတာလားဆိုတာတော့ ကိုယ်လည်း မဝေဖန်တတ်တော့ဘူး၊ စည်းမျဉ်းစနစ်တည်ဆောက်ခိုင်မြဲစေခြင်းဆိုတဲ့ အင်စတီကျူရှင်နယ်လိုက်ဇေးရှင်း အရာမှာ အလွန့်အလွန်ကို အားနည်းနေတာကိုတော့ နယ်ပယ်အသီးသီးမှာ တွင်တွင်ကြီးကို တွေ့နေရတုန်းပါပဲ
.
. . . မင်းလောင်းမျှော်ဝါဒ လက်ကိုင်ထားတဲ့သူတွေ များကြတယ်လို့ဆိုတဲ့ တို့တွေရဲ့ လူ့အဖွဲ့အစည်းကြီးကပဲ မင်းလောင်းကို မျှော်ရင်းမျှော်ရင်း စည်းမျဉ်းစနစ်တွေကို မေ့လျော့ခဲ့လေသလား၊ ပေါ်လာတဲ့ မင်းလောင်းတွေကပဲ စည်းမျဉ်းစနစ်တွေထက် သူ့ကိုယ်သူ တည်ဆောက်ခဲ့လေသလား မဝေခွဲတတ်ပေမယ့် မင်းလောင်းပေါ်လာရင်တော့ ရွှေမိုးငွေမိုးရွာသလို ငါတို့တိုင်းပြည်ကြီး ကြီးပွားတိုးတက်တော့မှာပဲ ဆိုတဲ့ အယူစွဲတွေအောက်မှာ စည်းမျဉ်းစနစ်တည်ဆောက်ခိုင်မြဲစေခြင်း သဘောတရားတွေက အားနည်းချည့်နဲ့နေတာတော့ အမှန်ပါပဲ
.
. . . ငယ်ငယ်က သင်ခဲ့ရတဲ့ ကျောင်းစာတွေထဲမှာလည်း စည်းမျဉ်းစနစ်တည်ဆောက်ခိုင်မြဲစေခြင်းနဲ့ ပတ်သက်တဲ့ ပုံပြင်တွေ ဖတ်စရာမှတ်စရာ အသိပညာမိတ်ဆက်တာမျိုး မပါခဲ့တာ၊ ပါခဲ့ရင်လည်း ကိုယ်တွေရဲ့ ရင်ထဲကို မရောက်ခဲ့တာ၊ အပြင်လောကမှာလည်း ကျော်ဖြတ်ခဲ့ရတဲ့ နိုင်ငံရေး လူမှုရေး ဝန်းကျင်မှာ စည်းမျဉ်းစနစ်တည်ဆောက်ခြင်းဆိုင်ရာ အတုယူစရာ သင်ယူလေ့လာစရာရယ်လို့ မယ်မယ်ရရ မထုတ်ဖော်ကြတာတွေကလည်း ကိုယ်တွေလူမှုဝန်းကျင်မှာ ဒီသဘောတရား အားနည်းနေတဲ့ အကြောင်းရင်းတစ်ရပ်လို့ ထင်မိတယ်
.
. . . ကေဒါရကျေးမင်းကြီးနဲ့များ တွေ့ရင် တောင်းဆိုချင်ပါတယ်၊ ကိုယ်တွေလောကမှာ ဉာဏ်နည်းတဲ့သူ အများသားမို့ ပညာရှိစကားနဲ့ နားသွင်းမယ့်အစား လူပြိန်းစကားလေးတွေနဲ့ပဲ အစဉ်လိုက်သောရွှေအိုးကြီးတွေအကြောင်း ရှင်းပြပေးပါလို့
.
ဗိုလ်ကောင်း
၄ စက်တင်ဘာ ၂၀၂၀
.
photo credit
https://www.sharethejoyphotography.com/birds/

