လက်ရှိကျင့်သုံးနေတဲ့ အခြေခံဥပဒေမှာတော့ ဒီလို ပါတီကူးပြောင်းမှုနဲ့ ပတ်သက်ပြီး သီးခြား ပြဌာန်းထားတာ မတွေ့ရပါဘူး။ နိုင်ငံရေးပါတီများနဲ့ ပတ်သက်တဲ့ ပြဌာန်းချက်တွေမှာ ပါတီကူးပြောင်းမှုနဲ့ ပတ်သက်တဲ့ ပြဌာန်းချက်တွေ ထည့်သွင်းထားတာ မတွေ့ရပါဘူး။ အမျိုးသားညီလာခံ မှတ်တမ်းများကို ဖတ်ရှုလေ့လာကြည့်ရာမှာလည်း ဒီလိုကိစ္စမျိုးနဲ့ ပတ်သက်ပြီး ဆွေးနွေးခဲ့တာ မတွေ့ရပါဘူး။ ( ကျွန်တော်မျက်စိလျှမ်းပြီး မတွေ့မိတာလည်း ဖြစ်နိုင်ပါတယ်။) အမျိုးသားညီလာခံ တက်ရောက်ခဲ့တဲ့ ရှေ့မီနောက်မီ ပုဂ္ဂိုလ်အချို့ရဲ့ အပြောအရ ဒီကိစ္စကို အခြေခံဥပဒေထဲ ထည့်ရေးလိုက်ရင် တင်းကျပ်တဲ့ စည်းမျဉ်းတစ်ခု ဖြစ်သွားနိုင်တာမို့ ထည့်မရေးခဲ့တာလို့ ပြောပါတယ်။ ဒီတော့ ထုံးစံအတိုင်း တစ်ခြားနိုင်ငံတွေမှာရော ဒီလိုမျိုးတွေ ရှိသလားဆိုတာ လေ့လာကြည့်မိပါတယ်။ ကျွန်တော် နားလည်သလောက် ပြန်လည်တင်ပြ ပါရစေ။
ပါတီကူးပြောင်းမှု တားမြစ်ချက် ဥပဒေရဲ့ သမိုင်းကြောင်းကို ကြည့်မယ်ဆိုရင် အိန္ဒိယနိုင်ငံမှာ ၀န်ကြီးချုပ် အင်ဒီယာဂန္ဒီ လုပ်ကြံခံရပြီးနောက် ရာဂျစ်ဂန္ဒီအစိုးရ တက်လာပါတယ်။ ၀န်ကြီးချုပ် ရာဂျစ်ဂန္ဒီအာဏာရအပြီး ၁၉၈၅ ခုနှစ်မှာ အခြေခံဥပဒေ ပြင်ဆင်ချက် အမှတ် ၅၂ ကို လုပ်ဆောင်ပြီး ဇယား ၁၀ ကို အခြေခံဥပဒေထဲမှာ ထည့်သွင်း ပြဌာန်းခဲ့ပါတယ်။ ဇယား ၁၀ ကတော့ အထက်မှာ ပြောခဲ့တဲ့ ပါတီကူးပြောင်းမှုကို တားမြစ်တဲ့ ပြဌာန်းချက် ဖြစ်ပါတယ်။
ဆိုခဲ့ပါ ဥပဒေအရ လွှတ်တော်အမတ်တစ်ယောက်ဟာ ဒီလိုအချက်အလက်တွေ နဲ့ညိစွန်းရင် လွှတ်တော်အမတ်တစ်ယောက်ရဲ့ အရည်အချင်း ပျက်ယွင်းတယ်လို့ ပြဌာန်းထားပါတယ်။ အဲဒါတွေကတော့ အမတ်တစ်ယောက်ဟာ သူ့သဘောနဲ့သူ နိုင်ငံရေးပါတီဝင်အဖြစ်က နုတ်ထွက်လိုက်ခြင်း၊ မိခင်ပါတီ ဒါမှမဟုတ် မိခင်ပါတီကဲ့သို့ သူ့အပေါ် သြဇာသက်ရောက်သူရဲ့ ကြိုတင်ခွင့်ပြုချက်မရဘဲ ပါတီရဲ့ သဘောထားနဲ့ ဆန့်ကျင်မဲပေးခြင်း ဒါမှမဟုတ် မဲမပေးဘဲနေခြင်း တို့နဲ့ စပ်လျဉ်းပြီး သက်ဆိုင်ရာပါတီက ၁၅ ရက်အတွင်းမှာ ကိစ္စမရှိဘူးလို့ သဘောထား ထုတ်ပြန်ခြင်း မပြုရင် (သက်ဆိုင်ရာပါတီက ခွင့်မလွှတ်ရင်) လွှတ်တော်အမတ်တစ်ယောက်ရဲ့ အရည်အချင်း ပျက်ယွင်းပါတယ်။ ဆိုလိုတာက လွှတ်တော်အမတ်အဖြစ်က ရပ်စဲခံရမယ်ဆိုတဲ့ သဘောပါပဲ။
အိန္ဒိယနိုင်ငံ လွှတ်တော်တွေထဲမှာ ရွေးကောက်ခံ အမတ်တွေသာမက သမ္မတက တိုက်ရိုက်အမည်စာရင်း တင်သွင်းတဲ့ အမတ်တွေလည်း ဒီပြဌာန်းချက်နဲ့ အကျုံးဝင်ပါတယ်။ အမည်စာရင်းတင်သွင်းလို့ ဖြစ်လာတဲ့အမတ်တစ်ယောက်ဟာ သူအမတ်ဖြစ်လာပြီး ခြောက်လမကျော်ခင်မှာ ပါတီတစ်ခုခုရဲ့ ပါတီဝင်ဖြစ်တယ်ဆိုရင် ဒီပြဌာန်းချက်နဲ့ အကျုံးဝင်ပါတယ်။
ပါတီတွေ ခွဲထောင်ကြတာနဲ့ ပတ်သက်ပြီးတော့လည်း ပြဌာန်းပေးထားပါတယ်။ ဥပမာအားဖြင့် မြန်မာနိုင်ငံက အမျိုးသားဒီမိုကရေစီ အင်အားစုပါတီကနေ အမျိုးသားဒီမိုကရေစီပါတီသစ် ခွဲထောင်လိုက်တဲ့သဘောမျိုးကို ပြောတာပါ။ တကယ်လို့ ပါတီတစ်ခုတည်းက ပါတီခွဲ ထောင်လိုက်တယ်ဆိုရင် အသစ်တည်ထောင်လိုက်တဲ့ ပါတီမှာလည်း မူလပါတီက ပါတီဝင်အမတ် သုံးပုံတစ်ပုံထက်မနည်း ပါဝင်တယ်ဆိုရင်တော့ ဒီပြဌာန်းချက်နဲ့ အကျုံးမ၀င်ပါဘူး။ ဒီနည်းနဲ့ ပါတီခွဲထောင်တာက တရားဝင်တဲ့ သဘောဖြစ်ပါတယ်။
နောက်တစ်ခါ ပါတီတွေ ပူးပေါင်းတည်ထောင်ကြတာနဲ့ ပတ်သက်ပြီးတော့လည်း ပြဌာန်းထားပါသေးတယ်။ ပါတီတွေ ပူးပေါင်းပြီး တစ်ပါတီတည်းမှာ စုစည်းလိုက်ကြတာ ဒါမှမဟုတ် ပါတီအသစ်တစ်ခု တည်ထောင်လိုက်ကြတာတွေနဲ့ ပတ်သက်ပြီး သက်ဆိုင်ရာ မူလပါတီဝင် အနည်းဆုံး သုံးပုံနှစ်ပုံက သဘောတူတယ်ဆိုရင် ဒီပြဌာန်းချက်နဲ့ အကျုံးမ၀င်ပါဘူးတဲ့။ အဲဒါ တရားဝင်တယ်လို့ ဆိုလိုတာ ဖြစ်ပါတယ်။ (အခြေခံဥပဒေ ပြင်ဆင်ချက်အမှတ် ၉၁ (၂၀၀၃))
