. . . မြန်မာစာကို စိတ်ဝင်တစားဖတ်ချင် ရေးချင်လာအောင် လုပ်ရတာက ပန်းပွင့်လေးကို ပြုစုပျိုးထောင်တဲ့ နေရာမှာ အကြီးမားဆုံး စိန်ခေါ်ချက်ဖြစ်နေပြီလားတောင် မသိဘူး။ ဖအေလုပ်တဲ့သူက မြန်မာစာပေကို ဒီလောက် မြတ်မြတ်နိုးနိုးရှိလှပေမယ့် ဒင်းလေးက မြန်မာစာဖတ်ဖို့ ရေးဖို့ အင်မတန် တွန့်ဆုတ်တယ်။
.
. . . မြန်မာလိုဖတ်စေချင်လို့ အင်္ဂလိပ်မြန်မာ နှစ်ဘာသာပါတဲ့ ရုပ်ပြစာအုပ်တွေ ၀ယ်ပေးတာ၊ သူဝယ်ချင်တာကို အားပေးတာ လုပ်တော့လည်း မြန်မာလိုကျတော့ မဖတ်ဘဲ အင်္ဂလိပ်လိုပဲဖတ်တယ်။ ပြဌာန်းစာအုပ်က မြန်မာစာ စာပုဒ်တွေကို အလျဉ်းသင့်သလို ဖတ်ပြခိုင်းရင်လည်း ချောချောမောမော ဖတ်ပြတတ်ပေမယ့် ဒီလောက်နဲ့လည်း ကိုယ်က စိတ်မကျေနပ်နိုင်သေးဘူး။ တစ်ခြား မြန်မာလိုချည်းသက်သက်ပါတဲ့ ရုပ်ပြတွေ စာအုပ်တွေ တတ်နိုင်သမျှဝယ်ပေးပေမယ့် အင်္ဂလိပ်စာဖတ်သလို သူ့ဘာသာ စိတ်ဝင်တစား မဖတ်ဘူး။ ဖတ်ပါ ဖတ်ပါ ဖတ်ပြပါ ဆိုပြီး နောက်က တွန်းနေရတယ်။ (အင်္ဂလိပ်စာကျတော့ ဆယ်တန်းအင်္ဂလိပ်စာ ပြဌာန်းစာအုပ်အထိကို သူ့ဘာသာ လျှောက်ဖတ်ပြီး ပြန်ပြောပြနေတာ)
.
. . . အလျဉ်းသင့်လို့ ပြောရရင် ဟိုတစ်နေ့က ဒေါ်အောင်ဆန်းစုကြည်ပြောတဲ့ ကလေးစာအုပ်တစ်အုပ်မှာ ဘာသာပြန်တာ မှားနေတာဆိုတာလည်း တော်တော်ကို ဆိုးတယ်။ သူက စာအုပ်တန်းမှာ ကလေးစာအုပ်တွေ လျှောက်မရှာဖူးလို့ အဲလောက်ပဲ သိတာ။ အမှန်က ဘာသာပြန်မှားတာ အင်္ဂလိပ်လိုက သိပ်မမှားဘူး။ မြန်မာလိုမှားနေတာတွေက အများကြီး။ အင်္ဂလိပ်လို မူရင်းရှိတဲ့ ladder series ထဲက ပုံပြင်တွေ အထုပ္ပတ္တိတွေ စသည်ဖြင့် အင်္ဂလိပ်-မြန်မာ နှစ်ဘာသာနဲ့ စာအုပ်တွေက ရန်ကုန်က စာအုပ်တန်းတွေမှာ တော်တေ်ာများများ ရနေပြီ။ မနှစ်က ကိုယ်မြန်မာပြည်ပြန်တော့ အဲဒါတွေ တော်တော်များများတွေ့လို့တောင် ၀မ်းသာနေသေးတယ်။
.
