.
. . . လွန်ခဲ့တဲ့ ဆယ်စုနှစ် နှစ်ခုကျော် ကာလတွေတုန်းက အခုလို နွေရာသီ နေ့လည်ပူပူမှာ အိမ်ထဲက အိမ့်အပြင်မထွက်ရလို့ အိမ်ထဲမှာပဲ စာတစ်အုပ်နဲ့ အေးရာအေးကြောင်း ရှာကြံရင်း ငိုက်မျဉ်းလာတဲ့ခါ လေးလေး ဒေါ်ခင်သိန်းရဲ့ မုန့်လက်ဆောင်း မုန့်ကျွဲသဲ ဆိုတဲ့ အသံစာစာလေးက ကျွန်တော်တို့ကို လှုပ်နှိုးပါတော့တယ်။ နွေရာသီမှာ နေတစ်အားမြင့်မှ ရေချိုးရင် အပူရှပ်တတ်တယ်ဆိုလို့ ဆယ့်တစ်နာရီလောက်ဆို ရေးမိုးချိုး သနပ်ခါးရေကျဲလိမ်း ထမင်းစားပြီးတဲ့အခါ တစ်ခါတစ်လေ ဦးအောင်ငွေတို့ ငြိမ်းချမ်းသာဗီဒီယိုသွားရင်သွား၊ အရှေ့ဝိုင်းက ကိုမျိုးတို့ မအေးတို့ရှိတဲ့ အန်တီဝင်းတို့ဝိုင်း သွားလည်ရင်လည်၊ မသွားတဲ့အခါလည်း အိမ်မှာပဲ ရှိတဲ့စာအုပ်တွေ ဖတ်ပြီးသား စာအုပ်တွေထဲက ကောင်းနိုးရာရာရွေး ကိုယ်ကြိုက်တဲ့အခန်းလေးတွေ ပြန်ဖတ်။ တစ်ခါတစ်ခါကျတော့လည်း ပူလွန်းလို့ တစ်နေရာအေးနိုး တစ်နေရာအေးနိုးနဲ့ အိမ်ထဲခြံထဲ နေရာပြောင်းရင်းနဲ့ပဲ ဒေါ်ခင်သိန်းရဲ့ မုန်းလက်ဆောင်းသံ မျှော်ရပါတယ်။
.
. . . ဒေါ်ခင်သိန်း မုန့်လက်ဆောင်း ဘယ်တုန်းက စရောင်းသလဲ ဆိုတာ မသိပေမယ့် ကိုယ်တွေ သိတတ်တဲ့အချိန်ကတည်းကစပြီး တက္ကသိုလ်တက်ဖို့ ရွာက ထွက်လာတဲ့အချိန်အထိ ဒေါ်ခင်သိန်း မုန့်လက်ဆောင်း ရောင်းနေတုန်းပါ။ နောက်ဆုံးတစ်ခေါက် အခုလို နွေရာသီ ရွာကိုရောက်တုန်းကလည်း ဒေါ်ခင်သိန်းရဲ့ မုန့်လက်ဆောင်းကို သောက်ခဲ့ရပါသေးတယ်။ ကျွန်တော်တို့ရဲ့ နွေရာသီ အခန်းဆက်ဇာတ်လမ်းကြီးမှာ ဒေါ်ခင်သိန်း မုန့်လက်ဆောင်းက မပါမဖြစ် ဇာတ်ပို့ဇာတ်ရံကြီးပေါ့
.
