ငါးနုပ်ဟင်း ငါးရုတ်သီးစိမ်း အိုးကပ်ကို ပင်စိမ်းရွက်လေးအုပ်ထားတာ စားချင်တယ်
ရေကျိုငါးပိကို မြေအိုးနဲ့ကြိုပြီး ငါးတံစို့ထိုးကင် ကြက်သွန်နီမီးကင်ကို ဆုံမှာထောင်းထားတဲ့အထဲ လောင်းထည့်ပြီး ငရုတ်သီးလှော်မွှေးမွှေးလေး နဲ့ ဖျော်ထားတဲ့ ငါးပိရည် ပျစ်ပျစ်ကို ပဲဇောင်းလျားသီး သင်္ဘောရွက်၊ ကြောင်လျှာသီးမီးဖုတ်၊ ခရမ်းကစော့သီး၊ သရက်သီးကင်း တွေနဲ့ နယ်ဖတ်တို့မြှပ်ပြီး စားချင်တယ်
ဖရုံသီးနုနုကို ပင်စိမ်းရွက်နဲ့ ခရမ်းကစော့သီးနဲ့ စပ်နေအောင်ချက်ထားတဲ့ အမေရင်ငယ်ငယ်တုန်းက ချက်ကျွေးတာမျိုးလေး စားချင်တယ်
ပုစွန်ခြောက်တွေ ကြက်သွန်နီတွေ အများကြီးမပါဘဲ စိမ်းစားငါးပိနဲ့ သုပ်ထားတဲ့ လျှောက်သီးသုပ်စပ်စပ်လေး စားချင်တယ်
အမေ့ခြံထဲက ထွက်တဲ့ အသီးအရွက်အစုံနဲ့ ချက်ထားတဲ့ အချဉ်ဟင်းကို ငါးခြောက်ကြော်စပ်စပ်လေးနဲ့ စားချင်တယ်
ရခိုင်ငှက်ပျောသီးမှည့်နဲ့ ကောက်ညှင်းဆန်နဲ့ ရောနယ်ပြီး ငှက်ပျောဖက်နဲ့ထုပ်ပြီးပြုတ်တဲ့ ငှက်ပျောသီးမုန့် အမေကိုယ်တိုင် လုပ်ကျွေးတာလေး စားချင်တယ်
ဆောင်းတွင်း မနက်စောစော ချမ်းချမ်းစီးစီးမှာ မိုးမလင်းခင် အိပ်ယာထ အိမ်အပြင်မှာ မီးဖိုပြီး မီးဖိုဘေးမှာ ဂုံနီအိတ်လေးတွေခင်းပြီး ၀ိုင်းထိုင်၊ မီးလှုံရင်း ပဲမြစ်တို့ ထန်းမြစ်တို့ ကြက်သွန်ဖြူတို့ မြေပဲဆံအစိုတို့ကို မီးဖုတ်ပြီး ငယ်ငယ်တုန်းကလို စားချင်တယ်
မမအေးခိုင် ငယ်ငယ်တုန်းက သုပ်သုပ်ကျွေးတဲ့ လက်ဖက်သုပ် ကြက်ခြေနီသုပ် ချဉ်ငန်စပ်ကို ရွာက မောင်နှမတစ်တွေ တစ်ယောက်တစ်ဇွန်း ၀ိုင်းနှိုက်စားရင်း ငရုတ်သီးစပ်တဲ့အခါ ရေနွေးကြမ်းပူပူလေး သောက်ရတာမျိုး ၀ိုင်းဖွဲ့ချင်တယ်
လေးလေး ဒေါ်ခင်သိန်းမုန့်လက်ဆောင်းကို အုန်းသီးဆန်တွေ အများကြီးထည့်ပြီး နှစ်ခွက်ဆင့် သောက်လိုက်ချင်တယ်
ဒညင်းစီး စီးစီး အုန်းနို့ချက် အ၀စားချင်တယ်
အဖေတို့ ကြို့ပင်ဆိပ်ရွာ အနောက်ဘက် သောင်ပြင်ထဲမှာ စိုက်တဲ့ ဗူးသီးလတ်လတ်ဆတ်ဆတ်ကို မုန့်နှစ်နဲ့ကြော်ထားပြီး အိမ်မှာ ကိုယ်တိုင်လုပ်တဲ့ မကျီးသီးအချဉ်ရည်နဲ့ တို့စားချင်တယ်
ကမ္မဌာန်းကျောင်းမှာ ဆွမ်းကပ်ရင် အမြဲချက်တဲ့ ပဲကြီးသဗွမ်းချက်က ချိုးလေးတွေ စားချင်တယ်။
နတ်ပြည်မွှေးပြောင်းဖူးအစိမ်းကို ဓားနဲ့ဖျင်ပြီး မွှေကြော်ကြော်ထားတဲ့ ပြောင်းဖူးကြော်ကို ထမင်းလွတ်စားချင်တယ်
အန်တီဝင်းတို့အိမ်ကချက်တဲ့ စိုးတိုးစပ်တပ် ဟင်းလေးတွေလည်း စားချင်တယ်
မကြွက်မဆိုင်က အမဲသားလုံးကြော်လည်း လတ်လတ်ဆတ်ဆတ်ဆို စားချင်တယ်
အာလူးပြုတ်တွေ ပဲပုပ်ပြားမီးဖုတ်ပြီးထောင်းထားတဲ့ ပဲပုပ်မှုန့်တွေနဲ့ အိမ်မှာကိုယ်တိုင်သုပ်တဲ့ သင်္ဘောသီးသုပ်စပ်စပ်လေးလည်း စားချင်တယ်
ခရမ်းချဉ်သီးမီးဖုတ်ပဲပုပ်ထောင်းကို ငါးခြောက်ကင်ဆီဆမ်းလေးနဲ့ မနက်ခင်းစောစောစီးစီး မီးလှုံရင်း စားချင်တယ်
မိဖုရားကုန်းဘုရားကြီး ထုံးသင်္ကန်းကပ်တဲ့အခါ အလှူကျွေးတဲ့ ကောက်ညှင်းပေါင်းနဲ့ ဘူးသီးကြော်လည်း စားချင်တယ်
တော်ပါပြီ အဲလောက်ဆို
No comments:
Post a Comment