.
. . . ပင်ပင်ပန်းပန်း ကျော်ဖြတ်ရတဲ့နေ့တွေ၊ အလုပ်တွေ အများကြီးလုပ်လိုက်ရတဲ့နေ့တွေ၊ ပျင်းရိငြီးငွေ့စရာကောင်းလို့ အချိန်တွေကလည်း ကုန်ခဲလိုက်တာဆိုတဲ့နေ့တွေအကြောင်း ပြောတဲ့အခါ အင်္ဂလိပ် ဘာသာစကားမှာ long day ဆိုတဲ့ စကားလုံးမျိုး သုံးပြီးပြောလေ့ရှိပါတယ်။ ဒါပေမယ့် အခု ပြောပြမယ့် အကြောင်းအရာကတော့ အဲလို အဓိပ္ပာယ်မျိုး မဟုတ်ပါဘူး။ တကယ့်ကို နေ့တာရှည်တဲ့အကြောင်းပါ . . .
.
. . . ကမ္ဘာကြီးက ဗဟိုပြုပြီး လည်နေတဲ့ ၀င်ရိုးစွန်းနှစ်ဘက်ဟာ ၂၃.၅ ဒီဂရီ စောင်းနေလို့ ကမ္ဘာကြီးက နေကို တစ်နှစ် တစ်ပတ်နှုန်းနဲ့ လှည့်ပတ်နေတဲ့အခါမှာ နေ့တာညတာ အတိုအရှည်တွေ ကွာခြားသွားရတဲ့အကြောင်း ငယ်ငယ်ကတည်းက ပထ၀ီမှာ သင်ဖူးကြပါတယ်။ အဲဒီလို တိမ်းစောင်းလည်နေလို့လည်း ဆောင်းရာသီမှာ နေ့တာက တိုသွားလိုက် နွေရောက်တော့ နေ့တာက ရှည်လာလိုက် ဖြစ်နေရတာပါ။ (အမှန်က ဆောင်းတွင်းရောက်လို့ နေ့တာတိုတာမဟုတ် နေ့တာတိုလို့ ဆောင်းဖြစ်ပြီး နေ့တာရှည်လို့ နွေဖြစ်လာတာရယ်)။ အဲဒီလို နေ့တာညတာ အတိုအရှည်တွေက တစ်ကမ္ဘာလုံးက အရပ်ဒေသ အားလုံးမှာ တစ်ညီတစ်ညာတည်း ဖြစ်နေတာ မဟုတ်ဘူး။ ကမ္ဘာ့တောင်ခြမ်းက နေ့တာရှည်ရင် ကမ္ဘာ့မြောက်ခြမ်းမှာ နေ့တာတို၊ တစ်ခါ ကမ္ဘာ့တောင်ခြမ်းမှာ နေ့တာတိုရင် ကမ္ဘာ့မြောက်ခြမ်းမှာ နေ့တာရှည် အဲလို အလှည့်ကျ ဖြစ်နေတာပါတဲ့ . . .
.
. . . ပထ၀ီစကားနဲ့ ပြောရရင်တော့ ဒီကနေ့ ဇွန်လ ၂၁ ရက်နေ့ဟာ ကမ္ဘာနဲ့ နေရဲ့ ထောင့်အနေအထားအရ ကမ္ဘာ့မြောက်ဘက်ခြမ်းမှာ နေ့တာအရှည်ဆုံးနေ့ ဖြစ်ပါသတဲ့။ တစ်နည်းအားဖြင့် ပြီးခဲ့တဲ့ မတ်လ ၂၀ ရက်နေ့တုန်းက နေ့တာညတာ အတူတူဖြစ်ခဲ့ပြီးတဲ့နောက် နေ့တာက တဖြည်းဖြည်း ရှည်လာလိုက်တာ ဒီကနေ့ ဇွန်လ ၂၁ ရက်နေ့မှာ နေ့တာ အရှည်ဆုံး ဖြစ်သွားပါတယ်။ မနက်ဖြန်ကစလို့ နေ့တာက တဖြည်းဖြည်း ပြန်တိုသွားမှာဖြစ်ပြီး လာမယ့် စက်တင်ဘာလ ၂၃ ရက် စနေနေ့ကျရင် နေ့တာညတာ အတူတူဖြစ်သွားအုံးမှာပါ။ အဲသည်နောက် လာမယ့် ဒီဇင်ဘာလ ၂၂ ရက် သောကြ်ာနေ့ကျရင် နေ့တာအတိုဆုံးနေ့ ပြန်ဖြစ်သွားပါအုံးမယ်။ ဒီလိုပဲ နေ့တာတွေ တိုလာလိုက် ရှည်လာလိုက်နဲ့ ကမ္ဘာကုန်ကျယ်သရွေ့ ဆက်ပြီး လည်ပတ်နေအုံးမှာပါ . . .
