. . . ငယ်ငယ်တုန်းက အိမ်နီးဝန်းကျင် သစ်ပင်ကြီးများ ချိုင်တဲ့အခါ အပင်ကတုံး တုံးဖြစ်ရင်တောင် ကိုင်းလေးတစ်ကိုင်းကိုတော့ ချန်ထားခဲ့ရတယ်။ တစ်ပင်လုံးတောင် ခုတ်ပစ်မင့်ဟာ ဒီတစ်ကိုင်းကျမှ ဘာလို့ချန်ထားရတာလဲ ဆိုတေ့ာ အဲဒါ နတ်နေကိုင်းလို့ခေါ်တယ်သားရဲ့။ တစ်တောရှင်း တစ်ပင်ချန် တစ်ပင်ခုတ် တစ်ငုတ်ချန်ရတယ် အဲဒါမှ အပင်စောင့်တဲ့ နတ်တွေ နေစရာရမှာပေါ့။ နို့မဟုတ်ရင် သူတို့တွေ နေစရာဘုံပျောက်သွားမှာပေါ့၊ ဒါကြောင့် နတ်နေကိုင်းဆိုတာ ချန်ရတယ်လို့ အမေက ပြောပြဖူးပါတယ် . . .
.
. . . လူ့အသိုင်းအ၀ိုင်းမှာလည်း နတ်နေကိုင်းတွေဆိုတာ ရှိရဲ့။ ဥပမာ အမေပေါ့၊ အမေသည် သားသမီးများအပေါ်မှာ နစ်နာစေလိုတဲ့ စေတနာနဲ့ ပြုတဲ့ကံ မရှိဘူးဆိုတဲ့ ယုံကြည်ချက်အပေါ် အခြေခံပြီး ကိုယ့်စိတ်နဲ့ မတွေ့လို့ အမေမှားတယ်လို့ ခံစားမိခဲ့ရင်တောင် အမေသည် ဘယ်တော့မှ မမှား၊ အမေသည် အမှားကို ပြုသူမဟုတ်၊ အမေ့စေတနာက ကိုယ့်လိုလားချက်နဲ့ မကိုက်လို့သာရယ်လို့ ဖြေသိမ့်ပြီး အမေ့အပေါ် အပြစ်မမြင်မိအောင် ကိုယ့်စိတ်ကို ဆုံးမရတယ်။ အမေက မိသားစုရဲ့ နတ်နေကိုင်းကိုး၊ တစ်ပင်လုံး ခုတ်မယ်ဆိုရင်တောင် တစ်ငုတ်အဖြစ်နဲ့ ချန်ကိုချန်ထားရမယ့် နတ်နေကိုင်းပေမို့. . .
.
. . . ရောက်ရာအရပ် နေရာဌာနတွေမှာလည်း အမေလို နတ်နေကိုင်းတွေရှိတယ်၊ ကိုယ့်ရဲ့ အမိလို အဖလို ဆွေမျိုးသားချင်းလို ဦးကြီးဒေါ်ကြီးအရင်းအချာလို ကိုယ့်အကျိုးကို လိုလားပြီး ကိုယ့်ကောင်းရာကောင်းကျိုးကို ပြုပြီး စောင့်ရှောက်နေသူဟာ ကိုယ့်အတွက် နတ်နေကိုင်းပဲ။ အဲသည် နတ်နေကိုင်းကြောင့် ကိုယ့်မှာ အမိအဖ ဝေးနေသော်လည်း ကိုယ့်ရေကိုယ့်မြေ ဝေးနေသော်လည်း ကိုယ့်ဆွေကိုယ့်မျိုး ဝေးနေသော်လည်း ကိုယ့်စိတ်မှာ လုံခြုံတဲ့ နွေးထွေးမှုကို ရတယ်။ ကိုယ့်အပေါ် ပြုဖူးတဲ့ ကျေးဇူးကို ပြန်သာအောက်မေ့ဆင်ခြင်ကြည့်လိုက်လို့ကတော့ စိတ်နဲ့ ပြစ်မှားမိမယ်ကြံရင်တောင် ကိုယ့်စိတ်ကိုယ် ချက်ချင်း ဆုံးမသွန်သင်ထိုက်လောက်အောင် အလေးအမြတ် ပြုအပ်သူတွေ၊ အဲသည်လို နတ်နေကိုင်းတွေဆိုတာ ကိုယ့်ဘာသာ ခုတ်ပစ်ဖို့ နေနေသာသာ ခုတ်မယ်ကြံတဲ့သူ တွေ့ရရင်တောင် နည်းမျိုးစုံသုံးပြီး တားဆီးထိန်းသိမ်းအပ်တာမျိုး မဟုတ်လား . . .
.
. . . တစ်ယောက်နဲ့တစ်ယောက် ကိုယ်ကျင့်သီလ သိက္ခာသမာဓိနဲ့ တည်ကြည်လေးနက်မှုတွေ ထားရှိအပ်တဲ့ တန်ဖိုးတွေ စံနှုန်းတွေပေါ် မူတည်ပြီး ဘယ်အရာကို နတ်နေကိုင်း သိမှတ်မလဲ ဆိုတာတော့ တူကောင်းမှ တူကြမယ်လေ။ တစ်ခါတစ်ရံမှာလည်း ကိုယ့်တန်ဖိုး စံနှုန်းတွေနဲ့ အံမ၀င်သော်လည်း အခြေအနေ အကြောင်းကြောင်းကြောင့် သိမှတ်လိုက်ရတဲ့ နတ်နေကိုင်းတွေ ဆိုတာ တစ်ချို့သူတွေအတွက် ရှိကောင်းရှိကြမှာပဲ . . .
.
. . . ကိုယ့်အတွက်ကတော့ ကိုယ့်ရင်ထဲက တကယ်တန်ဖိုးထားတဲ့ အလေးအမြတ် ပြုအပ်သူတွေကိုသာ နတ်နေကိုင်း သိမှတ်ခွင့် ပိုင်ပိုင်နိုင်နိုင်ရှိတဲ့ ကိုယ့်ရဲ့ လွတ်လပ်မှုကို ကျေနပ်ဂုဏ်ယူလို့မဆုံး . . .
.
ဗိုလ်ကောင်း
၅ စက်တင်ဘာ ၂၀၁၇
No comments:
Post a Comment