ဖိုးပွိုင့်ဇီးရိုး ခေါင်းလောင်းထိုးသံ

. . . အခုရက်ပိုင်းမှာ ထူးခြားတဲ့ သတင်း နှစ်ပုဒ်ကို သတိပြုမိတယ်၊ အီလွန်မာ့စ် တည်ထောင်ထားတဲ့ နျူရိုလင့် နည်းပညာကုမ္ပနီက သက်ရှိတွေရဲ့ ဥနှောက်ကို မှတ်တမ်းတင်ပြီး ပြန်လည်သရုပ်ပြနိုင်တဲ့ နည်းပညာကို တီထွင်နိုင်ခဲ့ပြီ ဆိုတဲ့ သတင်းနဲ့ Heron က တီထွင်ထားတဲ့ ဉာဏ်ရည်တု လေသူရဲဟာ လူသားလေသူရဲကို စီးချင်းထိုးတိုက်ခိုက်တာမှာ အောင်နိုင်ခဲ့တယ်ဆိုတဲ့ သတင်းတွေဖြစ်ပါတယ်။

.
. . . ထူးခြားတဲ့ သတင်းဆိုပေမယ့် ဒီလို သတင်းမျိုးကို လွန်ခဲ့တဲ့ နှစ်ပေါင်း ၂၀ ကျော် ကိုယ်တွေ အထက်တန်းကျောင်းသားဘဝကလည်း ကြားခဲ့ဖူးပါတယ်။ စစ်တုရင် ချန်ပီယံ ဂယ်ရီကက်စပါရော့ ကို ဉာဏ်ရည်တု စစ်တုရင်ကစားသမား Deep Blue က အနိုင်ကစားခဲ့တယ်ဆိုတဲ့ သတင်းပါ။ ဉာဏ်ရည်တု နည်းပညာဟာ ၁၉၉၆-၉၇ တုန်းကတောင် အာ့သလောက်စွမ်းနေပြီဆိုမှဖြင့် အခု နှစ်ပေါင်းအစိတ်နီးပါးအကြာမှာ ဘယ်လောက်တောင် တိုးတက်နေပြီလဲ မှန်းဆကြည့်လို့ ရပါတယ်။
.
. . . အခုလည်း အလားတူ သတင်းဆိုပေမယ့် AI လို့ခေါ်တဲ့ ဉာဏ်ရည်တု နည်းပညာက ခေတ်ရှေ့ကိုတောင် ပြေးနေလို့ ကိုယ်တွေမနည်း လိုက်ရတော့မယ့် အနေအထားဖြစ်နေပါပြီ။ ပြီးခဲ့တဲ့ ဩဂုတ်လ 20 ရက်နေ့က Heron System ဆိုတဲ့ ဉာဏ်ရည်တု လေသူရဲဟာ သက်ရှိလေသူရဲကို သဏ္ဌာန်တူ စီးချင်းတိုက်ပွဲမှာ ၅-၀ နဲ့ အနိုင်ယူခဲ့တယ်လို့ ဆိုပါတယ်။ သက်ရှိနဲ့ ဉာဏ်ရည်တုမှာ အဓိက ကွာခြားတဲ့ အချက်ကတော့ သက်ရှိလူသားဟာ ကမ္ဘာမြေဆွဲအားကို ဆန့်ကျင်မောင်းနှင်နေရမှုကြောင့် ကိုယ်တွင်းဖြစ်ပေါ်ပြောင်းလဲမှုဒဏ်တွေကို ခံရပေမယ့် ဉာဏ်ရည်တုမှာတော့ ဒီလို ဝေဒနာတွေ မရှိပါဘူး။ နောက်ပြီး အခုလို စီးချင်းမထိုးခင် ဉာဏ်ရည်တုဟာ စီးချင်းထိုးတိုက်ပွဲပေါင်း လေ့ကျင့်မှု အကြိမ်ပေါင်းများစွာ လုပ်ထားတဲ့အပြင် လူတွေလိုပဲ အတွေ့အကြုံကနေ သင်ယူပြောင်းလဲနိုင်ပါတယ်၊ ပြီးတော့ စီးချင်းတိုက်ပွဲမှာ တစ်ဘက်ပြိုင်ဘက်ရဲ့ နည်းဗျူဟာ ပြောင်းလဲကျင့်သုံးမှုတွေကိုလည်း လိုက်လျောညီထွေ လိုက်ပြောင်းပြီး လူသားကို ဉာဏ်ရည်တုက အနိုင်တိုက်နိုင်ခဲ့တာ ဖြစ်ပါသတဲ့