တကယ်လို့ အဲသည်လို လုပ်တဲ့အမတ်ဟာ သာမန်အမတ်တစ်ယောက်မဟုတ်ဘဲ လွှတ်တော် ဥက္ကဌ သို့မဟုတ် ဒုဥက္ကဌဖြစ်နေရင် ဘယ်လိုလုပ်မလဲ ဆိုတာလဲ ထည့်သွင်းပြဌာန်းထားပါသေးတယ်။ လွှတ်တော်ဥက္ကဌ သို့မဟုတ် ဒုဥက္ကဌတစ်ယောက်ဟာ ပါတီတစ်ခုကနေ မိမိဘာသာနုတ်ထွက်လိုက်ပြီး လွှတ်တော်ဥက္ကဌတာဝန် ဆက်လက်ထမ်းဆောင်နေစဉ်အတောအတွင်း အဲသည်ပါတီကိုလည်း ပြန်မ၀င် အခြားပါတီတစ်ခုခုကိုလည်း မ၀င်ဘူးဆိုရင်၊ ဒါမှမဟုတ် လွှတ်တော်ဥက္ကဌတာဝန်ကို ရပ်စဲပြီး ပါတီကို ပြန်ဝင်မယ်ဆိုရင် တရားဝင်ကြောင်း ပြဌာန်းထားပါတယ်။
ဒီလိုရှုပ်ထွေးတဲ့ ပြဌာန်းချက်တွေကြောင့် လွှတ်တော်အမတ်တစ်ယောက်ရဲ့ လုပ်ရပ်တစ်ခုခုဟာ ဒီဥပဒေနဲ့ ညိစွန်းမှု ရှိမရှိ ဆုံးဖြတ်ပိုင်ခွင့်ကို လွှတ်တော်ဥက္ကဌလက်ထဲ အပ်နှင်းထားပါတယ်။ လွှတ်တော်ဥက္ကဌကိုယ်တိုင် ဒီလုပ်ရပ်ကို လုပ်ဆောင်တာဆိုရင် အမတ်တွေ အသစ်ရွေးကောက်တင်မြှောက်လိုက်တဲ့ လွှတ်တော်ဥက္ကဌက ဆုံးဖြတ်ပေးရမှာ ဖြစ်ပါတယ်။ ဒီကိစ္စကို တရားရုံးများက ဆုံးဖြတ်ပေးပိုင်ခွင့် မရှိပါဘူး။
အခြေခံဥပဒေရဲ့ ဇယား ၁၀ ပါ ပြဌာန်းချက်များကို အကောင်အထည်ဖော်မယ့် စည်းမျဉ်းစည်းကမ်း လုပ်ထုံးလုပ်နည်းများကို လွှတ်တော်ဥက္ကဌများက ထုတ်ပြန်ပြဌာန်းပေးရမှာ ဖြစ်ပါတယ်။
ဒီလောက်ဆိုရင် လွှတ်တော်အမတ်များ ပါတီကူးပြောင်းမှုနဲ့ ပတ်သက်ပြီး အိန္ဒိယ အခြေခံဥပဒေက ပြဌာန်းထားချက်တွေကို သဘောပေါက်ပြီလို့ ယူဆပါတယ်။ မြန်မာနိုင်ငံမှာလည်း ဒီလိုဥပဒေပြဌာန်းချက်မျိုး လိုအပ်သလား မလိုအပ်ဘူးလားဆိုတာ စဉ်းစားသုံးသပ်ကြဖို့ပါ။
ရွှင်လန်းချမ်းမြေ့ကြပါစေဗျ #
No comments:
Post a Comment