ဝ ကိုယ်ပိုင်အုပ်ချုပ်ခွင့်ရဒေသမှာကျင်းပတဲ့ ငြိမ်းချမ်းရေး အနှစ်သုံးဆယ်ပြည့်ပွဲနဲ့ ပတ်သက်ပြီး ကျွန်တော့်ရဲ့ အမြင်ကို မေးကြသူများကို ဒီနေရာကနေ ပြောပြပါ့မယ်။
၁) ပြည်ထောင်စုအလံတော်ကို အမြဲတမ်း ထိပ်မှာထားတတ်တဲ့ ၀ တွေရဲ့ အင်အားကြီးထွားမှုက ပြည်ထောင်စုကို ပြိုကွဲစေမယ့် ခြိမ်းခြောက်မှုတစ်ခုဖြစ်တယ်လို့ မမြင်ပါဘူး။ သုံးတတ်ရင် ပြည်ထောင်စုအတွက် အားတစ်ခုဖြစ်ပါတယ်။ သမိုင်းကြောင်းများအရ ပြည်ထောင်စုကို ကာကွယ်ဖို့အတွက်လည်း အားထားရတဲ့ တပ်ဖွဲ့တစ်ခု ဖြစ်ခဲ့ပါတယ်။
၂) ၀ တပ်ဖွဲ့ကို အားကျပြီး အခြားတပ်ဖွဲ့များက အင်အားတည်ဆောက်တာလုပ်လာနိုင်ခြေရှိတာကိုတော့ သတိထားစောင့်ကြည့်ရမှာဖြစ်ပါတယ်။
၃) ၀ ကိုယ်ပိုင်အုပ်ချုပ်ခွင့်ရဒေသ အဆင့်ကနေ ပြည်နယ်အဆင့်ကို တိုးယူတောင်းဆိုတဲ့ အသံတစ်ချို့ကြားရပါတယ်။ လက်ရှိအခြေခံဥပဒေ ပြဌာန်းချက်တွေအရ ပြည်နယ်နယ်နိမိတ်ပြင်ဆင်သတ်မှတ်တဲ့ ပုဒ်မတွေကိုကိုးကားပြီး ပြည်နယ်အသစ်တစ်ခုအဖြစ် ပေါ်ပေါက်လာနိုင်ခြေရှိမရှိ ဥပဒေရှုထောင့်က သေချာမပြောတတ်ပေမယ့် ၀ ကို ပြည်နယ်ပေးလိုက်ရင် အခြားအင်အားကြီးများကလည်း သီးခြားပြည်နယ်တောင်းလာနိုင်တဲ့ အခြေအနေရှိပါတယ်။ ဘယ်လိုပဲဖြစ်ဖြစ် ပြည်နယ်အဆင့်တောင်းဆိုတာက ပြည်ထောင်စုကခွဲထွက်ဖို့ မကြံရွယ်သမျှ ကာလပတ်လုံး ပြည်ထောင်စုအတွက် ခြိမ်းခြောက်မှုတစ်ခု မဖြစ်ပါဘူး။
၎) တပ်မတော်တစ်ရပ်တည်းသာရှိရမယ်ဆိုတဲ့ နိုင်ငံတကာစံနှုန်းနဲ့ ကြည့်မယ်ဆိုရင် ပြည်ထောင်စုတပ်မတော်ကွပ်ကဲမှုနဲ့ ကင်းလွတ်နေတဲ့ ၀ တပ်ဖွဲ့ရဲ့ တည်ရှိနေမှုက နည်းနည်းတော့ ဂွတီးဂွကျနိုင်ပါတယ်။ ပြည်ထောင်စုတပ်မတော်ထဲကို ၀င်ရောက်ပူးပေါင်းတာဟာ ဗမာလူမျိုးလက်အောက်ကို ၀င်တာမဟုတ်ဘူးလို့ သဘောပေါက်အောင် ပြောနိုင်ပြနိုင်တဲ့တစ်နေ့တော့ ပြည်ထောင်စုတပ်မတော်ရဲ့ အစိတ်အပိုင်းတစ်ခု ဖြစ်လာနိုင်ပါတယ်။
၅) ပြည်ထောင်စုက ခွဲထွက်မယ်ဆိုတဲ့ အရိပ်အယောင် နဲ့ လုပ်ဆောင်ချက် ပြောဆိုချက် မရှိသေးသမျှ ကာလပတ်လုံး ၊ ပြည်ထောင်စုရဲ့ အစိတ်အပိုင်းတစ်ခုခုကို လက်နက်ကိုင် အကြမ်းဖက်တိုက်ခိုက်မှုတွေ လုပ်မလာသမျှ ကာလပတ်လုံး၊ ပြည်ထောင်စုတပ်မတော်နဲ့ ၀ တပ်ဖွဲ့ကြား စစ်ရေးပဋိပက္ခ ပေါ်လာစရာ အကြောင်းမရှိပါဘူး။
( သတင်းဓာတ်ပုံတွေနဲ့ ပတ်သက်ပြီး ထူးခြားချက်တစ်ခုက ဘာလဲဆိုရင် ၀တပ်ဖွဲ့ စစ်ရးပြမှာ အလံကိုင်တပ်ဖွဲ့ဟာ တပ်မတော်နေ့ စစ်ရေးပြလိုပဲ ပြည်ထောင်စုအလံတော်ကို ရှေ့ဆုံးမှာထားပြီး ချီတက်လာတာဖြစ်ပေမယ့် အဲသည်ဓာတ်ပုံကို သတင်းဌာနတွေရဲ့ ဓာတ်ပုံတွေထဲမှာ မတွေ့ရပါဘူး၊ သတင်းဌာနတွေက အမှတ်တမဲ့ပဲလား ရည်ရွယ်ချက်ရှိရှိပဲ အဲသည်ဓာတ်ပုံကို မသုံးတာလားဆိုတာ စိတ်ဝင်စားစရာဖြစ်ပါတယ်)
ဇေယျာနိုင်
ဓာတ်ပုံ
7 Day News
No comments:
Post a Comment