.
. . . နောက်သတင်းတစ်ခုကတော့ အီလွန်မာ့စ် တည်ထောင်ထားတဲ့ နျူရိုလင့် နည်းပညာကုမ္ပနီဟာ လူနဲ့ တိရစ္ဆာန်တို့ရဲ့ ဥနှောက်ကို တိုက်ရိုက်ချိတ်ဆက်ပြီး မှတ်တမ်းလည်းတင်နိုင် ပြန်ပြီးတော့လည်း သရုပ်ပြနိုင်တဲ့ နည်းပညာကို တီထွင်နိုင်ခဲ့ပြီး ပြီးခဲ့တဲ့ ဩဂုတ်လ ၂၈ ရက်နေ့က လူတွေကို ဖိတ်ခေါ်သရုပ်ပြခဲ့ပြီး မေးခွန်းတွေကို ဖြေပေးခဲ့ပါတယ်။ သရုပ်ပြမှုမှာ ဝက်တွေကို အသုံးပြုပြီး သူတို့တီထွင်ထားတဲ့ အထက်ပါနည်းပညာကို ပြသခဲ့တာဖြစ်ပါတယ်။ ဒီနည်းပညာဟာ လူတွေရဲ့ ဥနှောက်ထဲ ဉာဏ်ရည်တုနည်းပညာ ထည့်သွင်းအသုံးပြုနိုင်တဲ့ အဆင့်ထိ ရောက်နိုင်တယ်လို့ ဆိုပါတယ်။
. . . ဒီလိုသတင်းတွေက ကျွန်တော်တို့ရဲ့ ကိုယ်ကိုယ်တိုင် သင်ကြားသင်ယူမှု၊ ကျွန်တော်တို့ နောက်မျိုးဆက်တွေကို သင်ကြားပေးမှုတွေနဲ့ ပတ်သက်ပြီး ခေတ်ကြီးက ဘယ်လမ်းကြောင်းကို လျှောက်နေပြီလဲဆိုတာကို ကျယ်ကျယ်လောင်လောင် အချက်ပေးနေတဲ့ သတိပေးခေါင်းလောင်းသံတွေဖြစ်ပါတယ်။ ဒီကိစ္စတွေဟာ မြန်မာပြည်နဲ့ မိုင်ပေါင်းများစွာဝေးကွာတဲ့ ကမ္ဘာ့တစ်ဖက်ခြမ်းမှာ ဖြစ်ပျက်နေတာဆိုပေမယ့် မနက်ဖြန်သို့မဟုတ် တစ်ရက်ရက်မှာ ကျွန်တော်တို့ နိုင်ငံ၊ ကျွန်တော်တို့မြို့၊ ကျွန်တော်တို့ အိမ်ကို နိုင်ငံရေး၊ စီးပွားရေး၊ စစ်ရေး ဆိုတဲ့ ကိစ္စကြီးတွေကတစ်ဆင့် တံခါးခေါက်လာကြတော့မှာပါ။ ကိုယ့်အိမ်ကို လာတံခါးခေါက်မှ အိပ်ချင်မူးတူးနဲ့ တံခါးထဖွင့်ပေးမလား၊ ကိုယ်က ဦးအောင် ဒီနည်းပညာတွေကို ယူပြီး သုံးမလားဆိုတာကတော့ နိုင်ငံရဲ့ ပညာရေးဆိုင်ရာ လုပ်နိုင်ကိုင်နိုင် မူဝါဒချမှတ်နိုင်စွမ်းရှိတဲ့ လူကြီးမင်းတွေရယ်၊ သားသမီးတွေကို ပြုစုပျိုးထောင်ရမယ့် မိဘတွေရယ်အပေါ်မှာ မူတည်နေပါကြောင်း
.
ဗိုလ်ကောင်း
၂ စက်တင်ဘာ ၂၀၂၀
.
မူရင်းသတင်းတွေကို ဒီမှာ သွားကြည့်နိုင်ပါတယ်
https://www.youtube.com/watch?v=iOWFXqT5MZ4
https://www.engadget.com/alphadogfight-ai-f-16-pilot...

