ပန်းပွင့်လေးအတွက်ပုံပြင်တွေ

. . . မနှစ်က ဒီလိုအချိန် ဆရာမြန်မာပြည်ပြန်လာသခိုက် ကိုယ်လည်း မြန်မာပြည်ရောက်နေတဲ့အချိန်မို့ ပန်းပွင့်လေးတို့သားအမိနဲ့အတူ လေဆိပ်မှာ သွားကြိုနုတ်ဆက်တော့ ဆရာက စာအုပ်နှစ်အုပ် လက်ဆောင်ပေးတယ်။ Japanese Children's Favourite Stories နဲ့ More Japanese Children's Favourite Stories ဆိုတဲ့ ကလေးပုံပြင်စာအုပ်နှစ်အုပ်။ စာအုပ်က အေဖိုးဆိုက်ထက်ကြီးတဲ့ အဖုံးကတ်ထူ အတွင်းကြွေသားရောင်စုံပုံတွေနဲ့ စာမျက်နှာ တစ်ရာကျော်စီပါတယ်။ ဆရာက ဒီလိုပဲ ကြုံရင်ကြုံသလို စာအုပ်ဆိုင်တွေမှာ တွေ့ရင် ၀ယ်လာပေးနေကျ။ အရင်လည်း ကလေးပုံပြင်စာအုပ်လေးတွေ ဆရာဝယ်ဝယ်ပေးတာ အများကြီးပဲရှိတယ်။ ပန်းပွင့်လေးရဲ့ အခုရှိနေတဲ့ စာဖတ်အားအခြေအနေက အဲသည်စာအုပ်တွေအပေါ် တော်တော်လေး မူတည်ခဲ့တယ်ဆိုတာ တဖြည်းဖြည်း သဘောပေါက်လာပါတယ်။
.
. . . ပုံပြင်စာအုပ်လေးတွေကို သူကြိုးစားပြီး စဖတ်တဲ့ အချိန်တုန်းက အသက်က လေးနှစ်ပြည့်ပြီး ငါးနှစ်ထဲရောက်စပဲ ရှိသေးတယ်။ ဖအေနဲ့မအေကလွဲလို့ ကစားစရာ အဖော်လည်းမရှိ၊ တီဗီတွေ ကွန်ပြူတာတွေ ဖုန်းတွေ ကြည့်တာလည်း အချိန်ကန့်သတ်ပေးထားတာမို့ စာအုပ်တွေဘက်ကို အချိန်ပေးဖို့ အခွင့်အလမ်းပိုရသွားတာထင်ပါတယ်။ ရိုးရိုးသားသားပြောရရင် ဆရာဝယ်ပေးတဲ့ ပုံပြင်စာအုပ်တွေထဲက တစ်ချို့ပုံပြင်တွေဆို ကိုယ်လည်း သိပ်မကြားဖူးဘူးရယ်။ ပန်းပွင့်လေးက သူတတ်သမျှ စာအုပ်တွေထဲ လျှောက်ကြည့် ဖတ်ပြခိုင်းတော့မှ ကိုယ်လည်း အဲပုံပြင်တွေကိုသိတာ။ တစ်ခုရှိတာက ပန်းပွင့်လေးက ပုံပြင်တိုင်းကို မြန်မာလို မရှင်းပြခိုင်းဘူး။ သူ့ကို ဖတ်ပြဆိုပြီး အင်္ဂလိပ်လို ဖတ်ပြတာကိုပဲ နားထောင်တယ်။ အိပ်ခါနီးရင် သူကြိုက်တဲ့ စာအုပ်တစ်အုပ်နှစ်အုပ် ဆွဲလာပြီး ဖတ်ပြခိုင်းတာပဲ။ သူက သေချာနားထောင်တယ် တစ်ချို့နေရာတွေဆို သူက အဲဒါလေး ပြန်ဖတ်ပြပါဆိုရင် ထပ်ထပ်ဖတ်ပြရတာလည်းရှိတယ်။
.
. . . အခုကျတော့ သူကို ပုံပြင်ဖတ်ပြပေးစရာ မလိုတော့ဘူး။ (ဒါပေမယ့် သူပြောတာနားထောင်ပေးဖို့ သူမေးတာတွေဖြေဖို့နဲ့ သူ့ကို မေးခွန်းတွေထုတ်ဖို့တော့ အချိန်ပိုပေးလာရတယ်) စာမေးပွဲနဲ့ ဝေးတဲ့ရက်တွေ သာမန်ရက်တွေ တော်တော်များများမှာ ကျောင်းစာကြည့်တိုက်က စာအုပ်လေးတွေ အချိန်ရရင်ရသလို ငှားငှားလာတယ်၊ အိမ်ရောက်ရင် သူ့ကို ကိုယ်ပိုင်ချိန်ပေးထားတဲ့အချိန်မှာ ဖတ်ပြီး လူကြီးတွေကို ပြောပြတတ်တယ်။ တစ်ခါတစ်လေ ကျောင်းကပြန်လာရင်း ကားပေါ်မှာ ဖတ်လာလို့ မျက်စိထိခိုက်မှာစိုးလို့ ကားစီးနေရင်း စာမဖတ်ပဲ အပြင်ကိုပဲ ကြည့်ဖို့ သူငယ်ချင်းတွေနဲ့ စကားပြောဖို့ မှာထားရတယ်။
.