. . . ဒါပေမယ့် ၀မ်းသာတာက ရေရှည်သိပ်မခံဘူး။ အထဲက စာတွေ နည်းနည်းပါးပါး မြည်းစမ်း ဖတ်ကြည့်လိုက်တော့မှ စိတ်ပျက်စရာကောင်းလှတဲ့ ခပ်ညံ့ညံ့အရေးအသားတွေနဲ့ မြန်မာလိုပြန်ထားတာတွေ့လို တော်တော်ကို စိတ်လေသွားတယ်။ မြန်မာစာအရေးအသား သဒ္ဒါနဲ့ ၀ါကျဖွဲ့စည်းပုံ ချောမွေ့ပြေပြစ်မှုက စာကို အံကြိတ်ဖတ်နေရအုံးမယ့် ကလေးတွေ မဆိုထားနဲ့၊ ကိုယ်တွေတောင် ဘာကိုဆိုလိုချင်ပါလိမ့်လို့ နားမလည်လို့ မူရင်း အင်္ဂလိပ်စာ အရေးအသားနဲ့ တိုက်ကြည့်ရတာတွေက တော်တော်များများ တွေ့တယ်။ အဲဒါ တစ်အုပ်လည်း မဟုတ် နှစ်အုပ်လည်းမဟုတ်၊ စာစဉ်အလိုက်ဆိုရင်လည်း စာစဉ်တစ်ခုလည်း မဟုတ် နှစ်ခုလည်း မဟုတ်။ ကိုယ်ကြည့်မိသမျှ တော်တော်များများမှာကို အဲလိုဖြစ်နေတာ။
.
. . . ကလေးတွေ စာဖတ်ဖို့က ကလေးတွေ အတွေးစဉ်ကို ချောချောမွေ့မွေ့ စီးဆင်းသွားစေနိုင်တဲ့ အသံသာယာမှု ၀ါကျဖွဲ့ထုံးပြေပြစ်မှု၊ စကားအသုံးအနှုံးလွယ်ကူရိုးရှင်းမှု စတာတွေနဲ့ ပြည့်စုံတဲ့ ကလေးစာအုပ် စစ်စစ်တွေ အများကြီး လိုအပ်နေသေးတယ်။ ရောင်စုံအရုပ်တွေ အများကြီးနဲ့ ကလေးဖတ်စာလုံးအကြီးကြီးတွေနဲ့ အင်္ဂလိပ်-မြန်မာ နှစ်ဘာသာရေးထားတိုင်း ကလေးတွေနဲ့ သင့်လျော်မလျော် သေချာကြည့်နိုင်မှ တန်ကာကျတာ
.
. . . မနေ့ညက ပန်းပွင့်လေးနဲ့ ဖုန်းပြောတော့ ဖတ်စာအုပ်ထဲက ဥတုသုံးပါးအကြောင်း စာကို ဖတ်ပြခိုင်းလို့ ဖတ်ပြတယ်။ တော်တော်ချောချော ဖတ်နိုင်ပေမယ့် သိပ်ပြီး စိတ်ဝင်စားဟန်မပြဘူး။ ကိုယ်ကလည်း ဒီထက်ချောချောမောမော ထပ်ထပ်ပြီး ဖတ်စေချင်သေးတာနဲ့ စာထဲမှာပါတဲ့ ဥတုသုံးပါးကို သူစိတ်ဝင်စားတဲ့ ရောင်စုံပန်းချီကား သုံးချပ်ဆွဲပြပါလို့ ခိုင်းလိုက်တယ်။ အဲဒါတော့ သူက စိတ်ပါလက်ပါလုပ်ချင်တယ်ဆိုပေမယ့် စာကိုသေချာဖတ်ပြီးဆွဲမလား သူ့စိတ်ကူးနဲ့သူဆွဲမလား စောင့်ကြည့်ရအုံးမယ်။ အင်း ပြောသာပြောရ စာတော့ ထပ်ဖတ်မယ်သိပ်မထင်ဘူး။ သူစိတ်ကူးပေါက်ရာဆွဲပြီး ပြမယ်ဆိုတာတော့ သေချာသလောက်ပဲ။ သမီးက အဖေတူကိုး
.
ပန်းပွင့်လေးဖေဖေ
၂၁ ဒီဇင်ဘာ ၂၀၁၈
No comments:
Post a Comment