ထူးမခြားနား

. . . စတုတ္ထအကြိမ် ပြည်ထောင်စု ငြိမ်းချမ်းရေးညီလာခံ ဖွင့်ပွဲမှာ ဒေါ်အောင်ဆန်းစုကြည်ပြောကြားခဲ့တဲ့ မိန့်ခွန်းနဲ့ ပြည်ထောင်စု သဘောတူစာချုပ်များမှာ ပါရှိတဲ့ အပိုင်း ၃ အခြေခံမူများနဲ့ ပတ်သက်ပြီး ဝေဖန်သုံးသပ်သွားမှာဖြစ်ပါတယ်။
.

. . . ဒေါ်အောင်ဆန်းစုကြည်ရဲ့ ညီလာခံ အဖွင့်မိန့်ခွန်းမှာ #စစ်မှန်တဲ့ ဖယ်ဒရယ်ပြည်ထောင်စု ဆိုတဲ့ စကားလုံးကို သုံးသွားတာ တွေ့ပါတယ်၊ ( #စစ်မှန်၍ စည်းကမ်းပြည့်ဝသော ပါတီစုံဒီမိုကရေစီစနစ် ဆိုတဲ့ စကားလုံးကို သတိရစရာဖြစ်ပါတယ်)၊ ဒီမိုကရေစီကို ရှေ့က နာမဝိသေသနတွေတပ်ထားတာကို ဝေဖန်ခဲ့ကြတဲ့သူတွေအနေနဲ့ အခု ဒေါ်အောင်ဆန်းစုကြည်က ဖယ်ဒရယ်ပြည်ထောင်စုကို ရှေ့က စစ်မှန်၍ ဆိုတဲ့ နာမဝိသေသန တပ်လိုက်တာကိုရော ဘယ်လို အမြင်ရှိကြမလဲ ဆိုတာ စိတ်ဝင်စားမိပါတယ်။ 