. . . အခု သူတို့ ဒီဇင်ဘာနဲ့ နှစ်သစ်ကူးကျောင်းပိတ်ရက် စပြီဆိုတော့ အထက်မှာပြောခဲ့တဲ့ ပုံပြင်စာအုပ်နှစ်အုပ်အကြောင်းမေးတော့ နှစ်အုပ်ပေါင်းမှာ အပုဒ် သုံးဆယ်လောက်ရှိတာ သူဖတ်နေတာ ခြောက်ပုဒ်လောက်ကျန်သေးတယ်တဲ့။ အဲဒါ ခု ကျောင်းပိတ်ရက် အပြီးဖတ်မလား ဆိုတော့ ဖတ်မယ်ဆိုပြီး ခုမနက်စောစော ဖုန်းဆက်တော့ ညက စာဖတ်ရင်းနဲ့ အိပ်ယာဝင်နောက်ကျပေမယ့် မနက်ကျတော့ လန်းလန်းဆန်းဆန်း ထလာပြီး သူဖတ်ထားတဲ့ ပုံပြင်တွေအကြောင်း ပြောပြနေတာ။
.
. . . ညက ပုံပြင်စာအုပ်အကြောင်းတွေ ပြောကြရင်း စိတ်ပါသွားပြီး ကိုယ်တွေ ဆယ်တန်းတုန်းက သင်ခဲ့ရတဲ့ Selected Myanmar Tales တွေကို ဖတ်သတဲ့။ ဘယ်လို ဖတ်လိုက်လဲတော့ မသိဘူး မနက်ဖုန်းဆက်တဲ့အချိန်မှ အဲသည်ထဲက ပုံပြင် ဆယ့်ငါးပုဒ်လုံး ဖတ်ပြီးသွားပြီပြောတယ်။ ဖေဖေ မေးချင်တာမေးကြည့်တဲ့။ သမီးပြောချင်တာပဲ ပြောပြပါဆိုတော့ ပုံပြင်သုံးပုဒ်ပြောပြတယ်။ Exellent Choice, If You Help Ohters You also Help Yourself, The Man who Looked for the Lord of Death" ပုံပြင်သုံးပုဒ်ပြောပြတယ်။ ဇာတ်ကွက်အသေးစိတ်တွေ ကျော်သွားတာရှိပေမယ့် အဲဒါတွေကို မေးရင်လည်း ပြောပြတတ်တယ်။ တစ်ချို့မေ့သွားတာတွေကို စာအုပ်ထဲပြန်ကြည့်ပြီး ပြောတယ်။ စာကောင်းကောင်းဖတ်ထားပုံပဲ
.
. . . ဘာပဲပြောပြောလေ သူက မြန်မာလိုဖတ်ရမှာ ပျင်းတယ်ဆိုပေမယ့် အင်္ဂလိပ်လို စာဖတ်ဖို့ စိတ်အားထက်သန်ရှိတာကိုတော့ တစ်မျိုးဖြေသိမ့်လို့ရပါသေးတယ်။ အခု ပုံပြင်တွေ ဖတ်တဲ့အရွယ်ကို နည်းနည်းကျော်တာနဲ့ မြန်မာအကြောင်း ဒေါ်ခင်မျိုးချစ်တို့လို စာရေးဆရာတွေ ရေးထားတဲ့ အင်္ဂလိပ်စာအုပ်တွေ တော်တော်များများ သူ့လက်တစ်ကမ်း ထားပေးရတော့မှာပဲ။ မြန်မာအကြောင်း မြန်မာတွေပြောတဲ့ ဇာတ်ကြောင်းတွေကို နားရည်ဝကာမှသာ မြန်မာအကြောင်း လူမျိုးခြားတွေရေးတဲ့ စာအုပ်တွေနဲ့ ပေးတွေ့တော့မယ်စိတ်ကူးတယ်။ ကျောင်းနေစကတည်းက အင်္ဂလိပ်ကျောင်းမှာနေ ပြည်ပကိုထွက်၊ နာမည်ကြီးတက္ကသိုလ်တွေတက်၊ ကမ္ဘာ့အဖွဲ့အစည်းတွေမှာ အလုပ်လုပ်၊ အသက်ကြီးကာမှ မြန်မာပြည်ပြန်လာပြီး မြန်မာအကြောင်းမြန်မာတွေ နားလည်သလိုမလည်ဘဲ လူမျိုးခြားမျက်လုံးနဲ့ မြင်နေတတ်တဲ့ ကိုယ့်အသိတစ်ယောက်လို (သောက်တလွဲတွေ)မဖြစ်အောင် ပန်းပွင့်လေးကို ပြုစုပျိုးထောင်ရမယ်လို့ စိတ်ကူးမိတယ်
.
ပန်းပွင့်လေးဖေဖေ
၂၄ ဒီဇင်ဘာ ၂၀၁၈
International University of Japan