ကမ္ဘာ့ကုန်ကျယ်သရွေ့

. . . တက္ကသိုလ်ဘုန်းနိုင်ရေးတဲ့ ကမ္ဘာ့ကုန်ကျယ်သရွေ့ဝယ် ဝတ္ထုကို သေချာမဖတ်ဖူးပေမယ့် အနောက်နန်းမတော် မမြကလေးရဲ့ ချစ်သမျှကို ပတ်ပျိုးကိုတော့ ဆယ်တန်းအောင်ပြီးအချိန်လောက်ကတည်းက ကောင်းကောင်း ရင်းနှီးနေခဲ့တာ။ ဆယ်တန်းအောင်ပြီးစမှာ ပျဉ်းမနားက အခု ဥပ္ပာတသန္တိဘုရားကြီး ခြေတော်ရင်းက တည်ဆောက်ရေး (၅) ဆည်မြောင်းဝင်းထဲ သွားနေတော့ ကိုယ့်ယောက္ဖတစ်ဝမ်းကွဲ အကိုလေးတို့ အိမ်မှာ ကက်ဆက်နဲ့ သီချင်းတွေဘာတွေ နားထောင်တဲ့အခါ အဆိုတော်ဝင်းဦးဆိုတဲ့ ချစ်သမျှကို ပတ်ပျိုးကို ပထမဆုံး နားထောင်ဖူးတာပါပဲ
.
. . . ချစ်သမျှကို ပတ်ပျိုးကို သီချင်းအနေနဲ့ နားမထောင်ဖူးပေမယ့် ကိုးတန်းလား ဆယ်တန်းလား မြန်မာစကားပြေ လက်ရွေးစင်ထဲက ပြဌာန်းစာအုပ်တစ်ပုဒ်အနေနဲ့ ကောင်းကောင်းရင်းနှီးနေတော့ သီချင်းနားထောင်တဲ့အခါ ချက်ချင်း ကြိုက်သွားတယ်လို့ ပြောလို့ရတယ်။ ပတ်ပျိုးသီချင်း ဆိုပေမယ့် ကိုယ်တွေလို ဆယ်တန်းအောင်ခါစ လူပျိုပေါက်လေးတစ်ယောက်အတွက် သိပ်ပြီး ပျင်းစရာကောင်းမနေဘဲ သီချင်းအကြောင်းနဲ့ နောက်ခံဇာတ်လမ်းကိုလည်း သိထားတော့ သီချင်းကို ခံစားနိုင်သွားတာ ထင်တယ်
.
. . . ကမ္ဘာ့ကုန်ကျယ်သရွေ့ဆိုတာ ချစ်သမျှကိုပတ်ပျိုး အဆုံးသတ်မှာပါတဲ့ သဖြန်ပိုဒ်ထဲက စကားလုံး
.
ယွန်းစေဝသုန် . . . ငွေဝန်းသော်တာယုန်သို့ . . . ကမ္ဘာ့ကုန်ကျယ်သရွေ့မှာ. . . ဘယ်မေ့လိမ့်လဲ. . တဲ့
.
ဝသုန်လို့ဆိုတဲ့ကမ္ဘာမြေကြီး ပျက်ယွင်းသွားစေတော့၊ လမင်းကြီးမျက်နှာပြင်မှာ ယုန်ရုပ်ထင်နေတာ ကမ္ဘာတည်အောင် ရှိနေမှာဆိုတဲ့သဘောလိုပဲ ကမ္ဘာကုန်ဘယ်လောက်ပဲ ကျယ်ကျယ် မင်းကိုတော့ ဘယ်တော့မှ မေ့နိုင်မှာ မဟုတ်ပါဘူး ဆိုတဲ့ သဖြန်ပုဒ်လေးနဲ့ ချစ်သမျှကို ပတ်ပျိုးကို ပိတ်ထားတာ ကိုယ်က သိပ်သဘောကျတယ်
.