.
. . . ဖယ်ဒရယ်စနစ်ရဲ့ အခြေခံမူတွေဖြစ်တဲ့ အာဏာခွဲဝေမှု၊ သယံဇာတခွဲဝေမှု၊ အခွန်အကောက်ခွဲဝေမှု၊ ဖယ်ဒရယ်ယူနစ်တွေ တန်းတူရည်တူရှိမှု၊ ပြည်နယ်တွေကိုယ်ပိုင်ပြဌာန်းပိုင်ခွင့်အတွက် ကိုယ်ပိုင်အခြေခံဥပဒေတွေရှိမှု ဆိုတဲ့ အချက် ငါးချက်ကို ပြီးခဲ့တဲ့ ၂၀၁၉ အောက်တိုဘာမှာ ပြုလုပ်ခဲ့တဲ့ NCA စာချုပ်လက်မှတ်ထိုးခြင်း ၄ နှစ်မြောက် အခမ်းအနားမှာ သူမအဆိုပြုခဲ့တာလို့ ဆိုပါတယ်။ အဲသည် အချက်ငါးချက်ထဲက ပြည်နယ်(တိုင်းဒေသကြီး)တွေ ကိုယ်ပိုင်အခြေခံဥပဒေ ရှိရမယ်ဆိုတဲ့ တစ်ချက်ကလွဲပြီး ကျန်တဲ့ အချက်တွေကို အခု ပြည်ထောင်စုသဘောတူစာချုပ် အစိတ်အပိုင်း ၃ ထဲ ထည့်သွင်းချုပ်ဆိုနိုင်ခဲ့တယ်လို့ မိန့်ခွန်းထဲမှာထည့်ပြောခဲ့ပါတယ်။
.
. . . တကယ်တော့ ပြည်နယ်အခြေခံဥပဒေ ဆိုတဲ့ တစ်ချက်က လွဲပြီး အခု စာချုပ်ထဲ ပါဝင်နေတဲ့ ဖယ်ဒရယ်အခြေခံမူ ၄ ချက်က ဒေါ်အောင်ဆန်းစုကြည် အဆိုပြုခဲ့တယ်ဆိုတဲ့ ၂၀၁၉ ခုနှစ် အောက်တိုဘာလ မတိုင်မီ ၂၀၁၇ မေလ ၂၉ ရက်နေ့က ချုပ်ဆိုခဲ့တဲ့ ပြည်ထောင်စုသဘောတူစာချုပ် အစိတ်အပိုင်း ၁ (နောက်ပိုင်းမှာ စာချုပ် ၁ လို့ ဆက်သုံးသွားပါမယ်)မှာ အားလုံး ပါရှိပြီး ဖြစ်ပါတယ်။
.
. . . အသေးစိတ် ရှင်းပြပါမယ်။ ဒီနှစ်ချုပ်ဆိုလိုက်တဲ့ ပြည်ထောင်စု သဘောတူစာချုပ် အပိုင်း ၃ ဒီမိုကရေစီနှင့် ဖယ်ဒရယ်စနစ်တို့ကို အခြေခံသည့် ပြည်ထောင်စုတည်ဆောက်ရေးဆိုင်ရာ လမ်းညွှန်အခြေခံမူများ မှာ အပိုဒ် ၅ ပိုဒ်ပါဝင်ပြီး တစ်ပိုဒ်ချင်းစီအလိုက် ယခင် စာချုပ် အပိုင်း ၁ ထဲမှာ ဘယ်နေရာပါခဲ့တဲ့အကြောင်း ထောက်ပြသွားမှာဖြစ်ပါတယ်။
.
#အပိုဒ်၁။ နိုင်ငံတော်ကို ဒီမိုကရေစီနှင့် ဖယ်ဒရယ်စနစ်ကို အခြေခံသော ပြည်ထောင်စုအဖြစ် ဖွဲ့စည်းရမည်ဆိုတဲ့ စာသားဟာ စာချုပ် ၁ နိုင်ငံရေးကဏ္ဍ အပိုဒ် ၄(က) ကို မူရင်းအတိုင်း ပြန်ကူးထားတဲ့ စာသားဖြစ်ပါတယ်။