.
. . . ကမ္ဘာ့မြောက်ခြမ်းမှာ နေ့တာအရှည်ဆုံးနေ့ ဖြစ်ပေမယ့်လည်း တစ်နေရာနဲ့တစ်နေရာ နေ့ကာလအတိုအရှည် မတူကြပါဘူး။ အီကွေတာရဲ့ မြောက်ဘက်ကိုရောက်လေလေ နေ့တာရှည်လေလေဖြစ်ပြီး အီကွေတာနဲ့ နီးသွားလေလေ နေ့တာ တိုလေပါပဲ။ မြန်မာနိုင်ငံမှာဆိုရင် တောင်ဘက်ကနေ မြောက်ဘက် အစဉ်လိုက် ကော့သောင်း၊ ရန်ကုန်၊ နေပြည်တော်၊ မန္တလေး၊ မြစ်ကြီးနားတို့ကို ကြည့်မယ်ဆိုရင် တောင်ဘက်အကျဆုံး၊ အီကွေတာနဲ့ အနီးဆုံး ကော့သောင်းမြို့မှာ နေထွက်ချိန် မနက် ၀၅း၃၃ ၊ နေ၀င်ချိန် ညနေ ၁၈း၁၉ နဲ့ နေ့တာက ဆယ့်နှစ်နာရီ လေးဆယ့်ခြောက်မိနစ်ဖြစ်ပါတယ်။ မြောက်ဘက်အကျဆုံး အီကွေတာနဲ့ အဝေးဆုံး မြစ်ကြီးနားမြို့မှာတော့ နေထွက်ချိန် မနက် ၀၅း၁၀ ဖြစ်ပြီး နေ၀င်ချိန် ညနေ ၁၈း၅၃ ဖြစ်လို့ နေ့တာက ဆယ့်သုံးနာရီ လေးဆယ့်သုံးမိနစ် ကြာမြင့်ပါတယ်။ ဒီနေ့ ဇွန်လ ၂၁ ရက်၊ နေ့တာအရှည်ဆုံးနေ့ရဲ့ မြန်မာနိုင်ငံက မြို့အချို့ကို တောင်ဘက်ကနေ မြောက်ဘက် အစဉ်လိုက် လေ့လာကြည့်မယ်ဆိုရင်
.
ကော့သောင်း . . . . နေထွက် ၀၅း၃၃ ၊ နေ၀င် ၁၈း၁၉ ၊ နေ့တာ ၁၂း၄၆ နာရီ
ရန်ကုန်. . . . . . . . . နေထွက် ၀၅း၃၃ ၊ နေ၀င် ၁၈း၄၁ ၊ နေ့တာ ၁၃း၀၇ နာရီ
နေပြည်တော် . . . . နေထွက် ၀၅း၂၇ ၊ နေ၀င် ၁၈း၄၇ ၊ နေ့တာ ၁၃း၁၉ နာရီ
မန္တလေး . . . . . . . . နေထွက် ၀၅း၂၃ ၊ နေ၀င် ၁၈း၅၁ ၊ နေ့တာ ၁၃း၂၈ နာရီ
မြစ်ကြီးနား . . . . . . နေထွက် ၀၅း၁၀ ၊ နေ၀င် ၁၈း၅၃ ၊ နေ့တာ ၁၃း၄၃ နာရီ
.
