. . . တစ်ခါတစ်လေလည်း စဉ်းစားမိတယ်၊ အချစ်တို့ မေတ္တာတို့အကြောင်းပေါ့၊ ချစ်တာဆိုတာ ဘာကိုခေါ်တာလဲ၊ အချစ်ရဲ့အဓိပ္ပာယ်က ဘာတွေလဲ၊ ပန်းလေးတစ်ပွင့်ကို သဘောကျတာက ချစ်တာလား၊ ရေမြေတောတောင်သာယာတဲ့ ရှုခင်းကို သဘောကျတာက ချစ်တာလား၊ တယ်လီဖုန်းအကောင်းစားလေးတစ်ခုကို ကြိုက်မိတာက ချစ်တာလား ကြိုက်တာလား၊ ချစ်တာနဲ့ ကြိုက်တာနဲ့ အတူတူပဲလား၊ ဘာကွာလဲ၊ သက်မဲ့အရာဝတ္ထုတွေကို မြတ်နိုးစွဲလန်းရတာနဲ့ လူတစ်ယောက် ဒါမှမဟုတ် လူတွေကို ဒါမှမဟုတ် လူအချင်းချင်း ခင်မင် နှစ်သက် ချစ်ကြိုက် ကြည်ညို လေးစား ချစ်ခင်ရတာနဲ့ ဘာကွာလဲ၊ ခုနပြောခဲ့တဲ့ လူတစ်ယောက်အပေါ် ကိုယ့်ရဲ့သဘောထားရေချိန်ကို ဖော်ပြတဲ့ စကားလုံးတွေရဲ့ တစ်လုံးချင်းအဓိပ္ပာယ်တွေမှာ ပါဝင်တဲ့ သဘောတရားတွေက အတူတူပဲလား ဘယ်လောက်ထိတူပြီး ဘာတွေ ကွဲပြားနေတာလဲ
.
. . . ကိုယ်နားလည်မိသလောက်ဆိုရင် တစ်ခုခုကို စွဲလန်းမိတာမှန်သမျှ တဏှာဆိုတဲ့ တရားကိုယ်နဲ့ဆိုင်ပြီး နှစ်သက်စဖွယ် ရနဲ့လေးတစ်ခုကို အာရုံရလို့ သဘောကျသွားတာကနေ လူတစ်ယောက်ကို အရူးအမူးချစ်မိတာတွေအထိ အကုန်လုံး ဒီတရားကိုယ် သဘောတရားနယ်ပယ်ထဲမှာပဲ ရှိနေတယ်ဆိုတာပါပဲ၊ ဒါဆိုရင် သက်မဲ့တစ်ခုကို မြတ်နိုးစွဲလန်းရတာနဲ့ လူတစ်ယောက်ကို မြတ်နိုးစွဲလန်းရတာကရော ဘာတွေ ကွာခြားလဲ၊ ဒါကတော့ တော်တော်ကွာမှာပါ၊ သက်မဲ့ကို မြတ်နိုးစွဲလန်းမှုမှာ တစ်လမ်းသွားသဘောပဲရှိပြီး ကိုယ့်ရဲ့သူ့အပေါ် နှောင်ဖွဲ့မိတဲ့ စိတ်ခံစားချက်သက်သက်ပဲရှိတာ၊ လူတစ်ယောက်ကို မြတ်နိုးစွဲလန်းမိတာကတော့ အပြန်အလှန်သဘောဆောင်တာလေ၊ လူတစ်ယောက်ရယ်လို့မှ မဟုတ်ပါဘူး၊ မွေးထားတဲ့ ခွေးလေး ကြောင်လေးတွေ အသိဉာဏ်မြင့်လို့ ချစ်ခင်စွဲလန်းမှုကို ခံစားတတ်တဲ့ အသိများတာနဲ့အမျှ အချင်းချင်းကြား နှောင်ဖွဲ့မှုက ပိုများတတ်တာမဟုတ်လား
.
. . . ချစ်ခင်မှုနဲ့သံယောဇဉ်အနှောင်အဖွဲ့ကို ခံစားနိုင်စွမ်းရှိကြတဲ့ လူတွေအချင်းချင်းပဲဖြစ်ဖြစ် လူနဲ့ တစ်ခြားခွေးကြောင် တိရစ္ဆာန်တွေကြားမှာပဲဖြစ်ဖြစ် သက်မဲ့ကို စွဲလန်းမိတာနဲ့ မတူတဲ့အချက်က သတ္တဝါအချင်းချင်းမှာက ကိုယ့်ဘက်က သံယောဇဉ်ထားသလို သူ့ဘက်က သံယောဇဉ်ကိုလည်း မျှော်လင့်တတ်ကြတာပဲ၊ ရရင်ပျော်ရတယ် မရတော့ ဝမ်းနည်းကြရတယ်၊ ဒါထက်ဆိုးရင် ဆုတ်နစ်တဲ့ ဒေါသတရားကိုယ်ကနေ တက်ကြွတဲ့ဒေါသတရားကိုယ်အဖြစ်ကိုပြောင်းပြီး မခံချင်စိတ်တွေဖြစ်ကြတယ်၊ နေမထိထိုင်မသာတွေဖြစ်တယ်၊ ငါမင်းကို သတ်ချင်တယ်တွေဘာတွေထိ ဖြစ်ကြရတယ်၊ တကယ်တမ်းကျတော့ လူ့ဘဝတိုတိုလေးမှာ ကိုယ်ချစ်တဲ့သူကို ချစ်နေရရင်ပြီးရော မဟုတ်ဘူးလား၊ ဘာလို့များ သူ့အချစ်ကို ပြန်မရတာနဲ့ ကိုယ့်ဘာသာလောင်မြိုက်ခံနေအုံးမှာလဲ
.