.
#အပိုဒ်၂။ ပြည်ထောင်စုနှင့် တိုင်းဒေသကြီး/ပြည်နယ်အကြားတွင်သော်လည်းကောင်း၊ တိုင်းဒေသကြီး/ပြည်နယ်အချင်းချင်း အကြားတွင်သော်လည်းကောင်း ဖွဲ့စည်းပုံအခြေခံဥပဒေဆိုင်ရာ အငြင်းပွားမှုများကို ဖြေရှင်းရန်အတွက် သီးခြားလွတ်လပ်သော နိုင်ငံတော်ဖွဲ့စည်းပုံ အခြေခံဥပဒေဆိုင်ရာ ခုံရုံးကို ထူထောင်ထားရှိရမည် ဆိုတဲ့ အပိုဒ်ဟာ စာချုပ် ၁ အပိုဒ် ၄(ဆ) ကို ကူးယူရေးသားထားတာကို တွေ့ရှိရပါတယ်။
.
#အပိုဒ်၃(က)။ ပြည်ထောင်စုနှင့် တိုင်းဒေသကြီး/ပြည်နယ်များအကြား ဖယ်ဒရယ်စနစ်နှင့်အညီ အာဏာခွဲဝေမှု၊ သယံဇာတ ခွဲဝေမှု၊ အခွန်အကောက်ခွဲဝေမှု နှင့် ဘဏ္ဍာရေးခွဲဝေမှု ရှိရမည်။ ဆိုတဲ့ အပိုဒ်က အာဏာခွဲဝေမှုဆိုတာ စာချုပ် ၁ နိုင်ငံရေးကဏ္ဍ အပိုဒ် ၄ ရဲ့ ခေါင်းစဉ်ထဲမှာလည်းကောင်း၊ သယံဇာတခွဲဝေမှုနဲ့ပတ်သက်ပြီး စာချုပ် ၁ နိုင်ငံရေးကဏ္ဍ အပိုဒ် ၄(စ) မှာ အရင်းအမြစ်များကို ဥပဒေနှင့်အညီ မျှဝေခံစားခွင့် ဆိုတဲ့ စကားလုံးနဲ့လည်းကောင်း၊ အခွန်အကောက်ခွဲဝေမှုနှင့် ဘဏ္ဍာရေးခွဲဝေမှုဆိုတဲ့ စကားရပ်ကို စာချုပ် ၁ စီးပွားရေးကဏ္ဍ အပိုဒ် ၄ မှာလည်းကောင်း ပါရှိခဲ့ပြီးဖြစ်ပါတယ်။
.
#အပိုဒ်၃(ခ) တစ်ပိုဒ်လုံးဟာ စာချုပ် ၁ နိုင်ငံရေးကဏ္ဍ အပိုဒ် ၄(ဃ) ကို ကူးထည့်ထားတာဖြစ်ကြောင်း တွေ့ရပါတယ်။
.
#အပိုဒ်၃(ဂ) ပြည်ထောင်စုနှင့် တိုင်းဒေသကြီး/ပြည်နယ်များသည် ခွဲဝေထားသော ဥပဒေပြုရေး၊ အုပ်ချုပ်ရေးနှင် တရားစီရင်ရေးအာဏာများကို ကျင့်သုံးပိုင်ခွင့်ရှိရမည်ဆိုတာကလည်း စာချုပ် ၁ နိုင်ငံရေးကဏ္ဍ အပိုဒ် ၄(ဃ) နဲ့ (င) တို့မှာ အသေးစိတ်ဖော်ပြထားတဲ့ အချုပ်အခြာအာဏာခက်မ သုံးဖြာကို ခွဲဝေအပ်နှင်းရမယ်ဆိုတဲ့ သဘောတရားနဲ့ အတူတူပဲ ဖြစ်တာကို တွေ့ရပါတယ်။
.