. . . လေးလေးဒေါ်ခင်သိန်း အဓိက ရောင်းတာက မုန့်လက်ဆောင်းဖြစ်ပြီး မုန့်ကျွဲသဲလည်း ရောင်းပါတယ်။ နွေကုန်လို့ မိုးဦးကျရင် သာကူကြို နွားနို့ကြို ရောင်းသလား သိပ်မမှတ်မိတော့ပါ။ ဘာလို့လဲဆိုတော့ ကိုယ်တွေ အဓိက အားပေးတာက မုန့်လက်ဆောင်းမို့လို့ပါ။ မုန့်လက်ဆောင်း မုန့်လက်ဆောင်း ဆိုတဲ့ လေးလေး ဒေါ်ခင်သိန်းရဲ့ အသံစာစာလေးကို အခုထိတောင် နားထဲမှာ ကြားယောင်လို့ နေပါတယ်။ အသံကြားတာနဲ့ ကျွန်တော်တို့ ကလေးတွေက လေးလေး ဒေါ်ခင်သိန်း ထွက်လာမယ့် ရွာလည်လမ်းထဲကို မျှော်ရပါတယ်။ တစ်ခါတစ်ခါ ကျတော့လည်း အသံသာကြားရပြီး တော်တော်နဲ့ ပေါ်မလာတတ်ပါဘူး။ လမ်းမှာ ဈေးဝယ်တွေ့တဲ့အခါ သူလည်း ရောင်းရသေးတာကိုး။ ခံတောင်းကြီးကိုရွက်ပြီး ကော့ပက်ကော့ပက်နဲ့ လျှောက်လာတဲ့ မုန့်လက်ဆောင်းသည်ကြီး ရွာလည်လမ်းထဲက ထွက်လာပြီ ဆိုတာနဲ့ ကျွန်တော်တို့က အပြေးအလွှား အလုအယက် ခေါ်ကြပါတယ်။ မုန့်လက်ဆောင်းသည် လာပါအုံး လို့ ခေါ်သလား ဘယ်လို ခေါ်သလဲ တော့ မေ့တေ့တေ့ ဖြစ်နေပါပြီ။ တကယ်လို့ တစ်ခြား အိမ်တစ်အိမ်က ကိုယ့်ထက် ဦးသွားတယ်ဆိုရင် အေးအေး ဒီနားပြီးရင် လာခဲ့မယ်ဟေ့ ဆိုတဲ့အခါ ကျွန်တော်တို့မှာ စိတ်ရှည်ရှည် ထိုင်စောင့်ရပါတယ်။
.
. . . လေးလေး ဒေါ်ခင်သိန်း ကျွန်တော်တို့အိမ်ရောက်ပြီဆိုရင် သူရွက်လာတဲ့ ခံတောင်းကြီးကို ကူချပေး။ ပြီးရင် တစ်ယောက်တစ်လက် အလုအယက် သောက်ကြတော့တာပါပဲ။ သူ့ခံတောင်းကြီးထဲမှာ မုန့်လက်ဆောင်းထန်းလျက်ရည်ထည့်တဲ့ မြေအိုးကြီးတစ်လုံး ငှက်ပျောဖက်နဲ့ ပတ်လျက်သား ပါပါတယ်။ ဆန်ဆေးခြင်း ခပ်ကြီးကြီးကို ငှက်ပျောဖက်ခံပြီး မုန့်လက်ဆောင်းဖတ်တွေထည့် အပေါ်က ပိတ်ပါးလေးနဲ့ အုပ်ထားတတ်ပါတယ်။ ကျွန်တော်တို့ အကြိုက်ဆုံးကတော့ အုန်းသီးဆံပါ။ အုန်းသီးကို ထက်ခြမ်းခြမ်းထားပြီး အုန်းဆံသားဖြူဖြူကို အမျှင်အမျှင်လေးတွေ ဖြစ်အောင် လက်ကိုင် အုန်းခြစ်နဲ့ ခြစ်ပြီး မုန့်လက်ဆောင်းထဲ ထည့်စားရတာ ကိုယ်တွေ ကလေးတစ်သိုက်က သိပ်ကြိုက်ကြတာဆိုတော့ ကိုယ့်အလှည့်ကျရင် အုန်းသီးဆံ များများ ထည့်စားလို့ ရအောင် စေတနာ့ဝန်ထမ်း အုန်းသီးခြစ်ပေးကြတာပါ။ မုန့်လက်ဆောင်းကို ဖန်ခွက်ရှည်ရှည်လေးတွေနဲ့ ထည့်ပါတယ်။ ဖန်ခွက်က အကြီးအသေး နှစ်မျိုး ရှိပါတယ်။ ကျွန်တော်တို့ ကလေးတွေကတော့ အသေးပဲ သောက်ရပါတယ်။ ထပ်သောက်ချင်ရင် တစ်ခွက်ထပ်သောက်လို့ ရပါတယ်။ ကျွန်တော့်အစ်မငယ်ကတော့ မုန့်လက်ဆောင်းခွက်ကြီး နှစ်ခွက်ဆင့်သောက်တဲ့နေရာမှာ နာမည်ကြီးပါ။ နောက်ပြီးတော့ အမွှေးရည်ပုလင်းလေးလည်း ပါပါတယ်။ တစ်ချို့ကတော့ အမွှေးရည်မကြိုက်တတ်ကြပါဘူး။
.