. . . အခု နားလည်သလိုသာဆိုရင် လူတွေပြောပြောနေတဲ့ ဖြူစင်ပါတယ်ဆိုတဲ့ မေတ္တာအဖြစ် တင်စားနေကြတဲ့ ညီအစ်ကို မောင်နှမ သူငယ်ချင်း သားအမိသားအဖ အချင်းချင်း ချစ်ခင်မြတ်နိုးကြချင်းတွေမှာ စွဲလန်းမှုဆိုတဲ့ တဏှာပါနေသေးတာပဲ၊ သူတစ်ထူးကောင်းရာကိုသာလိုလားတဲ့ မေတ္တာအပြင် ချစ်ခင်မြတ်နိုးစွဲလန်းခြင်းတွေ ရောယှက်ပါနေတော့ အတူတူရှိကြသခိုက်မှာ ပျော်ကြရတယ်၊ ဝေးသွားရင် လွမ်းရတယ် ဆွေးရတယ် စိတ်မကောင်းဖြစ်ရတယ်၊ ခွဲခွာရတဲ့အခါ ငိုကြရတယ်၊ ကိုယ်က အဘိဓမ္မာမသင်ဖူးတော့ စိတ်တွေကို သရုပ်မခွဲတတ်ပေမယ့် အခုပြောတာက တက္ကသိုလ်ဘုန်းနိုင်ရဲ့ သူငယ်ချင်းခိုင် ဝတ္ထုထဲမှာပါတဲ့ သူငယ်ချင်း မိဘ မောင်နှမ သားအမိအချစ်တွေဟာ အေးချမ်းတဲ့ မေတ္တာနယ်ပယ်ကို ကျော်လွန်ပြီး ပူလောင်တဲ့ ကိလေသာနယ်ပယ်ထဲထိ ရောက်နေကြလို့ လွမ်းရဆွေးရ ငိုကြရတာပါဆိုတာကို ကိုးကားပြီးပြောတာပါ
.
. . . ဒါဆိုရင် ကိုယ့်ရဲ့ ငယ်ချစ်ဦးလေးကို အခုထိ ချစ်နေသေးတာကရော ဘာစိတ်လဲ၊ အဲသည်စိတ်ထဲမှာ သူနဲ့အတူရှိစဉ်ကအချိန်လေးတွေကို ပြန်ပြောင်းအောက်မေ့ပြီး ကြည်နူးသာယာတာ လွမ်းဆွတ်တာကလွဲရင် အခုနေသူနဲ့တွေ့ချင်နေတာတွေ သူ့ကိုမှ မမြင်ရရင် စားမဝင်အိပ်မပျော်တာတွေ မပါတော့ဘူးနော်၊ ဒါပေမယ့် ကိုယ်သိပ်ချစ်တယ် အခုထိလည်း ချစ်နေတုန်းပဲလို့ ကိုယ့်ဘာသာထင်နေတဲ့ ငယ်ချစ်ဦးအကြောင်း တွေးမိတိုင်း ကြည်နူးရတဲ့ ချိုမြိန်မှုလေးက ဘာနဲ့မှမတူတဲ့ ခံစားချက်လေးပဲ၊ အမြဲတမ်းကြီးမဟုတ်ပေမယ့် သူနဲ့ပတ်သက်တဲ့ အကြောင်းတိုက်ဆိုင်တဲ့အခါ ကိုယ့်ရဲ့စိတ်ထဲ သူတစ်ယောက်ဖြတ်ပြေးသွားတဲ့ တစ်ဒင်္ဂအချိန်လေးမှာ လှိုက်နဲနွေးသွားတဲ့ နှလုံးသားရဲ့ ခံစားချက်လေးက တစ်စက္ကန့်လောက်ပဲ ကြာချင်မှတောင်ကြာမယ်ဆိုပေမယ့် အာ့တာလေးကိုပဲ စွဲလန်းတသနေတတ်တဲ့ စိတ်ကိုရော ဘာလို့ နာမည်တပ်လို့ရမလဲ ၊ ဒါလည်းပဲ အချစ်ပဲလား အထက်ကပြောခဲ့တဲ့ တရားကိုယ်တွေနဲ့ ဘာကွာလဲ ၊ ကိုယ်လည်းမသိတော့ဘူးရယ်
.
နောက်ပြီး
ဒီသံသရာတစ်လျှောက်လုံး ချစ်ရခင်ရစွဲလန်းရ မြတ်နိုးရဆိုတဲ့ ဝန်ထုပ်ဝန်ပိုးတွေ ထမ်းပြီး ဘယ်ချိန်ထိအောင် လွမ်းရဆွေးရ ငိုနေကြရအုံးမှာလဲ
.
မောင်လွမ်းဝေ
၅ ဒီဇင္ဘာ ၂၀၁၉
No comments:
Post a Comment