#အပိုဒ်၄။ တိုင်းဒေသကြီး/ပြည်နယ်အားလုံးသည် အချင်းချင်း လေးစားမှုရှိပြီး အခွင့်အာဏာ တန်းတူရှိရမည်။ ဆိုတဲ့ စာပိုဒ်ဟာ စာချုပ် ၁ နိုင်ငံရေးကဏ္ဍ အပိုဒ် ၄(ခ) မှာ ထည့်သွင်းဖော်ပြထားပြီးသား ဖြစ်တယ်ဆိုတာ တွေ့ရပါတယ်။
.
#အပိုဒ်၅။ နိုင်ငံသားများအတွက် မူလအခွင့်အရေးနှင့် တာဝန်များကို ဖွဲ့စည်းပုံအခြေခံဥပဒေတွင် ထည့်သွင်းရေးဆွဲရမည်ဆိုတာ ဖွဲ့စည်းပုံအခြေခံဥပဒေတွေ ရေးရိုးရေးစဉ်အတိုင်း ပါကိုပါရမယ့်ကိစ္စဖြစ်ပြီး အဲသည်စာပိုဒ် နောက်ပိုင်းမှာပါတဲ့ တိုင်းရင်းသားလူမျိုးများ၏ ယဉ်ကျေးမှု၊ စာပေ၊ ဘာသာစကား၊ ကိုးကွယ်ယုံကြည်မှုနှင့် ဓလေ့ထုံးတမ်းစသည့် အခွင့်အရေးများကို ကာကွယ်စောင့်ရှောက်ရန်အတွက် ဥပဒေပြဌာန်းပေးရမည်ဆိုတာ စာချုပ် ၁ နိုင်ငံရေးကဏ္ဍ အပိုဒ် ၃ မှာ ပါရှိခဲ့ပြီးသား ကိစ္စရပ်ဖြစ်နေတာကို တွေ့ရှိရပါတယ်။ ဒါ့အပြင် အပိုဒ် ၅ အောက်မှာ ရေးထားတဲ့ မှတ်ချက်ဆိုတာကလည်း အထက်မှာ ဖော်ပြခဲ့တဲ့ စာချုပ် ၁ နိုင်ငံရေးကဏ္ဍ အပိုဒ် (ခ) ရဲ့ မှတ်ချက်ကို မူရင်းအတိုင်း ထည့်ထားတာကို တွေ့ရှိရပါတယ်။
.
. . . အနှစ်ချုပ်ပြောရရင် ၂၀၂၀ ပြည့်နှစ် ဩဂုတ်လ ၂၁ ရက်နေ့မှာ လက်မှတ်ရေးထိုးခဲ့ကြတဲ့ ပြည်ထောင်စုသဘောတူစာချုပ် အစိတ်အပိုင်း (၃) အပိုင်း (၃) ဒီမိုကရေစီနှင့် ဖယ်ဒရယ်စနစ်တို့ကို အခြေခံသည့် ပြည်ထောင်စုတည်ဆောက်ရေးဆိုင်ရာ လမ်းညွှန်အခြေခံမူများ ဆိုတာ အသစ်တစ်ခုမှ သဘောတရားနဲ့ အချက်အလက် အသစ်တစ်ခုမှ ပါဝင်ခြင်းမရှိဘဲ ပြီးခဲ့တဲ့ ၂၀၁၇ ခုနှစ် မေလ ၂၉ ရက်နေ့မှာ လက်မှတ်ရေးထိုးခဲ့ကြတဲ့ ပြည်ထောင်စုသဘောတူစာချုပ် အစိတ်အပိုင်း (၁) ထဲမှာ သဘောတူထားပြီးသား အချက်အလက်နဲ့ သဘောတရားတွေကိုပဲ စကားလုံး နဲ့စာပိုဒ် တိုက်ရိုက်သော်လည်းကောင်း၊ တစ်ချို့ကို အနည်းငယ်ပြင်ဆင် နေရာပြောင်းပြီး ရေးထားတာကို လေ့လာတွေ့ရှိရပါကြောင်း
.
ဗိုလ်ကောင်း
၂၁ ဩဂုတ် ၂၀၂၀