. . . လေးလေး ဒေါ်ခင်သိန်းလာတိုင်း မရိုးနိုင်အောင် မေးဖြစ်ခဲ့တဲ့ မေးခွန်းကတော့ မုန့်လက်ဆောင်းဖတ် ဘယ်လို လုပ်သလဲ ဆိုတာပါပဲ။ လေးလေးကလည်း တစ်ခါမေးတစ်ခါ ရှင်းပြရှာပါတယ်။ ဒါပေမယ့် ခုချိန်ထိ မုန့်လက်ဆောင်းဖတ် ဘယ်လို လုပ်သလဲဆိုတာ တစ်ခါမှ မမြင်ဖူးသေးပါဘူး။ မုန့်လက်ဆောင်းရောင်းရင် ပါလာတတ်တဲ့ မုန့်ကျွဲသဲတော့ သိပ်မစားဖြစ်ခဲ့ပါဘူး။ တစ်ခါတစ်လေ မုန့်လက်ဆောင်းသည် ရောက်တဲ့အချိန် အိမ်က တစ်ယောက်ယောက် မရှိတဲ့အခါ သူ့အတွက်ပါ ၀ယ်ထားပေးပါတယ်။ အဲသည်အခါကျရင် မုန့်လက်ဆောင်းဖတ်သတ်သတ် ထန်းလျက်ရည်သတ်သတ် ထားရပါတယ်။ တစ်ခါတည်း ရောလိုက်ရင် မုန့်ဖတ်တွေ ပွသွားတတ်ပါသတဲ့။ ဟိုးအရင်တုန်းကတော့ ဒေါ်ခင်သိန်း မုန့်လက်ဆောင်းဖတ်တွေက အဖြူထည်သက်သက်ဖြစ်ပြီး နောက်ဆုံးတစ်ခေါက် သောက်လိုက်ရတုန်းကတော့ မုန့်လက်ဆောင်းဖတ်က အစိမ်းရောင်လေး သမ်းနေလို့ လေးလေး ဒီဟာတွေက ဆေးဆိုးထားတာလားဆိုတော့ ဆိုးဆေး မဟုတ်ပါဘူးတဲ့ သဘာဝအတိုင်း ဘာနဲ့ဆိုလား လုပ်ထားတယ် ပြောပါတယ်။
.
. . . ရွာမှာ နေတုန်းကလည်း ရွာနီးချုပ်စပ်မှာ အလျဉ်းသင့်လို့ မုန့်လက်ဆောင်း သောက်ဖြစ်တယ်ဆို ဘယ်မုန့်လက်ဆောင်းမှ ဒေါ်ခင်သိန်း မုန့်လက်ဆောင်းလောက် ကောင်းတယ်လို့ မထင်ခဲ့တာ။ ဒါတင်မက မြန်မာပြည်က ဘယ်အရပ်ကိုပဲရောက်ရောက် သောက်မိသမျှ မုန့်လက်ဆောင်းတွေ လေးလေး ဒေါ်ခင်သိန်းလက်ရာလောက် မကောင်းတာကတော့ အစွဲကြီးတာပဲလားဘာလား မသိတတ်တော့ပါဘူး။ နွေနေ့လည်ပူပူမှာ လေးလေး ဒေါ်ခင်သိန်းရဲ့ မုန့်လက်ဆောင်းကို မောင်နှမတစ်တွေ သူ့ထက်ငါ ၀ိုင်းဖွဲ့သောက်ကြရင်း ချစ်ခင်ကြည်နူးခဲ့ကြတဲ့ မိသားစုအငွေ့အသက်နဲ့ မုန့်လက်ဆောင်းလေး သောက်အပြီးမှာ ရလိုက်တဲ့ ရင်ထဲမှာ အေးပြီး ဗိုက်ပြည့်သွားတဲ့ စိတ်ကျေနပ်မှုလေးကိုတော့ လွမ်းမိပါသေးရဲ့ . . .
No comments:
Post a Comment