. . . ကမ္ဘာကုန်ကျယ်သရွေ့ဝယ်ဆိုတဲ့ စာသဘောလေး စိတ်ထဲရောက်လာရင် စာရေးဆရာ ချစ်စံဝင်းရေးတဲ့ ယသော်ဓယာ့အလွမ်းဆိုတဲ့ စာအုပ်အကြောင်းကလည်း စိတ်ထဲ ရောက်ရောက်လာတယ်။ ဒီနှစ်ခုကို ဘယ်လိုဆက်စပ်မိနေတာလဲဆိုတာ မစဉ်းစားတတ်တော့ပေမယ့် ကမ္ဘာကုန်ကျယ်သရွေ့ဆိုတာနဲ့ ယသော်ဓယာ့အလွမ်းစာအုပ်ကို ဖတ်တုန်းက ခံစားချက်လေးတွေက ရင်ထဲကို ရောက်ရောက်လာတာ
.
ငယ်ကချစ်တော့ အနှစ်တစ်ရာ မမေ့သာ
ငယ်ကချစ်တော့ အနှစ်တစ်ထောင် မမေ့ပေါင်
ငယ်ကချစ်တော့ အနှစ်တစ်သောင်း မမေ့ကောင်း
ငယ်ကချစ်တော့ အနှစ်တစ်သိန်း မမေ့ကိန်း
ငယ်ကချစ်တော့ အနှစ်တစ်သန်း မမေ့တမ်း
ငယ်ကချစ်တော့ အနှစ်ကုဋေ မမေ့ပေ . . . တဲ့
ယသော်ဓရာ့အလွမ်း စာအုပ်ထဲမှာ စာရေးဆရာ ချစ်စံဝင်းက သူ့အဖေဆုံးသွားတဲ့အချိန်မှာ သူ့အမေက သွားလေသူကို လွမ်းပြီး မနေတတ်မထိုင်တတ် ဖြစ်နေတာကို ယသော်ဓရာရဲ့ ခံစားချက်နဲ့ ထပ်တူပြု ရေးဖွဲ့ထားတယ်လို့ မှတ်မိနေတယ်
.
. . . အဲသည်စာအုပ်ကို ဖတ်တဲ့အချိန်တုန်းက အဖေ ဆုံးကာစ၊ သားတွေသမီးတွေ တော်တော်များများကလည်း ရေကြည်ရာမြက်နုရာ ထွက်သွားကြလို့ အမေ့နားမှာ လူနည်းနေချိန်၊ ကိုယ့်မှာ ယသော်ဓရာ့အလွမ်းကို ဖတ်တော့ အမေ့ကို မြင်ယောင်မိပြီး ငိုလိုက်ရတာ၊ အဖေသေတုန်းက ကိုယ်က အနားမှာ မရှိဘဲ အဖေသေတာကိုလည်း အိမ်မပြန်လိုက်ရတော့ ကိုယ့်ဘဝမှာ အဖေသေတယ်ဆိုတာ နဖူးတွေ့ဒူးတွေ့ မတွေ့ဖူးဘဲ လူပြောသူပြောနဲ့ပဲ သိခဲ့ရတာမို့ အဖေသေတာကို ဝမ်းနည်းစရာလို့ မအောက်မေ့ခဲ့တဲ့သူ၊ ယသော်ဓယာ့အလွမ်း စာအုပ်ကို ဖတ်မှ သေသွားတဲ့ အဖေကို လွမ်းလို့ မဟုတ်ဘဲ ကျန်ခဲ့တဲ့ အမေ့ကို သနားလို့ ငိုလိုက်ရတာဆိုတာ
.
. . . အော် သမုဒယသစ္စာ အရင်းတည်တော့ ဒုက္ခသစ္စာကြွင်းလေသည်ဆိုလား ဟောသည် လောကကြီးထဲမှာ တစ်ချို့ အစွဲအလမ်းတွေကလည်း ကမ္ဘာကုန်ကျယ်သရွေ့အထိများ ကိုယ့်အနားကပ်ပါးနေအုံးမလား စဉ်းစားမိရင်း
.
မောင်လွမ်းဝေ
၂၈ ဖေဖော်ဝါရီ ၂၀၂၃