ငယ်ချစ်ဦး

 

ပြည်နယ်အခြေခံဥပဒေများ

ဒေါ်အောင်ဆန်းစုကြည် အဆိုပြုထားတဲ့
ဖယ်ဒရယ် အခြေခံမူ ငါးချက်ထဲက
ပြည်နယ်ဖွဲ့စည်းပုံအခြေခံဥပဒေ ရေးဆွဲရေးဆိုတဲ့ တစ်ချက်ကို
ပြည်နယ်အခြေခံဥပဒေ ခေါ်မလား
ပြည်နယ်ဖွဲ့စည်းပုံအခြေခံဥပဒေခေါ်မလား
ဆိုတဲ့ သဘောထားကွဲလွဲမှုကြောင့်
အခု ချုပ်ဆိုမယ့်
ပြည်ထောင်စု သဘောတူစာချုပ်
အစိတ်အပိုင်း ၃ မှာ
ထည့်သွင်းချုပ်ဆိုနိုင်ခြင်းမရှိဘူးလို့ ဆိုပါတယ်
ကိုယ်တိုင်က
ဒီအစည်းအဝေးတွေ တက်တဲ့သူမဟုတ်တော့
အသေးစိတ်ကို သေချာမသိပေမယ့်
ဒီစကားလုံးနှစ်လုံးဟာ
အနှစ်သာရအားဖြင့် အတူတူပဲလို့ ခံစားမိတာကြောင့်
အခု ချုပ်ဆိုမယ့်
ပြည်ထောင်စုသဘောတူစာချုပ်
အစိတ်အပိုင်း ၃ ထဲ
ထည့်လိုက်နိုင်ရင်ကောင်းမှာပဲလို့
မချင့်မရဲ ဖြစ်မိပါတယ်
ကျန်တဲ့ လေးချက်ဖြစ်တဲ့
အာဏာခွဲဝေရေး
အခွန်အခ ခွဲဝေရေး
သယံဇာတ ခွဲဝေရေး
ဖယ်ဒရယ်ယူနစ်များ တန်းတူညီမျှရှိရေး
အခြေခံမူများကိုတော့
အားလုံး သဘောတူတဲ့အတွက်
စာချုပ်အစိတ်အပိုင်း ၃ ထဲ
ပါလာမယ့်သဘောရှိပါတယ်
ကိုယ့်သဘောပြောရရင်
အနှစ်သာရ မကွာခြားတဲ့
စကားလုံးတွေအတွက်
အချိန်တွေအကုန်ခံပြီး
အငြင်းမပွားနေစေချင်တော့ဘူးဆိုပေမယ့်
တကယ့် အစည်းအဝေးတွေမှာ
ပြောဆိုဆွေးနွေးနေကြတဲ့သူတွေက
ပိုပြီး သိကြမှာမို့
မှတ်ချက်ပေးဖို့ ခက်ပါတယ်
အားလုံး အဆင်ပြေပြီး
ငြိမ်းချမ်းစေချင်လှပါပြီ
အရှေ့တောင်အာရှမှာတောင်
ကိုယ့်နောက်လှည့်ကြည့်ရင်
ကျောပဲ ရှိတော့တဲ့ အခြေအနေမို့
ကျနော်တို့မှာ
လုပ်စရာတွေ အများကြီးရှိနေသေးလို့ပါ

ပြည်ထောင်စုနယ်မြေ

အခြေခံဥပဒေ ရေးဆွဲစဉ်တုန်းက သမ္မတက တိုက်ရိုက်အုပ်ချုပ်တဲ့ ပြည်ထောင်စုနယ်မြေအဖြစ် (ထိုစဉ်တုန်းက နိုင်ငံမြို့တော်) ရန်ကုန် နဲ့ ကိုကိုးကျွန်းတို့ကို သတ်မှတ်ခဲ့တာရှိတယ် ၊ နောက်ပိုင်း အခြေခံဥပဒေ အတည်ဖြစ်တဲ့အချိန်မှာ မြို့တော်နေပြည်တော် တစ်ခုတည်းကိုပဲ ပြည်ထောင်စုနယ်မြေအဖြစ် သတ်မှတ်ပြီး ကိုကိုးကျွန်းကို ရန်ကုန်တိုင်းရဲ့ မြို့နယ်တစ်ခုအဖြစ် သတ်မှတ်ထားခဲ့တယ်
.

ကိုကိုးကျွန်းနဲ့ကပ်လျက် အက်ဒမန်နဲ့နစ်ကိုဘာကျွန်းစုကြီးတစ်ခုလုံးကို အိန္ဒိယရဲ့ ပြည်ထောင်စုနယ်မြေအဖြစ် သတ်မှတ်ပြီး ဗဟိုအစိုးရရဲ့ တိုက်ရိုက်အုပ်ချုပ်မှုအောက်မှာ ထားထားတယ်

.

ပြောင်းလဲလာတဲ့ ကမ႓ာ့အခင်းအကျင်းတွေရယ် မြန်မာ့တပ်မတော်ရေရဲ့ စွမ်းဆောင်နိုင်မှုတွေရယ်ကို အမျိုးသားအကျိုးစီးပွားအတွက် ထိထိရောက်ရောက် အသုံးချနိုင်ဖို့ဆိုရင် ကိုကိုးကျွန်းကို နေပြည်တော်က တိုက်ရိုက်အုပ်ချုပ်တဲ့ ပြည်ထောင်စုနယ်မြေအဖြစ် သတ်မှတ်ဖို့ စဉ်းစားသင့်တယ်
.
ဗိုလ်ကောင်း
၁၆ ဩဂုတ် ၂၀၂၀