. . . ဒါကြောင့် ဒီကနေ့ ဇွန်လ ၂၁ ရက်နေ့မှာ အီကွေတာနဲ့ ပိုနီးတဲ့ မြန်မာနိုင်ငံ တောင်ဘက်ဖျားက ကော့သောင်းမြို့ထက် အီကွေတာနဲ့ ဝေးတဲ့ မြောက်ဘက်ပိုင်းက မြစ်ကြီးနားမြို့က နေ့တာ ၅၇ မိနစ် ပိုရှည်ကြောင်း တွေ့ရမှာပါ။
.
. . . ဂျပန်နိုင်ငံက မြန်မာနိုင်ငံရဲ့ မြောက်ဘက်မှာ ရှိပြီး အီကွေတာနဲ့ ပိုဝေးတဲ့အတွက် ဒီကနေ့မှာ မြန်မာနိုင်ငံထက် နေ့တာ ပိုရှည်ပါတယ်။ ကျွန်တော်တို့နေတဲ့ မီနာမီအွန်နူမာမြို့လေးဟာ တိုကျိုမြို့ရဲ့ မြောက်ဘက်မှာမို့ တိုကျိုထက် နေ့တာ ရှစ်မိနစ် ပိုရှည်ပါတယ်။ ကျွန်တော်တို့ဆီမှာ ဒီကနေ့ မနက် ၀၄း၂၄ မှာ နေထွက်ပြီး ညနေ ၁၉း၀၇ မှာ နေ၀င်တဲ့အတွက် နေတာကာလ စုစုပေါင်း ၁၄း၄၂ နာရီ ကြာမြင့်ပါတယ်။ ကျွန်တော့် မွေးရပ်မြေ အင်းသာရွာထက် အခုနေရာက တစ်နာရီ နှစ်ဆယ့်သုံးမိနစ် နေ့တာ ပိုရှည်ပါတယ် . . .
.
. . . အဲဒီလိုနဲ့ အီကွေတာနဲ့ ဝေးလေ နေ့တာရှည်လေ ဖြစ်သွားလိုက်တာ ကမ္ဘာ့မြောက်ဘက်အကျဆုံးမြို့ဖြစ်တဲ့ နော်ဝေနိုင်ငံက ပုံမှန်လူဦးရေ ၃၀-၃၅ ယောက်လောက်ပဲ သုတေသနလုပ်ဖို့ နေထိုင်နေကြတဲ့ Ny-Ålesund မြို့လေးမှာဆိုရင် ဒီကနေ့ ဇွန်လ ၂၁ ရက်နေ့မှာ ညဆိုတာ မရှိတော့အောင်ကို နေ့တာက ရှည်သွားပါတော့တယ်။ အဲဒီလို ဖြစ်တာ ဒီနေ့တစ်ရက်တည်း မဟုတ်ပါဘူး၊ နှစ်စဉ်နှစ်တိုင်း ဧပြီလလယ်လောက်ကနေ သြဂုတ်လ နောက်ဆုံးပတ်အထိ ညဆိုတာ လုံးလုံး မရှိတော့ဘဲ တစ်နည်းအားဖြင့် နေလုံးဝ မ၀င်သွားဘဲနဲ့ လေးလလုံးလုံး နေ့ဖြစ်နေတဲ့ သဘောပါ။ ထိုနည်းတူစွာပဲ ဆောင်းတွင်းရောက်ပြီ ဆိုရင်လည်း အောက်တိုဘာလ နောက်ဆုံးပတ်ကနေ ဖေဖေါ်ဝါရီ လလယ်လောက်ထိက နေလုံးဝမထွက်ဘဲ သုံးလခွဲကျော် လေးလနီးပါးလောက် ညကြီးလုံးလုံး ဖြစ်နေပါသတဲ့ . . .
.
. . . တစ်နေ့နေ့ တစ်ချိန်ချိန်ကျရင်တော့ အဲဒီလို နေ့တာညတာ ထူးထူးခြားခြား အတိုအရှည်ဖြစ်တဲ့ နေရာတွေကို ပန်းပွင့်လေးတို့နဲ့အတူ သွားကြည့်ချင်ပါသေးတယ် . . .
.
ဗိုလ်ကောင်း
၂၁ ဇွန် ၂၀၁၇
.
#SummerSolstice
No comments:
Post a Comment